Lēsoni 12: Tokāteline mo e Ngaahi Fuakava 2; Siosefa Sāmita—Hisitōlia 1:27–65

Tokāteline mo e Ngaahi Fuakava 2; Siosefa Sāmita—Hisitōlia 1:27–65

ʻE Liliu Hotau Lotó ki Heʻetau Ngaahi Kuí

ʻI he taimi naʻe hā ai ʻa e ʻāngelo ko Molonaí, ko ha palōfita ʻo e Tohi ʻa Molomoná, kia Siosefa Sāmitá, naʻá ne lea ʻaki ha ngaahi kikite fakafolofola lahi. Ko e taha ko e fakahā ʻe Malakai ʻe foki mai ʻa e palōfita ko ʻIlaisiaá pea “ʻe liliu ʻa e loto ʻo e fānaú ki heʻenau ngaahi tamaí” (Siosefa Sāmita—Hisitōlia 1:38–39). ʻE lava ke tokoniʻi ʻe he lēsoni ko ʻení ʻa e kau akó ke nau kau ʻi he kikite ʻa e ʻEikí ki hono liliu honau lotó ki heʻenau ngaahi kuí.

Ngaahi ʻEkitivitī Ako ʻOku Ala Fakahokó

Ko hoku fāmilí

Ke tokoni ke fakakaukau e kau akó ki heʻenau ngaahi kuí mo e ʻuhinga ʻoku tau fai ai ʻa e hisitōlia fakafāmilí, fakakaukau ke fakaafeʻi e kau akó ke fakahoko ʻa e ʻekitivitī ko ʻení.

Fakatokangaʻi ange: ʻOku aʻusia ʻe ha kau ako ʻe niʻihi ha ngaahi tūkunga fakafāmili faingataʻa. Tokanga kiate kinautolu ʻoku ʻi ai haʻanau ngaahi hohaʻá, hangē ko e fehokotaki taʻengata ki honau ngaahi fāmilí pe ʻikai ʻiloʻi honau fāmili totonú.

Mahalo ʻe tokoni ke vahevahe ʻa e Maʻuʻanga Tokoni Lahi Ange, “ʻE tokoni fēfē ʻa e ngāue fakatemipalé mo e hisitōlia fakafāmilí ke fakamoʻui ʻa e ngaahi vā fetuʻutaki fakafāmilí?”

Hiki ki he tokolahi taha ʻo e kakai ʻi hoʻo fuʻu ʻakau fakafāmilí te ke lava ʻo manatuʻí. Vakai pe ko e hā ʻa e lahi ʻo e ngaahi toʻu tangata te ke lava ʻo hikí.

• Kuo tākiekina fēfē nai hoʻo moʻuí ʻe he niʻihi fakafoʻituitui ko ʻení?

• Ko e hā ha aʻusia mahuʻingamālie te ke lava ʻo vahevahe fekauʻaki mo ha taha ʻo e kau mēmipa ko ʻeni ʻo e fāmilí?

Tokoni ke mahino ki he kau akó, ko e kau ko ia ki he hisitōlia fakafāmilí mo e ngāue fakatemipalé ko ha founga ia ʻe taha te nau lava ai ʻo tokoni ke fakahoko e palani ʻa e Tamai Hēvaní ke fakatahaʻi ʻEne fānaú ʻo taʻengatá. Ke tokoni ke vakaiʻi ʻe he kau akó ʻa e ongo ʻoku nau lolotonga maʻu fekauʻaki mo e kau atu ki he hisitōlia fakafāmilí, fakakaukau ke fakaʻaongaʻi e ngaahi ueʻi ko ʻení.

Ko e fē ʻi he ngaahi fakamatala ko ʻení ʻokú ne fakahaaʻi lelei taha hoʻo ongo fekauʻaki mo e hisitōlia fakafāmilí?

• ʻOku ou saiʻia ʻi hono fai e hisitōlia fakafāmilí mo ʻiloʻi ha ʻuhinga mahino ki hono fai iá.

