Leksiyon 12: Doktrina ug mga Pakigsaad 2; Joseph Smith—Kasaysayan 1:27–65

Doktrina ug mga Pakigsaad 2 Joseph Smith—Kasaysayan 1:27–65

Ang Atong mga Kasingkasing Mobati sa Atong mga Katigulangan

Sa dihang si anghel Moroni, usa ka propeta sa Basahon ni Mormon, mipakita kang Joseph Smith, mikutlo siya og pipila ka mga panagna sa kasulatan. Ang usa mao ang pahayag ni Malaquias nga si propeta Elijah mobalik ug “ang mga kasingkasing sa mga anak mobati ngadto sa ilang mga amahan” (Joseph Smith—Kasaysayan 1:38–39). Kini nga leksiyon makatabang sa mga estudyante nga makaapil sa panagna sa Ginoo sa pagpabati sa ilang mga kasingkasing ngadto sa ilang mga katigulangan.

Mga Posibleng Kalihokan sa Pagkat-on

Akong pamilya

Aron matabangan ang mga estudyante sa paghunahuna mahitungod sa ilang mga katigulangan ug kon nganong naghimo kita og kasaysayan sa pamilya, ikonsiderar ang pagdapit sa mga estudyante sa pagbuhat sa mosunod nga kalihokan.

Timan-i: Ang ubang mga estudyante nagsinati og mahagitong mga kahimtang sa pamilya. Mahimong sensitibo niadtong adunay mga kabalaka, sama sa pagkadugtong sa kahangtoran sa ilang mga pamilya o wala makaila sa ilang biolohikal nga mga pamilya.

Mahimong makatabang ang pagpakigbahin sa Dugang nga Kapanguhaan “Sa unsang paagi nga ang buhat sa templo ug kasaysayan sa pamilya makatabang sa pag-ayo sa mga relasyon sa pamilya?”

Isulat ang daghang tawo sa imong kasaysayan sa pamilya kutob sa imong mahinumdoman. Tan-awa kon pila ka henerasyon ang mahimo nimong maapil.

• Sa unsang paagi nga ang imong kinabuhi naimpluwensiyahan niini nga mga indibidwal?

• Unsa ang makahuloganon nga kasinatian nga imong mapakigbahin mahitungod sa usa niini nga mga sakop sa pamilya?

Tabangi ang mga estudyante nga makasabot nga ang pag-apil sa kasaysayan sa pamilya ug buhat sa templo usa ka paagi nga sila makatabang sa pagpahinabo sa plano sa Langitnong Amahan sa paghiusa sa Iyang mga anak sa kahangtoran. Aron matabangan ang mga estudyante sa pagsukod kon unsay ilang gibati karon mahitungod sa pag-apil sa kasaysayan sa pamilya, ikonsiderar ang paggamit sa mosunod nga mga aghat.

Hain niini nga mga pamahayag ang labing nagpakita sa imong gibati mahitungod sa kasaysayan sa pamilya?

• Ganahan ko nga maghimo sa kasaysayan sa pamilya ug nakakita og klaro nga rason sa pagbuhat niini.

• Nasayod ko nga ang kasaysayan sa pamilya importante apan wala mogahin og daghang panahon sa pagbuhat niini.

• Nasayod ko nga ang kasaysayan sa pamilya importante, apan gipasagdan lang nako nga ang ubang mga sakop sa pamilya ang bahala niini.

• Wala gyod ko makakita og klaro nga rason sa pagbuhat sa kasaysayan sa pamilya.

Dasiga ang mga estudyante sa pagsusi kon sa unsang paagi ang ilang mga pagbati mahitungod sa kasaysayan sa pamilya ug sa buhat sa templo maimpluwensiyahan samtang sila magtuon sa Doktrina ug mga Pakigsaad 2.

Pagtudlo pinaagi sa Espiritu: Alang sa dugang nga pagbansay sa paghimo sa pagsukod sa kaugalingon sa mga estudyante, tan-awa ang pagbansay nga giulohan og “Paghimo og mga sitwasyon ug mga oportunidad alang sa mga tigkat-on nga matudloan pinaagi sa Espiritu Santo,” nga makita sa Pagpalambo sa mga Kahanas sa Magtutudlo: Pagtudlo pinaagi sa Espiritu.

