Leksiyon 10: Doktrina ug mga Pakigsaad 2; Joseph Smith—Kasaysayan 1:27–65

Joseph Smith—Kasaysayan 1:27–50

Si Moroni Nagpakita ngadto ni Joseph Smith

Niadtong Septiyembre 21, 1823, si Joseph Smith nag-ampo ngadto sa Dios alang sa kapasayloan sa iyang mga sala ug aron masayod sa iyang kahimtang atubangan sa Dios. Agig tubag, si propeta Moroni mipakita kang Joseph Smith aron sa pagtudlo kaniya mahitungod sa Basahon ni Mormon ug sa karaang mga panagna mahitungod sa Pagpahiuli sa ebanghelyo. Si Moroni nanagna usab mahitungod sa umaabot ni Joseph. Kini nga leksiyon makatabang sa mga estudyante nga mobati sa kamahinungdanon sa calling ni Joseph Smith isip propeta sa Dios.

Mga Posibleng Kalihokan sa Pagkat-on

Gihulagway ni Joseph Smith ang iyang pagkabatan-on

Aron maandam ang mga estudyante sa pagkat-on mahitungod sa mga kasinatian ni Joseph Smith sa iyang kabatan-on, ikonsiderar ang pagdapit kanila sa pagpakigbahin og mga pulong nga naghulagway sa mga tin-edyer. Laing opsiyon mao ang pagpakita sa mga pulong ug sa mga hugpong sa mga pulong diha sa pisara nga naghulagway ni Joseph Smith panahon sa iyang kabatan-on. Pananglitan, “Kanunay kong mobati nga gisilotan tungod sa akong kahuyang ug pagkadili-hingpit.” Mahimong butangan sa mga estudyante og tsek kadtong makakonektar sila.

Mahimo nimong dasigon ang mga estudyante sa pagpangita sa mga kahulogan sa mga pulong sa mosunod nga tudling sa kasulatan nga wala nila masabti. Kini nga feature anaa sa Librarya sa Ebanghelyo nga app. I-highlight ang usa ka pulong ug pilia ang “ipasabot” nga opsiyon.

Basaha ang Joseph Smith—Kasaysayan 1:27–29, mangita kon giunsa paghulagway ni Joseph Smith ang iyang mga pagbati sulod sa tulo ka tuig human ang Unang Panan-awon.

• Sa unsa nga paagi kaha ang kabatan-onan sa atong panahon makakonektar ngadto ni Joseph Smith?

Ang Dios adunay ipabuhat kang Joseph Smith

Ang sunod nga hugpong sa mga bersikulo usa ka mas dako nga bloke sa teksto nga basahon. Ikonsiderar ang mga panginahanglan ug mga abilidad sa imong mga estudyante sa pagpili sa usa ka paagi sa pagbasa. Mahimo kamong magbasa isip usa ka klase (mag-puli-puli ang mga estudyante nga magbasa), ipabasa sa mga estudyante nga magparesan, o ipatukar ang audio ug dapita ang mga estudyante sa pagsubay diha sa ilang mga kasulatan.

Human sa unang pangutana, mahimo nimong ihunong ug hisgotan kon unsay nakaplagan sa mga estudyante nga makatabang kanila sa ilang mga kasinatian isip usa ka tin-edyer.

Basaha ang Joseph Smith—Kasaysayan 1:30–35 ug pangitaa unsay nasinati ni Joseph Smith samtang nag-ampo siya.

• Unsa ang nasinati ni Joseph nga tingali nakahatag kaniya og paglaom?

• Unsa nga mga kamatuoran ang atong makat-onan gikan niini nga mga bersikulo mahitungod ni Joseph Smith?

Ang mga estudyante mahimong moila og nagkalainlaing mga kamatuoran, lakip ang pagtawag sa Dios kang Joseph Smith aron sa pagbuhat sa Iyang buluhaton. Mahimo nimong hisgotan sa mga estudyante nga samtang si Joseph Smith mibati nga gisilotan sa iyang mga kasaypanan ug mga sala, siya kinasingkasing nga nangayo og kapasayloan, ug ang Dios mitawag kaniya alang sa Iyang buluhaton.

Atol sa gabii ug sayo sa buntag sa Septiyembre 21–22, 1823, si Moroni mipakita ngadto ni Joseph sa tulo ka higayon. Siya mipakigbahin sa samang mensahe ug mikutlo sa samang kasulatan matag higayon (tan-awa sa Joseph Smith—Kasaysayan 1:36–50).

Aron matabangan ang mga estudyante nga makakita og mga ehemplo sa buhat sa Dios nga matuman pinaagi ni Joseph Smith, mahimo nimong bahinon ngadto sa mga sakop sa klase ang mosunod nga mga panagna nga gikutlo ni Moroni. Dapita ang mga estudyante sa pagbasa sa mga tudling, mangita kon sa unsang paagi sila may kalabotan sa buluhaton nga gitawag si Joseph aron pagabuhaton.

