5-р хичээл: Сургаал ба Гэрээ 1

Сургаал ба Гэрээ 1:30–33

“Цорын ганц үнэн бөгөөд амьд сүм”

Их Эзэн Сургаал ба Гэрээний Өөрийн өмнөх үгд Есүс Христийн шинээр сэргээгдсэн Сүмийн ач холбогдлыг тунхагласан. Тэрээр уг Сүмийг “бүх дэлхийн гадаргуу дээрх цорын ганц үнэн бөгөөд амьд сүм” (Сургаал ба Гэрээ 1:30) хэмээн тунхаглажээ. Энэ хичээл суралцагчдад цорын ганц үнэн сүм болох Есүс Христийн Хожмын Үеийн Гэгээнтнүүдийн Сүмийн ач холбогдлыг мэдрэхэд туслах зорилготой.

Боломжит суралцах үйл ажиллагаа

Их Эзэний Сүм

Хичээлээ эхлүүлэхдээ та дараах асуулт болон үүний дагалдах мэдэгдлийг хуваалцаж, хэд хэдэн суралцагчийг хариултаа хуваалцахад урь.

Яагаад зарим хүн дараах мэдэгдлүүдтэй санал нийлдэг эсвэл нийлдэггүй вэ?

1. Надад сүм хэрэгтэй гэж би бодохгүй байна.

2. Бүх сүм эн тэнцүү үнэн.

3. Есүс Христийн Хожмын Үеийн Гэгээнтнүүдийн Сүм бол цорын ганц үнэн сүм мөн.

Та эдгээр мэдэгдлийн талаарх өөрсдийн үзэл бодлыг дор бүрнээ дүгнэхийг суралцагчдаас хүсэж болно.

Маш олон өөр төрлийн шашин, үзэл бодол байхад үнэнийг олж мэдэх хүндрэлтэй байдаг. Их Эзэн бидэнд юу үнэн гэдэгт итгэлтэй байхад мөн Тэр өөрөө биднээс юу хүсдэгийг мэдэхэд маань туслахын тулд судруудаар дамжуулан удирдамж өгдөг.

Сургаал ба Гэрээний өмнөх үг болгон Их Эзэн “бүх хүмүүст” (Сургаал ба Гэрээ 1:4) сэрэмжлүүлгийг илчилжээ. Захиасныхаа нэг хэсэг болгон Тэрээр Есүс Христийн Хожмын Үеийн Гэгээнтнүүдийн Сүмийн талаар тодорхой мэдэгдэл хийсэн.

Сургаал ба Гэрээ 1:30-ийг уншаад, Их Эзэн Есүс Христийн Хожмын Үеийн Гэгээнтнүүдийн Сүмийг хэрхэн дүрсэлснийг олж мэд.

Сургаал ба Гэрээ 1:30 нь төгс эзэмших судрын хэсэг юм. Суралцагчдыг төгс эзэмших сургаалын судрын хэсгийг амархан олохын тулд онцгойлон тэмдэглэж авахад урьж болно.

• Та юу олж мэдсэн бэ?

“Бүх дэлхийн гадаргуу дээрх цорын ганц үнэн бөгөөд амьд сүм”

Суралцагчдыг дээрх гарчигт байгаа хэллэгийг судар дээрээ тэмдэглэхэд урь. Суралцагчдад үнэн бөгөөд амьд Сүм гэсэн нь ямар утгатай болохыг ойлгоход туслах цаг гаргаж өг. Дараах үйл ажиллагаа нь үүнийг гүйцэтгэх нэг арга зам юм.

Самбар дээр хоёр багана зур. Суралцагчдыг тараах материалыг судалж, Сүм хэрхэн “үнэн” бөгөөд “амьд” болохыг ойлгоход туслах үг хэллэгүүдийг тэмдэглэхэд урь.

Цорын ганц үнэн бөгөөд амьд Сүм

Арван хоёр төлөөлөгчийн чуулгын ахлагч Дэвид А.Бэднар ийн заажээ.

