Leksyon 9: Joseph Smith—Kasaysayan 1:1–26

Joseph Smith—Kasaysayan 1:21–26

“Ako Nakakita og Usa ka Panan-awon … ug Ako Dili Makalimod Niini”

Human sa pagpakigbahin sa iyang kasinatian sa Unang Panan-awon ngadto sa usa ka lokal nga ministro sa simbahan, ang 14-anyos nga si Joseph Smith dali nga nahimong tumong sa pagpanggukod. Kini, hinoon, wala makapakunhod sa iyang pagtuo nga ang Langitnong Amahan ug si Jesukristo mipakita kaniya. Kini nga leksiyon makahatag sa mga estudyante og kahigayonan nga mobati sa Espiritu Santo nga nagpamatuod ngadto kanila nga ang Langitnong Amahan ug si Jesukristo mipakita ngadto ni Propeta Joseph Smith.

Mga Posibleng Kalihokan sa Pagkat-on

Unsay imong bation?

Ikonsiderar ang pagsugod sa klase pinaagi sa pagdapit sa mga estudyante sa pagpamalandong sa ilang kaugalingong mga pagpamatuod nga gitawag sa Dios si Joseph Smith nga mahimong Iyang Propeta. Ang mosunod nga istorya ug mga pangutana makatabang sa pagtuman niini.

Si Presidente Thomas S. Monson (1927–2018) mipakigbahin og asoy sa duha ka mga misyonaryo kinsa gisukmatan mahitungod sa ilang pagpamatuod kang Joseph Smith.

Duha ka [mga misyonaryo] miabot sa panimalay ni Mr. Elmer Pollard. … Gipresentar ang ilang mensahe ug mihangyo kon pwede ba siyang moapil sa pag-ampo. Miuyon siya, sa usa ka kondisyon nga siya maoy mohatag sa pag-ampo.

Ang pag-ampo nga iyang gihatag nakapahingangha sa mga misyonaryo. Miingon siya, “Langitnong Amahan, panalangini kining duha ka walay swerte, wala magiyahi nga mga misyonaryo, nga unta mopauli sila ngadto sa ilang mga panimalay ug dili mag-usik sa ilang panahon sa pagsulti sa mga tawo sa Canada kabahin sa mensahe nga dili gayod katuohan ug kon asa gamay ra kaayo ang ilang nahibaloan.”

Sa ilang pagbarog, giingnan ni Mr. Pollard ang mga misyonaryo nga dili na gayod mobalik pa sa iyang panimalay. Sa ilang pagbiya, mabiaybiayon siyang misulti kanila, “Dili man gani mo makasulti kanako nga mituo gyod mo nga si Joseph Smith usa ka propeta sa Dios!” ug iyang gilamba ang pultahan. (Thomas S. Monson, “Si Propeta Joseph Smith: Magtutudlo Pinaagi sa Ehemplo,” Liahona, Nob. 2005, 69)

Dapita ang mga estudyante sa pagtubag sa mosunod nga mga pangutana diha sa ilang mga journal sa pagtuon. Mahimo kang maghangyo og mga boluntaryo sa pagpakigbahin sa ilang tubag sa ikaduhang pangutana ngadto sa klase.

• Unsa ka masaligon ka nga makapamatuod nga si Joseph gibisita sa Langitnong Amahan ug ni Jesukristo ug gitawag isip propeta?

• Sa unsang paagi nga ang pagkahibalo niana sa imong kaugalingon makaapektar sa imong kinabuhi ug sa imong relasyon sa Dios?

Samtang magtuon ka niini nga leksiyon, hunahunaa unsa ang kamahinungdanon sa Unang Panan-awon nganha kanimo ug sa unsang paagi kini nakapausab o makausab sa imong kinabuhi. Makabaton ka og kahigayonan sa kataposan sa leksiyon sa pagrekord sa imong mga hunahuna diha sa imong journal sa pagtuon.

Ang katinuod sa Unang Panan-awon ni Joseph Smith

Human magpakita ang Langitnong Amahan ug si Jesukristo ngadto kang Joseph Smith, iyang gipakigbahin ang kasinatian ngadto sa usa ka magwawali sa usa sa lokal nga mga simbahan.

Basaha ang Joseph Smith—Kasaysayan 1:21–23, mangita kon giunsa pagsanong sa usa ka magwawali ug sa daghang uban pa sa dihang nakadungog sila mahitungod sa panan-awon ni Joseph.

• Unsa ang mipatigbabaw diha kanimo gikan sa paghulagway ni Joseph sa unsay nahitabo niini nga mga bersikulo?

• Sa unsang mga paagi ka nakasinati og oposisyon sa unsay imong nahibaloan nga tinuod?

