O se Savali mai le Au Peresitene Sili

O matou uso e ma tuafafine talavou pele,

Matou te fiafia tele e faailoa atu ia te outou lenei mekasini fou mo le autalavou O Le Ekalesia a Iesu Keriso o le Au Paia o Aso e Gata Ai: Mo le Malosi o le Autalavou. Matou te faafetai mo lo outou lelei ma le malosi o ni talavou o le Ekalesia i aso nei. O outou moni lava o le faamoemoe o Isaraelu. O lo matou naunau faamaoni ia mafai ona fesoasoani lenei lomiga fou ia te outou ia tumau ai i le malolosi ma latalata atu i lo outou Tama Faalelagi ma lo tatou Faaola, o Iesu Keriso.

O loo i ai se galuega tele a le Alii mo outou ma la outou tupulaga. Ina ia fesoasoani ia te outou, o le a tuuina atu e lenei mekasini ia aoaoga talafeagai a perofeta ma aposetolo o aso nei, o e alolofa ia te outou. A o outou suesue i tusitusiga paia e faaaoga ai punaoa a le Ekalesia o le Sau, Mulimuli Mai ia te A’u mo le ola ai ma aoaoina le talalelei a Iesu Keriso, e mafai foi ona outou tagai i lenei mekasini mo se atamai, malamalamaaga loloto, ma ni musumusuga faaopoopo.

Mo le taimi muamua, o lenei lomiga ese mo na o le autalavou ua maua i atunuu ma gagana eseese. Matou te faamoemoe o le a aumaia e lenei lomiga se agaga o le auai ma le lotogatasi i le lalolagi atoa, ma o le a outou maua ai le malosi mai molimau ma aafiaga e faasoaina atu e isi talavou mai le lalolagi atoa.

O le igoa o lenei mekasini ua atagia ai lo matou talitonu i lo outou malosi o se autalavou o le Ekalesia. Matou te molimau atu o le olioli moni e oo mai e ala i lo tatou faatuatua ia Iesu Keriso, Lana talalelei, ma Lana Ekalesia toefuataiina.

Ma le faamaoni lava,

O le Au Peresitene Sili