Leksyon 11: Joseph Smith—Kasaysayan 1:27–65

Joseph Smith—Kasaysayan 1:50–65

Nakuha ni Joseph Smith ang Bulawan nga mga Palid

Ang Ginoo mihatag kang Joseph Smith og importante nga buluhaton nga pagabuhaton. Siya gisugo sa pagkuha sa bulawan nga mga palid gikan sa Bungtod sa Cumorah, paghubad sa rekord, ug pagpatungha sa Basahon ni Mormon. Ang Ginoo mihatag og paagi sa pagtabang kang Joseph nga matuman kining dakong buluhaton. Sama nga ang Ginoo mitabang ni Joseph sa pagtuman sa buluhaton nga gihatag kaniya, ang Ginoo makatabang usab kanato. Kini nga leksiyon makatabang sa mga estudyante nga makasabot nga ang Ginoo motabang kanato sa pagtuman sa buluhaton nga Iyang gisugo kanato nga pagabuhaton.

Mga Posibleng Kalihokan sa Pagkat-on

Mga anghel motabang kanato sa paghimo sa buluhaton sa Dios

Ikonsiderar ang pagbutang sa mga estudyante diha sa gagmay nga mga grupo aron sa paglista og daghang mga higayon kutob sa ilang mahimo sa mga panahon diin ang mga anghel mipakita sa mga tawo. Sunod, mahimo nilang ipamubo kon nganong mipakita ang matag anghel.

• Unsay imong nahibaloan kabahin kon nganong nagpadala ang Dios og mga anghel?

Basaha ang mosunod nga pamahayag gikan ni Elder Jeffrey R. Holland sa Korum sa Napulog Duha ka Apostoles, mangita og rason nganong ang Dios nagpadala og mga anghel.

Gikan sa sinugdanan hangtod ngadto sa mga dispensasyon, ang Dios naggamit sa mga anghel sa paghatod sa gugma ug kahingawa alang sa Iyang mga anak. … Naghisgot ako dinhi og langitnong tabang, sa mga anghel nga gipadala aron sa pagpanalangin kanato sa panahon sa panginahanglan. Apan, kon maghisgot kita niadtong mga gihimong mga instrumento sa Dios, kita napahinumduman nga dili tanang mga anghel gikan sa pikas bahin sa belo. Ang uban kanila nakauban ug nakaistorya nato—dinhi, karon, sa matag adlaw. (Jeffrey R. Holland, “Ang Pagpangalagad sa mga Anghel,” Liahona, Nob. 2008, 29–30)

Samtang magtuon ang mga estudyante niini nga leksiyon, mahimo nimo silang tabangan nga makakita nga ang parehong mga anghel gikan sa pikas nga bahin sa tabil ug ang mortal nga mga indibidwal mitabang kang Joseph Smith sa pagtuman sa gipabuhat sa Dios. Mahimo ka usab mopamatuod nga ang mga anghel makatabang sa imong mga estudyante sa pagtuman sa gipabuhat sa Dios ngadto kanila.

Ang Ginoo mihatag og paagi alang ni Joseph Smith sa pagtuman sa Iyang buhat

Aron matabangan ang mga estudyante nga makakita og mga paagi nga ang Ginoo mihatag og tabang ngadto ni Joseph Smith, ikonsiderar ang paggamit sa mosunod nga tsart. Mahimo nimong ipakita kini diha sa pisara ug dapita ang mga estudyante sa pagkopya niini diha sa ilang mga journal sa pagtuon. Ipakita kon unsaon kini pagtubag pinaagi sa pagkompleto sa unang laray isip usa ka klase. Samtang gikompleto sa mga estudyante ang tsart, tabangi sila sa pag-ila sa kamatuoran nga ang Ginoo naghatag og paagi sa pagtabang kanato nga matuman ang Iyang buhat.

