Leksiyon 4: Doktrina ug mga Pakigsaad 1

Doktrina ug mga Pakigsaad 1

“Ang Tingog sa Ginoo Modangat ngadto sa mga Lumulupyo sa Yuta”

Sa wala pa maimprinta ang Basahon sa mga Sugo, nga sa wala madugay nahimong kabahin sa Doktrina ug mga Pakigsaad, si Propeta Joseph Smith mihangyo sa Ginoo alang sa pasiuna sa basahon. Agig tubag, ang Ginoo mipadayag sa karon nga Doktrina ug mga Pakigsaad nga seksiyon 1 isip pasiuna sa mga pagpadayag ngadto sa kalibotan. Kini nga leksiyon makatabang sa mga estudyante nga makasabot kon nganong ang Ginoo naghatag og mga pasidaan ngadto sa kalibotan.

Mga Posibleng Kalihokan sa Pagkat-on

“Ang tingog sa pagpasidaan”

Ikonsiderar ang paggamit sa mosunod nga senaryo o kanang labing haom sa mga panginahanglan sa imong mga estudyante aron sa pagtabang kanila sa pagpangandam sa pagpamalandong kon nganong ang usa ka tawo mahimong mopasidaan sa laing tawo.

Handurawa nga ang usa ka higala naghimo og usa ka desisyon nga mosangpot sa negatibo nga mga sangpotanan.

Dapita ang mga estudyante sa pagpakigbahin og tinud-anay nga mga ehemplo kon unsa kaha kini nga desisyon. Pipila ka mga ehemplo mahimong pagpamakak sa mga ginikanan, paglapas sa Pulong sa Kaalam, pagpanikas sa eskwelahan, o pagbiya sa Simbahan.

• Ngano nga gusto nimong pasidan-an ang imong higala bahin niini nga desisyon?

Ang Manluluwas mihatag usab og “tingog sa pagpasidaan” (Doktrina ug mga Pakigsaad 1:4). Pamalandongi ang mosunod nga mga pangutana:

• Ngano kaha nga ang Manluluwas mopasidaan kanato? Ngano kaha nga personal man ka Niyang gipasidan-an? Sa unsang paagi?

• Unsa ang gitudlo niini kanimo mahitungod Kaniya?

Samtang magtuon ka niini nga leksiyon, pangitaa ang mga tubag niini nga mga pangutana.

Ang tingog sa pagpasidaan sa Ginoo alang sa tanang katawhan

Ang mosunod nga impormasyon makatabang sa mga estudyante nga masabtan ang kasaysayan kon giunsa pagdawat ang pasiuna sa Doktrina ug mga Pakigsaad.

Pagka-Nobiyembre 1831, si Propeta Joseph Smith nakarekord og sobra sa 60 ka pagpadayag gikan sa Ginoo. Hinoon, pipila ka mga miyembro sa Simbahan ang aduna nay mga kopya sa mga pagpadayag. Subay sa direksiyon sa Propeta, ang mga pagpadayag gihugpong sa usa ka bag-ong tomo [volume] sa kasulatan nga gitawag og Basahon sa mga Sugo, nga sa wala madugay nahimong kabahin sa Doktrina ug mga Pakigsaad. Sa dihang ang basahon hapit na maimprinta, si Joseph nangamuyo sa Ginoo og pag-ampo alang sa usa ka pasiuna sa basahon. Agig tubag, iyang nadawat pinaagi sa pagpadayag ang seksiyon 1, nga gitawag sa Ginoo nga “akong pasiuna” (Doktrina ug mga Pakigsaad 1:6) niining bag-ong basahon sa kasulatan.

Ikonsiderar ang pagsulat sa mosunod nga mga pangutana ug mga pakisayran diha sa pisara. Mahimong mangita ang mga estudyante og mga tubag nga magtinagsa o sa gagmay nga mga grupo. Kon magtinabangay diha sa ginagmay nga mga grupo, mahimong ipamubo [summarize] sa mga estudyante kon unsay ilang nakaplagan diha sa ilang mga grupo sa dili pa ipakigbahin ngadto sa klase.

Gamita ang imong mga kasulatan sa pagtubag sa mosunod nga mga pangutana:

• Kinsa ang gipasidan-an sa Manluluwas karon? (tan-awa sa Doktrina ug mga Pakigsaad 1:1–4, 34–36; tingali makatabang nga mahibaloan nga ang “pagtamod sa mga tawo” [bersikulo 35] mao ang tawo kinsa mopabor sa usa ka tawo labaw kay sa lain).

