Lēsoni 18: Tokāteline mo e Ngaahi Fuakava 6–9

Ko e Liliu ʻo e Tohi ʻa Molomoná

“Ko e Meʻafoaki mo e Māfimafi ʻo e ʻOtuá”

ʻI he hoko ʻa ʻŌliva Kautele ko e tangata tohi ʻa Siosefa Sāmitá, naʻe ʻi ai ha fakalakalaka fakaofo ʻi heʻene liliu ʻa e Tohi ʻa Molomoná lolotonga e faʻahitaʻu failau ʻo e 1829. Neongo ʻoku ʻikai ke tau ʻiloʻi ha fakaikiiki pau fekauʻaki mo e founga naʻe liliu ai ʻe Siosefa Sāmita ʻa e Tohi ʻa Molomoná, ka ʻoku tau ʻiloʻi naʻá ne fai ia ʻi he meʻafoaki mo e māfimafi ʻo e ʻOtuá. ʻOku fakataumuʻa ʻa e lēsoni ko ʻení ke tokoni ke fakamālohia ʻa e fakamoʻoni ʻa e kau akó naʻe ʻomi ʻe he ʻOtuá ha ngaahi founga mo ha mālohi kia Siosefa Sāmita ke liliu ʻaki ʻa e Tohi ʻa Molomoná maʻatautolu.

Ngaahi ʻEkitivitī Ako ʻOku Ala Fakahokó

Tupuʻanga ʻo e Tohi ʻa Molomoná

Fakakaukau ke kamata ʻa e kalasí ʻaki hono vahevahe ʻa e tūkunga ko ʻení. Te ke lava ʻo ʻoange ki he kau akó ha faingamālie ke tulamaʻi mo hanau hoa pe ʻi muʻa ʻi he kalasí.

Fakakaukauloto naʻá ke vahevahe ʻi ha ʻaho ki ha taha ho ngaahi kaungāmeʻa leleí ʻa hoʻo tui ko e Tohi ʻa Molomoná ko e folofola ia ʻoku hangē ko e Tohi Tapú. Hangē ʻoku kiʻi ʻohovalé ho kaungāmeʻá peá ne pehē naʻe akoʻi ia naʻe hiki ʻe Siosefa Sāmita ʻa e Tohi ʻa Molomoná mei heʻene fakakaukaú.

• Ko e hā ha ngaahi founga te ke lava ai ʻo tali ʻi he tūkunga ko ʻení?

Fakamatalaʻi ange ʻe tokoni ʻa e lēsoni ko ʻení ke ako ʻe he kau akó ha niʻihi ʻo e ngaahi fakaikiiki fekauʻaki mo hono liliu ʻe Siosefa Sāmita ʻa e Tohi ʻa Molomoná. Fakaafeʻi ʻa e kau akó ke kumi ha ngaahi moʻoni ʻi heʻenau akó ʻe lava ʻo tokoni kiate kinautolu ʻi he ngaahi tūkunga pehení pea fakamālohia ʻenau fakamoʻoní ko e Tohi ʻa Molomoná ʻoku mei he ʻOtuá.

Ko e tokoni ʻa ʻŌliva Kautele ʻi he liliú

Fakakaukau ke fehuʻi ki he kau akó pe ko e hā ʻoku nau manatuʻi fekauʻaki mo e ngaahi tūkunga kau ki he tokoni ʻa ʻŌliva Kautele kia Siosefa Sāmita ʻi hono liliu ʻo e Tohi ʻa Molomoná. Kapau ʻe fiemaʻu, vakai ki he lēsoni “Tokāteline mo e Ngaahi Fuakava 6” pe Kau Māʻoniʻoni, vōliume 1, Ko e Fuka ʻo e Moʻoní, 60–62.

