Lesona 16: Mataupu Faavae ma Feagaiga 3-5

Iloilo Lou Aoaoina 1

Mataupu Faavae ma Feagaiga 1–5; Iosefa Samita—Talafaasolopito 1

O le manatunatu ma iloiloina lo tatou aoaoina faaleagaga e mafai ona fesoasoani ia tatou faalatalata atili atu ai i le Faaola. O lenei lesona e mafai ona fesoasoani i tamaiti aoga e manatua ma iloilo ai pe na faapefea ona fesoasoani ia o latou aafiaga i le suesueina o le Mataupu Faavae ma Feagaiga ma le Iosefa Samita—Talafaasolopito ia i latou e tuputupu ae ai faaleagaga ma faalatalata atili atu ai ia Iesu Keriso.

Gaoioiga E Ono Mafai Ona Aoao Ai

Aisea e tatau ai ona tatou iloilo?

Ina ia fesoasoani e saunia tamaiti aoga e iloilo lo latou alualu i luma i le taimi nei, mafaufau e fai se gaoioiga e pei o lea. Tusi le kalafi lenei i luga o le laupapa ma mafaufau e tuu atu se faataitaiga o se sini. Atonu e mafaufau tamaiti aoga i sini faaleagaga, faalemafaufau, faaletino, pe faaagafesootai o loo latou faia i le polokalama a Tamaiti ma le Autalavou.

I luga o se itulau i lau api talaaga mo suesuega, tusi ai se laina. I le faaiuga o le laina i le itu taumatau, tusi ai se tasi o au sini umi. O nisi faataitaiga o le taaalo lea i se taaloga po o le ta lea o se mea fai musika i se tulaga maualuga, e faapitoa lava le lelei i se tomai, maua se tikeri po o se tusipasi, po o le faaipoipo i le malumalu.

E pei ona faaalia i le kalafi lenei, tusi se ata i luga a’e o le laina e faatusa ai le mamao ua e lagona ua oo i ai lou alualu i luma agai i lau sini.

I le itu agavale o le laina, faaalu sina taimi e tusi ai i lalo le alualu i luma lena ua e i ai. Atonu e te faaaofia ai ni mea patino na e aoaoina pe faia e alualu ai i luma i lau sini.

• Aisea e aoga ai le taofi ma iloilo mea ua tatou aoaoina ma pe o faapefea lo tatou alualu i luma?

Mafaufau e valaaulia ni nai tamaiti aoga e faasoa mai mea na latou aoaoina pe faia e alualu ai i luma agai i a latou sini. O lenei mea o le a le gata ina saunia ai tamaiti aoga e aoao atili i lenei lesona ae e mafai foi ona fesoasoani i tamaiti aoga ia iloa lelei ai e le tasi le isi ma fausia ai le lotogatasi i le vasega.

O se tasi faamoemoega o le seminare o le fesoasoani lea i lou faalatalata atili atu i le Faaola, o Iesu Keriso, ma avea atili ai e faapei o Ia.

• Aisea e ono taua ai foi le taofi ma iloilo a tatou taumafaiga e faalatalata atili atu ia Iesu Keriso ma avea atili e faapei o Ia?

O le a se mea ua e aoaoina? O a mai lou alualu i luma?

Faamatala atu i lenei tausaga atoa o suesuega, o le tai fa i le ono vaiaso o le a i ai se lesona faapenei, lea e mafai ai e tamaiti aoga ona taofi e iloilo mea o loo latou aoaoina ma pe faapefea ona latou faalatalata atili atu i le Faaola.

Afai e aoga, mafaufau e valaaulia tamaiti aoga e lisi nisi o tala ma autu ua aoaoina ai i latou i lenei taimi. E mafai ona fesoasoani lenei mea ia i latou a o latou faia mea nei:

Faaalu ni nai minute e tusi ai i lau api talaaga mo suesuega e uiga i lau taumafaiga e faalatalata atili atu ai i le Faaola a o e suesueina le Mataupu Faavae ma Feagaiga i lenei tausaga. E mafai ona aofia ai aoaoga faavae ma upumoni o loo e aoaoina, o auala ua faateleina ai lau molimau ia Iesu Keriso, o uiga fou o loo e fausiaina, ma auala o loo e taumafai ai e sui.

A uma ua lava se taimi, valaaulia ni nai tamaiti aoga e faasoa mai o latou manatu pe afai e le patino tele i latou. O lenei gaoioiga e mafai ona faia i ni vaega toalaiti pe o se vasega. I se isi itu, e mafai foi e tamaiti aoga ona mafaufau i se upu po o se fasifuaitau e aotele ai auala o latou aoaoina pe tuputupu ae ai ma tusi i luga o le laupapa (mo se faataitaiga, “molimau malosi atu,” “aoao e uiga ia te Ia e ala i tusitusiga paia,” po o le “lagonaina o le alofa o le Faaola”). Ona mafai lea ona e faasino i upu autu i luga o le laupapa ma fesili pe o le a malie le tamaitiiti aoga na tusia e faasoa mai pe aisea na latou lisiina ai. A o e faalogo, vaavaai mo auala e faamalo atu ai i taumafaiga a tamaiti aoga, faamalosi i latou e faaauau, ma molimau atu i le fesoasoani ma faamanuiaga a le Alii.

