Leksyon 8: Joseph Smith—Kasaysayan 1:1–26

Joseph Smith—Kasaysayan 1:15-20

“Ako Nakakita og Duha ka Personahe, Kansang Kahayag ug Himaya Dili Mahulagway”

Agi og dugang sa pagtubag sa pangutana ni Joseph Smith kon hain nga simbahan ang kinahanglan niyang apilan, ang pagpakita sa Langitnong Amahan ug ni Jesukristo nagtudlo kanato sa mga kamatuoran sama sa kinaiya sa Dios nga Kapangulohan ug sa atong relasyon uban Kanila. Kini nga leksiyon makatabang sa mga estudyante nga makasabot sa importante nga mga kamatuoran nga gipadayag mahitungod sa Langitnong Amahan ug ni Jesukristo gikan sa Unang Panan-awon ni Joseph.

Mga Posibleng Kalihokan sa Pagkat-on

Mga pulong nga nakapausab sa kalibotan

Ikonsiderar ang pagsulat sa Pito ka pulong gikan sa Joseph Smith—Kasaysayan 1:15–20 nga nakapausab sa tibuok kalibotan diha sa pisara sa wala pa ang klase. Samtang mosulod sa kwarto ang mga estudyante ug naghulat nga magsugod ang leksiyon, dapita sila sa pagsulay sa pag-ila sa mga pulong gikan niini nga tudling nga mohaom niini nga paghulagway.

Si Presidente Russell M. Nelson sa makausa mitudlo sa usa ka grupo sa mga bata nga ang “pito ka mga pulong nakapausab sa tibuok kalibotan” (diha sa Seven Words That Changed the World [Pito ka Pulong nga Nagpausab sa Kalibotan]” [bidyo], ChurchofJesusChrist.org).

• Unsa sa imong hunahuna kadto nga mga pulong?

Si Presidente Nelson nagpasabot sa kataposang pito ka mga pulong sa Joseph Smith—Kasaysayan 1:17. Basaha kadtong pito ka mga pulong ug ikonsiderar ang pagrekord sa pamahayag ni Presidente Nelson diha sa imong mga kasulatan duol sa kataposan sa bersikulo.

Ang Joseph Smith—Kasaysayan 1:15–20 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali nila kining makit-an.

Pagdapit og usa ka boluntaryo sa pagsulti sa klase kon kinsa ang misulti niining pito ka mga pulong, si kinsa ang Iyang gipasabot, ug kang kinsa Siya namulong.

Ikonsiderar ang paghatag sa mga estudyante og panahon sa paghunahuna pag-ayo ug sa pagpakigbahin sa ilang mga tubag sa mosunod nga mga pangutana.

• Sa unsang mga paagi sa imong hunahuna kadtong pito ka mga pulong nakapausab sa kalibotan? Sa unsang paagi sila nakaapekto sa imong kinabuhi?

Mga kamatuoran nga atong makat-onan gikan sa Unang Panan-awon

Ang mosunod nga seksiyon makatabang sa mga estudyante sa pag-ila ug pagsabot sa daghang mga kamatuoran gikan sa asoy sa Unang Panan-awon, ilabi na sa mga kamatuoran mahitungod sa Langitnong Amahan, ni Jesukristo, ug sa Ilang Simbahan.

Ikonsiderar ang pagdrowing og upat ka porma og tawo nga stick [stick figure] diha sa pisara, ang matag usa adunay bula sa hunahuna [thought bubble] nga adunay usa sa mosunod nga mga pangutana. (Mobati nga gawasnon sa paggamit og nagkalainlaing mga pangutana nga ang mga estudyante sa imong klase mahimong aduna mahitungod sa Dios o sa Iyang Simbahan.) Bahina ang mga estudyante ngadto sa mga grupo, nga ang matag grupo mangita diha sa mga bersikulo 15–20 sa mga tubag sa usa sa mga pangutana. Ipasulat sa usa ka representante gikan sa matag grupo ang mga numero sa bersikulo nga ilang nakaplagan nga makatabang sa pagtubag sa ilang pangutana tapad sa bula sa hunahuna [thought bubble] diha sa pisara.

