Sau, Mulimuli Mai ia te A’u

Iosefa Samita—O La’u Perofeta

Saunia e David A. Edwards

Mekasini a le Ekalesia

O ia foi o lau perofeta. E mafai ona e suesue i ana aoaoga i lenei tausaga ina ia avea atili ai o ia ma au perofeta.

O se mea na saunoa mai ai Peresitene Russell M. Nelson i le konafesi aoao ia Aperila 2020 na taia ai au: “Po o fea lava o loo e nofo ai po o a foi ou tulaga o i ai, o le Alii o Iesu Keriso o lou Faaola, ma o le perofeta a le Atua, o Iosefa Samita, o lau perofeta” (“Faalogo ia te Ia“ [Ensign po o le Liahona, Me 2020, 88]).

Talu mai lava lo’u laitiiti, o le lagona lena na ou lagonaina—o Iosefa Samita o la’u perofeta. E sili atu nai lo se isi lava, o lenei perofeta o le Toefuataiga na fesoasoani ou te iloa ai Iesu Keriso ma Lana talalelei. Sa ou suesue i faaaliga i le Mataupu Faavae ma Feagaiga. Ma a o ou talavou, sa tuuina mai e lo’u tamā ia te au se tusi o aoaoga a le Perofeta o Iosefa Samita, ma sa ou faitauina ma le fiafia pei se meaai. O le suesueina o na aoaoga na avea ma se vaega tele o le fausiaina o la’u molimau i le talalelei toefuataiina.

Na ou mafaufau talu mai lena taimi: o le a le mea e faatatau i aoaoga a Iosefa Samita na faia se uunaiga faapena ia te au? O le a se mea na faatagaina le Agaga e molimau malosi mai ia te au e uiga i lo latou moni? Ou te fai atu o mea ia e tolu: (1) sa ia silafia le mea na ia silafia, ma sa ia ta’uina atu ma le lototoa; (2) sa ia maua se auala e faamalamalama manino atu ai upumoni sa ia aoaoina e ala i faaaliga; ma le (3) o taimi uma e susulu mai ai lona tagata ma ona uiga.

Sa Ia Silafia le Mea na Ia Silafia, ma sa Ia Ta’uaina Atu Ma le Lototoa

Talu mai lava le Uluai Faaaliga, na feagai ai Iosefa Samita ma sauaga ona o le faasoaina atu o mea sa ia aoaoina e ala i faaaliga. Ae na ia iloa e le mafai ona ia toe aluese mai ai: “Aisea ua sauaina ai au i lo’u ta’u atu o le mea moni? Sa ou vaai moni lava i se faaaliga vaaia; ma o ai aʼu ou te vavao atu ai i le Atua, pe aisea ua manatu ai le lalolagi e faia ia te aʼu ia ou faafitia ai le mea na ou vaai moni lava i ai? Sa ou vaai i se faaaliga vaaia; sa ou mautinoa lena mea, ma sa ou mautinoa sa silafia e le Atua lena mea, ma e le mafai ona ou faafitia lena mea, pe ou te fiatoa e fai” (Iosefa Samita—Talafaasolopito 1:25).

E ui ina sa ia silafia o le a ia valaaulia nisi sauaga ma le ita e ala i le faia o lea mea, sa tautino mai ma le lototoa e Iosefa Samita ia upumoni sa ia aoaoina mai le Atua i aso na totoe o lona olaga.

Faataitaiga:

E ui lava o le toatele o tagata i le lalolagi Kerisiano na talitonu o le tagata na foafoaina e le Atua mai le leai o se mea, sa aoao mai e Iosefa Samita ma le mautinoa se mea e ese:

“Sa i ai foi le tagata i le amataga faatasi ma le Atua. O le atamai, po o le malamalama o le upumoni, sa lei foafoaina pe na gaosia, pe mafai moni lava ona foafoaina pe gaosia” (Mataupu Faavae ma Feagaiga 93:29).