• ʻOku ou ʻilo ʻoku mahuʻinga ʻa e hisitōlia fakafāmilí ka ʻoku ʻikai ke u fakaʻaongaʻi ha taimi lahi ki hono fakahokó.

• ʻOku ou ʻilo ʻoku mahuʻinga ʻa e hisitōlia fakafāmilí, ka ʻoku ou tuku ki ha kau mēmipa kehe ʻo e fāmilí ke nau tokangaʻi ia.

• ʻOku ʻikai ke u sio au ki ha ʻuhinga mahino hono fai ʻo e hisitōlia fakafāmilí.

Poupouʻi e kau akó ke nau vakaiʻi ʻa e founga ʻoku tākiekina ai ʻenau ngaahi ongo fekauʻaki mo e hisitōlia fakafāmilí mo e ngāue fakatemipalé ʻi heʻenau ako ʻa e Tokāteline mo e Ngaahi Fuakava 2.

Faiako ʻaki ʻa e Laumālié: Ki ha ako lahi ange ki hono faʻu ha ngaahi sivi vakaiʻi fakatāutahá, vakai ki he ako ʻoku ui ko e “Fokotuʻu ha ngaahi feituʻu mo ha ngaahi faingamālie maʻá e kau akó ke akoʻi kinautolu ʻe he Laumālie Māʻoniʻoní,” ʻoku maʻu ʻi he Fakatupulaki ʻa e Ngaahi Taukei ʻa e Faiakó: Faiako ʻAki ʻa e Laumālié.

Ko e foki mai ʻa e palōfita ko ʻIlaisiaá

Ke ʻomi ʻa e puipuituʻa ʻo e Tokāteline mo e Ngaahi Fuakava 2, te ke lava ʻo fakaʻaliʻali ha fakatātā ʻo e ʻāngelo ko Molonaí ʻi heʻene hā kia Siosefá pea fakaafeʻi e kau akó ke nau fakamatalaʻi ʻa e meʻa ʻoku nau manatuʻi fekauʻaki mo ʻene ʻaʻahí. Pe, ko hono vahevahe ʻa e ngaahi palakalafi ko ʻení ʻi he lea pē ʻaʻau pe fakaafeʻi ha tokotaha ako ke lau leʻolahi ia.

ʻI he taimi naʻe hā ai ʻa e ʻāngelo ko Molonaí ki he talavou taʻu 17 ko Siosefa Sāmitá, naʻe lau ʻe Molonai ha ngaahi kikite fakakuongamuʻa ʻoku lekooti ʻi he Tohi Tapú. Naʻe fakahā ʻe he ngaahi kikite ko ʻení ha meʻa lahi ange fekauʻaki mo e ngāue ʻa Siosefa ʻi he kahaʻú pea kau ai mo ha ngaahi meʻa ʻe hoko kimuʻa mo e hili ʻa e Hāʻele ʻAnga Ua Mai ʻa e Fakamoʻuí.

Ko ha kikite ʻe taha ʻi he Fuakava Motuʻá naʻe lau ʻe Molonaí ko e Malakai 4:5–6. ʻOku lekooti e ngaahi lea ʻa Molonaí ʻi he Siosefa Sāmita—Hisitōlia 1:38–39 mo e Tokāteline mo e Ngaahi Fuakava 2, ʻo fakahā ai ʻe foki mai ʻa e palōfita ko ʻIlaisiaá ki he māmaní kimuʻa ʻi he Hāʻele ʻAnga Ua Mai ʻa e Fakamoʻuí.

Mahalo ʻe fie ʻilo e kau akó, ʻoku lave ʻa e ngaahi folofolá takitaha ki he foki mai ʻa ʻIlaisiaá (vakai, Malakai 4:5–6; 3 Nīfai 25:5–6; Tokāteline mo e Ngaahi Fuakava 2; Siosefa Sāmita—Hisitōlia 1:38–39). ʻI hono lau ʻe he kau akó e ngaahi veesi ko ʻení, tokoniʻi kinautolu ke nau fakaʻuhingaʻi ha ngaahi foʻi lea pe kupuʻi lea pē ʻoku ʻikai mahino kiate kinautolu.