• Sa unsang paagi gipahayag sa Ginoo ang Iyang mensahe? (tan-awa sa Doktrina ug mga Pakigsaad 1:4–6).

Samtang gikonsiderar sa mga estudyante ang ilang mga tubag, mahimong makatabang ang pagsulat sa mosunod nga pamahayag diha sa pisara: Ang tingog sa pagpasidaan sa Manluluwas alang sa tanang mga tawo.

Ang tingog sa pagpasidaan sa Ginoo maoy ebidensiya sa Iyang gugma

Diha sa Doktrina ug mga Pakigsaad 1, nagpadayag ang Manluluwas og pipila ka mga rason nga Siya naghatag og mga pasidaan sa kalibotan. Samtang magtuon ka, pamalandongi kon sa unsang paagi kini nga mga rason mahimong ebidensiya sa pagpanalangin kanato sa Manluluwas.

Basaha ang Doktrina ug mga Pakigsaad 1:11–17, 21–28, ug pangitaa ang mga rason nga ang Ginoo naghatag kanato og mga pasidaan.

Ikonsiderar ang pagtunga sa klase. I-assign ang katunga sa pagbasa sa mga bersikulo 11–17 ug ang laing katunga sa pagbasa sa mga bersikulo 21–28. Kon nagkinahanglan ang mga estudyante og dugang nga pagpanudlo, mahimo kang maghimo og duha ka kolum nga tsart. Ibutang ang mga bersikulo sa unang kolum, ug tugoti ang mga estudyante sa pagsulat sa rason sa pasidaan diha sa ikaduhang kolum. Mahimong makakita ang mga estudyante og mga tubag sama sa mosunod:

• 1:12 aron pag-andam kanato sa unsay umaabot

• 1:15–17 aron pagpasidaan kanato sa mga hagit ug mga sala sa atong panahon

• 1:21 aron pagdugang sa atong hugot nga pagtuo

• 1:22 aron ang walay kataposan nga pakigsaad sa Ginoo matukod

• 1:26 aron pagtudlo kanato

• 1:27 aron pagpanton ug pagtul-id kanato kon kita makasala

• 1:27 aron pagtabang kanato sa paghinulsol

• 1:28 aron paghatag kanato og kahibalo

Ikonsiderar ang pagdapit og pipila ka mga estudyante sa pagpakigbahin sa unsay ilang nakat-onan pinaagi sa paggamit sa mosunod nga aghat.

Pagpili og usa sa mga rason nga imong nakaplagan nga ang Ginoo nakigsulti kanato, ug tubaga ang usa o duha sa mosunod nga mga pangutana:

• Sa unsang paagi kini nga rason ebidensiya sa gugma sa Manluluwas? Sa unsang paagi kini nga rason makonsiderar nga usa ka panalangin?

• Kanus-a nimo nasinati kini nga panalangin, o nganong gusto nimo kini nga panalangin diha sa imong kinabuhi?

• Ngano nga ang tibuok kalibotan nagkinahanglan niini nga panalangin?

Sa unsang paagi ang Manluluwas mipasidaan kanato sa atong panahon?

Ang mosunod mahimong makatabang sa mga estudyante sa pagpakigbahin sa unsay ilang nakat-onan. Mahimo kang mohatag og papel o dapiton ang mga estudyante sa paggamit sa ilang mga journal sa pagtuon. Dasiga ang mga estudyante nga mahimong mamugnaon kon sa unsang paagi nila ipakigbahin ang ilang mga mensahe. Mahimo ka nga mohatag og kagamitan sa pagdrowing kon anaa.

Handurawa nga alang sa inyoong leksiyon karong Dominggo, gidapit ka sa imong magtutudlo sa paggahin og pipila ka minuto sa pagpakigbahin nganong ang Ginoo nagpasidaan kanato karon. Ikonsiderar kon unsaon nimo pagpakigbahin niini nga mensahe diha sa inyong klase sa makahuloganong paagi. Pag-andam og handout, meme, poster, o uban pang mamugnaong pamaagi sa pagpakigbahin niini nga mensahe diha sa inyong klase. Palihog iapil ang mosunod:

• Usa ka bersikulo gikan sa Doktrina ug mga Pakigsaad 1 nga nagpakigbahin sa labing menos usa ka rason nga ang Ginoo nagpasidaan sa tanang mga tawo

• Usa ka ehemplo sa pasidaan sa Ginoo kanato sa atong panahon (Kon imong gipili nga ang Ginoo mopasidaan kanato sa kalibotanong mga hagit ug mga sala [tan-awa sa Doktrina ug mga Pakigsaad 1:15–17], mahimo nimong ipakigbahin ang usa ka bersikulo gikan sa mga kasulatan o ang mga pulong sa propeta sa modernong panahon kinsa mipasidaan kanato sa moderno nga mga tentasyon.)