“O le agaga—o le mafaufau o le tagata—o le agaga ola pea. O fea na sau ai? O tagata atamamai uma ma fomai o mea silisili ua fai mai sa foafoaina e le Atua i le amataga, ae e leai: o lena manatu e ta’ufaatauvaaina ai le tagata i lo’u manatu. Ou te le talitonu i le aoaoga faavae; e sili atu lo’u iloa. Faalogo i ai, outou o i tulimanu uma o le lalolagi; aua ua ta’u mai e le Atua ia te au; ma afai tou te le talitonu mai ia te au, o le a le tuua ai le mea moni e aunoa ma ni aafiaga” (Aoaoga a Peresitene o le Ekalesia: Iosefa Samita [2007], 209).

Sa Ia Faamalamalamaina Manino Upumoni

O nisi taimi e faaataata mai ai e Iosefa Samita na te iloaina le tele o vaega o mea lilo a le Atua nai lo le mea e mafai ona ia faasoa atu i le lalolagi. Ae a ia aoao mai, sa ia te ia se auala e avea ai upumoni o le Atua ma mea manino ma faigofie.

Faataitaiga:

Mai le Uluai Faaaliga agai i luma, sa aoaoina ai e Iosefa Samita le tele o upumoni e uiga i le natura o le Atua le Tama e Faavavau. Ma i ana aoaoga sa ia faamalamalama mai ai le taua o nei upumoni. Mo se faataitaiga, na ia saunoa:

“Afai e le malamalama tagata i uiga o le Atua, latou te le malamalama ia i latou lava” (Aoaoga: Iosefa Samita, 43). O se faamatalaga manino lena ma le taua po o ai le Atua, po o ai i tatou, o le a la tatou sootaga ma Ia, ma lo tatou gafatia.

Na ia sosoo mai ai ma le faamatalaga lenei: “O le Atua lava Ia sa avea o ia e pei o i tatou nei, ma o se tagata faaeaina” (Aoaoga: Iosefa Samita, 44). Ma e sili atu ona manino.

Ona ia aoaoina mai lea o le mea lenei: “O le Atua lava ia, i le silafia ai ua i ai o Ia i le lotolotoi o agaga ma le mamalu, ma talu ai e sili atu lona atamai, sa silasila atu ai e tatau ona faatulagaina ni tulafono e mafai ai e le toatele ona maua le avanoa e alualu ai i luma e pei o Ia lava”(Aoaoga: Iosefa Samita, 223). Na faaalia e Iosefa Samita se mea iinei e taua i le fuafuaga a le Tama Faalelagi: e finagalo le Tama Faalelagi ia avea i tatou faapei o Ia.

E Susulu Mai Lona Tagata ma Ona Uiga

O le ala na faailoa mai ai e Iosefa Samita ia lava ua tuuina mai ai le manatu ia i tatou, po o ai o ia ma pe o ai o ia o se tagata faapea ai foi ma se perofeta. E taua lenei mea, aua o le fesootai ma tagata i se ala ua faigofie ai ona fesootai ma manatu. O le uiga o Iosefa o loo susulu mai i ana aoaoga.

Faataitaiga:

E ui o Iosefa Samita e masani ona foliga fiafia (tagai i le Iosefa Samita— talafaasolopito 1:28), ae a oo i mea na poloai mai ai le Alii, na te lei manatu māmā i ai. Sa ia iloa e ala i aafiaga taunuuga o le le usitai i ia ituaiga o poloaiga (tagai, mo se faataitaiga, Mataupu Faavae ma Feagaiga 3:4–9). Ua ou iloa le fetaui lelei o se natura fiafia ma se soo mataalia—ma ia te au lava ia, e mafai ona ou malamalama i ai.

O lenei, i le avea ai ma perofeta o le Toefuataiga, na poloaiina Iosefa Samita e aoao atu upumoni ua faaalia mai e le Atua, o le tele lava e fou i tagata uma. Sa tatau ia Iosefa ona taumafai e fesoasoani i tagata ia aoao nei upumoni fou. Ae o nisi taimi sa mamafatū. Sa ia saunoa i se taimi:

“Ua i ai se tulaga matua faigata tele i le tuuina atu lea o soo se mea i mafaufau o lenei tupulaga. Ua faapei o le tau vavaeina o se laau malo e faaaogaina ai se fasi falaoa mo se tofi, ma se maukeni mo se samala laau. E oo lava i le Au Paia o loo faatuai ona malamalama” (Aoaoga: Iosefa Samita, 553).