Есүс Христийн Хожмын Үеийн Гэгээнтнүүдийн Сүм бол “бүх дэлхийн гадаргуу дээрх цорын ганц үнэн бөгөөд амьд сүм” (С&Г 1:30) хэмээн Их Эзэн тунхагласан байдаг. Энэ сэргээгдсэн Сүм Аврагчийн Сүм учраас үнэн сүм юм. Аврагч бол “зам, үнэн, амь мөн” (Иохан 14:6). Ариун Сүнсний ажлууд ба бэлгүүдийн учир энэ нь амьд сүм юм. (Дэвид А.Бэднар, “Ариун Сүнсийг хүлээн авах нь,” 2010 оны 10-р сарын Ерөнхий чуулган, 105)

Тэргүүн зөвлөлийн ерөнхийлөгч Даллин Х.Өүкс ийн заасан:

(1) Сургаалын бүрэн байдал, (2) санваарын хүч, (3) Есүс Христийн гэрчлэл гэсэн энэ гурван хүчин зүйл нь Бурхан яагаад үүнийг дэлхий даяарх цорын ганц үнэн бөгөөд амьд Сүм хэмээн тунхагласныг … тайлбарладаг. …

Есүс Христийн сэргээгдсэн сайн мэдээ нь ойлгомжтой, бүх нийтийн, нигүүлсэнгүй бөгөөд үнэн юм. …

Есүс Христийн Хожмын Үеийн Гэгээнтнүүдийн Сүмийн удирдагчид болон зохих ёсоор эрх олгогдсон гишүүд санваарын хүчийг хүлээн авснаар баптисм хүртээх, Ариун Сүнсний бэлэг өгөх мөн ариун ёслолыг түгээх зэрэг шаардлагатай санваарын ёслолуудыг гүйцэтгэх эрх мэдэлтэй болдог.

Бидний хайрт бошиглогч болон Сүмийн бусад бошиглогч, ерөнхийлөгч бүрийн атгадаг санваарын түлхүүрүүд нь түүнд Сүмийн өмнөөс илчлэлт хүлээн авах эрхийг олгодог. Бидний цаг үед шаардлагатай, Их Эзэний үгийг үргэлжлүүлэн дамжуулдаг бошиглогчид бидэнд байгаа учраас энэ Сүм “амьд” юм.

Яагаад цорын ганц, үнэн Сүм болохын гурав дахь шалтгаан бол бидэнд Бурханы мөн чанарын тухай, Түүнтэй харилцах бидний харилцааны тухай илчилсэн үнэнүүд байгаа тул бидэнд Есүс Христийн өвөрмөц гэрчлэл бий. (Dallin H. Oaks, “The Only True and Living Church,” New Era, Aug. 2011, 3–5)

Суралцагчдыг тэмдэглэсэн зүйлээ хуваалцахад урь. Тэд олж мэдсэн зүйлээ самбар дээрх хоёр баганад бичиж болно. Суралцагчдаас тэдний тэмдэглэсэн Түүний Сүмийн хэсэг бүрээр дамжуулан Их Эзэн биднийг хэрхэн адисалдаг болохыг асуу. Христийн талаарх бидний өвөрмөц гэрчлэлийн тухай ерөнхийлөгч Өүксийн санааг ойлгоход нь суралцагчдад туслахын тулд тэднээс бошиглогч Иосеф Смит, Мормоны Ном эсвэл орчин үеийн бошиглогчдоор дамжуулан сурсан Тэнгэрлэг Эцэг, Есүс Христ хоёрын тухай үнэнүүдийн талаар бодохыг хүс. Тэд “Үнэн” гэсэн баганад бодлоо нэмж бичих боломжтой.

Шаардлагатай бол, Есүс Христийн Хожмын Үеийн Гэгээнтнүүдийн Сүмийг “цорын ганц үнэн бөгөөд амьд сүм” гэж тунхагласан Их Эзэний гэрчлэл нь бусад сүм ямар ч үнэнийг агуулдаггүй гэсэн үг биш болохыг ойлгоход нь суралцагчдад тусал.