Basaha ang Joseph Smith—Kasaysayan 1:15–20, mangita kon unsaon kaha nimo pagtubag ang mosunod nga mga pangutana sa usa ka tawo, gamit kini nga asoy:

• Nasayod ba ang Dios kanato?

• Namulong ba ang Dios sa mga tawo sa atong panahon?

• Importante ba kon unsa nga simbahan kita nahisakop? Ngano man?

• Posible ba nga mahibaloan kon unsa ang tinuod? Sa unsang paagi?

Dapita ang mga grupo sa pagpakigbahin sa klase nganong napilian nila ang mga bersikulo nga ilang gipili aron sa pagtubag sa ilang pangutana.

Ikonsiderar ang pagpangutana og follow-up nga mga pangutana samtang ang mga estudyante mopakigbahin, sama niini: “Unsa pa ang inyong namatikdan niini nga tudling nga importante nga masabtan sa mga tawo karon?” “Unsa ang ubang kasagarang sayop nga mga pagtuo mahitungod sa Dios ang gitabangan pagklaro sa Unang Panan-awon?” “Ngano kaha sa imong hunahuna nga ang Dios nga Amahan personal man nga mopakita aron sa pagsugod sa Pagpahiuli sa ebanghelyo?” “Unsa ang atong makat-onan gikan sa giunsa pagpaila sa Langitnong Amahan si Jesukristo ngadto ni Joseph diha sa bersikulo 17?”

Mahimo nimong ipakigbahin ang mga pamahayag gikan sa seksiyon sa “Dugang nga mga Kapanguhaan” aron suportahan ang mga kamatuoran nga gipakigbahin sa mga estudyante o aron matabangan sila nga makakita sa mga kamatuoran nga wala nila madiskobrehi sa ilang kaugalingon.

Daghang mga asoy sa Unang Panan-awon

Ang ubang mga tawo nabalaka sa dihang ilang nahibaloan nga si Joseph Smith mipakigbahin og talagsaon nga mga detalye sa Unang Panan-awon sa nagkalainlaing mga okasyon sa dihang naghulagway sa iyang kasinatian. Tabangi ang mga estudyante nga makasabot nga kini usa ka panalangin nga kita adunay daghang mga asoy niining mahimayaong panan-awon. Ang pagpasabot sa unod sa mosunod nga parapo mahimong makatabang.

Aduna usay usa ka ideya diha sa seksiyon nga “Dugang nga mga Kalihokan sa Pagkat-on” nga tingali makatabang.

Girekord ni Joseph Smith ang asoy sa Unang Panan-awon diha sa Joseph Smith—Kasaysayan niadtong 1838 isip kabahin sa opisyal nga kasaysayan sa Simbahan nga imantala ngadto sa kalibotan. Gipanalanginan usab kita nga adunay ubang mga asoy sa Unang Panan-awon—ang tulo niini gisulat o gidiktar ni Joseph. Ang matag asoy giandam sa nagkalainlaing mga panahon alang sa nagkalainlaing mga tawo ug, busa, gihatagan og gibug-aton ang nagkalainlaing mga aspeto sa iyang kasinatian. Sama pananglit, sa 1835 nga asoy ni Joseph atong nahibaloan nga nakakita usab siya og mga anghel, samtang sa iyang 1832 nga asoy gisulti niya kini aron ihulagway ang resulta sa pagkaanaa sa presensiya sa Dios: “Ang akong kalag napuno sa gugma, ug sulod sa daghang mga adlaw ako nagmaya uban sa dakong kalipay” (“Joseph Smith’s Accounts of the First Vision,” josephsmithpapers.org; tan-awa usab ang Gospel Library nga app).