Basaha kini nga mga bersikulo nga mangita kon nganong kini nga mga panagna makahatag ni Joseph og dugang nga pagsabot mahitungod sa buluhaton nga iyang pagabuhaton.

• Malaquias 4:1, 5–6

• Isaias 11:11–12

• Mga Buhat 3:22–23

• Joel 2:28–29

• Sa unsang paagi kini nga mga bersikulo may kalabotan sa buhat sa Ginoo nga gitawag si Joseph aron pagabuhaton?

• Sa unsang paagi kaha kini nga mga panagna makapalig-on sa imong pagsaksi sa balaang tawag ni Joseph?

  Samtang nagbasa niini nga mga bersikulo, tingali makamatikod ang mga estudyante nga ang Ginoo mitawag ni Joseph Smith aron pagtabang sa pag-andam sa Iyang katawhan alang sa Iyang Ikaduhang Pag-anhi pinaagi sa Pagpahiuli sa ebanghelyo, nga naglakip sa pagpahiuli sa gahom sa pagselyo ug sa mga ordinansa sa templo, sa pagpundok sa Israel, ug sa pagbubo sa ubang espirituhanon nga mga panalangin.

• Sa unsang paagi nga ang natuman nga buluhaton sa Dios pinaagi ni Joseph Smith nakaimpluwensiya sa unsay imong nahibaloan o sa unsay imong gibati mahitungod ni Jesukristo? (Tan-awa sa 2 Nephi 3:6–8, 11; Doktrina ug mga Pakigsaad 135:3.)

Ang ngalan ni Joseph Smith pagagamiton alang sa maayo ug daotan

Ibaling ang atensiyon sa mga estudyante ngadto sa panagna ni Moroni mahitungod sa ngalan ni Joseph Smith diha sa Joseph Smith Kasaysayan—1:33. Hisgoti kon unsa kaha ang gibati ni Joseph mahitungod sa panagna ug ang mga paagi nga kini natuman karon. Tabangi ang mga estudyante nga makakita nga ang katumanan sa panagna maoy ebidensiya sa calling ni Joseph Smith isip propeta sa Dios.

• Ngano sa imong hunahuna nga adunay daghan kaayong oposisyon ngadto ni Propeta Joseph Smith?

Si Elder Neil L. Andersen sa Korum sa Napulog Duha ka Apostoles mitudlo:

Nganong ang Ginoo mitugot nga ang pagsulti og daotan magauban sa maayo? Usa ka rason mao nga ang pagsupak sa mga butang sa Dios mopaluhod sa mga nagpangita og kamatuoran alang sa mga tubag. …

Ang negatibong komentaryo bahin ni Propeta Joseph Smith modaghan samtang nagpadulong kita sa Ikaduhang Pag-anhi sa Manluluwas. Ang morag mga tinuod ug mga panglingla dili mokunhod. Dunay mga sakop sa pamilya ug mga higala nga magkinahanglan sa inyong tabang. (Neil L. Andersen, “Joseph Smith,” Liahona, Nob. 2014, 28, 30)

• Sa unsang paagi makatabang ang pagkahibalo nga si Moroni nanagna nga adunay mga kritiko nga mosulti og “daotan” bahin kang Joseph Smith?

• Unsa ang atong mahimo aron maandam sa pagtabang niadtong kinsa makasinati og oposisyon sa ilang pagtuo kang Joseph Smith?

Pagtuman sa panagna sa pagsulti og maayo bahin kang Joseph Smith

Si Elder Neil L. Andersen sa Korum sa Napulog Duha ka Apostoles mihatag og piho nga pagdapit ngadto sa kabatan-onan sa Simbahan:

Sa kabatan-onan nga naminaw karon o makabasa niining mga pulong sa umaabot nga mga adlaw, mohatag ko ninyo og piho nga hagit: Pagbaton og personal nga pagsaksi bahin ni Propeta Joseph Smith. Himoa nga ang inyong tingog motabang sa pagtuman sa propetikanhong mga pulong ni Moroni sa pagsulti og maayo bahin sa Propeta. (Neil L. Andersen, “Joseph Smith,” Liahona, Nob. 2014, 30)

• Unsa ang mga paagi nga makatabang ka sa pagpatuman sa panagna ni Moroni sa pagpamulong og maayo mahitungod ni Joseph Smith?

Aron matabangan ang mga estudyante nga makakita og mga ehemplo kon sa unsang paagi ang Manluluwas namulong og maayo mahitungod ni Joseph Smith, mahimo nimong bahinon ang mosunod nga mga pakisayran sa kasulatan ngadto sa mga estudyante: Doktrina ug mga Pakigsaad 1:17; 35:17; 112:15; 136:37–38. Hangyoa ang pipila ka mga estudyante sa pagpakigbahin sa unsay gisulti sa Manluluwas mahitungod ni Joseph Smith.