Lau ʻa e Tokāteline mo e Ngaahi Fuakava 2, pea kumi ʻa e ʻuhinga ʻoku mahuʻinga ai e foki mai ʻa ʻIlaisiaá ki he fānau ʻa e Tamai Hēvaní (vakai foki, Tokāteline mo e Ngaahi Fuakava 128:17–19).

• Ko e hā ha ngaahi fehuʻi ʻokú ke maʻu fekauʻaki mo e ngaahi veesi ko ʻení?

  ʻE lava ke tokoni ʻeni ke tali e ngaahi fehuʻi ʻa e kau akó fekauʻaki mo e Tokāteline mo e Ngaahi Fuakava 2:

  • ʻOku ʻuhinga ʻa e “Lakanga Fakataulaʻeikí, ʻi he nima ʻo ʻIlaisiaá” (veesi 1) ki he mālohi faisila naʻe fakafoki mai ʻe ʻIlaisiā ʻi he Temipale Ketilaní ʻi he ʻaho 3 ʻo ʻEpeleli 1836 (vakai foki, Tokāteline mo e Ngaahi Fuakava 110:13–16).

  • ʻOku ʻuhinga ʻa e “fuʻu ʻaho lahi mo fakamanavahē ʻo e ʻEikí” (veesi 1) ki he Hāʻele ʻAnga Ua Mai ʻa e Fakamoʻuí.

  • ʻE lava ke ʻuhinga ʻa e “ngaahi talaʻofa naʻe fai ki he ngaahi tamaí,” (veesi 2) ki he Fuakava Faka-ʻĒpalahamé mo e ngaahi talaʻofa naʻe fai kia ʻĒpalahame, ʻAisake, mo Sēkopé (vakai foki, Tokāteline mo e Ngaahi Fuakava 27:9–10).

  • Ko e founga ʻe taha ʻoku liliu ai e loto ʻo e fānaú ki heʻenau ngaahi tamaí ʻoku fakafou ʻi he ngāue fakatemipalé mo e hisitōlia fakafāmilí.

  • Ka ne taʻeʻoua hono silaʻi ʻo e ngaahi fāmilí, he ʻikai lava ke fakahoko e ngaahi taumuʻa ʻo e māmaní; ʻe “fakaʻauha ʻo ʻosiʻosingamālie” ʻa e māmaní (veesi 3; vakai foki, Tokāteline mo e Ngaahi Fuakava 128:17–19).

• ʻE liliu fēfē nai e ngaahi fāmilí ʻi he foki mai ʻa ʻIlaisiaá?

• Ko e hā ha ngaahi moʻoni te ke lava ʻo ʻiloʻi ʻi he Tokāteline mo e Ngaahi Fuakava 2?

ʻE lava ke lekooti ʻe he kau akó ʻi he palakipoé ʻa e ngaahi moʻoni ʻoku nau maʻú. ʻE lava ke kau ʻi he ngaahi moʻoni ko ʻení ʻa e: Naʻe talaʻofa ʻe he ʻOtuá ʻe fekauʻi mai ʻa ʻIlaisiā ke fakafoki mai ʻa e mālohi faisila ʻo e lakanga fakataulaʻeikí ki he māmaní kimuʻa ʻi he Hāʻele ʻAnga Ua Maí (vakai, veesi 1). ʻE lava ke liliu hotau lotó ki heʻetau ngaahi kuí, pea te tau lava ʻo fakahoko e ngaahi ouaú maʻanautolu ʻi he temipalé (vakai, veesi 2). Ka ne taʻeʻoua ʻa e mālohi ke fakatahaʻi ʻa e ngaahi fāmilí ki he taʻengatá, he ʻikai lava ʻo fakahoko ʻa e ngaahi taumuʻa ki he māmaní (vakai, veesi 3).