• Ngano nga importante nga adunay imong kaugalingong saksi sa kamatuoran kon ang uban nagduda sa imong gisulti?

Basaha ang Joseph Smith—Kasaysayan 1:24–26 ug ikonsiderar ang pagmarka sa mga pulong ug mga hugpong sa mga pulong diin si Joseph nagpamatuod sa kamatuoran sa iyang panan-awon.

• Unsa nga mga kamatuoran ang atong makat-onan gikan niini nga mga bersikulo?

  Mahimong mosulti ang mga estudyante og nagkalainlaing mga kamatuoran. Pasalamati sila sa pagpakigbahin sa ilang nakaplagan. Isulat diha sa pisara ang mosunod nga kamatuoran: Ang Langitnong Amahan ug si Jesukristo, sa pagkatinuod, nagpakita ngadto kang Joseph Smith agig tubag sa iyang pag-ampo.

  Mahimong makatabang nga ilista tapad sa kamatuoran diha sa pisara ang mga pulong ug ang mga hugpong sa mga pulong nga gimarkahan sa mga estudyante. Sa laing paagi, mahimong isulat sa mga estudyante ang mga pulong o ang mga hugpong sa mga pulong diha sa gagmay nga mga palid sa papel ug ipapilit kini diha sa pisara.

• Sumala sa bersikulo 25, sa unsang paagi ang panabot ni Joseph sa Dios nakatabang kaniya nga mobarog nga lig-on sa unsay iyang nahibaloan nga tinuod?

Hatagi ang mga estudyante og kahigayonan sa pagpamalandong ug pagsulat diha sa ilang journal mahitungod sa unsa kamahinungdanon ang Unang Panan-awon ngadto kanila. Mahimo silang mogahin ug 10 ngadto sa 15 ka minuto sa pagbuhat niini. Ang paghatag sa mga estudyante og giya nga kalihokan aron matabangan sila sa pagpamalandong ug pagsulat, sama niadtong gilista sa ubos, makatabang nila nga mobati sa Espiritu Santo nga nagpamatuod ngadto kanila sa Unang Panan-awon. Mahimo nimong ipakita kini nga mga kalihokan ug tugoti ang mga estudyante sa pagpili kon unsay gusto nilang buhaton, o mahimo nimong pilion unsay buhaton ninyong tanan isip usa ka klase. Ang unang duha ka mga kalihokan mahimong maayo nga buhaton isip usa ka klase.

1. Kantaha isip usa ka klase o basaha ang mga pulong sa himno “Unang Pag-ampo ni Joseph Smith” (Mga Himno, no. 21). Ania ang bersiyon sa Tabernacle Choir sa Temple Square nga nanganta sa himno:

2. Tan-awa ang bidyo nga “A Choice Seer Will I Raise Up: Prophet of the Restoration [Usa ka Pinili nga Manalagna Ako Mopasanay: Ang Propeta sa Pagpahiuli]” (4:42), anaa sa ChurchofJesusChrist.org.

3. Isulat ang mga pulong sa Joseph Smith—Kasaysayan 1:16–17 diha sa imong journal, mamalandong pag-ayo sa mga pulong. O kung mahimo, irekord ug paminawa ang imong kaugalingon nga nagbasa niini nga mga pulong pinaagi sa digital nga device.

4. Basaha ang usa ka pakigpulong nga gihatag sa kinatibuk-ang komperensiya mahitungod sa Unang Panan-awon. Ania ang pipila ka mga kapilian:

   1. “Ang mga Bunga sa Unang Panan-awon” (Dieter F. Uchtdorf, Liahona, Mayo 2005, 36–38)

   2. “Joseph Smith Did See God” (Joseph F. Merrill, Ensign, Dec. 2015, 70–71)

Ikonsiderar ang pagpakigbahin sa nahabilin nga istorya bahin ni Mr. Pollard nga anaa sa “Si Propeta Joseph Smith: Magtutudlo Pinaagi sa Ehemplo” Liahona, Nob. 2005, 69.

Irekord diha sa imong journal kon unsa kamahinungdanon ang Unang Panan-awon nganha kanimo. Ilakip diha sa imong mga pagpamalandong ang imong pagpamatuod o kon sa unsang paagi paminaw nimo nga ang pagbaton og pagpamatuod sa Unang Panan-awon makapanalangin sa imong kinabuhi.

Kon mahuman na ang mga estudyante, dapita kadtong gustong mopakigbahin sa ilang mga pagpamatuod o mga pagbati mahitungod ni Joseph Smith ug sa Unang Panan-awon. Ikonsiderar ang pagpakigbahin kon giunsa nimo pagkahibalo sa katinuod sa pagbisita sa Langitnong Amahan ug ni Jesukristo ngadto kang Joseph Smith.