• Unsa ang gitudlo kanimo sa epekto sa Ilang pagbisita kang Joseph mahitungod sa Langitnong Amahan ug ni Jesukristo?

Ang matag asoy nagpanalangin kanato og talagsaon nga mga detalye, apan ang tanan miuyon sa mahinungdanong kamatuoran nga si Joseph Smith mipaabli sa langit ngadto kaniya ug nakakita og balaanong mga mensahero, lakip ang Dios nga Amahan ug si Jesukristo.

Ikonsiderar ang paghatag sa mga estudyante og pipila ka minuto sa pagpangita sa seksiyon nga “Ang mga Gisugilon ni Joseph Smith mahitungod sa Unang Panan-awon” diha sa Lirarya sa Ebanghelyop nga app. Makita nila kini pinaagi sa pagpili sa “Librarya,” dayon “Kasaysayan sa Simbahan,” dayon “Unang Panan-awon.” Mahimong maghimo ang mga estudyante og mga grupo, nga ang matag estudyante mangita og nagkalainlaing mga asoy alang sa dugang nga mga kamatuoran mahitungod sa Langitnong Amahan ug ni Jesukristo.

Ang mga estudyante mahimo usab nga mangita og dugang mga kamatuoran diha sa bidyo nga “Ask of God: Joseph Smith’s First Vision” (6:35), anaa sa ChurchofJesusChrist.org. Kini nga bidyo naglakip sa mga detalye gikan sa matag usa sa mga asoy ni Joseph Smith.

Magpunting sa Langitnong Amahan ug kang Jesukristo: Alang sa dugang nga pagbansay sa mga pangutana nga nagdapit sa mga estudyante sa pagkonsiderar unsay ilang nakat-onan mahitungod sa Langitnong Amahan ug ni Jesukristo, tan-awa ang pagbansay nga giulohan og “Tabangi ang mga tigkat-on nga makaila sa gugma, gahom, ug kaluoy sa Ginoo diha sa ilang kinabuhi” nga makita sa Pagpalambo sa mga Kahanas sa Pagtutok diha ni Jesukristo.

• Unsa pa ang gitudlo niini nga mga asoy mahitungod sa Langitnong Amahan, ni Jesukristo, ug sa Ilang Simbahan nga mapasalamaton kang mahibalo?

Ikonsiderar ang pagdapit sa mga estudyante sa pagtapos sa leksiyon pinaagi sa pagrekord diha sa ilang mga journal sa pagtuon sa usa ka kamatuoran nga ilang nakat-onan gikan sa Unang Panan-awon ni Joseph Smith nga importante diha kanila ug ngano. Pagdapit og mga boluntaryo nga mopakigbahin sa klase unsay ilang gisulat.

Isag-ulo

Mahimo nimong tabangan ang mga estudyante sa pagsag-ulo sa pakisayran ug sa mahinungdanon nga hugpong sa mga pulong sa kasulatan sa Joseph Smith—Kasaysayan 1:15–20 ug dayon irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Si Joseph Smith ‘nakakita og duha ka Personahe, kansang kahayag ug himaya dili mahulagway.’” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsa nga mga kamatuoran ang atong makat-onan gikan sa pagpakita sa Langitnong Amahan ug ni Jesukristo ngadto kang Joseph Smith?

Si Elder Adilson de Paula Parrella sa Seventy mitudlo:

Usa ka importanteng kamatuoran nga atong nakat-onan gikan sa Unang Panan-awon ug ni Propeta Joseph Smith mao nga ang Dios nagtawag og mga propeta, manalagna, ug tigpadayag aron sa pagtudlo, paggiya, pagpasidaan, ug pagpangulo kanato. (Adilson de Paula Parrella, “Mahinungdanong mga Kamatuoran—Nagkinahanglan sa Atong Paglihok,” Liahona, Nob. 2017, 115)

Si Presidente M. Russell Ballard sa Korum sa Napulog Duha ka Apostoles mipasabot:

Si Joseph nakaamgo nga ang Biblia wala magsulat sa tanang tubag sa mga pangutana sa kinabuhi; hinoon, kini nagtudlo sa mga katawhan unsaon nila pagkakita sa mga tubag sa ilang mga pangutana pinaagi sa pagpakigsulti direkta sa Dios pinaagi sa pag-ampo. (M. Russell Ballard, “Kita Dili Ba Mopadayon sa Hilabihan ka Mahinungdanon nga Katuyoan?,” Liahona, Mayo 2020, 9)

Si Elder Patricio M. Giuffra sa Seventy mipakigbahin unsay iyang nakat-onan samtang ang mga misyonaryo mitudlo kaniya mahitungod sa Unang Panan-awon ni Joseph Smith:

Atol niadto nga leksiyon, ang Espiritu mipamatuod kanako sa pipila ka kamatuoran.

Una, ang Dios maminaw sa sinsero nga mga pag-ampo sa tanan Niyang mga anak, ug nga ang langit abli ngadto sa tanan—dili lamang sa pipila.

Ikaduha, ang Dios Amahan, si Jesukristo, ug ang Espiritu Santo tulo ka managlahi nga mga binuhat, nagkahiusa sa katuyoan Nila nga “ang pagpahinabo sa pagka-imortal ug sa kinabuhi nga dayon sa tawo” [Moises 1:39].

Ikatulo, gilalang kita diha sa panagway sa Dios. Ang atong Langitnong Amahan ug ang Iyang Anak, si Jesukristo, adunay lawas nga unod ug mga bukog sama kanato, apan Sila nahimaya ug nahingpit, ug ang Espiritu Santo usa ka personahe sa espiritu.

Ika-upat, pinaagi ni Joseph Smith, si Jesukristo mipahiuli sa Iyang ebanghelyo ug tinuod nga Simbahan ngadto sa yuta. (Patricio M. Giuffra, “Usa ka Matinud-anon nga Pagpangita Nagantihan,” Liahona, Nob. 2021, 23)

Joseph Smith—Kasaysayan 1:19. Sa unsang paagi ang Langitnong Amahan nagpanalangin kanato og “pagkadiosnon” pinaagi sa Iyang gipahiuli nga Simbahan?

Si Elder Neil L. Andersen sa Korum sa Napulog Duha ka Apostoles mipasabot:

Isip atong mahigugmaon nga Amahan, Siya mihatag kanato og mga ordinansa nga makatabang kanato aron mobati sa Iyang gahom diha sa atong kinabuhi—ang gahom sa pagkadiosnon.

Hunahunaa kini nga kasulatan: “Diha sa mga ordinansa … , ang gahom sa pagkadiosnon gipakita” (Doktrina ug mga Pakigsaad 84:20).

Ania ang upat ka ordinansa ug mga panalangin nga nagdapit niana nga gahom diha sa imong kinabuhi. …

Una, kita mobati sa gahom sa pagkadiosnon pinaagi sa sakramento. …

Ikaduha, makadawat kita og giya ug gahom gikan sa Dios pinaagi sa pagtambong sa templo. …

Ang ikatulo nga butang nga magdapit sa gahom sa Dios diha sa imong kinabuhi mao ang imong patriyarkal nga panalangin. …

Sa kataposan, gusto kong mopahinumdom kanatong tanan bahin sa gahom nga modagayday sa atong kinabuhi pinaagi sa mga panalangin sa pagkapari gikan sa takos nga mga tighupot sa pagkapari. (Neil L. Andersen, “Ang Gahom sa Pagkadiosnon pinaagi sa mga Ordinansa ug mga Panalangin sa Pagkapari,” Alang sa Kalig-on sa mga Kabatan-onan, Ago. 2021, 10–13)

Dugang nga mga Kalihokan sa Pagkat-on

Joseph Smith—Kasaysayan 1:20. “Ako nakahibalo sa akong kaugalingon”

