« មេរៀនទី ៥—គោលលទ្ធិ និងសេចក្ដីសញ្ញា ១:៣០–៣៣ ៖ ‹ សាសនាចក្រតែមួយដែលពិត ហើយសកម្ម › » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្ដីសញ្ញា ១:៣០–៣៣ » សៀវភៅសិក្សាព្រះគម្ពីរគោលលទ្ធិ និងសេចក្ដីសញ្ញាសម្រាប់គ្រូបង្រៀនថ្នាក់សិក្ខាសាលា
មេរៀនទី ៥ ៖ គោលលទ្ធិ និងសេចក្តីសញ្ញា ១
គោលលទ្ធិ និងសេចក្ដីសញ្ញា ១:៣០–៣៣
« សាសនាចក្រតែមួយដែលពិត ហើយសកម្ម »
នៅក្នុងបុព្វកថារបស់ទ្រង់ចំពោះព្រះគម្ពីរគោលលទ្ធិ និងសេចក្តីសញ្ញា ព្រះអម្ចាស់បានប្រកាសពីភាពសំខាន់នៃសាសនាចក្រដែលបានស្ដារឡើងវិញថ្មីនៃព្រះយេស៊ូវគ្រីស្ទ ។ ទ្រង់បានប្រកាសថា សាសនាចក្រនេះគឺជា « សាសនាចក្រតែមួយ ដែលពិត ហើយសកម្មនៅលើផ្ទៃផែនដីទាំងមូល » ( គោលលទ្ធិ និងសេចក្ដីសញ្ញា ១:៣០ ) ។ មេរៀននេះមានគោលបំណងជួយសិស្សឲ្យយល់ពីសារៈសំខាន់នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយថាជាសាសនាចក្រពិតតែមួយគត់ ។
សកម្មភាពរៀនសូត្រដែលអាចមាន
សាសនាចក្ររបស់ព្រះអម្ចាស់
ដើម្បីចាប់ផ្តើមមេរៀននេះ អ្នកអាចចែកចាយសំណួរខាងក្រោម និងសេចក្តីថ្លែងការណ៍ដែលភ្ជាប់មកជាមួយ ហើយអញ្ជើញសិស្សបីបួននាក់ឲ្យឡើងចែកចាយចម្លើយរបស់ពួកគេ ។
ហេតុអ្វីបានជាមនុស្សមួយចំនួនអាចយល់ស្រប ឬមិនយល់ស្របនឹងសេចក្ដីថ្លែងការណ៍ខាងក្រោមនេះ ?
-
ខ្ញុំគិតថា ខ្ញុំមិនត្រូវការព្រះវិហារទេ ។
-
ព្រះវិហារទាំងអស់គឺសុទ្ធតែពិតដូចគ្នា ។
-
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្រតែមួយគត់ដែលពិត ។
អ្នកអាចនឹងសុំសិស្សឲ្យវាយតម្លៃដោយស្ងៀមស្ងាត់នូវទស្សនៈរបស់ពួកគេផ្ទាល់ស្ដីពីសេចក្ដីថ្លែងការណ៍ទាំងនេះ ។
ដោយមានសាសនា និងទស្សនៈខុសៗគ្នាជាច្រើន វាអាចពិបាកក្នុងការដឹងថាអ្វីទៅជាការពិត ។ ព្រះអម្ចាស់បានប្រទានការណែនាំដល់យើងតាមរយៈព្រះគម្ពីរ ដើម្បីជួយយើងឲ្យមានទំនុកចិត្តលើអ្វីដែលពិត និងដឹងពីអ្វីដែលទ្រង់សព្វព្រះទ័យចង់បានសម្រាប់យើង ។
ជាបុព្វកថាចំពោះព្រះគម្ពីរគោលលទ្ធិ និងសេចក្តីសញ្ញា ព្រះអម្ចាស់បានបើកសម្តែងការព្រមានមួយ « ដល់មនុស្សទាំងអស់ » ( គោលលទ្ធិ និងសេចក្ដីសញ្ញា ១:៤ ) ។ ជាផ្នែកមួយនៃសារលិខិតរបស់ទ្រង់ ទ្រង់បានថ្លែងយ៉ាងច្បាស់លាស់អំពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនេះ ។
សូមអាន គោលលទ្ធិ និងសេចក្ដីសញ្ញា ១:៣០ ហើយរកមើលរបៀបដែលព្រះអម្ចាស់មានបន្ទូលរៀបរាប់អំពីសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនេះ ។
គោលលទ្ធិ និងសេចក្ដីសញ្ញា ១:៣០ គឺជាវគ្គបទគម្ពីរចំណេះចំណានខាងគោលលទ្ធិមួយ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីពួកគេអាចងាយរកវាឃើញ ។
-
តើអ្នកបានរកឃើញអ្វីខ្លះ ?
