Doktrina ug mga Pakigsaad 2; Joseph Smith—Kasaysayan 1:27–65

Doktrina ug mga Pakigsaad 2; Joseph Smith—Kasaysayan 1:27–65

Kinatibuk-ang Pagpasabot

Tulo ka tuig human ang Unang Panan-awon, si Joseph Smith nagtinguha nga masayod sa iyang kahimtang atubangan sa Dios. Nag-ampo siya sa Dios alang sa giya. Ang anghel nga si Moroni mipakita ug misulti kang Joseph nga ang Dios adunay ipabuhat kaniya. Si Moroni namulong bahin sa bulawan nga mga palid ug mikutlo sa mga panagna sa Biblia nga tabangan ni Joseph Smith nga matuman, lakip ang panagna ni Malaquias nga si Elijah mopabati sa mga kasingkasing sa mga anak ngadto sa ilang mga amahan.

Pagtudlo pinaagi sa Espiritu: Ang Espiritu Santo nagsaksi sa kamatuoran, Siya nagpamatuod kabahin ni Kristo, ug Siya nag-usab sa mga kasingkasing. Pinaagi lamang sa Espiritu Santo nga matuman nato ang labing taas nga tumong sa pagtudlo sa ebanghelyo—ang pagtukod og hugot nga pagtuo diha ni Jesukristo ug pagtabang sa uban nga mas mahisama Kaniya. Pangita og mga paagi sa pagdapit sa Espiritu Santo sa pagbuhat sa Iyang mga tahas. Alang sa dugang pa kon giunsa kini pagbuhat sa Manluluwas, tan-awa ang seksiyon nga “Ang Manluluwas Mihatag og mga Kahigayonan alang sa mga Tawo nga Matudloan pinaagi sa Espiritu Santo” diha sa Pagtudlo sumala sa Pamaagi sa Manluluwas. Ang paghatag sa mga estudyante og mga pagtimbang-timbang sa kaugalingon mahimong usa ka paagi sa pagbuhat niini. Makita usab nimo ang usa ka ehemplo kon unsaon sa pagbuhat niini diha sa leksiyon karong semanaha nga giulohan nga “Doktrina ug mga Pakigsaad 2”.

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Joseph Smith—Kasaysayan 1:27–50

Katuyoan sa leksiyon: Kini nga leksiyon makatabang sa mga estudyante nga mobati sa kamahinungdanon sa calling ni Joseph Smith isip propeta sa Dios.

• Pagpangandam sa estudyante: Dapita ang mga estudyante sa pagtambong nga andam sa pagpakigbahin og makahuloganon nga mga kamatuoran nga gipadayag tungod kay ang Dios mitawag kang Joseph Smith aron mahimong propeta.

Joseph Smith—Kasaysayan 1:50–65

Katuyoan sa leksiyon: Kini nga leksiyon gituyo aron matabangan ang mga estudyante nga makasabot nga ang Ginoo motabang kanila sa pagtuman sa buluhaton nga Iyang gisugo kanila nga buhaton.

• Pagpangandam sa estudyante: Dapita ang mga estudyante sa pagtambong sa klase nga maghunahuna kon sa unsang paagi sila makabenepisyo sa tabang sa Manluluwas sa ilang kinabuhi.

• Sulod nga ipakita: Mahimo nimong kopyahon ang tsart diha sa pisara sa dili pa ang klase.

Doktrina ug mga Pakigsaad 2

Katuyoan sa leksiyon: Kini nga leksiyon makatabang sa mga estudyante sa pagbuhat sa pagdapit sa Ginoo nga ang ilang mga kasingkasing mobati ngadto sa ilang mga katigulangan.

• Pagpangandam sa estudyante: Mahimong mangandam ang mga estudyante sa pagpakigbahin mahitungod sa usa ka tawo gikan sa ilang kaugalingong kasaysayan sa pamilya. Mahimo nilang gamiton ang tab nga “Mga Panumdoman” diha sa FamilySearch aron sa pagpangita og istorya mahitungod sa usa ka paryente sa ilang family tree.

• Mga Materyal: Pahinumdomi ang mga estudyante nga mag-andam og username ug password aron maka-log in sa FamilySearch.org. Mahimo nilang gamiton ang ilang impormasyon sa pag-log-in sa account sa Simbahan aron makagamit sa FamilySearch.org. Paghatag og papel ug gunting aron makahimo og kadena nga papel.