ʻE liliu hotau lotó ki heʻetau ngaahi tamaí

Ko e kupuʻi lea “ʻe liliu … [hotau lotó] ki [heʻetau] ngaahi tamaí” (Tokāteline mo e Ngaahi Fuakava 2:2), ʻe lava ke ʻuhinga ia kia ʻĒpalahame, ʻAisake, mo Sēkope, ko e “ngaahi tamai” ʻo e Fale ʻo ʻIsilelí. ʻOku faʻa fakaʻaongaʻi ʻa e kupuʻi lea ko ʻení he ʻahó ni ke ʻuhinga ki heʻetau ngaahi kuí kotoa—ngaahi faʻeé, ngaahi tamaí, pea mo e kotoa hotau ngaahi fāmilí ʻi he toʻu tangata kotoa pē.

• Ko e hā ha ngaahi aʻusia ʻi he temipalé mo e hisitōlia fakafāmilí kuo tokoni ke liliu ho lotó ki ho fāmilí?

• ʻE tokoni fēfē hono liliu hotau lotó ki hotau ngaahi fāmilí ke fakatafoki hotau lotó ki he Fakamoʻuí?

Ke tokoni ki he kau akó ke nau fakakaukau ki ha ngaahi founga ʻe lava ke liliu ai honau lotó, fakakaukau ke fakaafeʻi kinautolu ke ʻoatu ha ngaahi founga te nau lava pe kuo nau ʻosi kau ai ʻi he ngāue fakatemipalé mo e hisitōlia fakafāmilí. Te ke lava ʻo hiki ʻenau ngaahi fokotuʻú ʻi he palakipoé, ʻo tānaki atu e ngaahi fakakaukau ko ʻení ʻo ka fiemaʻu. ʻOange ha taimi ki he kau akó lolotonga e kalasí ke nau kamata ngāue ai ki he ʻekitivitī ne nau filí.

Fili ʻi he faʻa lotu ha ʻekitivitī ʻe tokoni atu ke ke fakahoko ai e kikite ʻa e ʻEikí ki hono liliu ho lotó ki he kau mēmipa ho fāmilí. Ko ha ngaahi fakakaukau ʻeni:

• Teuteuʻi ha ngaahi fehuʻi te ke lava ʻo ʻeke ki ha mēmipa matuʻotuʻa ange ʻo e fāmilí fekauʻaki mo ʻene kei toʻu tupú pe ko e meʻa kuo nau ako ʻi he ngaahi aʻusia ʻo ʻenau moʻuí. Hili iá pea lekooti ha ʻinitaviu mo e mēmipa ho fāmilí.

• Hiki pe vahevahe ha talanoa mahuʻingamālie mei ho hisitōlia fakafāmilí. Hangē ko ʻení, te ke lava ʻo lekooti ʻa e founga naʻe kau ai e fuofua mēmipa ho fāmilí ki he Siasí.

• Fakaʻaongaʻi ʻa e FamilySearch.org pe ko e polokalama ʻAkau Fakafāmilí ke:

  • Vakaiʻi hoʻo fuʻu ʻakau fakafāmilí pea ako ʻa e founga ʻokú ke fehokotaki ai mo hoʻo ngaahi kuí.

  • Upload ha ngaahi tā fakafāmili, kau ai ʻa e hingoa ʻo e niʻihi fakafoʻituituí ʻi he laʻitā takitaha.

  • Lekooti e ngaahi talanoa pe manatu melie manakoa fekauʻaki mo e kau mēmipa ʻo e fāmilí.

  • Feinga ke ʻiloʻi ʻa e kau mēmipa ʻo e fāmilí kuo pekiá ʻa ia ʻe lava ke nau maʻu e ngaahi ouau fakatemipalé. (Fili ʻa e Temipalé, pea fili ʻa e Ngaahi Ouau Kuo Māú.)

• Palani ha taimi maʻa ho fāmilí, ngaahi kaungāmeʻá, pe kulupu toʻu tupú ke mou ō ki he temipalé. Ngāue fakataha ke kumi e hingoa ʻo e kau mēmipa ʻo e fāmili kuo pekiá ʻa ia ʻoku fiemaʻu ke nau maʻu ʻa e ngaahi ouau fakatemipalé. Fakaafeʻi e kau mēmipa ʻo e fāmilí ke ngāue maʻá e ʻEikí ʻaki ʻenau tokoni ke fakahoko e ngaahi ouau toputapu ko ʻení.