Ang pagbalik ni propeta Elijah

Aron paghatag sa konteksto sa Doktrina ug mga Pakigsaad 2, mahimo nimong ipakita ang hulagway ni anghel Moroni nga nagpakita ngadto ni Joseph ug dapita ang mga estudyante sa pagsaysay unsay ilang nahinumdoman mahitungod sa iyang pagbisita. Sa laing paagi, mahimo nimong ipakigbahin ang mosunod nga mga parapo sa imong kaugalingong mga pulong o dapita ang usa ka estudyante sa pagbasa niini og kusog.

Sa dihang mipakita si anghel Moroni ngadto sa 17-anyos nga si Joseph Smith, si Moroni mikutlo sa pipila ka karaan nga mga panagna nga narekord sa Biblia. Kini nga mga panagna mipadayag og dugang mahitungod sa umaabot nga buluhaton ni Joseph ug naglakip sa mga panghitabo nga mahitabo sa dili pa ug human sa Ikaduhang Pag-anhi sa Manluluwas.

Usa ka panagna sa Daang Tugon nga gikutlo ni Moroni mao ang Malaquias 4:5–6. Ang mga pulong ni Moroni narekord diha sa Joseph Smith—Kasaysayan 1:38–39 ug sa Doktrina ug mga Pakigsaad 2, nagpadayag nga si propeta Elijah mobalik sa yuta sa dili pa ang Ikaduhang Pag-anhi sa Manluluwas.

Mahimong mainteresado ang mga estudyante nga mahibalo nga ang pagbalik ni Elijah gihisgotan sa matag usa sa sumbanan nga mga buhat [standard works] (tan-awa sa Malaquias 4:5–6; 3 Nephi 25:5–6; Doktrina ug mga Pakigsaad 2; Joseph Smith—Kasaysayan 1:38–39). Samtang nagbasa ang mga estudyante sa mosunod nga mga bersikulo, tabangi sila sa pagpahatag og kahulogan sa bisan unsang mga pulong ug mga hugpong sa mga pulong nga tingali dili nila masabtan.

Basaha ang Doktrina ug mga Pakigsaad 2, ug pangitaa kon nganong ang pagbalik ni Elijah importante ngadto sa mga anak sa Langitnong Amahan (tan-awa usab diha sa Doktrina ug mga Pakigsaad 128:17–19).

• Unsa ang imong mga pangutana mahitungod niini nga mga bersikulo?

  Ang mosunod makatabang sa pagtubag sa mga pangutana sa mga estudyante mahitungod sa Doktrina ug mga Pakigsaad 2:

  • “[Ang] Pagkapari, pinaagi sa kamot ni Elijah” (bersikulo 1) nagpasabot sa gahom sa pagselyo nga gipahiuli ni Elijah sa Templo sa Kirtland niadtong Abril 3, 1836 (tan-awa usab sa Doktrina ug mga Pakigsaad 110:13–16).

  • “Ang mahinungdanon ug makalilisang nga adlaw sa Ginoo” (bersikulo 1) nagpasabot sa Ikaduhang Pag-anhi sa Manluluwas.

  • “[Ang] mga saad nga gihimo ngadto sa mga amahan” (bersikulo 2) mahimong nagpasabot sa Abrahamic Covenant ug sa mga saad nga gihimo ngadto kang Abraham, Isaac, ug Jacob (tan-awa usab sa Doktrina ug mga Pakigsaad 27:9–10).

  • Usa ka paagi nga ang mga kasingkasing sa mga anak mobati ngadto sa ilang mga amahan mao ang pinaagi sa buhat sa templo ug kasaysayan sa pamilya.

  • Kon wala ang pagbugkos sa mga pamilya, ang mga katuyoan sa yuta dili matuman; ang yuta sa “hingpit malaglag” (bersikulo 3; tan-awa usab sa Doktrina ug mga Pakigsaad 128:17–19).

• Sa unsang paagi ang pagbalik ni Elijah nakaapekto sa mga pamilya?

• Unsa nga mga kamatuoran ang imong mailhan diha sa Doktrina ug mga Pakigsaad 2?

Mahimong irekord sa mga estudyante diha sa pisara ang mga kamatuoran nga ilang mapalgan. Taliwala sa uban, kini nga mga kamatuoran mahimong maglakip sa: Ang Dios misaad sa pagpadala kang Elijah aron ipahiuli ang gahom sa pagkapari sa pagbugkos dinhi sa yuta sa dili pa ang Ikaduhang Pag-anhi (tan-awa sa bersikulo 1). Ang atong mga kasingkasing mahimong mobati ngadto sa atong mga katigulangan, ug kita makapahigayon og mga ordinansa alang kanila diha sa mga templo (tan-awa sa bersikulo 2). Kon wala ang gahom sa paghiusa sa mga pamilya alang sa kahangtoran, ang mga katuyoan sa yuta dili matuman (tan-awa sa bersikulo 3).