Pakisayran	Kinsa ang gipadala sa Ginoo aron sa pagtabang kang Joseph? Giunsa nila pagtabang si Joseph?
Pakisayran Joseph Smith—Kasaysayan 1:33
Pakisayran Joseph Smith—Kasaysayan 1:35
Pakisayran Joseph Smith—Kasaysayan 1:54
Pakisayran Joseph Smith—Kasaysayan 1:57; Doktrina ug mga Pakigsaad 25:5–6
Pakisayran Joseph Smith—Kasaysayan 1:61–62

Basaha pagbalik ang Joseph Smith—Kasaysayan 1:33 ug ilha ang anghel nga unang gipadala sa Ginoo aron sa pagtabang kang Joseph.

Sa higayon nga hisgotan sa mga estudyante si Moroni, pangutan-a sila kon unsay ilang nahibaloan mahitungod kon giunsa niya pagtabang si Joseph Smith sa pagtuman sa buluhaton nga gihatag sa Ginoo kaniya. Kon dili hisgotan sa mga estudyante ang upat ka mga pagbisita ni Moroni atol sa gabii sa Septiyembre 21, 1823, ug kon unsay iyang gitudlo, ikonsiderar ang pagrebyo niini nga panghitabo ngadto kanila (tan-awa sa miaging leksiyon). Ang pagdugang sa mosunod nga sulod [content] sa unsay gipakigbahin sa mga estudyante mahimong makatabang usab.

Sa misunod nga tulo ka tuig sa Septiyembre 22, nakigkita si Joseph Smith ni Moroni sa samang dapit ug nakadawat og dugang nga panudlo mahitungod sa kamahinungdanon sa rekord ug sa buluhaton nga gipabuhat sa Dios ngadto kaniya (tan-awa sa Joseph Smith—Kasaysayan 1:33–34). Gitudloan usab ni Moroni si Joseph og dugang mahitungod sa “pagabuhaton sa Ginoo, ug sa unsaon” niini pagkahitabo (Joseph Smith—Kasaysayan 1:54). Niining panahona, nahimamat ug giminyoan ni Joseph si Emma Hale (tan-awa sa Joseph Smith—Kasaysayan 1:57–58).

Niadtong Septiyembre 22, 1827, nadawat ni Joseph ang bulawan nga mga palid gikan ni anghel Moroni.

Dapita ang mga estudyante sa pagpakigbahin kon unsay ilang idugang sa unang laray sa tsart. Mahimong tubagan sa mga estudyante ang ubang mga laray sa tsart nga magtinagsa o diha sa mga grupo. Human makompleto ang tsart, dapita ang mga estudyante sa pagpakigbahin kon nganong gikinahanglan ni Joseph nga makadawat niini nga tabang.

Pasidaan ni Moroni ngadto kang Joseph

Basaha ang Joseph Smith—Kasaysayan 1:59–60 ug pangitaa ang pasidaan ug saad nga gihatag ni Moroni kang Joseph Smith sa gabii nga iyang nadawat ang mga palid.

• Ngano nga gipasidan-an ni Moroni si Joseph nga dili magpabaya sa pagpanalipod sa mga palid?

Ikonsiderar ang pagdapit sa mga estudyante sa pagpakigbahin og mga pananglitan nga tingali pamilyar sila kon sa unsang paagi ang mga tawo misulay sa pagkuha sa mga palid gikan ni Joseph. Mahimo usab nimong hangyoon ang mga estudyante sa pagbasa ug paghisgot sa mga asoy gikan sa Mga Santos, 1:41–47, o basaha ang teksto sa ubos.

Human madawat ang mga palid gikan ni anghel Moroni, gitago kini ni Joseph sa usa ka lungag sa usa ka kahoy aron kini luwas hangtod makakuha siya og kahon nga makandadohan kini. Pagkasunod adlaw, samtang si Joseph Smith nagtrabaho, ang iyang amahan nakadungog sa usa ka grupo sa mga lalaki nga nagplano sa pagkawat sa mga palid. Si Emma miadto aron sa pagpasidaan kang Joseph, ug siya, pinaagi sa Urim ug Thummim, nakakita nga ang mga palid luwas. Nasayod usab siya nga panahon na sa pagkuha sa mga palid gikan sa kahoy aron kini luwas.

