Lesona 14: Mataupu Faavae ma Feagaiga 3-5

Mataupu Faavae ma Feagaiga 4

Auauna atu e pei o le Alii

Na mana’o Iosefa Samita le Matua e iloa pe mafai faapefea ona ia auauna atu i le Atua ma isi. I le tali atu i le manao o lona tama, sa saili ma maua ai e le Perofeta o Iosefa le uluai faaaliga na tuuina mai i tagata taitoatasi o e sa mananao e fesoasoani i le galuega a le Alii (tagai foi Mataupu Faavae ma Feagaiga 11–12; 14–16; 25). O lenei lesona e mafai ona fesoasoani i tamaiti aoga e auauna atu i le Atua ma isi i auala faaKeriso.

Gaoioiga E Ono Mafai Ona Aoao Ai

Auauna Atu e pei o le Alii

Mafaufau e amata le vasega i se gaoioiga e fesoasoani i tamaiti aoga e mafaufau loloto ai i o latou uiga e faatatau i le auauna atu i le Atua ma isi i auala faaKeriso. O le tasi nei o faataitaiga.

Vaai faalemafaufau i se tasi o faia se tasi o galuega nei o le auauna atu mo oe:

• Talanoa atu ia te oe e vaai pe o a mai oe

• Fesoasoani ia te oe i se galuega e tatau ona e faia

• Tatalo mo oe

E mafai faapefea ona aafia ai oe pe afai latou te auauna atu i auala nei? Aisea?

• Ma le loto atoa po o le lē loto atoa

• Onosai pe lē onosai

• Faaosofia e le alofa mo oe po o se isi mea

Vaai faalemafaufau la i le faatinoina e le Faaola o lena auaunaga mo oe. E mafai faapefea ona Ia faatinoina ma o le a se taunuuga e ono i ai?

I lenei lesona, o le a e suesue ai e uiga i le auauna atu ma uiga faaKeriso e finagalo le Alii tatou te sailia a o tatou auauna atu. A o e suesue, mafaufau loloto i ou lava manaoga e auauna atu ma pe aisea e te ono manao ai e taumafai ia maua nei uiga.

Taliina le fesili a Iosefa Samita le Matua

E ui lava e lei fesootai o ia ma soo se tapuaiga faatulagaina, ae sa talitonu Iosefa Samita le Matua i le mea na faasoa mai e lona atalii e uiga i ana faaaliga faalelagi ma lagolagoina o ia i lana faaliliuga o le Tusi a Mamona. Sa manao Iosefa le Matua e auauna atu i le Atua ae sa le iloa le mea e fai. Ia Fepuari 1829, sa la asiasi atu ai ma lona faletua ia Iosefa le Itiiti i Haramoni, Penisilevania. I le taimi o lena asiasiga, sa maua ai e le Perofeta o Iosefa le Mataupu Faavae ma Feagaiga 4 e tali ai le fesili a lona tama.

Faitau le Mataupu Faavae ma Feagaiga 4:1–4, ma vaavaai mo mea na aoao mai e le Alii e uiga i le (1) auala e tatau ona tatou auauna atu ai ia te Ia ma (2) aisea e tatau ai ona tatou auauna atu ia te Ia. Atonu e fesoasoani le iloa i le fuaiupu 4, o loo faatusatusa ai e le Alii le saito ua saunia e selesele i tagata o e ua saunia e talia le talalelei. O se selesaito o se meafaigaluega mo le seleselega.

Mafaufau e valaaulia tamaiti aoga e faaaoga metotia eseese e faailoga ai pe faapefea ma pe aisea tatou te auauna atu ai. Mo se faataitaiga, e mafai ona latou vase lalo o le e faapefea ona auauna atu i le Atua ma li’o pe aisea e tatau ai ona tatou auauna atu ia te Ia. Pe e mafai foi ona latou faaaogaina lanu eseese. Ona mafai lea e tamaiti aoga ona faatusatusa mea na latou faailogaina ma se paga po o se vaega toalaiti.

• O le a se mea sa e mauaina?

  Mafaufau e fai ni koluma se lua i luga o le laupapa e faaautuina E Faapefea ma le Aisea. E mafai ona e valaaulia ni tamaiti aoga e tusi mea na latou mauaina i luga o le laupapa i le koluma talafeagai. Atonu e te mafaufau e tusi upu loto, manatu, mafaufau, ma le malosi i luga o le laupapa ma fesili atu i tamaiti aoga pe o le a so latou manatu pe faapei le auauna atu o se tasi i “mea uma” o nei mea taitasi.