Ang atong mga kasingkasing mobati sa atong mga amahan

Ang hugpong sa mga pulong nga ang atong “mga kasingkasing … mobati sa [atong] mga amahan” (Doktrina ug mga Pakigsaad 2:2) mahimong piho nga nagpasabot kang Abraham, Isaac, ug Jacob, ang “mga amahan” sa Balay ni Israel. Karon kining hugpong sa mga pulong kanunay nga gigamit sa pagpasabot sa tanan natong mga katigulangan—mga inahan, mga amahan, ug ang kinatibuk-an sa atong mga pamilya sa tanang henerasyon.

• Unsa nga mga kasinatian sa templo ug sa kasaysayan sa pamilya ang nakatabang sa pagpabati sa imong kasingkasing ngadto sa imong mga pamilya?

• Sa unsang paagi nga ang pagpabati sa atong mga kasingkasing ngadto sa atong mga pamilya makatabang sa pagpabati sa atong mga kasingkasing ngadto sa Manluluwas?

Aron matabangan ang mga estudyante nga makahunahuna og mga paagi nga ilang mapabati ang ilang mga kasingkasing, ikonsiderar ang pagdapit kanila sa paghingalan og mga paagi nga sila makahimo o ila nang nahimo sa pagsalmot sa buhat sa templo ug sa kasaysayan sa pamilya. Mahimo nimong ilista ang ilang mga sugyot diha sa pisara, idugang ang mosunod nga mga ideya kon gikinahanglan. Hatagi og panahon ang mga estudyante atol sa klase nga sugdan ang pagbuhat sa kalihokan nga ilang gipili.

Mainampoong mopili og usa ka kalihokan nga makatabang kanimo sa pagtuman sa panagna sa Ginoo sa pagpabati sa imong kasingkasing ngadto sa mga sakop sa imong pamilya. Ang pipila ka mga ideya naglakip sa:

• Pag-andam og mga pangutana nga mahimo nimong ipangutana sa usa ka tigulang nga sakop sa pamilya mahitungod sa ilang kabataan o unsa ang ilang nakat-onan pinaagi sa ilang mga kasinatian sa kinabuhi. Dayon irekord ang usa ka interbyo uban sa imong sakop sa pamilya.

• Isulat o ipakigbahin ang usa ka makahuloganon nga istorya gikan sa imong kasaysayan sa pamilya. Pananglitan, mahimo nimong irekord kon sa unsang paagi ang unang miyembro sa imong pamilya mipasakop sa Simbahan.

• Gamita ang FamilySearch.org o ang Family Tree nga app aron sa:

  • Pagsusi sa imong family tree ug sa pagkat-on kon sa unsang paagi ka konektado sa imong mga katigulangan.

  • Pag-upload og mga hulagway sa pamilya, lakip ang mga ngalan sa mga indibidwal sa matag hulagway.

  • Pagrekord og paborito nga mga istorya o mga panumdoman kabahin sa mga sakop sa pamilya.

  • Pag-ila sa mga namatay nga mga sakop sa pamilya kinsa makadawat sa mga ordinansa sa templo. (Pilia ang Templo, dayon Andam nga mga ordinansa.)

• Pagplano og panahon alang sa imong pamilya, grupo sa mga higala, o grupo sa kabatan-onan sa pagtambong sa templo. Pagtinabangay sa pagpangita og mga ngalan sa namatay nga mga sakop sa pamilya kinsa nagkinahanglan nga makadawat sa mga ordinansa sa templo. Dapita ang mga sakop sa pamilya sa pag-alagad sa Ginoo pinaagi sa pagtabang sa paghimo niining sagrado nga mga ordinansa.

Dasiga ang mga estudyante sa pagbuhat sa kalihokan nga ilang gipili. Mahimong gustohon nilang iapil ang ilang mga sakop sa pamilya o suod nga mga higala niini nga proseso. Mahimo kang magplano og panahon alang sa mga estudyante sa pagreport sa ilang pag-uswag o sa pagpakigbahin sa ilang mga kasinatian ngadto sa klase.

Dugang nga mga Kapanguhaan

Doktrina ug mga Pakigsaad 2:3. Unsa ang buot ipasabot sa “ang tibuok yuta sa hingpit malaglag”?