Poupouʻi e kau akó ke muimuiʻi ʻa e ʻekitivitī kuo nau filí. Mahalo te nau fie fakakau mai e kau mēmipa honau fāmilí pe ngaahi kaungāmeʻa ofí ʻi he meʻá ni. Mahalo te ke fie palani ha taimi maʻá e kau akó ke lipooti ʻenau fakalakalaká pe vahevahe ʻenau ngaahi aʻusiá mo e kalasí.

Ngaahi Maʻuʻanga Tokoni Lahi Ange

Tokāteline mo e Ngaahi Fuakava 2:3. Ko e ʻuhinga ki he hā ʻa e pehē, “ʻe fakaʻauha ʻo ʻosiʻosingamālie ʻa e māmaní kotoa”?

ʻOku ʻuhinga ʻa e kupuʻi lea fakaʻauha ʻo ʻosiʻosingamālié ki he “fakaʻauha kotoa pe ʻikai hano toe ʻaonga” (“Line Upon Line: Joseph Smith—History 1:39,” New Era, Oct. 2014, 11).

Naʻe akonaki ʻa Palesiteni Siosefa Filitingi Sāmita (1876–1972) ʻo pehē:

Kapau naʻe ʻikai haʻu ʻa ʻIlaisiā, ʻoku tau tui he ʻikai ʻaonga ʻa e ngaahi ngāue kotoa pē ʻo e kuohilí, he naʻe folofola ʻa e ʻEikí ʻe fakaʻauha ʻo ʻosiʻosingamālie ʻa e māmaní kotoa ʻi he tuʻunga ko iá, heʻene hāʻele maí. … Kapau naʻe ʻikai ke ʻi māmani ʻa e mālohi faisilá, ʻe mālohi ʻa e puputuʻú pea fetongi ʻe he moveuveú ʻa e māú ʻi he ʻaho ko ia ʻe hāʻele mai ai ʻa e ʻEikí, ka, he ʻikai foki ke lava ʻeni ʻo hoko, he ko e meʻa kotoa pē ʻoku puleʻi mo tuʻutuʻuni ʻe he fono haohaoa ʻi he puleʻanga ʻo e ʻOtuá.

Ko e hā ʻe fakaʻauha ai ʻa e māmaní? ʻOku ʻuhinga pē he kapau ʻe ʻikai ke ʻi ai ha fehokotakiʻanga ʻi he ngaahi tamaí mo e fānaú—ʻa ia ko e ngāue maʻá e kau pekiá—ta te tau tuʻu kotoa ʻoku ʻikai tali; ʻe taʻe-lava kotoa ʻa e ngāue kotoa ʻa e ʻOtuá mo fakaʻauha ʻo ʻosiʻosingamālie. Ko e faʻahinga tuʻunga peheé foki, he ʻikai hoko. (Siosefa Filitingi Sāmita, Ngaahi Akonaki ʻa e Kau Palesiteni ʻo e Siasí [2013], 248–49)

Tokāteline mo e Ngaahi Fuakava 2:2. Ko hai ʻa e “ngaahi tamaí,” pea ko e hā ʻa e ngaahi talaʻofa naʻe fai ʻe he ʻEikí kiate kinautolú?

Naʻe fakamatalaʻi ʻe Palesiteni Lāsolo M. Nalesoni ʻo pehē:

ʻI he fakalea fakaʻosi ʻo e Fuakava Motuʻá, ʻoku tau lau ai ki he palōmesi ʻa Malakaí ʻe hanga ʻe ʻIlaisiā ʻo “liliu ʻa e loto ʻo e mātuʻá ki he fānaú, pea ko e loto ʻo e fānaú ki heʻenau mātuʻá” (Malakai 4:6). ʻI ʻIsileli ʻo e kuonga muʻá, naʻe mei kau ʻi he fakamatala ki he ngaahi tamaí ʻa e ngaahi tamai ko ʻĒpalahame, ʻAisake, mo Sēkopé. [Vakai, Tokāteline mo e Ngaahi Fuakava 27:9–10.] (Russell M. Nelson, “Ko e Fuakava Taʻengatá,” Liahona, ʻOkatopa 2022, 6–7)