ʻI loto ʻi ha ʻaho ʻe ua mei he tūʻuta ʻa ʻŌliva Kautele ki Hāmoni, Penisilivēnia ke feʻiloaki mo Siosefa Sāmitá, naʻá ne kamata ngāue ko ha tangata tohi ʻa Siosefa. Naʻe ʻikai fuoloa kuo fakahoko ʻe Siosefa mo ʻŌliva ha fakalakalaka fakaofo ʻi hono liliu ʻo e Tohi ʻa Molomoná. ʻOku fakafuofua, ʻi he hoko ʻa ʻŌliva ko e tangata tohi ʻa Siosefa Sāmitá, naʻe fakakakato ai ʻe Siosefa hono liliu ʻo e Tohi ʻa Molomoná ʻi ha ʻaho ngāue nai ʻe 65 (vakai, Russell M. Nelson, “A Treasured Testament,” Ensign, July 1993, 61).

Fakamatala ʻa Siosefa Sāmita ki he liliú

Fakakaukau ke ʻeke ki he kau akó ʻa e meʻa ʻoku nau ʻilo kau ki hono liliu ʻe Siosefa Sāmita ʻa e Tohi ʻa Molomoná ʻi ha founga fakaofo peheé.

ʻE lava ke tokoni ʻa e konga ko ʻeni naʻe toʻo mei he ngaahi ʻēsei ki he Ngaahi Tefito ʻo e Ongoongoleleí ʻoku ui ko e “Book of Mormon Translation” ke mahino ki he kau akó ʻa e meʻa naʻe fiemaʻu ʻe Siosefa Sāmita ke ʻilo ʻe he māmaní fekauʻaki mo e liliú.

ʻI he talamuʻaki ki he pulusinga ʻo e Tohi ʻa Molomoná ʻi he 1830, naʻe tohi ai ʻe Siosefa Sāmita ʻo pehē: “Te u fakahā kiate kimoutolu naʻá ku liliu [ʻa e tohí], ʻaki ʻa e meʻafoaki mo e mālohi (māfimafi) ʻo e ʻOtuá.” ʻI hono faʻa fakafehuʻia ʻa Siosefa ki ha fakaikiiki kau ki he founga ʻo e liliú, naʻá ne toutou tali ʻi he taimi lahi naʻe fai ia ʻʻaki ʻa e meʻafoaki mo e mālohi (māfimafi) ʻo e ʻOtuá’ peá ne pehē ʻi ha taimi ʻe taha, “Naʻe ʻikai fakataumuʻa ia ke tala ki he māmaní ʻa e founga kotoa naʻe ʻomi ai ʻa e Tohi ʻa Molomoná.” (Ngaahi ʻĒsei ki he Ngaahi Tefito ʻo e Ongoongoleleí, “Book of Mormon Translation,” ChurchofJesusChrist.org)

• Ko e hā ha ngaahi moʻoni te tau lava ʻo ako mei he fakamatala ʻa Siosefa Sāmita fekauʻaki mo hono liliu ʻo e Tohi ʻa Molomoná?

  Tokoni ke ʻilo ʻe he kau akó ʻa e moʻoni ko ia naʻe liliu ʻe Siosefa Sāmita ʻa e Tohi ʻa Molomoná ʻaki ʻa e meʻafoaki mo e mālohi (māfimafi) ʻo e ʻOtuá.

• Ko e hā ʻoku mahuʻinga ai ke ʻiloʻi naʻe liliu ʻa e Tohi ʻa Molomoná ʻi he mālohi (māfimafi) ʻo e ʻOtuá kae ʻikai ʻo Siosefa Sāmitá?

Ngaahi meʻangāue liliu leá

ʻE lava ke tokoni ʻeni ke mahino ki he kau akó ha kiʻi meʻa siʻi fekauʻaki mo e ngaahi meʻangāue naʻe tuku ʻe he ʻOtuá kia Siosefa Sāmita ke tokoni ʻi heʻene feinga ke liliu ʻa e Tohi ʻa Molomoná.

ʻI he taimi naʻe hā ai ʻa e ʻāngelo ko Molonaí kia Siosefa Sāmita ʻi he 1823, naʻá ne ʻoange ha ngaahi fakahinohino ki he Palōfitá fekauʻaki mo e founga ʻe ʻomi ai ʻa e Tohi ʻa Molomoná.

Lau ʻa e Siosefa Sāmita—Hisitōlia 1:34–35 pea kumi ʻa e ngaahi meʻangāue naʻe teuteu ʻe he ʻOtuá ki hono liliu ʻo e Tohi ʻa Molomoná.