Ang hugpong sa mga pulong nga hingpit malaglag nagpasabot nga “hingpit nga naguba o wala nay kapuslanan” (“Line Upon Line: Joseph Smith—History 1:39,” New Era, Okt. 2014, 11).

Si Presidente Joseph Fielding Smith (1876–1972) mitudlo:

Kon wala pa moanhi si Elijah atong masabtan nga ang tanan nga mga buhat sa miaging mga panahon wala kaayoy kapuslanan, kay ang Ginoo miingon nga ang tibuok kalibotan, ubos sa ingon nga kahimtang, hingpit nga malaglag sa iyang pag-anhi. … Kon kining gahom sa pagbugkos wala dinhi sa kalibotan, nan ang kalibog mohari ug kagubot mopuli sa kahusay niana nga adlaw nga ang Ginoo moanhi, ug, sa tinuod, dili kini mahimo, kay ang tanang mga butang gidumala ug gipugngan sa hingpit nga balaod diha sa gingharian sa Dios.

Nganong pagalaglagon ang kalibotan? Tungod lamang kay walay pagkasumpay tali sa mga amahan ug sa mga anak—nga mao ang buluhaton alang sa mga patay—nan tanan kita magbarog nga isalikway; ang tanang buhat sa Dios mapakyas ug hingpit nga malaglag. Ang mao nga kahimtang, sa tinuod, dili mahitabo. (Joseph Fielding Smith, Mga Pagtulun-an sa mga Presidente sa Simbahan [2013], 249–250)

Doktrina ug mga Pakigsaad 2:2. Kinsa ang “mga amahan,” ug unsa nga mga saad ang gihimo sa Ginoo ngadto kanila?

Si Presidente Russell M. Nelson mipasabot:

Sa hinapos nga bahin nga teksto sa Daang Tugon, atong mabasa ang saad ni Malaquias nga si Elijah “hiusahon niya ang mga ginikanan ug ang mga anak” (Malaquias 4:6). Sa karaan nga Israel, ang paghisgot niana nga mga amahan mahimong maglakip sa mga amahan nga sila si Abraham, Isaac, ug Jacob. [Tan-awa saDoktrina ug mga Pakigsaad 27:9–10.] (Russell M. Nelson, “Ang Walay Kataposan nga Pakigsaad,” Liahona, Okt. 2022, 7)

Si Abraham, Isaac, ug Jacob atong mga katigulangan. Kita sakop sa Israel. Kita adunay katungod sa pagdawat sa ebanghelyo, mga panalangin sa pagkapari, ug kinabuhing dayon. … Ang tinuod nga binhi ni Abraham ug kadtong kinsa gipundok ngadto sa iyang pamilya pinaagi sa pagsagop nagdawat niining gisaad nga mga panalangin—nag-agad diha sa pagdawat sa Ginoo ug pagkamasulundon ngadto sa iyang mga sugo. (Russell M. Nelson, “Children of the Covenant,” Ensign, Mayo 1995, 33)

Nganong kinahanglan ko nga moapil sa buhat sa kasaysayan sa pamilya?

Si Elder David A. Bednar sa Korum sa Napulog Duha ka Apostoles mitambag:

Dili kini sulagma nga ang FamilySearch ug uban nga mga gamit nia na sa panahon nga ang kabatan-onan pamilyar kaayo sa mga teknolohiya sa impormasyon ug komunikasyon. Ang inyong mga tudlo maayo na kaayo mo-text ug mo-tweet aron mapaspas ug mapalambo ang buhat sa Ginoo—dili lang aron makakontak dayon sa inyong mga higala. Ang mga kahanas ug abilidad nga makita sa kadaghanan sa atong kabatan-onan karon usa ka pagpangandam sa pagtabang sa buhat sa kaluwasan. …

Kon motuman mo niini nga pagdapit uban sa hugot nga pagtuo, ang inyong kasingkasing mobati sa inyong mga amahan. Ang saad nga gihimo ngadto nila ni Abraham, Isaac, ug Jacob matisok diha sa inyong mga kasingkasing. Ang inyong patriyarkal nga panalangin, uban sa pamahayag niini sa kaliwatan, mosumpay ninyo ngadto sa mga amahan ug mahimong mas mahinungdanon alang kaninyo. Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensiya sa yawa. Samtang kamo moapil ug mohigugma niining balaan nga buhat, kamo panalipdan sa inyong kabatan-on ug sa tibuok ninyong kinabuhi. (David A. Bednar, “Ang mga Kasingkasing sa mga Anak Mobati,” Liahona, Nob. 2011, 26)

Sa unsang paagi nga ang buhat sa templo ug kasaysayan sa pamilya makatabang sa pag-ayo sa mga relasyon sa pamilya?

