“O le Pogai Sili o le Toefuataiga,” Mo le Malosi o le Autalavou, Ian. 2021, 3–5.
O le Pogai Sili o le Toefuataiga
O le galuega na amataina e Iosefa ma Ailama Samita, faatasi ai ma le toatele o isi tagata faamaoni, o loo faaauau pea i le Ekalesia i aso nei.
Ina ua alu atu le alii talavou o Iosefa Samita i le togavao e tatalo ai, sa oo mai ia te ia se faaaliga ofoofogia, ua ta’ua i aso nei o le Uluai Faaaliga.
I le faaaliga lenei, na tau atu ai e le Faaola ia Iosefa ua faamagaloina ana agasala. Sa Ia taliina foi le fesili a Iosefa ma fetalai mai, e leai ma se tasi o ekalesia i lena taimi na “taliaina e le Atua o lana ekalesia ma le malo.”
“I le taimi lava lea,” na faamatalaina e Iosefa, “sa [ou] mauaina se folafolaga e faapea, o le a faaalia mai ia te a’u le atoatoaga o le talalelei i se taimi o le lumanai.”1
I le mavae ai o lenei faaaliga mamalu, na tulai mai Iosefa mai le Vao Paia e amata ana tapenaga e avea o se perofeta a le Atua.
Moronae ma le Tusi a Mamona
E tolu tausaga mulimuli ane, i le 1823, na toe tatala mai ai le lagi o se vaega o le faaauauina o le Toefuataiga o le talalelei a Iesu Keriso i aso e gata ai. Na faaali mai se agelu e igoa ia Moronae ia te ia ma faapea mai “o i ai i le Atua se galuega mo [ia] [e] faia … [ma] o loo i ai se tusi ua teuina, ua tusia i luga o papatusi auro” o loo i ai “e atoatoaga o le Talalelei tumau-faavavau” (Iosefa Samita—Talafaasolopito 1:33–34).
Mulimuli ane, sa maua e Iosefa, faaliliu, ma lolomiina faamaumauga mai anamua, lea ua lauiloa i le asō o le Tusi a Mamona.
Uso Faamaoni
O le uso o Iosefa o Ailama sa o se lagolago i taimi uma ia Iosefa. I o la’ua soifuaga, sa fetaiai faatasi Iosefa ma Ailama ma tagata faatupu faalavelave ma sauaga. Mo se faataitaiga, sa la mafatia faatasi i tulaga aupito pagatia i le Faleuipui i Liperate i Misuri mo le lima masina i le taimi o le taumalulu tele o le 1838–39.
A o fetaiai ai ma sauaga, sa faaalia e Ailama le faatuatua i folafolaga a le Alii, e aofia ai se faamaoniga e sola ese mai ona fili pe afai na te filifili e fai. Ia Iuni i le 1844, sa tuuina atu ai ia Ailama le filifiliga e ola pe oti ina ia faamamaluina ai le Atua ma ia “faamau faailoga e ia lana molimau i lona toto”—e tutufaatasi ma lona uso pele o Iosefa (tagai i le Mataupu Faavae ma Feagaiga 136:39).
O se vaiaso ae lei fasiotia ma le faalealofa i laua, sa fai atu ai Iosefa ia Ailama e ave lona aiga ma o ese atu. Ou te lagonaina le lotomomomo tele pe a ou manatua le tali a Ailama, “Iosefa, e le mafai ona ou tuua oe.”2
O lea na o ai Iosefa ma Ailama i Karefasi, i le mea na avea ai i la’ua o ni maturo mo le faamoemoega ma le suafa o Keriso. “Sa lei fevaevaeaʼi i laua i le soifuaga, ma sa lei tuueseeseina i laua i le oti!” (Mataupu Faavae ma Feagaiga 135:3; faaopoopo le faamamafa).
O Se Valaau e Galulue
E tatau ona tatou manatua e le aunoa le tau na totogiina e Iosefa ma Ailama Samita, faatasi ai ma le anoanoai o isi alii ma tamaitai ma tamaiti faatuatua, e faavae le Ekalesia ina ia mafai ai e oe ma au ona sapi i le tele o faamanuiaga ma nei upumoni faaalia uma ua tatou maua i ona po nei. E le tatau lava ona faagaloina lo latou faatuatua!
A o lei maliu o ia i le 1844, sa tusia ai e Iosefa se tusi faamalosiau i le Au Paia. O se valaau e galulue, lea lava e faaauau i le Ekalesia i ona po nei:
“Uso e [ma tuafafine], tatou te lē o atu pea ea i lenei savali sili? O atu i luma ae le o le solomuli. Lototetele, uso e [ma tuafafine]; o atu pea, o atu pea i le manumalo! …
“… O lea, ia tatou osi atu, o se ekalesia ma se nuu, ma se Au Paia o Aso e Gata Ai, se taulaga i le Alii i le amiotonu” (Mataupu Faavae ma Feagaiga 128:22, 24; faaopoopo le faamamafa).
Mafaufau po o le a le taulaga o le a e tuuina atu i le Alii i le amiotonu i aso a sau. Ia lototetele—faasoa atu i se tasi e te talitonuina, ma o le mea e sili ona taua, faamolemole ia faaavanoa se taimi e fai ai!
Ou te iloa e finagalo malie le Faaola pe a tatou tuuina atu ia te Ia se taulaga mai o tatou loto i le amiotonu, e faapei foi ona sa faamalieina o Ia i le taulaga faamaoni a na uso ofoofogia o Iosefa ma Ailama Samita, ma isi Au Paia faatuatua uma.