Dapita ang mga estudyante sa pagbuhat og usa ka butang diha sa klase nga makatabang sa pagpatuman sa propetikanhong mga pulong ni Moroni sa pagpamulong og maayo bahin kang Joseph Smith. Sama pananglit, mahimo nilang ipakigbahin kon sa unsang paagi si Joseph nakatabang nila nga makahibalo mahitungod ni Jesukristo o sa ubang mga paagi nga si Joseph Smith nakaimpluwensiya sa ilang kinabuhi alang sa kaayohan. Mahimo usab nga dapiton ang mga estudyante sa pagpadala og mensahe pinaagi sa text o social media ngadto sa usa ka tawo sa gawas sa klase.

Dugang nga mga Kapanguhaan

Sa unsang paagi nga ang mga kasinatian ni Joseph Smith nagsaksi nga siya usa ka propeta?

Si Elder Gerrit W. Gong sa Korum sa Napulog Duha ka Apostoles mitudlo mahitungod sa panagna diha sa Joseph Smith—Kasaysayan 1:33–34:

Niadtong 1823, si Joseph usa ka wala mailhi nga 17-anyos nga batan-on nga nagpuyo sa dili kaayo ilado nga balangay sa bag-ong naindependente nga nasod. Gawas kon kini tinuod, giunsa kaha niya sa paghunahuna nga miingon nga himoon siyang instrumento sa buhat sa Dios ug mohubad pinaagi sa gasa ug gahom sa Dios og sagradong kasulatan nga mahibaloan sa tanang dapit?

Bisan pa, kay kini tinuod man, ikaw ug ako makasaksi niana nga panagna nga natuman gani dihang gidapit kita aron motabang nga matuman kini. (Gerrit W. Gong, “Tanan nga mga Kanasoran, mga Kaliwatan, ug mga Pinulongan,” Liahona, Nob. 2020, 39)

Unsaon nato pagsunod sa ehemplo ni Joseph Smith gikan sa iyang pagkabatan-on?

Si Sister Susan W. Tanner, kanhi Kinatibuk-ang Presidente sa Young Women, mipakigbahin:

Sa dihang unang nahimamat ni Joseph si Moroni, 17-anyos pa lang siya, ang edad sa kadaghanan kaninyo young women. Nasayod kaayo kita sa oras ug lugar. Usa kadto ka gabii sa Septiyembre 21, 1823, sa usa ka lawak sa taas samtang ang lima sa iyang mga igsoong lalaki nangatulog. Si Joseph nag-ampo nga siya “makahibalo sa [iyang] kahimtang sa atubangan sa [Dios]” (JS—K 1:29). Si Joseph mibati nga dili angayan ug dili takos sa atubangan sa Dios. Siya miingon nga wala siya “nasayop sa usa ka dako o bug-at nga mga sala,” apan nahulog ngadto sa “walay hinungdan nga mga kasaypanan, ug nagpakita sa kahuyang sa kabatan-on” (JS—K 1:28), mao nga nag-ampo siya alang sa kasiguradohan. Makaila ko sa mga pagbati sa batan-ong Joseph, sama sa akong nahibaloan nga daghan kaninyo ang makaila. Unsa ka sagad nga ang matag usa kanato miluhod uban sa ingon nga mga pagbati sa kakulangon ug panginahanglan sa balaanong pagpasalig?

Agig tubag sa mahinulsulon ug matinud-anong pag-ampo ni Joseph, si Moroni, usa ka langitnong mensahero, mipakita kaniya. Si Joseph mirekord nga “siya misangpit sa akong ngalan, ug miingon … nga ang Dios adunay ipabuhat kanako” (JS—K 1:33). Si Joseph “hilabihan nga katingala sa gisulti [kaniya] sa kahibulongan nga sinugo” (JS—H 1:44).

Kita usab makadawat og espirituhanong pagpasalig agig tubag sa atong mga pag-ampo. Kita makadawat og saksi nga ang atong Amahan sa Langit nakaila kanato sa ngalan ug nga Siya adunay yutan-ong misyon nga atong tumanon. (Susan W. Tanner, “Maayong mga Balita gikan sa Cumorah,” Liahona, Mayo 2005, 104)

Si Joseph Smith (1805–44) misulat:

Sa dihang ako napulo ug pito pa ka tuig ang panuigon ako misangpit pag-usab sa Ginoo ug siya mipakita ngari kanako sa usa ka langitnong panan-awon kay tan-awa ang usa ka anghel sa Ginoo miabot ug mitindog sa akong atubangan ug sa gabii kadto ug siya mitawag kanako sa akong ngalan ug siya miingon nga ang Ginoo mipasaylo kanako sa akong mga sala. (Joseph Smith, “ History, circa Summer 1832 ,” The Joseph Smith Papers, 4, https://www.josephsmithpapers.org/paper-summary/history-circa-summer-1832/4)