Iloilo i tusitusiga paia

Faaali atu se ata o Iosefa Samita e pei o lenei ma talanoa ma tamaiti aoga le aafiaga o le suesueina o tusitusiga paia e uiga ia te ia o se perofeta a le Atua.

• Na faapefea ona fesoasoani le suesuega o tusitusiga paia i le Perofeta o Iosefa Samita?

Mafaufau i lau lava sini o le suesueina o tusitusiga paia. O faapefea ona aafia oe i lau taumafaiga?

Tuu atu i tamaiti aoga taitasi ni pepa laiti se lua. E mafai e tamaiti aoga ona tusi a latou tali i le fesili muamua i luga o le pepa e tasi ona tusi lea o a latou tali i le fesili lona lua i le isi.

• O le a se auala se tasi e te lagona ua faamanuiaina ai oe i lau suesuega o tusitusiga paia?

• O le a se tauiviga o loo e mauaina i au suesuega o tusitusiga paia?

Tuu atu i tamaiti aoga e tuu faatasi pepa o i ai o latou faamanuiaina i le faaputuga e tasi ma a latou tauiviga i se isi faaputuga. Faafefiloi eseese faaputuga e lua ma faasoa atu i le vasega. A o e faitau i mea na faamanuiaina ai i latou, ia faamalo atu ma faamalosi’au atu i tamaiti aoga. Mafaufau e fesili atu “Pe na i ai se isi na faamanuiaina i le faia o se mea faapea?” ma le “Na faapefea ona fesoasoani lau suesuega o tusitusiga paia ia te oe e faalatalata atili ai i le Tama Faalelagi ma Iesu Keriso?” A o outou faitau i tauiviga o loo feagai ma tamaiti aoga i le suesueina o tusitusiga paia, atonu e aoga le valaaulia o le vasega e sue ni mau, vaavaai mo faamatalaga mai perofeta po o taitai o le Ekalesia, pe mafaufau foi i ni aafiaga patino e ono fesoasoani.

Iloilo pe o faapefea lagona o tamaiti aoga i le Perofeta o Iosefa Samita

Tuu atu se avanoa e pei o lenei mo tamaiti aoga e iloilo ai o latou lagona e uiga i le Perofeta o Iosefa Samita.

Tusi le tele o mea e mafai ona e mafaufau i ai ua e aoaoina e uiga i le Perofeta o Iosefa Samita i nai vaiaso ua tuanai o le seminare.

E mafai e tamaiti aoga ona tusi faataamilo mea sa latou aoaoina i le ata o Iosefa Samita i luga o le laupapa. I se isi itu, e mafai e tamaiti aoga ona faia lenei gaoioiga i ni vaega toalaiti.

Vase lalo pe li’o soo se mea i lau lisi e faasino foi i se auala na ia fesoasoani ai ia te oe e faalatalata atili atu ai ia Iesu Keriso.

Afai e le aumaia e tamaiti aoga, ia mautinoa e aofia ai na vaai Iosefa Samita i le Tama Faalelagi ma Iesu Keriso i le Uluai Faaaliga, faaliliuina le Tusi a Mamona e ala i le mana o le Atua, ma maua faaaliga mai le Alii o loo aofia i le Mataupu Faavae ma Feagaiga. Ia aofia ai foi na toefuatai mai e le Alii le perisitua, le Ekalesia, ma feagaiga ma sauniga e ala mai ia Iosefa Samita.

Valaaulia tamaiti aoga e iloilo pe o le a le malosi latou te talitonu ai i mea sa latou lisiina i luga o se fua o le 1 i le 5 (1=e lē talitonu ma le 5=talitonu ma le mautinoa). Valaaulia i latou e faasoa mai ni aafiaga na fesoasoani e faateleina ai lo latou talitonuga faapea na valaauina e le Atua ia Iosefa Samita e avea ma se perofeta e fesoasoani ia i tatou e faalatalata atili atu ai ia Iesu Keriso.

O nisi o au tamaiti aoga atonu o loo tauivi pea ma a latou molimau faapea o Iosefa Samita o se perofeta. O le fai atu o le fesili lenei ma faataga tamaiti aoga e saunia ni manatu se tele e mafai ona fesoasoani ai i nei tamaiti aoga.

• Afai e tauivi se tasi e talitonu na valaauina e le Alii ia Iosefa Samita e avea ma se perofeta, o le a se mea e mafai ona e fautuaina latou e faia e faamalosia ai lo latou talitonuga?