« សាសនាចក្រតែមួយ ដែលពិត ហើយសកម្មនៅលើផ្ទៃផែនដីទាំងមូល »
សូមពិចារណាអញ្ជើញសិស្សឲ្យគូសចំណាំឃ្លាក្នុងចំណងជើងខាងលើនេះក្នុងព្រះគម្ពីររបស់ពួកគេ ។ សូមចំណាយពេលខ្លះ ដើម្បីជួយសិស្សឲ្យយល់ពីអត្ថន័យដែលថា សាសនាចក្រនេះគឺជាសាសនាចក្រដែលពិត និងសកម្ម ។ ខាងក្រោមនេះគឺជារបៀបមួយដែលអ្នកអាចធ្វើការណ៍នេះបាន ៖
សូមគូរជួរឈរពីរនៅលើក្ដារខៀន ។ សូមអញ្ជើញសិស្សឲ្យសិក្សាសំណៅចែក និងគូសចំណាំឃ្លាដែលជួយពួកគេយល់ពីបៀបដែលសាសនាចក្រទាំង « ពិត » និង « សកម្ម » ។
សាសនាចក្រតែមួយដែលពិត ហើយសកម្ម
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានបង្រៀន ៖
ព្រះអម្ចាស់បានប្រកាសថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជា « សាសនាចក្រតែមួយ ដែលពិត ហើយសកម្មនៅលើផ្ទៃផែនដីទាំងមូល » ( គ.&ស. ១:៣០ ) ។ សាសនាចក្រដែលបានស្ដារឡើងវិញនេះគឺពិត ដោយសារវាជាសាសនាចក្ររបស់ព្រះអង្គសង្គ្រោះ ហើយទ្រង់គឺជា « ផ្លូវជាសេចក្តីពិត ហើយជាជីវិត » ( យ៉ូហាន ១៤:៦ ) ។ ហើយវាជាសាសនាចក្រដែលសកម្ម ដោយសារតែកិច្ចការ និងអំណោយទាននៃព្រះវិញ្ញាណបរិសុទ្ធ ។ ( ដេវីឌ អេ បែដណា « Receive the Holy Ghost » Liahona ខែ វិច្ឆិកា ឆ្នាំ ២០១០ ទំព័រ ៩៧ )
ប្រធាន ដាល្លិន អេក អូក ក្នុងគណៈប្រធានទីមួយបានបង្រៀន ៖
លក្ខណៈពិសេសចំនួនបី—(១) ភាពពោរពេញនៃគោលលទ្ធិ (២) អំណាចបព្វជិតភាព និង (៣) ទីបន្ទាល់អំពីព្រះយេស៊ូវគ្រីស្ទ—ពន្យល់អំពីមូលហេតុដែលព្រះបានប្រកាស … ថានេះគឺជាសាសនាចក្រតែមួយគត់ដែលពិត ហើយសកម្មនៅលើផ្ទៃផែនដីទាំងមូល ។ …
ដំណឹងល្អដែលបានស្ដារឡើងវិញនៃព្រះយេស៊ូវគ្រីស្ទ គឺមានលក្ខណៈទូលំទូលាយ ជាសកល ពេញដោយសេចក្ដីមេត្តាករុណា និងពិត ។ …
ដោយមានអំណាចបព្វជិតភាព ថ្នាក់ដឹកនាំ និងសមាជិកដែលមានសិទ្ធិអំណាចត្រឹមត្រូវនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មានអំណាចដើម្បីធ្វើពិធីបរិសុទ្ធបព្វជិតភាពដែលតម្រូវឲ្យមាន ដូចជាពិធីបុណ្យជ្រមុជទឹក អំណោយទាននៃព្រះវិញ្ញាណបរិសុទ្ធ និងការរៀបចំពិធីសាក្រាម៉ង់ជាដើម ។