Isulat ang mga pulong nga “Ako nakahibalo sa akong kaugalingon” diha sa pisara ug dapita ang mga estudyante sa pagmarka niini diha sa bersikulo 20. Hangyoa ang mga estudyante sa pagsulat diha sa gagmay nga mga piraso sa papel sa mga kamatuoran mahitungod sa Dios ug sa ebanghelyo nga ilang nakat-onan sa ilang kaugalingon ug ipapasa kini. Tugoti ang mga estudyante sa pagpili kon isulat ba nila ang ilang ngalan sa papel o dili nalang magpaila. Basaha ang pipila ka mga papel ngadto sa klase. Dapita ang mga estudyante sa pagpakigbahin sa kalainan nga nahimo niini diha sa ilang kinabuhi sa dihang nakat-on sila og piho nga mga kamatuoran sa ilang kaugalingon.

Daghang mga asoy sa Unang Panan-awon

Sa dili pa ipaila ang daghang mga asoy sa Unang Panan-awon, tabangi ang mga estudyante nga makaamgo nga normal lang ang paghatag og gibug-aton sa nagkalainlaing mga detalye kon mopakigbahin sa samang tinuod nga asoy sa nagkalainlaing mga panahon ug ngadto sa nagkalainlaing mga tawo. Mahimo nimong dapiton ang mga estudyante sa pagpakigbahin uban sa usa ka pares mahitungod sa ilang paboritong bakasyon, ilang bunyag, o ubang makahuloganong kasinatian. Dayon dapita sila sa pagpakigbahin sa samang kasinatian ngadto sa laing pares, niining higayona maglakip og dugang tinuod nga mga detalye.

Dapita ang usa ka estudyante sa pagsulti ngadto sa klase mahitungod sa kasinatian sa iyang pares. Dayon dapita ang laing tawo nga nakadungog sa samang kasinatian sa pagdugang og mga detalye nga gisulti ngadto kaniya. Hisgoti kon sa unsang paagi ang pagkahibalo sa mga detalye gikan sa duha ka mga asoy naghatag kanila og mas kompleto nga pagsabot sa kasinatian.

Tabangi ang mga estudyante nga ikonektar ang mga kamatuoran diha sa ilang kinabuhi

Sa paingon na sa pagtapos sa leksiyon, dapita ang mga estudyante sa pagpakigbahin hain nga kamatuoran gikan sa panan-awon ni Joseph ang ilang gihunahuna nga labing gikinahanglan nga mahibaloan sa mga tin-edyer ug kon ngano. Hangyoa sila sa pagpakigbahin kon sa unsang paagi nga ang pagkahibalo niana nga kamatuoran nakahimo o makahimo og kalainan sa ilang mga kinabuhi.

Ang mosunod nga bidyo nagpakigbahin og usa ka kamatuoran nga importante nga mahibaloan sa mga tin-edyer mahitungod sa Langitnong Amahan.

“Sila nagpaduol ngari kanako uban sa ilang mga ngabil”

Pagdrowing og yano nga porma sa usa ka tawo diha sa pisara. Pagdrowing og pana [arrow] nga ngadto paingon sa mga ngabil sa tawo, ug hangyoa ang mga estudyante sa paglista og mga paagi nga kita makaalagad sa Dios pinaagi sa atong mga ngabil (nagpasabot sa atong mga pulong).

Dapita ang mga estudyante sa pagbasa sa Joseph Smith—Kasaysayan 1:19, mangita kon nganong ang ubang mga tawo sa panahon ni Joseph gikonsiderar sa Ginoo nga dunot, bisan og sila mialagad Kaniya pinaagi sa ilang mga ngabil.

Pagdrowing og pana nga ngadto paingon sa kasingkasing sa hulagway diha sa pisara, ug hangyoa ang mga estudyante sa pagpakigbahin og mga paagi nga kita makaduol sa Dios pinaagi sa atong mga kasingkasing.