Kapau ʻe fiemaʻu, te ke lava foki ʻo fakaafeʻi ʻa e kau akó ke lau ʻa e Molomona 9:34 mo e ʻEta 3:23–24 ke tokoni ke mahino kiate kinautolu, naʻe mahino ki he kau palōfita ʻo e Tohi ʻa Molomoná ʻe teuteu ʻe he ʻOtuá ha founga ke liliu ai ʻenau ngaahi leá.

• Ko e hā ha ngaahi founga naʻe teuteuʻi ai ʻe he ʻEikí ʻa e Tohi ʻa Molomoná ki hono liliú?

Ke tokoni ke mahino lelei ange ki he kau akó ʻa e ngaahi fakaikiiki fekauʻaki mo hono fakaʻaongaʻi ʻe Siosefa Sāmita ha ngaahi meʻangāue fakatuʻasino ke liliu ʻa e Tohi ʻa Molomoná, fakakaukau ke huluʻi ʻa e foʻi vitiō “Seer Stone” (3:47), ʻoku maʻu ʻi he ChurchofJesusChrist.org. Pe, ko hoʻo fakamatalaʻi fakanounou ʻa e fakamatala ko ʻení pe fakaafeʻi ha tokotaha ako ke lau ia ki he kalasí.

ʻOku fakahaaʻi ʻe he ngaahi fakamatala fakahisitōlia kimui angé naʻe ʻikai ngata pē ʻi hono fakaʻaongaʻi ʻo e ʻŪlimí mo e Tūmemí (ʻoku faʻa ui ʻi he taimi ʻe niʻihi ko e ongo meʻa liliu lea ʻa e kau Nīfaí) ke liliu ʻaki ʻa e Tohi ʻa Molomoná, ka naʻe fakaʻaongaʻi ʻe Siosefa Sāmita ha meʻangāue ʻe taha naʻe ui ko e maka kikité. Naʻe ʻiloʻi ʻe he Palōfitá ʻa e meʻangāue ko ʻení ʻi ha ngaahi taʻu lahi kimuʻa peá ne toki maʻu ʻa e ʻū lauʻi peleti koulá.

ʻOku ʻikai ke tau ʻilo ha ngaahi fakaikiiki lahi fekauʻaki mo e founga naʻe fakaʻaongaʻi ai ʻe Siosefa ʻa e ngaahi meʻangāue ko ʻeni naʻe teuteuʻi ʻe he ʻOtuá. Ka naʻe pehē ʻe he kau fakamoʻoní, ʻoku faʻa fokotuʻu ʻe Siosefa ʻi he taimi ʻe niʻihi ʻa e ʻŪlimí mo e Tūmemí pe foʻi maka kikité ke taʻofi ʻaki ʻa e māmá, ʻa ia naʻe lava ai ke ne sio lelei ange ki he ngaahi lea naʻe hā ʻi he ngaahi meʻangāue fakatuʻasinó (vakai, Ngaahi ʻĒsei ki he Ngaahi Tefito ʻo e Ongoongoleleí, “Book of Mormon Translation,” ChurchofJesusChrist.org).

Tokoni ke mahino ki he kau akó neongo ʻoku tau ʻilo ha ngaahi fakaikiiki fekauʻaki mo hono liliu ʻe Siosefa Sāmita ʻa e Tohi ʻa Molomoná, ka ʻoku lahi ha ngaahi meʻa ʻoku ʻikai ke tau ʻilo fekauʻaki mo e founga ʻo e liliú. Ko e moʻoni mahuʻinga tahá ko hono fakaʻatā ʻe he mālohi (māfimafi)ʻo e ʻOtuá ʻEne folofolá ke ʻomi ki Heʻene fānaú.

Fakakaukau ke fakaʻaongaʻi ha taha pe lahi ange ʻo e ngaahi maʻuʻanga tokoni ko ʻení ke tokoni ke ongoʻi ʻe he kau akó naʻe liliu ʻa e Tohi ʻa Molomoná ʻaki ʻa e meʻafoaki mo e mālohi (māfimafi) ʻo e ʻOtuá.