• Ang imong mga hunahuna ug mga pagbati mahitungod sa Ginoo nga nagpakigbahin og mga mensahe sa pasidaan kanato karon. Mahimo ka usab nga maglakip og usa ka kasinatian.

Samtang mopakigbahin ang mga estudyante, pangita og mga paagi sa pagdayeg ug pagpasalamat kanila sa ilang sinsero nga paningkamot ingon man usab sa paghatag og gibug-aton sa gugma sa Manluluwas pinaagi sa mga mensahe nga Iyang gipadala karon.

Alang sa dugang nga pagbansay kon unsaon pagtabang sa mga estudyante nga makahibalo nga imong gipakabilihan ang ilang mga komento, tan-awa sa “Ipakita Nga Imong Gihatagan og Bili ang mga Estudyante sa dili pa Sila Mokomentaryo o Moisa sa Ilang Kamot aron Mokomentaryo.” Kini nga pagbansay makita sa Pagpalambo sa mga Kahanas sa Magtutudlo: Higugmaa Kadtong Imong Gitudloan.

Dugang nga mga Kapanguhaan

Unsa ang Basahon sa mga Sugo?

Sa unang pipila ka tuig sa Simbahan, ang ubang mga miyembro makagamit lamang sa mga pagpadayag sa Ginoo ngadto ni Propeta Joseph Smith pinaagi sa sinulat sa kamot nga mga kopya diha sa tinagsa nga papel nga wala gihugpong [loose sheets] nga gipakuyanap taliwala sa mga Santos. Sa usa ka pagpadayag nga nadawat ni Joseph sa usa ka komperensiya niadtong 1831, ang Ginoo miuyon sa paghugpong sa mga pagpadayag ug sa wala pa ang pag-imprinta mipadayag og pasiuna alang sa umaabot nga basahon. Kini maglangkob sa mga bersyon nga ubos og gamay sa katunga sa mga pagpadayag nga anaa karon sa Doktrina ug mga Pakigsaad. Nagsugod ang pag-imprinta niadtong 1832 sa usa ka printahanan sa Independence, Missouri, apan ang panon sa manggugubot nakapahunong sa paningkamot. Kini ug ang ubang mga pagpadayag malamposong naimprinta niadtong 1835 isip ang Doktrina ug mga Pakigsaad sa ang Simbahan sa mga Santos sa Ulahing mga Adlaw. Alang sa dugang nga impormasyon, tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 (2018), 161–63.

Ngano nga ang mga propeta ug apostoles usahay mopakigbahin og dili bantogan nga mga mensahe?

Si Presidente Russell M. Nelson mitudlo:

Usahay kami isip mga lider sa Simbahan gisaway tungod sa hugot nga paghupot sa mga balaod sa Dios, pagpanalipod sa doktrina sa Manluluwas, ug pagsalikway sa katilingbanong mga pagpamugos sa atong panahon. Apan ang among sugo isip giordinahan nga apostoles mao ang “pagpanlakaw ngadto sa tibuok kalibotan sa pagsangyaw sa [Iyang] ebanghelyo ngadto sa matag linalang” [Doktrina ug mga Pakigsaad 18:28]. Kana nagpasabot nga kami gimandoan sa pagtudlo sa kamatuoran.

Sa pagbuhat sa ingon, usahay kami gipasanginlan sa pagkadili maamumahon samtang kami nagtudlo sa mga panginahanglanon sa Amahan alang sa kahimayaan didto sa celestial nga gingharian. Apan dili ba kini mas labaw pa nga dili maamumahon alang kanamo sa dili pagsulti sa kamatuoran—sa dili pagtudlo sa unsay gipadayag sa Dios?