“Nagdali nga miadto sa bungtod, nakit-an ni Joseph ang kahoy diin didto gitagoan ang mga palid ug giputos kini pag-ayo sa usa ka sinina. Dayon miagi siya sa kakahoyan ug mipadulong sa ilang balay, ang iyang mga mata alerto sa peligro. …

“Nagbaguod tungod sa gibug-aton sa rekord, si Joseph paspas nga milakaw agi sa kakahoyan kutob sa iyang mahimo. Dunay natumba nga kahoy nga nagbabag sa unahan sa agianan, ug sa iyang paglukso ibabaw niini, mibati siya og kusog nga hapak gikan sa iyang likod. Sa iyang paglingi, nakakita siya og tawo nga nagpaingon kaniya, gigunitan nga daw bunal ang usa ka pusil.

“Hugot nga gisipitan ang mga palid sa iyang usa ka bukton, napatumba ni Joseph ang tawo ug misum-ok siya sa kalibonan. Midagan siya og mga usa ka kilometro sa dihang dunay laing tawo nga mikalit og guho gikan sa luyo sa kahoy ug mibunal kaniya gamit ang pul-an sa iyang pusil. Nakig-away si Joseph sa tawo ug midagan dayon palayo, desperado nga makagawas sa kakahoyan. Apan sa wala pa siya makapalayo dunay ikatulong lalaki nga miatake, kusog nga mibunal nga nakapabarag kaniya. Gamit ang nahabiling kusog, gisukmag ni Joseph ang tawo ug midagan pauli. …

“Human nadala ni Joseph sa balay ang bulawang mga palid, ang mga tigpangita og bahandi naningkamot sa pagkawat niini sulod sa pipila ka semana. Aron magpabiling luwas ang rekord, kinahanglan niya kining ibalhin-balhin og butang, gitagoan ang mga palid ilawom sa halinganan, ilawom sa salog sa talyer sa iyang amahan, ug ilawom sa nagtipun-og nga lugas. Kinahanglang magbantay gayod siya kanunay.

“… Determinado siya nga ampingan ang mga palid, misalig sa saad sa Ginoo nga kon iyang buhaton ang tanan, mapanalipdan kini” (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 44-46, 48).

• Sa unsang mga paagi nga ang mga paningkamot ni Joseph ug “ang kaalam sa Dios” naghiusa sa pagpreserbar sa mga palid?

• Unsa nga mga panabot bahin sa Dios ang imong makuha gikan niini nga asoy?

Ang Ginoo naghatag kanato og tabang aron matuman ang buhat nga Iyang gihatag kanato

• Unsa ang pipila ka mga ehemplo diha sa mga kasulatan sa mga panahon sa dihang ang Ginoo mitabang sa mga tawo sa pagtuman sa buhat nga Iyang gisugo kanila nga buhaton?

  Kon gikinahanglan, dapita ang mga estudyante sa pagtuon sa usa o sa subra pa sa usa sa mosunod nga mga ehemplo:

  • Moises (Exodo 3:15–18; 4:10–17)

  • Nephi (1 Nephi 17:8–13; 18:1–4)

  • Ang Karaang Apostoles (Mateo 28:19–20; Mga Buhat 2:1–6, 41)

• Sa unsa kaha nga mga paagi ang Ginoo makatabang kanimo sa pagtuman sa buhat nga Iyang gihangyo o isugo kanimo nga buhaton?

• Kinsa ang pipila sa mga “anghel” (mortal nga mga indibidwal) sa imong kinabuhi nga imong gibati nga gipadala sa Dios aron sa pagtabang kanimo sa buluhaton sa Ginoo?