កូនសោនៃបព្វជិតភាព ដែលព្យាការីជាទីស្រឡាញ់នៃយើងកាន់ … និងព្យាការី និងប្រធានសាសនាចក្រគ្រប់រូបកាន់ ផ្តល់សិទ្ធិឲ្យលោកទទួលបានវិវរណៈជំនួសឲ្យសាសនាចក្រទាំងមូល ។ សាសនាចក្រនេះ « សកម្ម » ដោយសារយើងមានព្យាការីដែលបន្តផ្ដល់ព្រះបន្ទូលនៃព្រះអម្ចាស់ដល់យើង ដែលចាំបាច់សម្រាប់ជំនាន់របស់យើង ។
មូលហេតុទីបីនៃការដែលយើងគឺជាសាសនាចក្រដ៏ពិតតែមួយនោះគឺថា យើងមានសេចក្ដីពិតដែលបានបើកសម្ដែងអំពីលក្ខណៈនៃព្រះ និងទំនាក់ទំនងរបស់យើងជាមួយទ្រង់ ហេតុដូច្នេះហើយយើងមានទីបន្ទាល់ដ៏ពិសេសអំពីព្រះយេស៊ូវគ្រីស្ទ ។ ( ដាល្លិន អេក អូក « The Only True and Living Church » New Era ខែ សីហា ឆ្នាំ ២០១១ ទំព័រ ៣–៥ )
សូមអញ្ជើញឲ្យសិស្សចែកចាយអ្វីដែលពួកគេបានគូសចំណាំ ។ ពួកគេអាចនឹងសរសេរអ្វីដែលពួកគេបានរកឃើញនៅក្នុងជួរឈរទាំងពីរនៅលើក្តារខៀន ។ សូមពិចារណាសួរសិស្សអំពីរបៀបដែលព្រះអម្ចាស់ប្រទានពរដល់យើង តាមរយៈផ្នែកនីមួយៗនៃសាសនាចក្ររបស់ទ្រង់ដែលពួកគេបានគូសចំណាំ ។ ដើម្បីជួយសិស្សឲ្យយល់អំពីចំណុចរបស់ប្រធាន អូក ដែលមានប្រសាសន៍អំពីទីបន្ទាល់ពិសេសរបស់យើងអំពីព្រះគ្រីស្ទ សូមពិចារណាឲ្យពួកគេរិះរកសេចក្តីពិតអំពីព្រះវរបិតាសួគ៌ និងព្រះយេស៊ូវគ្រីស្ទ ដែលពួកគេបានស្វែងយល់តាមរយៈព្យាការី យ៉ូសែប ស្ម៊ីធ ព្រះគម្ពីរមរមន ឬព្យាការីសម័យទំនើប ។ ពួកគេអាចនឹងបន្ថែមគំនិតរបស់ពួកគេចូលទៅជួរឈរ « ពិត » ។
ប្រសិនបើចាំបាច់ សូមជួយសិស្សឲ្យយល់ថា ទីបន្ទាល់របស់ព្រះអម្ចាស់ដែលប្រកាសថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយគឺជា « សាសនាចក្រតែមួយដែលពិត ហើយសកម្ម » មិនមានន័យថា ព្រះវិហារផ្សេងទៀតមិនមានសេចក្ដីពិតណាមួយឡើយ ។
ពរជ័យនៃសាសនាចក្ររបស់ព្រះយេស៊ូវគ្រីស្ទ
បន្ទាប់ពីបានបញ្ជាក់ថា សាសនាចក្រនេះគឺជា « សាសនាចក្រតែមួយដែលពិត ហើយសកម្ម » ព្រះអង្គសង្គ្រោះបានរួមបញ្ចូលនូវហេតុផលមួយចំនួនដែលទ្រង់បានស្ដារសាសនាចក្ររបស់ទ្រង់ឡើងវិញ ។ សូមអាន គោលលទ្ធិ និងសេចក្ដីសញ្ញា ១:៣១–៣៣ ហើយរកមើលអ្វីដែលទ្រង់បានបង្រៀន ។
សិស្សអាចងាកទៅរកដៃគូម្នាក់ ហើយសង្ខេបអ្វីដែលពួកគេបានរៀនពីខគម្ពីរទាំងនេះ ។ លើសពីនេះ ពួកគេអាចនឹងពិភាក្សាគ្នាអំពីសំណួរខាងក្រោមនេះបានផងដែរ ។
-
តើសាសនាចក្រដែលពិត និងសកម្មរបស់ព្រះយេស៊ូវគ្រីស្ទ ជួយអ្នកឲ្យងាកមករកទ្រង់ទូលសូមការអភ័យទោសដោយរបៀបណា ?