Dugang nga mga Kapanguhaan

Unsa ang gipakigbahin sa mga lider sa Simbahan mahitungod sa ilang pagbaton og kaugalingong mga pagpamatuod sa Unang Panan-awon?

Si Presidente Lorenzo Snow (1814–1901) mipamatuod:

Ako nahibalo nga si Joseph Smith usa ka tinuod nga Propeta sa buhing Dios. Ako nagpamatuod nga siya nakakita ug nakigsulti sa Dios ug sa Iyang Anak nga si Jesukristo. Ang Ginoo mihatag kanako niining buhi nga pagpamatuod ug kini kanunay nga lig-on nga pagbati sulod sa akong kalag sukad sa akong pagdawat niini. Karon ako kining ihatag ngadto sa tibuok kalibotan. Ako wala lamang nagpamatuod ngadto sa tanang katawhan nga si Joseph Smith gipadala sa Dios ug nga ang buhat nga gitukod pinaagi kaniya mao ang buhat sa Dios, apan nagpahimangno sa tanang mga kanasoran sa yuta kalabot sa mga panagna nga gihimo pinaagi sa Propeta, ug sa pagpamatuod sa labing ligdong nga paagi nga ako nahibalo niini nga tinuod. (Mga Pagtulun-an sa mga Presidente sa Simbahan: Lorenzo Snow [2012], 321)

Si Presidente David O. McKay (1873–1970) mipamatuod:

Ang pagpakita sa Amahan ug sa Anak ngadto ni Joseph Smith mao ang pundasyon niini nga Simbahan. Ania dinhi ang sekreto sa kalig-on ug kalagsik niini. Tinuod kini, ug ako mosaksi niini. Kanang usa ka pagpadayag nakatubag sa tanang mga pangutana bahin sa siyensya mahitungod sa Dios ug sa iyang balaang personalidad. Nakakita ba kamo unsay gipasabot niana? Unsa ang Dios, natubag na. Ang iyang relasyon ngadto sa iyang mga anak klaro. Ang iyang tinguha sa mga tawo pinaagi sa awtoridad nga gitugyan ngadto sa tawo tataw. Ang kaugmaon sa buhat sigurado. Kini ug ang ubang mahimayaong mga kamatuoran giklaro nianang mahimayaong panan-awon. (Mga Pagtulun-an sa mga Presidente sa Simbahan: David O.Mckay [2003], 113)

Si Presidente Ezra Taft Benson (1899–1994) mipamatuod:

Ang katorse anyos nga batang lalaki mibarog nga matinuoron batok sa kalibotan. Ang Dios nakaila sa iyang anak [Joseph Smith] sa dihang siya gipili. Siya nahibalo nga siya magmaunungon ug magmatinuoron bisan ngadto sa kamatayon. (Mga Pagtulun-an sa mga Presidente sa Simbahan: Ezra Taft Benson [2014], 131)

Si Presidente Gordon B. Hinckley (1910–2008) mipamatuod:

Bag-o lang ko nga naadto sa Palmyra, New York [duol sa dapit diin nadawat ni Joseph Smith ang Unang Panan-awon]. Sa mga nanghitabo didtong dapita, ang usa ka tawo kinahanglan gayod nga moingon: “Posibleng nahitabo gayod kining mga butanga o wala. Dili mahimo kana nga duha ka hunahuna puro tinuod.”

Ug dayon ang tingog sa hugot nga pagtuo mihunghong: “Tanan kini nahitabo. Nahitabo kini sama sa iyang giingon nga kini nahitabo.” (Mga Pagtulun-an sa mga Presidente sa Simbahan: Gordon B. Hinckley: [2016], 172)

Dugang nga mga Kalihokan sa Pagkat-on

Bidyo: “Origin”

Ikonsiderar ang paggamit sa bidyo nga ““Origin” (4:57) aron sa pagtabang sa mga estudyante nga makasabot kon unsaon nila pag-angkon o pagpalawom sa ilang hugot nga pagtuo nga ang Langitnong Amahan ug si Jesukristo mipakita ngadto ni Propeta nga si Joseph Smith.

Bidyo: “Sacred Grove Historic Site, Part 1: The First Vision”

Aron matabangan ang mga estudyante nga mobati kon daw unsa kaha ang maana sa Sagrado nga Kakahoyan ug mahatagan ang Espiritu Santo og oportunidad sa pagpamatuod ngadto sa mga estudyante sa unsay nahitabo didto, mahimo nimong ipasalida ang bahin lamang o ang tibuok bidyo nga: “Sacred Grove Historic Site, Part 1: The First Vision” (10:57). Aron sa pagtan-aw sa piho nga bahin sa bidyo nga naghulagway sa Unang Panan-awon, pagsugod sa bidyo sa time code 4:55.

