“O le Mataupu Faavae ma Feagaiga: O se Vaaiga Aoao,” Mo le Malosi o le Autalavou, Ian. 2021, 14–15.
Sau, Mulimuli Mai ia te A’u
O le Mataupu Faavae ma Feagaiga: O se Vaaiga Aoao
Iosefa ma Sini saunia e Annie Henrie Nader
O le a lea tusi?
O le Mataupu Faavae ma Feagaiga o se tuufaatasiga o faaaliga o ona po nei mai le Atua na tele lava ina maua e tauala mai i le Perofeta o Iosefa Samita. O le tele o nei faaaliga na tuuina mai o ni tali i fesili na fesili atu ai Iosefa ma isi uluai tagata o le Ekalesia i le Atua.
Aisea na faia ai le Mataupu Faavae ma Feagaiga?
I aso popofou o le Ekalesia, sa na o ni nai kopi na tusilimaina o nei faaaliga na i ai. I le 1831, na tonu ai i taitai o le Ekalesia e lolomi ma faalauiloa atu ia faaaliga i se Tusi o Poloaiga. I se konafesi ia Novema 1831 na talanoaina ai le Tusi o Poloaiga, na maua ai e Iosefa le faaaliga lea ua avea nei ma vaega 1, o le faatomuaga i le Mataupu Faavae ma Feagaiga.
O Le Aoaoga Faavae
O le tuufaatasiga muamua o faaaliga sa taua o le Tusi o Poloaiga. O tuufaaatsiga mulimuli ane sa taua o le Mataupu Faavae ma Feagaiga ona sa latou faaopoopoina i ai se faasologa o lauga “i le aoaoga faavae o le Ekalesia,” ua taua o le “aoaoga faavae” mo le faapuupuuga (ua taua nei o le Tautalaga e uiga i le Faatuatua [Lectures on Faith]). Talu mai le lomiga o le 1921, na le toe aofia ai Tautalaga e uiga i le Faatuatua [Lectures on Faith], ae na tumau pea le ulutala Mataupu Faavae ma Feagaiga.1
O Feagaiga
O le vaega na totoe o le tusi o loo i ai faaaliga na maua e Iosefa Samita. O le vaega lenei sa taua o “feagaiga ma poloaiga a le Alii” po o “feagaiga” mo se faapuupuuga. Na faaaoga e le Au Paia anamua ia le “feagaiga” po o “poloaiga” e faatatau atu i nei faaaliga na maua e le Perofeta, ina ia mafai ona iloa ai le eseesega mai isi tusitusiga a Iosefa Samita, e pei o lauga musuia ma ana faaliliuga o le Tusi Paia.2
Aisea e taua ai le Mataupu Faavae ma Feagaiga i aso nei?
O le Mataupu Faavae ma Feagaiga o loo i ai faaaliga mai ia Iesu Keriso i Lona nuu. Ua aoao mai ia i tatou e silafia e le Atua i tatou taitoatasi i o tatou igoa, e faafofogaina e Ia a tatou tatalo ma tali mai i a tatou fesili, ma o loo fetalai mai pea le Atua i le asō. O loo aoao mai ai foi aoaoga faavae taua e uiga i le ata o le faaolataga ma aumaia ai ia i tatou se malamalamaaga loloto faaopoopo i le Togiola a Iesu Keriso. E tuuina mai ai le mafanafana e ala i le faapupula mai o le alofa tele o le Atua ia i tatou ma valaau mai pea tatou te o mai ia te Ia e tusa lava pe tatou te faia ni mea sese.