Есүс Христийн Сүмийн адислалууд

Аврагч уг Сүмийг “цорын ганц үнэн бөгөөд амьд сүм” хэмээн хэлснийхээ дараа яагаад Өөрийн Сүмийг сэргээх болсон зарим шалтгааныг дурджээ. Сургаал ба Гэрээ 1:31–33-ыг уншаад, Их Эзэн юу заасныг олж мэд.

Суралцагчид хамтрагчтайгаа эдгээр шүлгээс сурч мэдсэн зүйлээ нэгтгэн дүгнэж болно. Тэд мөн дараах асуултыг хамтдаа ярилцаж болно.

• Есүс Христийн үнэн бөгөөд амьд Сүм Түүнд хандан өршөөл эрэхэд тань хэрхэн тусалдаг вэ?

Суралцагчдад энэ хичээлийн үеэр олж мэдсэн зүйлээ хуваалцах боломжийг олго. Үүнийг гүйцэтгэх нэг арга нь суралцагчдыг судлах тэмдэглэлдээ дараах жишээнд хариулж бичихэд урих явдал юм. Дуусмагц нь хэд хэдэн суралцагчийг бичсэн зүйлээсээ хуваалцахад урих талаар бодож үз.

Хэн нэгэн танай сүм бусад сүмээс юугаараа ялгардаг болохыг танаас асууж байна гэж төсөөл. Та энэ хүнд Сүмийн талаар илүү ихийг мэдэхийг хүсэж болохуйц байдлаар хэрхэн хариулж болох вэ? Та дараах зүйлийг хариултдаа оруулж болно. Тухайлбал:

1. Өнөөдөр Их Эзэний Сүмийн талаар Түүний өөрийн гэрчлэлээс таны сурсан зүйл болон уг гэрчлэлийн талаарх таны сэтгэгдэл

2. Сүм амьд бөгөөд үнэн гэдгийг мэдэрсэн, ойлгосон арга замууд

3. Христийн Сүмийн гишүүний хувьд хүлээн авсан адислалууд

Та Есүс Христийн үнэн бөгөөд амьд Сүмээр дамжуулан ирдэг адислалуудын талаар мөн үүнд харьяалагдах нь таныг Аврагчтай илүү ойртоход хэрхэн тусалсан талаар гэрчлэлээ хуваалцан дуусгаж болно.

Цээжил

Та энэ хичээлийн турш эшлэл, судрын түлхүүр үг хэллэгийг цээжлэхэд нь суралцагчдад тусалж, дараа дараагийн хичээлүүд дээрээ давтаж болно. Судрын түлхүүр үг хэллэг нь “Цорын ганц үнэн бөгөөд амьд сүм” юм. “Төгс эзэмших сургаалыг давтах үйл ажиллагаа” хэсгийн хавсралт материалуудад цээжлэх үйл ажиллагаанд зориулсан санаанууд бий.

Нэмэлт эх сурвалж

Есүс Христийн Хожмын Үеийн Гэгээнтнүүдийн Сүм цорын ганц үнэн Сүм мөн үү?

Тэргүүн зөвлөлийн ерөнхийлөгч Даллин Х.Өүкс ийн заасан:

Их Эзэний энэ тунхгийн ачаар үүнийг Түүний Сүм—бидний Сүм—”цорын ганц үнэн сүм” гэж нэрлэдэг. Бид ингэж хэлэхдээ заримдаа өөр сүмд явдаг эсвэл өөр гүн ухааныг баримталдаг хүмүүсийг ихээр гомдоох гээд байдаг. Гэвч Бурхан биднийг бусдаас онцгой болгох ямар ч зүйлийг бидэнд заагаагүй. Мэдээж бүх сүм, гүн ухаанд бусдаасаа их, бага ямар нэг хэмжээгээр үнэний хэсгүүд агуулагддаг. Бурхан мэдээж бүх хүүхдэдээ хайртай. Тэрээр сайн мэдээний төлөвлөгөөгөө Өөрийн цаг хугацааны дагуу бүх хүүхдэдээ зориулсан байдаг нь мэдээж. (Dallin H. Oaks, “The Only True and Living Church,” New Era, Aug. 2011, 3)

Бидэнд яагаад Сүм хэрэгтэй вэ?