Ko ʻetau ngaahi kui ʻa ʻĒpalahame, ʻAisake, mo Sēkope. Ko ha kakai ʻIsileli kitautolu. ʻOku tau maʻu ʻa e totonu ke maʻu e ongoongoleleí, ngaahi tāpuaki ʻo e lakanga fakataulaʻeikí mo e moʻui taʻengatá. … ʻOku maʻu ʻe he hako ʻo ʻĒpalahamé mo kinautolu ʻoku tānaki fakataha ki hono fāmilí ʻo fakafou ʻi hono ohi kinautolú, ʻa e ngaahi tāpuaki kuo talaʻofa ko ʻení—ʻo makatuʻunga ʻi heʻenau tali e ʻEikí mo talangofua ki Heʻene ngaahi fekaú. (Russell M. Nelson, “Children of the Covenant,” Ensign, May 1995, 33)

Ko e hā ʻoku totonu ke u kau ai ʻi he ngāue hisitōlia fakafāmilí?

Naʻe faleʻi ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ʻikai tupukoso pē hono ʻomi ʻo e FamilySearch mo e ngaahi meʻangāue kehe ʻi ha kuonga ʻoku maheni ai e toʻu tupú mo e ngaahi tekinolosia kehekehe ʻo e fakamatalá mo e fetuʻutakí. Kuo mou ako ke ʻave (text) e ngaahi pōpoaki ʻi hoʻomou telefoni toʻotoʻó mo tweet ke toe vave mo fakalakalaka ange e ngāue ʻa e ʻEikí—kae ʻikai ke fetuʻutaki vave ange mo homou ngaahi kaungāmeʻá. ʻOku hā mahino e ngaahi pōtoʻi ngāue mo e mohu founga ʻa ha toʻu tupu tokolahi he ʻahó ni ko ha teuteu ia ke tokoni ki he ngāue faifakamoʻuí. …

ʻI hoʻomou tali ʻa e fakaafe ko ʻení ʻi he loto tuí, ʻe liliu ai homou lotó ki he ngaahi tamaí. ʻE tō ʻi homou lotó ʻa e ngaahi talaʻofa ko ia naʻe fai kia ʻĒpalahame, ʻAisake, mo Sēkopé. ʻE fakafehokotaki kimoutolu ʻe homou tāpuaki fakapēteliaké, ʻa ia ʻokú ne ʻoatu e hohoko homou hakó, ʻokú ne fakafehokotaki kimoutolu ki he ngaahi tamai ko ʻení pea ʻe mahuʻinga mālie leva kiate kimoutolu. ʻE tupulaki ʻa hoʻomou ʻofa mo e houngaʻia ʻi hoʻomou ngaahi kuí. ʻE loloto mo tolonga hoʻomou fakamoʻoní mo e ului ki he Fakamoʻuí. Pea ʻoku ou palōmesi atu ʻe maluʻi ʻa kimoutolu mei he ivi tākiekina mālohi ʻo e filí. ʻI hoʻomou kau pea ʻofa ʻi he ngāue māʻoniʻoní ni, ʻe maluʻi ai kimoutolu ʻi hoʻomou kei talavoú pea ʻi hono kotoa hoʻomou moʻuí. (David A. Bednar, “ʻE Liliu ʻa e Loto ʻo e Fānaú,” Liahona, Nōvema 2011, 26–27)

ʻE tokoni fēfē ʻa e ngāue fakatemipalé mo e hisitōlia fakafāmilí ke fakamoʻui ʻa e ngaahi vā fetuʻutaki fakafāmilí?

Naʻe fakamoʻoni ʻa ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ki he mālohi ʻo Sīsū Kalaisi ke fakamoʻui hotau ngaahi vā fetuʻutaki kuo maumaú (vakai, “Hisitōlia Fakafāmilí mo e Ngāue Fakatemipalé: Silá mo e Fakamoʻuí,” Liahona, Mē 2018, 46–49).

