Lesona 15: Mataupu Faavae ma Feagaiga 3-5

Mataupu Faavae ma Feagaiga 5

“Ua Ou Iloa ma le Mautinoa Ua Moni i Latou”

Sa faamautinoa atu e le Alii ia Matini Harisi a o ia sailia se faamaoniga faaopoopo o Iosefa Samita sa i ai papatusi auro. O lenei lesona ua faamoemoe e fesoasoani i tamaiti aoga ia iloa molimau ua saunia e le Alii e fesoasoani ia i latou ia maua se molimau patino o le Tusi a Mamona o se isi molimau ia Iesu Keriso ma le valaauga o Iosefa Samita o se perofeta a le Atua.

Gaoioiga E Ono Mafai Ona Aoao Ai

O le faafitauli a Matini Harisi

Tuu atu i tamaiti aoga se avanoa e iloilo ai a latou molimau o le Tusi a Mamona ma Iosefa Samita. Mafaufau loloto i le ata lenei ma fesili e mafai ona fesoasoani ia i latou e ausia lenei tulaga. E mafai ona faasoa mai e tamaiti aoga nisi o a latou tali i le vasega.

E mafai foi ona e faaalia le “Molimau Mamana,”o loo maua i le ChurchofJesusChrist.org, mai le faailo taimi 0:00 i le 0:37.

Compelling Witness

When her Book of Mormon falls onto the cafeteria floor and into the hands of a skeptical classmate, one young woman works to create a case for its truthfulness.

Vaai faalemafaufau e faapea, sa i ai se tasi na faia se faamasinoga po o i ai ia Iosefa Samita pe leai foi ia papatusi auro.

• O le a le lelei o sou lagona i le molimau atu e uiga i le Tusi a Mamona o le afioga a le Atua ma le avea ai o Iosefa Samita ma Perofeta o le Toefuataiga? Aisea?

• O le a sau tala e fai atu?

• O le a se mea o le a e tuuina atu o se faamaoniga e lagolago ai lau mataupu?

O le faasoa atu po o le aoteleina o faamatalaga o le talaaga lenei e mafai ona fesoasoani i tamaiti aoga ia malamalama atili ai pe faapefea ona faaaoga le Mataupu Faavae ma Feagaiga 5 i o latou lava tulaga faapitoa.

Sa le fiafia Lusi Harisi, le faletua o Matini Harisi e uiga i le taimi ma le tupe na tuu atu atoa e lona toalua i le lolomiina o le Tusi a Mamona. Sa ia failaina se faitioga i le tulafono e faasaga ia Iosefa Samita ma faapotopotoina ni tagata sa mananao e molimau na pepelo o ia e uiga i le i ai o papatusi. Sa lapataia Matini afai na te le auai faatasi ma i latou i le molimau faasaga ia Iosefa, e mafai foi ona auina atu Matini i le falepuipui. E ui ina sa avea muamua Matini ma se tusiupu mo Iosefa, ae sa ia faaali atu ni mata’itusi mai papatusi i tagata atamamai e faamaonia ai le i ai mai anamua, ma sa leiloloa itulau e 116 o uluai tusitusiga, ae sa saili pea e Matini se isi molimau i le moni o papatusi auro. Sa malaga atu o ia i le aiga o Iosefa Samita, lea na ole atu ai Iosefa i le Alii ma maua mai ai le faaaliga o loo i le Mataupu Faavae ma Feagaiga 5.

A o e suesueina le Mataupu Faavae ma Feagaiga 5, saili le Agaga Paia e fesoasoani e faamautu mea ua uma ona e iloa e uiga ia Iosefa Samita ma le Tusi a Mamona. Saili foi ni auala e faamalosia ai lau molimau ia Iesu Keriso ma Lana Ekalesia toefuataiina.

Faitau le Mataupu Faavae ma Feagaiga 5:1–3, ma vaavaai mo le ala na tali mai ai le Faaola ia Matini Harisi.

• Aisea e te manatu e le faamaonia ai e le Alii le moni o le Tusi a Mamona e ala i le faatagaina o papatusi e faaali atu i le lalolagi?

E ui ina sa lei faatagaina Matini e vaai i papatusi auro i lena taimi, ae o lenei faaaliga na faamalosia ai o ia i se auala na mafai ai e ia ona tuuina atu se molimau mamana e uiga i le Perofeta. I lenei lesona, o le a e iloa ai ua saunia e le Alii ni molimau e fesoasoani ia i tatou taitoatasi ia maua a tatou lava molimau ia Iosefa Samita o se perofeta a le Atua ma le Tusi a Mamona o se tasi molimau ia Iesu Keriso.