Joseph Smith—Kasaysayan 1:26

Ang laing paagi sa paghisgot niini nga bersikulo mao ang pagtan-aw niini isip usa ka ehemplo sa paglihok inubanan sa hugot nga pagtuo. Niini nga punto sa iyang kasaysayan, wala mahibalo si Joseph kon sa unsang paagi mahitabo ang Pagpahiuli. Nasayod siya nga nakakita siya og usa ka panan-awon nga nagmando kaniya sa dili pagpasakop sa bisan hain sa ubang mga simbahan, ug siya nasayod nga siya maghulat og dugang nga panudlo. Ikonsiderar ang pagdapit sa mga estudyante sa pagtandi sa Joseph Smith—Kasaysayan 1:26 ngadto sa parapo 7 sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023), mangita sa pagkaparehas. Kini nga pamahayag gikan sa pakigpulong ni Elder Neil L. Andersen nga “Mga Espirituhanong Panumduman nga Angay Hinumduman” mahimo usab nga mahinungdanon.

Sa iyang pait nga mga oras, gihinumdoman ni Joseph ang hapit duha na ka dekadang milabay nga kasiguradoan sa gugma sa Dios kaniya ug ang mga hitabo nga mihangop sa dugay nang gitagna nga Pagpahiuli. Sa pagpamalandong sa espirituhanon niyang panaw, miingon si Joseph: “Dili nako mabasol si bisan kinsa sa dili pagtuo sa akong kasaysayan. Kon ako wala makasinati unsay akong nasinati, mismo ako dili motuo niini.”

Ang maong mga kasinatian tinuod, ug wala siya makalimot o molimod niini, hilom niyang gipamatud-an ang iyang panghimatuod samtang padulong siya sa Carthage. “Ako moadto sama sa usa ka karnero ngadto sa ihawanan,” “apan ako malinawon ingon sa kabuntagon sa ting-init; ako adunay tanlag nga walay sala ngadto sa Dios ug ngadto sa tanan nga mga tawo.” (Neil L. Andersen, “Mga Espirituhanong Panumdoman nga Angay Hinumdoman,” Liahona, Mayo 2020, 18-19)

Pagbaton og pagpamatuod kang Joseph Smith ug sa Unang Panan-awon

Aron matabangan ang mga estudyante nga makabaton og pagpamatuod sa Unang Panan-awon, mahimo nimong hatagan ang matag estudyante og kopya niini nga pamahayag ni Elder Neil L. Andersen sa Korum sa Napulog Duha ka Apostoles. Dapita sila sa pagmarka sa mga butang nga ilang nasinati ug sa paglinya ngadto sa mga margin sa papel diin sila makasulat og mubo nga mga deskripsiyon sa ilang mga kasinatian.

Ang pagpamatuod bahin ni Propeta Joseph Smith moabot nga lahi sa matag usa nato. Mahimong moabot kini samtang nagluhod kamo sa pag-ampo, naghangyo sa Dios sa pagmatuod nga siya tinuod nga propeta. Mahimong moabot kini samtang nagbasa kamo sa asoy sa Propeta bahin sa Unang Panan-awon. Usa ka pagpamatuod mahimong motuhop diha sa inyong kalag samtang magbalik-balik kamo og basa sa Basahon ni Mormon. Mahimong moabot kini samtang magpamatuod kamo bahin sa Propeta o samtang magbarog kamo sa templo ug makaamgo nga pinaagi ni Joseph Smith ang balaang gahom sa pagselyo gipahiuli sa yuta. Uban sa hugot nga pagtuo ug tinuod nga katuyoan, ang inyong pagpamatuod kang Propeta Joseph Smith malig-on. Ang pirme nga water balloon nga mopisik gikan sa daplin usahay makapabasa ninyo, apan kini dili gayod makapalong sa inyong nagdilaab nga hugot nga pagtuo. (Neil L. Andersen, “Joseph Smith,” Liahona, Nob. 2014, 30)

Mahimo dayon nimong hisgotan ang mga pangutana sama sa mosunod: Unsa ang nagkalainlaing mga paagi nga imong maangkon o mapalawman ang imong pagpamatuod ni Joseph Smith ug sa Unang Panan-awon? Sa unsang paagi nga ang imong pagpamatuod kang Joseph Smith naapektohan pinaagi sa bisan hain niini nga mga sugyot?