• O a faamanuiaga o i ai i nei fuaiupu mo i latou o e auauna atu i le Atua ma o latou loto atoa, manatu, mafaufau, ma le malosi atoa?

Ina ua uma ona aoao atu e uiga i faamanuiaga o le auauna atu i le Atua ma o tatou loto atoa, manatu, mafaufau, ma le malosi atoa, sa lisi mai e le Alii ni uiga paia se tele e mafai ona fesoasoani ia i tatou a o tatou auauna atu. Ua ia Iesu Keriso nei uiga taitasi ma valaaulia i tatou e atiina ae i o tatou lava olaga. A o tatou faia lena mea, e avea atili i tatou e faapei o Ia ma mafai ona auauna atu e pei ona Ia auauna atu.

Faitau le Mataupu Faavae ma Feagaiga 4:5–6, ma vaavaai mo uiga e finagalo le Alii ia i tatou e atiina ae ao tatou auauna atu.

Faamalamalama atu o nei uiga o le pe faapefea ona tatou auauna atu ma e mafai ona faailogaina i le ala lava e tasi e pei o malamalamaaga pe faapefea i fuaiupu 1–4. E mafai e tamaiti aoga ona faaopoopo nei uiga i le laupapa i le koluma e o faatasi ai.

• E faapefea ona e faia se aotelega o aoaoga o lenei vaega i se fuaiupu se tasi?

O se tasi o mataupu faavae e mafai ona tatou aoao mai lenei vaega o le, a o tatou auauna atu ma uiga faaKeriso, o le a tatou tutu ma le lē pona i luma o le Atua ma aumaia le faaolataga i o tatou agaga.

O le malamalama i uiga faa-Keriso

Mafaufau e fesili po o a ni uiga e le malamalama i ai tamaiti aoga. Valaaulia tamaiti aoga e saili upu autu i le Taiala i Tusitusiga Paia, le Taiala i Autu, po o lauga o konafesi aoao. O se tusi lomifefiloi po o se sailiga i luga o le polokalama o le Gospel Library e mafai foi ona aoga.

Valaaulia tamaiti aoga e faasoa mai po o a uiga faaKeriso i le Mataupu Faavae ma Feagaiga 4 latou te manatu e sili ona taatele ona maua i tagata talavou. Mafaufau e fesili po o le fea uiga e ono seāseā tupu ma pe aisea foi. (E mafai ona e fesili po o le a [le uiga] o loo ta’ua faalua i le vaega 4 ma pe aisea latou te manatu ua faapea.) E mafai e tamaiti aoga ona faasoa mai pe na faapefea ona latou vaaia nei uiga faaKeriso i a latou uo i le vasega. O lenei mea e mafai ona faateleina ai le lotogatasi o le vasega ma faamalosi ai isi e atiina ae uiga faaKeriso.

Saili le taitaiga a le Agaga Paia e filifili ai se uiga faaKeriso o le a sili ona aoga mo oe e suesue i ai. Tusi i le pito i luga o se itulau i lau api talaaga mo suesuega. I lalo ifo o le uiga na e filifilia, tusi ai mea nei.

1. Faataitaiga: Mafaufau loloto pe na faapefea ona faataitaia e le Faaola lenei uiga paia anamua po o i lou olaga i aso nei. Afai e faaaoga se faataitaiga mai tusitusiga paia, taumafai e tusi i lalo se tala patino po o se mau faasino. (O le Taiala i Tusitusiga Paia ma le Taiala i Autu e mafai ona toe aoga.) E mafai foi ona e tusia se faataitaiga faaonapo nei o se tasi o loo auauna atu ma lenei uiga ma le auala na faia ai se eseesega.

2. O mea e mafai ona tatou faia: Lisi se laasaga se tasi pe lua e mafai ona e faia e atiina ae atili ai lenei uiga i lou olaga. Mo manatu, toe faitau le Mataupu Faavae ma Feagaiga 4:7, fesili atu mo se fautuaga e ala i le tesi po o le fesili atu i se tasi e te lagona o loo i ai lenei uiga faaKeriso.

Valaaulia ni nai tamaiti aoga e faasoa mai o latou manatu. A o latou faasoa mai, mafaufau e fesili atu pe i ai nisi na filifilia lea uiga e tasi ma mananao e faasoa mai o latou manatu. Faasoa foi i ai ni ou oe lava manatu. E mafai ona avea lenei mea ma se avanoa sili e malamalama atili ai i uiga faaKeriso eseese ma lagona ai lo latou taua. Vaavaai mo ni auala e faamamafa ai le faataitaiga a le Faaola.