Faamaoniga mai le Alii

Mafaufau e vavae le vasega i ni vaega se tolu ma atofa atu i vaega taitasi se “molimau” ese e suesue e i latou lava e faaaoga ai le pepa e tufa atu o loo i lalo. A uma ua lava se taimi, e mafai e tamaiti aoga ona faatusatusa ma talanoaina ma o latou vaega mea sa latou aoaoina.

E mafai foi ona e faaigoaina teutusi eseese e tolu o le “Molimau #1,” “Molimau #2,” ma le “Molimau #3.” Faatumu teutusi taitasi i ni kopi se tele o le vaega e o faatasi ai ma le pepa tufa atu. Tufatufa atu i vaega taitasi e suesue ai.

Molimau

Molimau #1

O afioga a le Alii.

Sa poloaiina Iosefa Samita e aua nei faaali atu papatusi auro i le lalolagi (tagai i le Mataupu Faavae ma Feagaiga 5:3). Faitau le Mataupu Faavae ma Feagaiga 5:6–10, ma vaavaai i mea sa faataga ona faasoa e Iosefa.

Atonu e te manao e maka se fasifuaitau o loo ta’ua soo e le Alii i fuaiupu 5, 6, ma le 7.

• Aisea e te manatu ai e sili atu le mamafa i le Alii ia lo tatou talitonu ma faalogo i Ana afioga i le Tusi a Mamona nai lo le tatou iloaina e i ai papatusi?

E faasino i le Tusi a Mamona, na aoao mai Peresitene Gordon B. Hinckley (1910–2008):

O le faamaoniga mo lona moni, mo lona lelei i se lalolagi ua matele i le manaomia o se faamaoniga, e le maua lea i le suesueina o toega o mea po o le suesueina o le tagata soifua, e ui lava o nei mea atonu e aoga i isi. E le maua foi i le suesuega o upu po o suesuega anamua, e ui o nei mea e ono faamaonia ai le moni. … O le suega o lona moni o loo taoto lea i le faitauina o le tusi. O se tusi a le Atua. (Gordon B. Hinckley, “O Maatulimanu e Fa o le Faatuatua,” Ensign, Fep. 2004, 6)

Faaalu ni nai minute e mafaufau loloto ai i lou aafiaga i le suesueina ma le aoaoina mai le Tusi a Mamona. Mafaufau pe na faapefea ona aafia lou olaga i lau suesuega. Atonu e te manao e faamaumau nisi o ou manatu i lau api talaaga.

Molimau #2

O Le Mau a Molimau a auauna e toatolu

Faitau le Mataupu Faavae ma Feagaiga 5:11–15, ma vaavaai po o ai o le a i’u ina faatagaina e le Alii e vaai i papatusi.

• O le a se mea na e vaaia i nei fuaiupu e mafai ona mamana ai molimau a Molimau e Toatolu?

Mulimuli ane, o le a vaai Matini Harisi, Oliva Kaotui, ma Tavita Uitimera i papatusi auro ma molimau atu i lo latou moni. O le a e aoao atili e uiga i lenei tulaga pe a e suesueina le Mataupu Faavae ma Feagaiga 17.

I le ta’ua ai o Molimau e Toatolu, na aoao mai ai Peresitene Dallin H. Oaks o le Au Peresitene Sili:

E le feteena’i la latou molimau ma nisi lava molimau. E mafai e se tasi ona faafitia lena molimau, ae mafai faapefea e se tasi ona faamatala mai nei alii e toatolu amiolelei ua aufaatasi e tumau i lenei molimau ua faasalalauina e oo i le iuga o o latou ola i le feagai ai ma amusiaga e tele ma isi mea faigata na oo ia te i latou? E pei o le Tusi a Mamona lava ia, e leai se isi faamalamalamaga e sili atu nai lo lea ua tuuina atu i le molimau lava ia, o le faamatalaga paia a nei tagata lelei ma le faamaoni o e sa tautino atu le mea na latou vaai i ai. (Dallin H. Oaks, “O le Molimau: Martin Harris,” Liahona, Me 1999, 36)

Mafaufau e faitau le “O Le Mau a Molimau e Toatolu” i le amataga o le Tusi a Mamona po o le faia o se lisi o tagata o e na molimau atu ia te oe e moni le Tusi a Mamona. Mafaufau pe na faapefea ona faamalosia e a latou molimau lau molimau.