Si Elder Dale G. Renlund sa Korum sa Napulog Duha ka Apostoles mipamatuod sa gahom ni Jesukristo sa pag-ayo sa atong naguba nga mga relasyon (tan-awa sa “Buhat sa Family History ug sa Templo: Pagsilyo ug Pagkaayo,” Liahona, Mayo 2018, 46–49).

Diha sa bidyo nga “ From the Head to the Heart ” (2:56), Si Brother Stephen W. Owen, kanhi Kinatibuk-ang Presidente sa Young Men, mipakigbahin kon sa unsang paagi nga ang Manluluwas makapausab sa atong mga kasingsaking samtang kita moapil sa buhat sa family history ug sa templo.

Dugang nga mga Kalihokan sa Pagkat-on

Bidyo: “Family is made of …”

Aron matabangan ang mga estudyante nga mobati sa kaimportante sa mga koneksiyon sa pamilya, mahimo nimong ikonsiderar ang pagpakita sa RootsTech 2019 Kickoff video (2:44). Kini nga bidyo nagpakita sa mga imahe ug mga pulong nga naghulagway sa mga relasyon sa pamilya. (Mahimo nimong ipasabot nga ang RootsTech usa ka tinuig nga gipasiugdahan sa Simbahan nga komperensiya bahin sa kasaysayan sa pamilya nga nagsaulog sa mga koneksiyon sa pamilya.) Dapita ang mga estudyante sa paghunahuna kon sa unsang paagi ang ilang mga koneksiyon sa pamilya nakapanalangin ug nakahagit kanila.

• Ngano nga importante ang pagkahibalo sa bili sa atong mga relasyon sa pamilya bisan og kini tingale mahagiton?

• Unsa ang pipila ka mga paagi nga atong mapalig-on ang atong pagpasalamat ug gugma alang sa mga sakop sa pamilya?

Paggamit sa Family Tree nga app

Ikonsiderar ang pagdapit og usa ka estudyante sa pagpakita kon unsaon paggamit ang Family Tree nga app. Mahimo nimong ipasabot nga ang kabatan-onan mahimong matawag aron sa pagserbisyo isip mga konsultant sa family history diha sa ilang lokal nga mga kongregasyon.

Ang mga estudyante mahimong moapil sa usa o mas daghan pa nga mga kalihokan nga makita diha sa Family Tree nga app aron makakat-on pa og dugang bahin sa ilang mga pamilya o magsugod sa pagrekord sa ilang personal nga mga kasaysayan. Diha sa app, pilia ang Family History nga mga Kalihokan (iklik ang Dugang pa nga tab o ipagawas ang sidebar). I-scroll ang Mga Kalihokan nga Pangsulod sa Panimalay, ug awhaga ang mga estudyante sa pagpili og usa ka kalihokan gikan sa Bahin Nako o sa Akong Pamilya nga mga seksiyon. Mahimo usab ka nga mosugyot sa mga estudyante sa pag-scroll ngadto sa Irekord ang Akong Istorya diha sa Mga Kalihokan sa Family History nga pahina aron sa pagrebyo sa mga pangutana nga ilang magamit sa pagrekord sa ilang kaugalingon nga istorya o sa ubang mga paryente. Hatagi og panahon ang mga estudyante nga makakat-on bahin sa kalihokan nga ilang gipili.

Alang sa Kasinatian sa klase, tingali gusto nimong pilion ang Trivia nga Dula sa Pamilya diha sa Akong Pamilya nga seksiyon. Bahina ang klase ngadto sa ginagmay nga mga grupo sa “pamilya”, ug dapita ang mga grupo sa dungan nga pagtubag ug paghisgot sa mga pangutana.

Pagpabati sa atong mga kasingkasing

Dapita ang mga estudyante sa paghunahuna kon sa unsang paagi sila mapalig-on pinaagi sa pagkat-on og dugang pa mahitungod sa mga indibidwal sa ilang mga kasaysayan sa pamilya. Ikonsiderar ang pagpakita sa bidyo nga “ Discover Your Family History: Discover Your Story [Diskobreha ang Imong Kasaysayan sa Pamilya: Diskobreha ang Imong Istorya] ” (2:42), nga nagpakita og mga hulagway sa pamilya nga konektado sa pipila ka henerasyon.