O le atiinaeina o uiga faa-Keriso

Ina ia faaiuina lenei lesona, fai se fuafuaga o ni laasaga se tasi pe lua e mafai ona e faia e fausia ai se uiga faaKeriso sa e suesueina i lenei aso. E mafai ona e faaaofia ai ni auala e saili ai le fesoasoani a le Alii a o fausiaina lenei uiga.

Atonu e aoga le valaaulia o tamaiti aoga e tusi a latou sini i a latou api talaaga mo suesuega po o Atinaega Faaletagata Lava Ia: Tusitaiala a le Autalavou. I se lesona i le lumanai, fai atu i tamaiti aoga e lipoti mai tulaga o i ai i latou. Mafaufau e faatu se sini patino ma faasoa atu i au tamaiti aoga pe o faapefea ona e sailia le fesoasoani a le Alii.

Punaoa Faaopoopo

O fea e mafai ona ou aoao atili ai e uiga ia Iosefa Samita le Matua.?

E ono mafai foi ona fesoasoani punaoa nei:

• Autu o le Talafaasolopito a le Ekalesia: “Iosefa Samita le Matua.,” ChurchofJesusChrist.org/study/history/topics

• Autu o le Talafaasolopito a le Ekalesia, “Aiga o Iosefa le Matua ma Lusi Maki Samita,” ChurchofJesusChrist.org/study/history/topics

• “Iosefa Samita le Matua“ (faamatalaga o le talaaga), the Joseph Smith Papers josephsmithpapers.org/person/joseph-smith-sr

• “The Joseph Smith Sr. Aiga,” Past Impressions (faasologa o le leo), ChurchofJesusChrist.org

Na faapefea ona usita’ia e Iosefa Samita le Matua le faaaliga ma auauna atu?

Na faaauau pea Iosefa Samita le Matua e auauna atu i auala faaKeriso i lona olaga atoa. E lei leva ona uma lenei faaaliga, ae ia faasoa atu le talalelei ia Oliva Kaotui. Sa faaauau pea ona lagolagoina e Iosefa le Matua lona atalii ma sa papatisoina i le Ekalesia i se taimi vave lava ina ua uma ona faatuina. Sa avea foi o ia o se tasi o Molimau e Toavalu o le Tusi a Mamona. Sa galue Iosefa le Matua i le Malumalu o Katelani ma sa auauna atu i valaauga eseese, e aofia ai le Peteriaka ma le fautua fesoasoani i le Au Peresitene Sili. I le 63 o ona tausaga, sa ia auauna atu ai i se misiona i Sasae o le Iunaite Setete.

Aisea e tatau ai ona ou auauna atu i le Atua?

Na aoao mai Elder David A. Bednar o le Korama a Aposetolo e Toasefululua:

O le auauna atu ia te Ia e manaomia ai o tatou loto atoa, manatu, mafaufau, ma le malosi atoa. O le mea lea, o le auauna atu i isi ma le lē manatu faapito e faatoilaloina ai lagona faaloloto ma le manatu faapito o le tagata natura. Tatou te tuputupu a’e ia alolofa i ē tatou te auauna i ai. Ma ona o le auauna atu i isi o le auauna atu lava lea i le Atua, ua tatou tuputupu a’e ai e alolofa atili ia te Ia ma o tatou uso ma tuafafine. O lea alofa o se faailoaga lea o le meaalofa faaleagaga o le alofa mama, le alofa le pona lava lea o Keriso. (David A. Bednar, “Ana Iloa e Outou o A’u,” Liahona, Nov. 2016, 104)

Aisea e tatau ai ona ou suesue i le Mataupu Faavae ma Feagaiga 4?

Na tusia e Peresitene Iosefa Filitia Samita (1876–1972):

[O leMataupu Faavae ma Feagaiga 4] e matua puupuu lava, e na o le fitu fuaiupu, ae ua lava ma totoe fautuaga ma faatonuga o loo i ai mo se olaga atoa o suesuega. E leai se tasi ua malamalama lelei i ai. Sa lei fuafuaina o se faaaliga patino ia Iosefa Samita [Matua], ae o se faamanuiaga ia i latou uma o e ua mananao e o atu i le galuega a le Atua. O se faaaliga i tagata taitoatasi o le Ekalesia. … Atonu e leai se isi faaaliga i a tatou tusitusiga paia uma ua i ai faatonuga sili atu e faatatau i ituaiga agavaa o tagata o le Ekalesia mo le galuega a le Atua, ma i se faiga faapuupuuina nai lo lenei faaaliga. E pei lava lona lautele, lona maualuga, ma lona loloto o le faavavau. E leai se alii [po o se tamaitai] faifeautalai o le Ekalesia e agavaa e aoao atu i le Ekalesia, pe avatu le savali o le Faaolataga i le lalolagi, seiiloga [na te] talia ma faaaogaina, ia le itiiti ifo se vaega, o lenei faatonuga na auina mai le lagi. (Joseph Fielding Smith, Church History and Modern Revelation [1953], 1:35)