Арван хоёр төлөөлөгчийн чуулгын ахлагч Д.Тодд Кристоффэрсон ийн заасан.

Бурханы эцсийн зорилго бол биднийг өсгөж хөгжүүлэх явдал гэдгийг ойлгох нь чухал. Бид Түүний бидэнд өгч чадах бүхний “бүрэн байдлыг хүлээн авах хүртлээ ач ивээлээс ач ивээлд” [Сургаал ба Гэрээ 93:13] үргэлжлүүлж байх нь Түүний хүсэл юм. Энэ нь зүгээр л нэг сайн байх эсвэл сүнсний мэдрэмжийг мэдрэхээс илүү их зүйлийг шаарддаг. Үүнд: Есүс Христэд итгэх итгэл, наманчлал, усан болон Сүнсний баптисм, эцсээ хүртэл итгэлтэйгээр тэвчих зэрэг нь орно. Хүмүүн үүнийг тусгаарлагдсан орчинд бүрэн дүүрэн гүйцэтгэж чадахгүй учраас “мөнхийн амьдралд хүргэдэг давчуу бөгөөд нарийн замд” [2 Нифай 31:18] бие биеэ дэмжих гэгээнтнүүдийг бий болгох нь Их Эзэний сүмийг үүсгэх болсон гол шалтгаан юм. (Д.Тодд Кристоффэрсон, “Сүм яагаад хэрэгтэй вэ?,” 2015 оны 10-р сарын Ерөнхий чуулган, 101–102)

Нэмэлт суралцах үйл ажиллагаа

Итгэлийн ес дэх тунхаг

Есүс Христийн Сүм “амьд” гэдэг нь ямар утгатайг илүү дэлгэрүүлж тодорхойлохын тулд суралцагчдыг итгэлийн ес дэх тунхгийг уншихдаа үүнд Сүмийн “амьд” мөн чанарыг хэрхэн тусгасныг олж мэд. Суралцагчид мөн энэхүү итгэлийн тунхаг, Сургаал ба Гэрээ 1:30 хоёрын хооронд холбогдох эшлэл үүсгэж болно. Та Тэнгэрлэг Эцэг амьд бошиглогчдоор дамжуулан үнэнийг үргэлжлүүлэн илчилдэг талаар хэрхэн гэрчлэлтэй болсныг нь суралцагчдаас асууж болно.

Сүмийн тухай гэрчлэл хуваалцах

Суралцагчдыг Сүмийн талаар албан ёсоор гэрчлэлээ хуваалцахад урихыг бод. Та эхлээд Тэргүүн зөвлөлийн ерөнхийлөгч Хэнри Б.Айрингийн хуваалцсан дараах гэрчлэлийг хуваалцаж болно.

“Энэ бол Есүс Христийн үнэн бөгөөд амьд Сүм гэдгийг би чанд гэрчилж байна. Өөрсдийнхөө төлөө ямар нэг зүйлийг мэдэх гэсэн та нарын чин сэтгэлийн залбирлуудад Тэнгэрлэг Эцэг хариулах болно. … Түүгээр ч барахгүй бодгалийг цэвэршүүлж, дэлхий дээрх болон тэнгэр дэх зүйлсийг холбодог энэ Сүмийн дотор гүйцэтгэдэг ёслолууд нь Петр, Иаков, Иохан нарын үед гүйцэтгэдэг байсны адил явагдаж байгаа билээ. Тэдгээр түлхүүр болон ёслол нь бошиглогч Иосеф Смитээр дамжуулан одоо үед бүрэн дүүрэн сэргээгдсэн ба түүний залгамжлагчдаар дамжин уламжлагдан ирсэн. Есүс бол Христ. Тэр амьд. Би үүнийг мэднэ” (Henry B. Eyring, “The True and Living Church,” Liahona, May 2008, 24).

Дараа нь та үнэн бөгөөд амьд Сүмийн талаар гэрчлэлээ хуваалцах хүсэлтэй суралцагч байгаа эсэхийг асууж болно. Мөн та гэрчлэлээ хуваалцах талаар бодож үзээрэй.