Ikonsiderar ang paghatag og pagsaksi sa buhat ni Joseph Smith sa pagpatungha sa Basahon ni Mormon. Mahimo ka usab nga mopakigbahin og usa ka kasinatian kon sa unsang paagi ang Ginoo mitabang kanimo nga matuman ang buhat nga Iyang gihatag diha kanimo. Mahimo ka usab nga modapit og mga estudyante nga buot mohatag og pagsaksi o mopakigbahin og kasinatian.

Dugang nga mga Kapanguhaan

Sama ni Joseph Smith, aduna bay ipabuhat ang Dios kanako?

Si Presidente Russell M. Nelson mitudlo:

Pangutan-a ang inyong Langitnong Amahan, sa pangalan ni Jesukristo, unsa ang Iyang gibati mahitungod kaninyo ug sa inyong misyon dinhi sa yuta. Kon kamo mangayo uban sa tinuod nga katuyoan, sa kadugayan ang Espiritu mohunghong og makapausab sa kinabuhi nga mga kamatuoran diha kaninyo. … Ako mosaad kaninyo nga kon kamo mosugod sa pagkakita bisan daklit lang kon unsay pagtan-aw sa inyong Langitnong Amahan kaninyo ug unsay Iyang gilaoman nga inyong buhaton alang Kaniya, mausab gayod ang inyong kinabuhi! (Russell M. Nelson, “Pagkahimo nga Tinuod nga mga Milenyal” [tibuok kalibotan nga debosyonal alang sa mga young adult, Ene. 10, 2016], broadcasts.ChurchofJesusChrist.org)

Si Sister Elaine S. Dalton, kanhi Kinatibuk-ang Presidente sa Young Women, mitudlo:

Unsa ang gipaabot sa Ginoo nga atong buhaton? Nagpaabot Siya nga atong buhaton ang atong bahin sa kataposang mga yugto sa dili pa ang Iyang pag-anhi. Nagpaabot Siya nga atong sa pagpakita sa atong kaugalingon nga takos nga mobalik ug mopuyo uban Kaniya. Nagpaabot Siya nga kita mahimong sama Kaniya. (Elaine S. Dalton, “Nakaila Siya sa Inyong Pangalan,” Liahona, Mayo 2005, 111)

Ngano nga si Joseph Smith gipasanginlan nga usa ka mangwartahay?

Tan-awa sa Mga Hisgotanan sa Kasaysayan sa Simbahan: Pagpangita og Bahandi

Giunsa paghulagway ang bulawan nga mga palid?

Ang mga palid napuno sa karaang sinulat ug gihugpong sa usa ka kilid sa tulo ka lingin nga metal. Ang matag palid mga unom ka pulgada ang gilapdon, walo ka pulgada ang gitas-on, ug nipis ra. Usa ka porsiyon sa mga palid makita nga daw giselyohan aron walay makabasa niini. (Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 28–29)

Tan-awa sa Mga Hisgotanan sa Kasaysayan sa Simbahan: Bulawan nga mga Palid

Dugang nga mga Kalihokan sa Pagkat-on

Pagtudlo ni Moroni kang Joseph Smith sa Bungtod sa Cumorah

Gamita ang kasayoran sa Mga Santos, 1:28–33, 37–42 aron matabangan ang mga estudyante nga masabtan ang dugang pa nga mga detalye mahitungod sa pagbisita ni Moroni kang Joseph Smith sa Bungtod sa Cumorah. Mahimong moreport ang mga estudyante sa mga pagsulay ni Joseph sa pagkuha og balik sa bulawan nga mga palid ug sa unsang paagi ang mga interbyo ni Moroni nakatabang ni Joseph nga maandam sa pagtuman sa buluhaton nga gisugo sa Ginoo diha kaniya. Mahimo nimong hisgotan kon ngano nga si Joseph wala magmalamposon sa iyang unang mga pagsulay sa pagkuha sa bulawan nga mga palid ug giunsa niya pag-andam ang iyang kaugalingon alang sa importante nga buhat (tan-awa usab ang Mormon 8:14–16).