Dugang nga mga Kalihokan sa Pagkat-on

Birtuwal nga paglibot sa umahan sa mga Smith

Tan-awa ang bidyo nga “ Sacred Grove Historic Site, Part 2: The Angel Moroni and Joseph Smith ” (8:05) aron sa pagtabang sa mga estudyante nga makakita unsa kaha ang dagway sa panimalay sa mga Smith ug aron makakita sa mga misyonaryo nga mipakigbahin og asoy sa pagbisita ni Moroni. Sa pagtan-aw sa bahin lamang sa bidyo bahin sa mga pagbisita ni Moroni, tan-awa gikan sa time code 1:37 hangtod sa 6:28.

Mga hulagway sa panimalay sa mga Smith diin nagpakita si Moroni

Mahimong interesado ang mga estudyante nga makakita og mga hulagway sa gitukod pag-usab nga panimalay sa Smith diin si Moroni nagpakita ngadto kang Joseph Smith (tan-awa sa Joseph Smith—Kasaysayan 1:30–47). Ikonsiderar ang pagpakita sa mosunod nga mga hulagway:

Bidyo: “Joseph Smith: Prophet of the Restoration”

Sa pagpakita sa mga estudyante og usa ka bidyo nga nagrepresentar sa pagbisita ni Moroni, mahimo nimong gamiton ang bidyo nga “ Joseph Smith: Prophet of the Restoration (2002 Version) ” gikan sa time code 15:19 hangtod sa 16:15.

Tabangi ang mga estudyante sa paglig-on sa ilang personal nga mga saksi ni Propeta Joseph Smith

Human mabasa ang pagdapit ni Elder Andersen nga magbaton og personal nga saksi kang Propeta Joseph, mahimong motubag ang mga estudyante sa mosunod nga mga pangutana diha sa ilang mga journal sa pagtuon. Pagkahuman, mahimong mopakigbahin ang pipila ka mga boluntaryo sa ilang mga pagpamalandong diha sa klase. Ikonsiderar ang paghisgot nganong importante nga adunay personal nga pagsaksi kang Joseph Smith.

• Sa imong hunahuna sa unsang paagi ka mapanalanginan kon imong lig-onon ang imong personal nga pagsaksi kang Propeta Joseph Smith?

• Unsay makatabang nimo nga makaangkon o makapalig-on sa imong pagpamatuod nga si Joseph Smith usa ka propeta?

• Unsa nga mga kasinatian ang nakatabang kanimo sa pagtuo nga si Joseph Smith usa ka propeta?

Ebidensiya sa calling ni Joseph Smith isip propeta

Ikonsiderar ang pagtabang sa mga estudyante nga makakita nga ang oposisyon ngadto kang Joseph Smith ug ang iyang ngalan nga “pagagamiton alang … sa daotan diha sa tanang mga kanasoran” usa ka ebidensiya nga siya gitawag sa Dios. Mahimo nimong hisgotan nga si Satanas kanunay nga supak sa kamatuoran. Ikonsiderar ang pagpakigbahin sa mosunod nga pamahayag ni Elder Lawrence E. Corbridge sa Seventy:

“Ang katugbang, pagsaway, ug kasilag mga kauban na sa kamatuoran. Sa higayon nga ang kamatuoran kalabot sa katuyoan ug kapalaran sa tawo ipadayag, kanunay gayod nga adunay pwersa nga mosupak niini. …

Ang tawo nga nakadawat sa daghang dili makiangayon nga pagpanggukod kay sa lain mao ang Usa nga labing gisupak, gihagit, ug gisalikway, gilatos, gibiyaan, ug gilansang, ang Usa kinsa mipaubos sa tanang butang, ug dinha makita ninyo ang kamatuoran, ang Anak sa Dios, ang Manluluwas sa tanang katawhan. Nganong wala man lang nila Siya pasagdi?

Ngano man? Tungod kay Siya ang kamatuoran, ug ang kamatuoran kanunay gayod nga supakon.

Ug dayon pangitaa ang tawo nga mipagawas sa laing tugon ni Jesukristo ug uban pang kasulatan, pangitaa ang tawo nga nahimong instrumento nga pinaagi niya ang kahingpitan sa ebanghelyo ug ang Simbahan ni Jesukristo gipahiuli sa yuta, pangitaa siya ug paabota na lang nga daoton sa mga tawo. Nganong dili man lang siya pasagdan?

Ngano man? Tungod kay nagtudlo siya sa kamatuoran, ug ang kamatuoran kanunay gayod nga supakon” (Lawrence E. Corbridge, “Si Propeta Joseph Smith,” Liahona, Mayo 2014, 104).