E mafai faapefea ona ou atiina a’e uiga faa-Keriso?

Mafaufau e matamata pe faitau le “Avea e Faapei o Ia” na saunia e Scott D. Whiting o le Fitugafulu (Liahona, Nov. 2020, 12–15).

Gaoioiga Faaopoopo e Aoao Ai

Sui amataga

Mafaufau e amata le vasega i le valaaulia o tamaiti aoga e moeiini o latou mata ma vaai faalemafaufau pe faape’i pe ana faapea na soifua le Faaola o Iesu Keriso i lo latou aai. E faapefea Ana amioga? E faapefea ona Ia faia isi tagata? O le a se mea Na te faia?

A uma ona faasoa mai e tamaiti aoga nisi o ō latou manatu, valaaulia i latou e mafaufau i ni nai auala e mafai ai e se tasi i aso nei ona taumafai e auauna atu i le Atua ma isi e pei o le Faaola. A o mafaufau tamaiti aoga, e mafai ona e faamanatu atu ia i latou sa auauna ma faauoina e le Faaola i latou sa vaai maualalo i ai tagata pe na ta’ua o tagata agasala (tagai Mataio 9:10–11; Ioane 8:1–11). Sa ia siitia ma taialaina isi ia talitonu ma faalagolago i le Atua i ni auala sili atu. Sa Ia faamaloloina ma faamanuiaina isi i Ana upu ma galuega. Mafaufau e fesili po o le a le aafiaga o nei faatinoga ma pe aisea foi.

O le isi auala e amata ai le vasega o le valaaulia lea o tamaiti aoga e tali le fesili lenei: “Afai e mafai ona e foafoaina se [tagata taalo, tagata musika, tusiata, faiaoga, po o se toalua] lelei, o a ni uiga o le a i ai ia i latou?” Ona faitau lea e tamaiti aoga le Mataupu Faavae ma Feagaiga 4 ma vaavaai pe o le a le ituaiga faamatalaina ua faamatala ai le auauna lelei a le Atua.

Ia tutu ma le lē pona i luma o le Atua

A mae’a ona talanoaina le fuaiuipu 2, valaaulia tamaiti aoga e vaai faalemafaufau pe faape’i le tu ai ma le “lē pona” i le afioaga o le Atua. Ona fesili atu lea: O le a le uiga o le lē pona? Aisea e te manatu ua finagalo ai le Alii ia te oe e auauna atu ia te Ia ma isi ina ia lē pona? E mafai ona maua e tamaiti aoga ia fuaiupu i tusitusiga paia o loo ta’u mai ai le taua o le auauna atu po o le ala e fesoasoani ai le Faaola ia i tatou ia lē pona.

O le mafuaaga tatou te auauna atu ai

Mafaufau e valaaulia tamaiti aoga e vaavaai i tali na latou maua mo le mafuaaga e tatau ai ona tatou auauna atu i le Atua. Afai e aoga mo tamaiti aoga le suesue i isi mafuaaga tatou te auauna atu ai, mafaufau e valaaulia i latou e faitau le Mataio 25:34–45; Mosaea 2:17; Mataupu Faavae ma Feagaiga 76:5; po o le Dallin H. Oaks, “Aisea Tatou te Auauna Atu Ai?,” Ensign, Nov. 1984, 12–15. Valaaulia tamaiti aoga e faasoa mai po o a mafuaaga e sili ona faaosofia ai i latou ma pe aisea.

O le faataitaiga a Iesu Keriso

Ina ia faapupula le faataitaiga a le Faaola e faatatau i uiga o loo maua i le Mataupu Faavae ma Feagaiga 4, mafaufau e matamata le “Uiga FaaKeriso” (2:53). E mafai e tamaiti aoga ona faailoa mai ni uiga faaKeriso faaopoopo o loo lisiina i le vitio e le o maua i le Mataupu Faavae ma Feagaiga 4.