Ngaahi ʻEkitivitī Fakalahi ki he Akó

Fakaafeʻi e kau akó ke nau fakakaukau ki he founga kuo fakatou faitāpuekina mo poleʻi ai kinautolu ʻe honau ngaahi fehokotaki fakafāmilí.

• Ko e hā ʻoku mahuʻinga ai ke fakatokangaʻi ʻa e mahuʻinga ʻo hotau ngaahi vā fetuʻutaki fakafāmilí neongo e taimi ʻe lava ke faingataʻa aí?

• Ko e hā ha ngaahi founga te tau lava ai ʻo fakamālohia ʻetau houngaʻia mo e ʻofa ki he kau mēmipa ʻo e fāmilí?

Ko hono fakaʻaongaʻi ʻo e polokalama Fuʻu ʻAkau Fakafāmilí

Fakakaukau ke fakaafeʻi ha tokotaha ako ke ne fakatātaaʻi e founga hono fakaʻaongaʻi ʻo e polokalama Fuʻu ʻAkau Fakafāmilí. Mahalo te ke fie fakamahinoʻi ange ʻe lava ke uiuiʻi ʻa e toʻu tupú ke nau hoko ko ha kau faifaleʻi hisitōlia fakafāmili ʻi honau ngaahi uooti fakalotofonuá.

ʻE lava ke kau ʻa e kau akó ʻi ha ʻekitivitī ʻe taha pe lahi ange ʻoku maʻu ʻi he polokalama Fuʻu ʻAkau Fakafāmilí ke ako lahi ange fekauʻaki mo honau ngaahi fāmilí pe kamata lekooti honau ngaahi hisitōlia fakatāutahá. ʻI he polokalamá, fili ʻa e Ngaahi ʻEkitivitī Hisitōlia Fakafāmilí (lomiʻi ʻi he Lahi Angé pe fakaʻasi ʻa e konga ki he tafaʻakí). ʻAlu ki he Ngaahi ʻEkitivitī ʻi ʻApí, pea poupouʻi e kau akó ke nau fili ha ʻekitivitī mei he ongo konga Fekauʻaki Mo Aú pe Ko Hoku Fāmilí. Te ke lava foki ʻo fokotuʻu ange ki he kau akó ke nau ʻalu ki he Lekooti ʻEku Talanoá ʻi he peesi Ngaahi ʻEkitivitī Hisitōlia Fakafāmilí ke toe vakaiʻi e ngaahi fehuʻi te nau lava ʻo fakaʻaongaʻi ke lekooti ʻaki ʻenau ngaahi talanoá pe ngaahi talanoa ʻa honau kāinga kehé. ʻOange ha taimi ki he kau akó ke nau ako ai fekauʻaki mo e ʻekitivitī naʻa nau filí.

Ki ha aʻusia fakakalasi, mahalo te ke fie fili ʻa e Keimi Feʻauhi Fakafāmilí ʻi he konga Ko Hoku Fāmilí. Vahevahe ʻa e kalasí ki ha fanga kiʻi kulupu “fāmili” iiki ange, pea fakaafeʻi e ngaahi kulupú ke nau tali mo aleaʻi fakataha ʻa e ngaahi fehuʻí.

Ko hono liliu hotau lotó

Fakaafeʻi e kau akó ke nau fakakaukau ki he founga ʻe lava ke fakamālohia ai kinautolu ʻi heʻenau ako lahi ange ki he niʻihi fakafoʻituituí ʻi honau hisitōlia fakafāmilí. Fakakaukau ke hulu e foʻi vitiō “ ʻIloʻi Hoʻo Hisitōlia Fakafāmilí: ʻIloʻi Hoʻo Talanoá ” (2:42), ʻa ia ʻokú ne fakaʻaliʻali ha ngaahi ʻata ʻo ha fāmili ʻoku nau fehokotaki ʻi ha ngaahi toʻu tangata lahi.