O se mataupu mamafa lenei mo Iosefa samita. Atonu sa tele naua mea na ia finagalo ia iloa e tagata ma malamalama ma talia ma ola ai—ma sa latou le mananao ai lava. Ae o se tala faatauvaa mai le seneturi lona sefuluiva i le I.S. o tagata e muai nofoia ni nofoaga ua faaalia ai se ata malie ma tuuina mai ai ia i tatou se tamai malamalama i le uiga o Iosefa Samita.

E tele lava isi vaega o uiga o Iosefa Samita o loo susulu mai i ana aoaoga. Mo se faataitaiga, o lona fiafia i uo: “O le a alofa lo’u loto mo i latou, ma o le a galulue ou lima ia i latou, o e alolofa ma galulue mo au, ma o le a faavavau ona latou faamaoni i le avea ma a’u uo” (Aoaoga: Iosefa Samita, 492).

Po o lona agaalofa ma le agalelei: I se tasi taimi ina ua fai mai tamaloloa ua latou alolofa tele mo se tamaloa sa susunuina lona fale, sa vave ona fai atu Iosefa, “Ou te alofa i lenei uso i le aofaiga e lima tala; o le a le tele o lo outou alofa [mo ia]?” Aoaoga: Iosefa Samita, 490.

Ona sosoo mai ai lea ma lona alofa i le aiga, amiosa’o, lotomaualalo, talitonu, faamasinotonu ma le tonu, faatuatua i le lotolotoi o tofotofoga ma puapuaga. O loo i ai uma lava iina, ua faaalia faatasi ai ma upumoni e faavavau ma mataupu faavae e ola ai.

O Ia o La’u Perofeta

Ioe, o loo osofaia pea ma faitioina Iosefa Samita i le taimi nei. Ae e pei ona ia saunoa mai, “Ou te le i ta’uina atu lava ia te outou ua atoatoa ona ou lelei; ae e leai lava se mea sese o i faaaliga na ou aoaoina atu ia te outou” (Aoaoga: Iosefa Samita, 555). E mafai ona tatou tuuina atu se molimau lototoa o le mea moni o ia o se perofeta. Ua ou iloa e faigofie ona molimau atu e uiga ia Iosefa Samita—e le faapea ona o loo i ai se tali faigofie o fesili uma e ono faia e tagata e uiga ia te ia, ae ona ua ou suesueina ana faaaliga ma aoaoga faaperofeta ma lagonaina le Agaga Paia o molimau mai e moni lava. E pei lava ona saunoa ai Iosefa i se taimi:

“Ua mafai ona ou tofoina mataupu faavae o le ola e faavavau, ma e mafai foi e outou. Ua tuuina mai ia te a’u e ala i faaaliga a Iesu Keriso; ma ou te iloa a oo ina ou ta’uina atu nei upu o le ola e faavavau e pei ona tuuina mai ia te a’u, e mafai foi ona outou tofoina, ma ou te iloa tou te talitonu i ai. Tou te fai mai o le hani e suamalie, ma ou te fai atu ai foi. E mafai foi ona ou tofoina le agaga o le ola e faavavau. Ou te iloa e lelei; ma a oo ina ou ta’uina atu ia te outou nei mea ia na tuuina mai ia te a’u e ala i musumusuga a le Agaga Paia, e moni o le a faapea foi ona outou mauaina i latou i le suamalie lava lena, ma faateleina ai lo outou olioli” (Aoaoga: Iosefa Samita, 559).

Sa ou tofo i lena suamalie. Sa faasoaina mai ia te au e la’u perofeta, o Iosefa Samita. E pei ona taua e Peresitene Nelson, o lau perofeta foi. E mafai ona e faia se suesuega faamaoni o lona soifuaga ma aoaoga i lenei tausaga i le Sau, Mulimuli Mai ia te A”u. Ona mafai lea ona e molimau atu i le suamalie o upumoni ua ia fesoasoani e te tofo i ai.