Molimau #3

O le Agaga Paia

Faitau le Mataupu Faavae ma Feagaiga 5:16 ma le Moronae 10:4–5. Faailoa mai pe faapefea ona faaali mai e le Atua le moni o le Tusi a Mamona i Ana fanau.

• O a nisi o auala e mafai ona molimau atu ai le Agaga i se tasi e uiga i le moni o le Tusi a Mamona?

Na saunoa mai Glenn L. Pace, o le sa auauna atu o se Epikopo Pulefaamalumalu:

E leai lava se isi auala e maua ai se molimau ae e ala mai i le molimau a le Agaga Paia. E leai lava se isi mea e mafai ona e faalagolago i ai. … E tele faataitaiga o mau i le leai o se uiga o se faaaliga faaletino e mafai ai e aunoa ma le mauaina o le molimau a le Agaga Paia. O le liuaina e le oo mai i faaaliga faaletino mai le lagi. (Glenn L. Pace, “The Elusive Balance,” New Era, Mat. 1989, 49)

Fai se lisi o mafuaaga e te manatu ai o se molimau mai le Agaga Paia, o se sui o le Aiga Atua, e sili atu ona taua nai lo faamaoniga faaletino e moni se mea. Mafaufau ia aofia ai soo se molimau e te lagona ua e mauaina e ala i le Agaga Paia faapea e moni le Tusi a Mamona.

A uma ona suesue ma talanoaina e tamaiti aoga a latou molimau ua tofia i ai, valaaulia i latou e faailoa mai se sui e tasi pe sili atu foi mai la latou vaega e tuuina mai faamatalaga nei i le vasega:

• Faamalamalama atu le molimau na tuuina mai e le Alii na tou suesue faatasi ai ma lau vaega.

• Faasoa atu ni faataitaiga mai lisi na faia e tagata o lau vaega.

E mafai ona e valaaulia tamaiti aoga uma e faaopoopo o latou manatu ma molimau i mea na faasoa mai e a latou uo i le vasega.

E mafai ona outou matamata le mea o totoe o le vitio “Compelling Witness,” mai le faailotaimi 0:37 i le 7:46.

Compelling Witness

When her Book of Mormon falls onto the cafeteria floor and into the hands of a skeptical classmate, one young woman works to create a case for its truthfulness.

I le mulimuli ai i le faaaliga o loo i le Mataupu Faavae ma Feagaiga 5, sa molimau atu ai Matini ma le lototoa i le faamasinoga i uiga o Iosefa Samita ma le moni o papatusi auro. Ina ua uma ona faalogo i le molimau a Matini ma isi, sa faaleaogaina e le faamasino le mataupu e faasaga ia Iosefa Samita.

Faasoa atu ou manatu ma le molimau o le upumoni o lenei lesona.

Punaoa Faaopoopo

O le a le mea na tupu i le faamasinoga?

I le faamasinoga, sa feteenai molimau eseese a o latou tuuina atu molimau sese e faasaga ia Iosefa Samita. Mo se faataitaiga, sa latou fai mai e lei ia Iosefa Samita ia papatusi ae o le pusa na ia fai mai na i ai papatusi sa tumu i oneone, u’amea, po le leai foi o se mea. Sa latou fai mai foi o se taufaasese ina ia maua mai tupe ia Matini Harisi. Ona “molimau atu lea o Matini ma le lototoa, faaiuga, ma le malosi.” Sa ia fai mai, “E mafai ona ou tauto atu, e le’i maua lava se tālā se tasi a Iosefa Samita mai ia te a’u e ala i le faatauanau, talu ai na faia ia te a’u e le Atua. Ma i papatusi ua ia fai mai ua iā te ia, alii e, afai tou te le talitonu i ai, ae faaauau pea ona tetee atu i le upumoni, o le a i ai se aso o le a avea ma ala e faamalaia ai o outou agaga” (Lucy Mack Smith, Biographical Sketches [1853], faamauina i totonu o le Larry E. Morris, A Documentary History of the Book of Mormon [2019], 296–97).

E mafai faapefea ona ou faaaogaina upu o le Tusi a Mamona ma le Agaga Paia e fesoasoani ia te au e maua ai se molimau i le moni o le Tusi a Mamona?