សូមផ្ដល់ឱកាសឲ្យសិស្សបង្ហាញពីអ្វីដែលពួកគេបានរៀនក្នុងអំឡុងមេរៀននេះ ។ វិធីមួយដើម្បីធ្វើរឿងនេះបានគឺឲ្យសិស្សសរសេរការឆ្លើយតបទៅនឹងសាច់រឿងខាងក្រោមនេះក្នុងសៀវភៅកំណត់ហេតុការសិក្សារបស់ពួកគេ ។ នៅពេលបានបញ្ចប់ហើយ សូមពិចារណាអញ្ជើញសិស្សមួយចំនួនឲ្យចែកចាយនូវអ្វីដែលពួកគេបានសរសេរ ។
សូមស្រមៃថា មាននរណាម្នាក់សួរអ្នកពីអ្វីដែលធ្វើឲ្យព្រះវិហាររបស់អ្នកខុសពីព្រះវិហារដទៃទៀត ។ តើអ្នកអាចឆ្លើយតបទៅកាន់បុគ្គលនេះតាមរបៀបមួយ ដែលអាចជួយឲ្យពួកគេចង់ដឹងបន្ថែមទៀតអំពីសាសនាចក្របានយ៉ាងដូចម្ដេច ? អ្នកអាចនឹងរួមបញ្ចូលអ្វីខាងក្រោមនេះទៅក្នុងចម្លើយរបស់អ្នក ៖
-
អ្វីដែលអ្នកបានរៀននៅថ្ងៃនេះមកពីទីបន្ទាល់របស់ព្រះអម្ចាស់អំពីសាសនាចក្ររបស់ទ្រង់ និងអារម្មណ៍របស់អ្នកអំពីទីបន្ទាល់នោះ
-
របៀបដែលអ្នកមានអារម្មណ៍ ឬបានឃើញថា សាសនាចក្រនេះគឺពិត ឬសកម្ម
-
ពរជ័យដែលអ្នកទទួលបានក្នុងនាមជាសមាជិកនៃសាសនាចក្ររបស់ព្រះគ្រីស្ទ
អ្នកអាចនឹងបញ្ចប់ដោយការចែកចាយទីបន្ទាល់ផ្ទាល់ខ្លួនរបស់អ្នកអំពីពរជ័យនៃសាសនាចក្រដ៏ពិត និងសកម្មរបស់ព្រះយេស៊ូវគ្រីស្ទ និងរបៀបដែលការធ្វើជាសមាជិកក្នុងសាសនាចក្របានជួយអ្នកឲ្យខិតកាន់តែទៅជិតព្រះអង្គសង្គ្រោះ ។
ទន្ទេញ
អ្នកអាចនឹងចង់ជួយសិស្សឲ្យទន្ទេញសេចក្ដីយោង និងឃ្លាបទគម្ពីរគន្លឹះអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឹះគឺ « សាសនាចក្រតែមួយដែលពិត ហើយសកម្ម » ។ គំនិតសម្រាប់សកម្មភាពទន្ទេញ មាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។