• Ko e konga “Ngaahi Leʻo ʻo hono Fakafoki Mai ʻo e Ongoongoleleí” ʻo e “Tokāteline mo e Ngaahi Fuakava 6–9: Ko ʻEni ʻa e Laumālie ʻo e Fakahaá,” Haʻu, ʻo Muimui ʻIate Au—Maʻá e ʻApí mo e Lotú: Tokāteline mo e Ngaahi Fuakava 2025

• “Days of Harmony” mei he taimi 7:18 ki he 11:33

• Ko e fakamatala ʻa ʻŌliva Kautele ki he founga ʻo e liliú ʻo hangē ko hono lekooti ʻi he Siosefa Sāmita—Hisitōliá (ʻoku maʻu ʻi he palakalafi ʻuluaki hili ʻa e veesi 75)

  Mahalo te ke fie fakaafeʻi ʻa e kau akó ke aleaʻi fakakulupu pe tauhoa ʻa e ngaahi fehuʻi ko ʻení kimuʻa pea fakaafeʻi kinautolu ke vahevahe ʻenau ngaahi talí mo e kalasí.

• Ko e hā ha ngaahi foʻi lea pe kupuʻi lea ʻa ʻEma pe ko ʻŌliva ʻoku poupou ki he fakamoʻoni ʻa Siosefa Sāmitá, naʻe liliuʻa e Tohi ʻa Molomoná ʻaki ʻa e meʻafoaki mo e mālohi (māfimafi) ʻo e ʻOtuá?

• Ko e hā ʻokú ke ako pe ongoʻi fekauʻaki mo e ʻOtuá hili hoʻo ʻilo naʻe hoko ʻa Siosefa Sāmita ko ha meʻangāue ʻi Hono toʻukupú ke liliu ʻa e Tohi ʻa Molomoná?

Ko e mālohi ʻo e Tohi ʻa Molomoná ʻi hoʻo moʻuí

Fakamatalaʻi ange ko e taha ʻo e ngaahi founga lelei taha ʻe lava ke tau ʻilo ai naʻe liliu ʻa e Tohi ʻa Molomoná ʻaki ʻa e meʻafoaki mo e mālohi (māfimafi) ʻo e ʻOtuá, ko hono ako mo aʻusia ʻa e mālohi ʻo e ʻOtuá ʻi hono moʻui ʻaki hono ngaahi akonakí.

ʻOange ha taimi ki he kau akó ke nau kumi ha veesi pe talanoa mei he Tohi ʻa Molomoná kuó ne tokoniʻi ʻenau moʻuí. Kapau ʻoku faingataʻa ke maʻu ʻe he kau akó ha meʻa, fakakaukau ke fakahoko ha tokoni pe fakahinohino, hangē ko hano fakaafeʻi kinautolu ke ako ha niʻihi ʻo e ngaahi potufolofola fakataukei fakatokāteline ʻo e Tohi ʻa Molomoná. Te ke lava foki ʻo fokotuʻu ange ha ngaahi veesi ʻe niʻihi ʻe lava ke nau ako.

• Ko e hā ha veesi pe talanoa mei he Tohi ʻa Molomoná kuó ne tākiekina lelei hoʻo moʻuí?

• Kuo takiekina fēfē nai ʻe he veesi pe talanoa ko ʻení hoʻo ngaahi ongo ki he Tamai Hēvaní mo Sīsū Kalaisí?

Fakakaukau ke ke fakamoʻoniʻi ki he kau akó ko e mālohi te nau lava ʻo maʻu mei hono ako ʻo e Tohi ʻa Molomoná ko ha fakamoʻoni ia ʻo e mālohi ʻo e ʻOtuá ʻi hono ʻomi ʻo e Tohi ʻa Molomoná.

Ngaahi Maʻuʻanga Tokoni Lahi Ange

Ko e hā ʻoku siʻisiʻi ai ʻetau ʻilo ki he founga naʻe fakahoko ai ʻa e liliú?