Na faasoa mai foi Uso Tad R. Callister, o lē sa avea ma Peresitene Aoao o le Aoga Sa, lenei tala:

God's Compelling Witness: The Book of Mormon

Ua faamatala mai e Brother Callister le taumafaiga a le au faitio o le Ekalesia ae toilalo i le le faamaonia o le Tusi a Mamona. Ua ia molimau mai o Iosefa Samita na faaliliuina e ala i le faaaliga.

Sa tuua e se tasi o a’u uo lelei atamai le Ekalesia mo se taimi. Sa tusi mai o ia talu ai nei e uiga i lona toe foi mai: “Muamua, sa ou manao ina ia faamaonia mai ia te au le Tusi a Mamona i lona faasolopito, faaletino, faalegagana, ma faaleaganuu. Peitai, ina ua ou suia la’u taulaiga i le mea o loo ia aoao mai e uiga i le talalelei a Iesu Keriso ma Lana misiona laveai, sa amata ona ou maua se molimau i lona moni. I se tasi aso a o ou faitauina le Tusi a Mamona i lo’u potu, sa ou taofi ae tootuli i lalo ma avatu se tatalo ma le loto ma lagonaina ma le manino sa musumusu mai le Tama Faalelagi i lo’u Agaga e faapea o le Ekalesia ma le Tusi a Mamona e matuai moni a’ia’i. O lau tolu ma le afa tausaga o le toe sailiilia o le Ekalesia na toe taitai mai ai a’u ma le loto atoa ma le faatalitonuina i lona moni.”

Afai e faaalu e le tagata se taimi e faitau ai ma manatunatu loloto ma le lotomaualalo le Tusi a Mamona, e faapei ona faia e la’u uo, ma uai atu i fua suamalie o le Agaga, ona mulimuli ane lea ona maua le molimau o loo moomia. (Tad R. Callister, “O Le Molimau Mamana a le Atua: O Le Tusi a Mamona,” Liahona, Nov. 2017, 109)

Aisea e sili atu ai ona tāua se faaaliga o le Agaga nai lo faamaoniga faaletino?

E le gata ina finagalo lo tatou Tama Faalelagi ia tatou aoao; E finagalo o Ia ia tatou sui ma avea atili ona faapei o Ia ma Lona Alo. O le mauaina o se molimau faaleagaga e i ai se aafiaga e suia ai le tagata talitonu. O le mafuaaga lea e tasi e le lava ai le na o le vaai i papatusi. O le faagasologa o le faitauina o le Tusi a Mamona, talitonu i upu, ma le mauaina o se faaaliga faaleagaga i le moni e afua ai se suiga---o se toefanauina faaleagaga---i le tagata faitau (tagai i le Mataupu Faavae ma Feagaiga 5:16).

Gaoioiga Faaopoopo e Aoao Ai

Malamalamaaga faaopoopo

A o suesue e tamaiti aoga a latou pepa e tufa atu, e mafai ona e uunaia i latou e faaaoga ia vaefaamatalaga ma le Potutusi o le Talalelei e sue ai ni mau faaopoopo po o ni faamatalaga mai le konafesi aoao e faateleina ai lo latou malamalama i le molimau o loo latou suesueina. A o latou folasia atu i le vasega, e mafai ona latou faasoa mai nisi o nei mau faaopopo.

“O La’u Auauna o Iosefa”

Atonu e aoga i tamaiti aoga le tilotilo i fuaiupu ia e faaalia ai le ala na faamatalaina ai e Iesu Keriso ia Iosefa Samita. Valaaulia i latou e faitau le Mataupu Faavae ma Feagaiga 5:1–10, 21–22, ma le 33–35 ma mafaufau po o a mea ua faaalia mai e nei fuaiupu e uiga i lagona o le Faaola agai ia Iosefa Samita.

Ia e loto maualalo

Na tuuina atu ia Matini Harisi ni faatonuga faaopoopo e saunia ai o ia lava e avea ma se tasi o Molimau e Toatolu o papatusi auro. Faitau faatasi ia fuaiupu 24 ma le 28 ma tamaiti aoga. Talanoa pe mafai faapefea ona fesoasoani nei faatonuga i a tatou taumafaiga ia maua se molimau patino o le Tusi a Mamona o se tasi molimau ia Iesu Keriso.