Kini eksakto tungod kay kami gusto sa labing maayo alang sa tanang mga anak sa Dios nga among gisangyaw ang Iyang kamatuoran. Mahimong dili kami mosulti kanunay sa mga tawo kon unsay ilang gusto nga paminawon. Ang mga propeta panagsa ra nga mailado. Apan kami sa kanunay nagtudlo sa kamatuoran! (Russell M. Nelson, “The Love and Laws of God” [debosyonal sa Brigham Young University, Sept. 17, 2019], 3, speeches.byu.edu)

Dugang nga mga Kalihokan sa Pagkat-on

Usa ka alternatibo nga pagsugod

Dapita ang usa ka estudyante sa pagpiyong sa iyang mga mata o pagsul-ob og taptap ug hinayhinay nga maglakaw gikan sa luyo sa kwarto paingon ngadto sa atubangan nga dili makabangga sa bisan unsang mga lamesa o mga lingkoranan. (Kon gusto nimo, mahimo nimong dapiton ang mga estudyante nga ibalhin una ang ilang mga lamesa o mga lingkoranan aron makahimo og mga babag samtang nagbilin pa og agianan paingon sa atubangan.) Dayon dapita ang pipila ka mga estudyante sa pagpasidaan sa gitaptapan nga estudyante kon hapit na siyang mobangga ngadto sa babag. Hangyoa ang mga estudyante sa paghunahuna og mga ehemplo kon kanus-a sila mahimong mopasidaan sa uban o sila mismo gusto nga mapasidan-an.

Ang pagbaliwala sa tingog sa Ginoo adunay mga sangpotanan

Ang mga estudyante sa kasagaran naglisod sa pagsabot sa mga sangpotanan sa pagbaliwala sa tingog sa Ginoo. Aron madugangan ang ilang pagsabot, mahimo nimong dapiton ang mga estudyante sa pagdirekta sa ilang pagtagad ngadto sa mga pasidaan nga gihisgotan diha sa klase sa sinugdanan sa leksiyon. Hangyoa ang klase sa pagpakigbahin sa daklit sa nagkalainlaing mga sangpotanan sa pagbaliwala sa mga pasidaan sa Manluluwas. Tabangi ang mga estudyante nga makasabot nga ang pagsupak sa balaang mga balaod sa Manluluwas magdala og negatibo nga espirituhanong mga sangpotanan niadtong mopili nga dili maghinulsol.

Idirekta ang pagtagad sa mga estudyante ngadto sa Doktrina ug mga Pakigsaad 1:14, ug hangyoa sila sa pag-ila sa mga sangpotanan sa dili pagpaminaw sa tingog sa Ginoo o sa Iyang mga sulugoon. Mahimong makatabang ang pagpasabot nga ang “isalikway” gikan sa katawhan sa Dios mao ang pagkahimulag gikan sa mga matarong. Ang “isalikway” nagpasabot usab nga mahimulag gikan sa gahom sa Dios, proteksiyon, impluwensiya, mga panalangin, ug, sa kataposan, sa Iyang presensiya.

Ang klase mahimong makabenepisyo gikan sa pagbasa sa mosunod nga pamahayag ni Presidente Russell M. Nelson:

Minahal kong mga kaigsoonan, ang balaanong mga balaod mga gasa sa Dios ngadto sa Iyang mga anak. Sama nga ang mga lagda sa atong pamilya mipanalipod sa atong mga anak nga luwas samtang sila nagtubo ngadto sa pagkahamtong, sama nga ang balaanong mga balaod nga nagdumala sa kasingkasing ug ang pagpalupad sa mga ayroplano mopanalipod kaninyo nga luwas diha sa lamesa sa pag-opera o samtang nagbiyahe, ang pagsunod sa mga balaod sa Dios makapanalipod kaninyo nga luwas samtang kamo mouswag ngadto sa kataposang kahimayaan. …

… Ang labing dako nga mga panalangin sa Dios gitagana alang niadtong kinsa nagsunod sa Iyang mga balaod, sama sa Iyang gipasabot: “Alang sa tanan kinsa may panalangin sa akong mga kamot kinahanglan nga motuman sa balaod nga gitudlo alang niana nga panalangin” [Doktrina ug mga Pakigsaad 132:5]. Ang mga balaod sa Dios dinasig sa Iyang hingpit nga walay kinutobang gugma alang kanato ug sa Iyang tinguha alang kanato nga mahimong maayo kutob sa mahimo. (Russell M. Nelson, “The Love and Laws of God” [debosyonal sa Brigham Young University, Sept. 17, 2019], 3, speeches.byu.edu) 

Ang tingog sa Manluluwas nanalipod kanato

Aron matabangan ang mga estudyante nga makahimo og mga koneksiyon tali sa ilang kamasulondon sa tingog sa Ginoo ug sa Iyang balaan nga proteksiyon, ikonsiderar ang pagpakita sa bidyo nga: “Follow the Prophet” (4:16).