Naʻe akoʻi ʻe ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e hā ʻoku ʻikai ke tau maʻu ai ha fakamatala lahi ange ʻo kau ki he founga ʻo hono liliu ʻa e Tohi ʻa Molomoná? Mahalo naʻe ʻikai fakahaaʻi kakato ʻa e foungá koeʻuhí he ʻikai ke tau mateuteu ke maʻu ha mahino, ʻo ka naʻa tau maʻu ia. Mahalo pē naʻe finangalo ʻa e ʻEikí ke tuku pē ʻa e Tohi ʻa Molomoná ʻi he tafaʻaki ʻo e tuí, neongo ʻoku lahi fau ai ʻa e ngaahi fakamoʻoni ki hono mahuʻingá. He naʻe fakahinohinoʻi ʻe Kalaisi ʻa Molomona, ʻa ia naʻá ne toe vakaiʻi ʻa e ngaahi akonaki ʻa e Fakamoʻuí ʻi he lotolotonga ʻo e kau Nīfaí, ke ʻoua naʻa hiki kotoa ʻa kinautolu ʻi he ʻū lauʻi peletí he “Te u siviʻi ʻa e tui ʻa hoku kakaí” (3 Nīfai 26:11). Mahalo ʻoku taʻofi foki ʻa e ngaahi fakaikiiki ʻo e liliú koeʻuhí ʻoku fakataumuʻa ke tau fakafemoʻuekinaʻi kitautolu ʻi he kakano ʻo e tohí kae ʻikai ke fuʻu tokanga ki he founga naʻa tau maʻu ai iá. (Neal A. Maxwell, “By the Gift and Power of God,” Ensign, Jan. 1997, 41)

Naʻe founga fēfē nai ʻa e hoko hono liliu ʻe Siosefa Sāmita ʻa e Tohi ʻa Molomoná ko ha maná?

Naʻe akonaki ʻa Palesiteni Lāsolo M. Nalesoni ʻo pehē:

Fakakaukau ki he kiʻi taimi nounou naʻe liliu ai ʻe Siosefa ʻa e Tohi ʻa Molomoná. ʻI he ngāue ʻa Siosefa mei ʻEpeleli ki Sune ʻo e 1828, naʻá ne liliu ai ha peesi ʻe 116 naʻe fakamoleki kimui ʻe Māteni Hālisi. Naʻe toe kamata ʻa e liliu ʻa Siosefá ʻi he ʻaho Tūsite ko e 7 ʻo ʻEpeleli 1829 pea ko e tangata tohí ko ʻŌliva Kautele. Naʻe kakato ʻa e tohí, hili ha ʻaho ʻe valungofulu-mā-nima mei ai, ʻi he ʻaho 30 ʻo Sune ʻo e taʻu pē ko iá. Ko hono moʻoní, naʻe ʻikai fakaʻaongaʻi ʻa e taimi kotoa ko iá ʻi he liliú. … Ko hono fakafuofuaʻi totonú, ko e toenga ʻaho ngāue ko ʻeni ʻe onongofulu mā nima pe toe siʻi ange aí, naʻe liliu ai ʻe he palōfitá mo ʻene kau tangata tohí ʻa e tohí ni, ʻa ia ʻoku peesi ʻe 531 ʻi hono pulusinga lolotongá. (Vakai, John W. Welch, Ensign, Jan. 1988, pp. 46–47.) ʻOku fikaʻi fakaʻavalisi ia ki ha peesi ʻe valu ʻi he ʻaho. Fakakaukau ki heni ʻi haʻo liliu ha tohi, pe ko hoʻo fakataimi-tēpileʻi hoʻo lau ʻa e Tohi ʻa Molomoná. (Russell M. Nelson, “A Treasured Testament,” Ensign, July 1993, 61–62)

ʻE lava fēfē ke hoko ʻa e Tohi ʻa Molomoná ko ha aʻusia maʻu fakahā kiate au?

Naʻe akoʻi ʻe ʻEletā Kimi B. Kalake, ko e Fitungofulu Taki Māʻolunga ʻi he tuʻunga fakalāngilangí ʻo pehē:

ʻE lava ke hoko ʻa e Tohi ʻa Molomoná ko ha aʻusia fakalaumālie kiate koe, hangē ko ia naʻe hoko kia Siosefá.

Naʻe mamata ʻa e kau palōfita naʻa nau hiki ʻa e Tohi ʻa Molomoná ki hotau kuongá. Naʻa nau tohi mai kiate kitautolu. ʻOku lave ʻenau ngaahi leá ki hotau kuongá, ngaahi fiemaʻú, mo ʻetau ngaahi taumuʻá. Kapau ʻoku fakaʻatā ho lotó ʻi hoʻo lau mo lotua ʻa e Tohi ʻa Molomoná, ʻe “fakahā” ʻe he Laumālie Māʻoniʻoní “hono moʻoní kiate koe” [Molonai 10:4]. (Kim B. Clark, “Vakai ko Siosefa Koe” [fakataha lotu fakaemāmani lahi maʻá e kakai lalahi kei talavoú, 7 ʻo Mē, 2017], ChurchofJesusChrist.org)

Ngaahi ʻEkitivitī Fakalahi ki he Akó

Ko hono tukutaha ʻa e tokangá ki he meʻa ʻoku mahuʻinga tahá

Kimuʻa pea fakaafeʻi ʻa e kau akó ke vahevahe ha ngaahi veesi pe ngaahi talanoa mei he Tohi ʻa Molomoná kuó ne liliu ʻenau moʻuí, te ke lava ʻo huluʻi ʻa e foʻi vitiō “How Did Joseph Smith Translate the Book of Mormon?” (8:06). ʻI he vitiō ko ʻení, ʻoku vahevahe ai ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá mo Keiti Holopaluki (1972–2022), ko ha faihisitōlia mālōlō ʻa e Siasí, ʻa e founga naʻe mahuʻinga ange ai ʻena fakamoʻoni ki he Tohi ʻa Molomoná ʻi heʻena ʻilo ki he ngaahi fakaikiiki fekauʻaki mo e founga hono liliú.

Ako lahi ange fekauʻaki mo e ngaahi meʻangāue naʻe ʻomi ʻe he ʻOtuá

ʻI hoʻomou aleaʻi hono fakaʻaongaʻi ʻe Siosefa Sāmita ʻa e ngaahi meʻangāue fakatuʻasinó ke liliu ʻa e Tohi ʻa Molomoná, fakakaukau ke fehuʻi ki he kau akó pe ʻoku nau ʻilo ha toe taimi ange naʻe fakaʻaongaʻi ai ʻe he ʻOtuá ha ngaahi meʻangāue pe meʻa ke fakahā ʻaki Hono mālohí. ʻE lava ke fakaʻaongaʻi ʻa e fakamatala ko ʻeni mei he Ngaahi ʻĒsei ki he Ngaahi Tefito ʻo e Ongoongoleleí ʻi he liliu ʻo e Tohi ʻa Molomoná ko ha konga ʻo e fealēleaʻaki ko ʻení:

“Makehe mei he ʻŪlimí mo e Tūmemí, ʻoku fakamatala ʻa e Tohi Tapú ki ha ngaahi meʻangāue fakatuʻasino kehe naʻe fakaʻaongaʻi ke ngāue ʻaki ai ʻa e mālohi ʻo e ʻOtuá: ko e tokotoko ʻo ʻĒloné, ko ha ngata palasa, ngaahi lolo tākai māʻoniʻoni, ko e Puha ʻo e Fuakavá, naʻa mo ha efu mei he kelekelé naʻe fio ʻaki ʻa e fāvaí ke fakamoʻui ʻa e mata ʻo ha tangata kui” (Ngaahi ʻĒsei ki he Ngaahi Tefito ʻo e Ongoongoleleí, “Book of Mormon Translation, ” ChurchofJesusChrist.org).

Te ke lava foki ʻo fakaafeʻi ʻa e kau akó ke ako ʻa e ngaahi fakamatala ki he “ʻŪlimí mo e Tūmemí” ʻi he Fakahinohino ki he Ngaahi Folofolá ke ako lahi ange fekauʻaki mo e ngaahi meʻangāue ko ʻení pea mo ha ngaahi taimi kehe kuo fakaʻaongaʻi ai kinautolu ʻi he hisitōliá. Te ke lava leva ʻo fakaafeʻi ha toko taha pe toko ua te na loto fiemālie ke fakamatalaʻi fakanounou ʻa e meʻa naʻá na akó.