Ang Basahon ni Mormon mituman sa panagna sa Daang Tugon

Tabangi ang mga estudyante nga makakita kon sa unsang paagi ang pipila sa mga panghitabo nga nagpalibot sa pagtungha sa Basahon ni Mormon gipanagna ni Isaias ug gikutlo ni Nephi. Dapita ang mga estudyante sa pagtuon sa Isaias 29:11–12 ug 2 Nephi 27:9–10, 15–20 ug sa pagpakigbahin kon sa unsang paagi kini nga mga kasulatan may koneksiyon sa unsay nahitabo diha sa Joseph Smith—Kasaysayan 1:70–72.

Aron matabangan ang mga estudyante nga mahanduraw ang pagbisita ni Martin Harris ngadto ni Charles Anthon, ipasalida ang bidyo nga “ A Marvelous Work and a Wonder ” (3:57). Ang mga estudyante mahimong moila kon sa unsang paagi nga kini nga pagbisita mihatag og katumanan sa mga pulong sa karaang mga propeta bahin sa Pagpahiuli sa ebanghelyo ni Jesukristo.

Mga bidyo sa makasaysayanon nga mga dapit sa Simbahan

Mahimo kang mopili nga ipakita ang mga bahin sa pipila ka mga bidyo sa birtuwal nga paglibot sa makasaysayanon nga mga dapit sa Simbahan. Ikonsiderar ang paggamit niini nga mga klip aron sa pagtabang sa mga estudyante sa paghanduraw ug pagsabot sa pipila ka mga panghitabo nga naglibot sa mga kasinatian ni Joseph sa pagkuha ug pagpanalipod sa bulawan nga mga palid.

Kini nga klip nga bidyo nagpamubo sa unang pagbisita ni Joseph didto sa Bungtod sa Cumorah uban sa sunod-sunod nga mga pakigtagbo uban ni Moroni sa wala pa makuha ang mga palid:

Kini nga klip nga bidyo nagpamubo sa tambag ni Alvin ngadto kang Joseph sa wala pa siya motaliwan bahin sa sagrado nga rekord:

Kini nga klip nga bidyo naghulagway sa mga paningkamot ni Joseph sa pagpreserbar sa bulawan nga mga palid:

Kini nga klip nga bidyo naghulagway sa pipila ka asoy nga may kalabotan sa pagkita nila ni Joseph ug Emma ug sa wala madugay, ang pagpangulitawo:

Mga paagi nga gitagana alang kang Joseph Smith sa pagpatungha sa Basahon ni Mormon

Aron matabangan ang mga estudyante nga makat-on og dugang kon sa unsang paagi ang mga indibidwal mitabang kang Joseph Smith nga matuman ang gipabuhat nga pagpatungha sa Basahon ni Mormon, ikonsiderar ang pagbasa sa pipila sa mosunod nga mga kinutlo gikan sa Mga Santos, vol. 1, Ang Sumbanan sa Kamatuoran. Mahimo nimong bahinon ang mga estudyante ngadto sa tulo ka grupo ug i-assign ang matag grupo sa pagbasa og usa sa mga kinutlo. Mahimo dayon nga ipamubo sa usa ka estudyante nga gikan sa matag grupo ang ilang mga nakaplagan ngadto sa klase.

• Moroni (mga pahina 28–30)

• Emma Smith (mga pahina 31–42)

• Martin Harris (mga pahina 43–48)

Mga hulagway sa mga dapit nga gitagoan ni Joseph Smith sa bulawan nga mga palid

Mahimong mainteresado ang mga estudyante nga makakita sa mga dapit diin gitagoan ni Joseph Smith ang bulawan nga mga palid (tan-awa sa Joseph Smith—Kasaysayan 1:59–60). Ikonsiderar ang pagpakita sa mosunod nga mga hulagway: