“Sikolasipi Pulouaitu,” Mo le Malosi o le Autalavou, Ian. 2021, 6–7.
SikolasipiPulouaitu
O a ni lesona e mafai ona ou aoaoina mai se mea e le manaia e pei o pulouaitu?
Ata na tusia e Julia Yellow
Ou te le fiafia i pulouaitu. O lena manogi ma le tofo—ou te le fiafia lava i ai! Ae na amata ona atiina ae e ou matua pulouaitu a o ou laitiiti, o lea sa matou aai ai i aso uma. I le vaitau o le seleselega, ou te fesoasoani ai i ou matua e oo i le leva o le po. Ou te fuaina le 200 kalama o pulouaitu, tuu i totonu o se taga, ma oomi le faamau i luga o le pepa. Ou te manatua lou fiafia a o matou talanoa ma lou aiga. Sa tai pei lava e fai se afiafi faaleaiga i aso uma.
Na maua mai ai foi se tupe maua mo le aiga, ma o lea sa tatau ai ona matou fesoasoani i ai. Ae e lua ni itu na leaga ai: muamua, o se tasi o polokalama o le televise e sili ona ou fiafia i ai sa sau i le taimi lea na tatau ona matou galulue ai, o lea sa le mafai ona ou matamata ai. Ma le lona lua, e oo ane i le taimi na uma ai au galuega, ua uliuli ou lima mai pulouaitu, ma sa faigata ona aveese le lanu ma le manogi i se fasimoli. A o ou laitiiti, sa ou faitio i nisi taimi pe aisea na tatau ai ona ou fesoasoani tele i aso uma.
Na saunia e pulouaitu se tupe lelei mo sina taimi, ae na iu lava ina pa’ū ia tau ao faateleina le aofai o faifaatoaga pulouaitu, ma sa le toe totoina ai e ou matua ia pulouaitu. Sa ou manatu na pau le mea na ala ai ona la tuua, ona sa pa’ū ia tau, ae sa ou aoaoina se mea moni lea na faateia ai au ina ua ou faauu mai le kolisi.
Na amata ona atiina ae e ou matua ia pulouaitu ina ia faasaoina ai ni tupe mo le kolisi mo matou ma ou uso. Sa faatoa tuu e i laua ina ua la ausia le la aofaiga faamoemoeina. Ina ua ou iloaina, sa ou lagona le maasiasi i le faitio soo. Ou te lei iloaina sa ou faigaluega mo au tupe faaalu i le kolisi i le lumanai. Ma le isi mea, na fesoasoani mai lou aiga ia te au!
Sa ou tomumu pea lava pea e aunoa ma le iloaina sa matou totoina pulouaitu mo lau lava ia sikolasipi. O lou faitio sa pei lava o Lamana ma Lemuelu i le 1 Nifae 2:12: “Ma sa faapea ona muimui o Lamana ma Lemuelu … ona sa laua lē iloa faiga a lena Atua o lē na foafoaina i laua.” Ua ou fiafia lava e silafia lelei au e le Alii ma faamanuiaina au, e ui lava i lou faitio.
Ou te manatu o le a ou le fiafia lava e ai pulouaitu. Ae ana leai ni pulouaitu, o le a fai si ou faanoanoa laitiiti, aua o le a ou le maua le avanoa e manatua ai na aafiaga faatasi ma lou aiga. Ona o ia mea, na ou aoao ai e faataua ou faamanuiaga ma faalagolago i le fuafuaga a le Alii—ae le o le faitio! E ui lava la ina ou le fiafia i pulouaitu, ae ua ou talisapaia nei. O se faatusa taua ia te au e manatua ai sootaga o lou aiga.
E alaala le tusitala i le Aai o Shinagawa, Iapani.