“Lēsoni 19—Tokāteline mo e Ngaahi Fuakava 8: Ko e Laumālie ʻo e Fakahaá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 8,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 19: Tokāteline mo e Ngaahi Fuakava 6–9
Tokāteline mo e Ngaahi Fuakava 8
“Ko e Laumālie ʻo e Fakahaá”
Naʻe ʻohovale ʻa ʻŌliva Kautele ʻi he malava ʻe Siosefa Sāmita ke liliu ʻa e Tohi ʻa Molomoná. Naʻá ne fiemaʻu ke foaki ange ʻe he ʻOtuá ʻa e meʻafoaki tatau kiate ia. Naʻe talaʻofa ʻe he ʻEikí kia ʻŌliva Kautele ʻa e meʻafoaki ke liliú ʻo fakatatau ki heʻene tuí. ʻI he taimi ko iá, naʻe akoʻi ʻe Sīsū Kalaisi kia ʻŌliva ha ngaahi tefitoʻi moʻoni mahuʻinga fekauʻaki mo e fakahaá. ʻE lava ke tokoni ʻa e lēsoni ko ʻení ki he kau akó ke fakatupulaki ʻenau malava ke ʻiloʻi ʻa e founga ʻoku folofola mai ai ʻa e ʻOtuá kiate kinautolú ʻo fakafou ʻi he Laumālie Māʻoniʻoní.
Ngaahi ʻEkitivitī Ako ʻOku Ala Fakahokó
Ngaahi fehuʻi fekauʻaki mo e fakahaá
Ke tokoniʻi ʻa e kau akó ke nau kamata ako fekauʻaki mo e fakahaá, fakakaukau ke vahevahe ʻeni:
ʻOku finangalo ʻa e ʻOtuá ke folofola mai kiate kitautolu pea ʻokú Ne fakahoko ia ʻi ha ngaahi founga kehekehe. Fakafou ʻi he Laumālie Māʻoniʻoni, ʻoku feinga ʻa e ʻOtuá “ke tokoni ʻi heʻetau ngaahi fiemaʻu pau fakafoʻituituí, ngaahi fatongiá, mo e ngaahi fehuʻí, pea ke tokoni ke fakamālohia ʻetau fakamoʻoní” (Ngaahi Tefitó mo e Ngaahi Fehuʻí, “Fakahā,” topics.ChurchofJesusChrist.org).
-
Ko e hā ha ngaahi fehuʻi ʻokú ke maʻu, pe niʻihi kehe ʻokú ke ʻilo, fekauʻaki mo hono ʻiloʻi ʻa e fakahā mei he ʻOtuá?
Fakakaukau ke kole ki he kau akó ke hiki ʻenau ngaahi fehuʻí ʻi he palakipoé pe ʻi ha laʻipepa. Te ke lava ʻo fakaafeʻi ʻa e kau akó ke fekumi ki ha ngaahi tali ʻi heʻenau ako ʻi he ʻaho ní. ʻOku ʻikai fakataumuʻa ia ke tali ʻa e ngaahi fehuʻi kotoa pē ʻi he kalasí, ka ʻe lava ke hiki ʻe he kau akó ha faʻahinga fakakaukau ʻoku nau maʻu. Te ke lava ʻo fakaʻaongaʻi ʻa e ngaahi fehuʻi ko ʻení ke tokoni ke fakakaukau ʻa e kau akó ki he ʻuhinga ʻoku maʻu ai ʻe he kakaí ha ngaahi ongo veiveiua fekauʻaki mo e fakahaá.
-
Ko e hā ʻe lava ke faingataʻa ai ke ʻiloʻi ʻa e taimi mo e founga ʻoku fetuʻutaki mai ai ʻa e ʻOtuá mo kitautolú?
-
ʻOkú ke pehē ko e hā ʻe mahuʻinga ai ke fakatupulaki ʻetau malava ke ʻiloʻi mo muimui ʻi he fakahā mei he ʻOtuá?
Te ke lava ʻo kole ki he kau akó ke nau kamataʻi ha peesi ʻi heʻenau tohinoa akó pe faʻu ha kiʻi fakamatala ʻi he polokalama Gospel Library, ʻa ia te nau lava ʻo lekooti ai ʻa e meʻa naʻa nau ako fekauʻaki mo e fakahā mei he ʻEikí. Te ke lava ʻo ʻoange ha sīpinga ʻaki haʻo fai ʻa e meʻa tatau ʻi he palakipoé. Fakakaukau ke kamata ʻaki ha ʻuluʻi fakamatala hangē ko e Te u lava fēfē nai ʻo ʻilo ʻoku ou maʻu fakahā mei he ʻOtuá?
Ko e akoʻi ʻe he ʻEikí ʻa ʻŌliva Kautele fekauʻaki mo e fakahaá
Lolotonga ʻa e hoko ʻa ʻŌliva Kautele ko ha tangata tohí, naʻá ne lava ʻo fakamoʻoniʻi naʻe foaki ʻe he ʻEikí kia Siosefa Sāmita ʻa e mālohi ke liliu ʻa e Tohi ʻa Molomoná. Naʻe loto foki mo ʻŌliva ke ne liliu lea. Naʻe finangalo ʻa e ʻEikí ke ʻoange kiate ia ʻa e faingamālié (vakai, Tokāteline mo e Ngaahi Fuakava 6:25). Naʻe akoʻi ʻe he ʻEikí ha ngaahi tefitoʻi moʻoni mahuʻinga fekauʻaki mo e maʻu fakahaá, ke tokoni ke lavameʻa ʻa ʻŌliva.
Ko e Tokāteline mo e Ngaahi Fuakava 8:2–3 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻu ngofua kinautolu.
Lau ʻa e Tokāteline mo e Ngaahi Fuakava 8:1–3, ʻo kumi ʻa e meʻa naʻe finangalo ʻa e ʻEikí ke ʻilo ʻe ʻŌliva fekauʻaki mo e maʻu fakahaá.
-
Ko e hā naʻá ke ako mei he ngaahi veesi ko ʻení fekauʻaki mo e founga ʻe lava ke folofola mai ai ʻa e ʻEikí kiate kitautolu ʻo fakafou ʻi he Laumālie Māʻoniʻoní?
Kole ki he kau akó ke lipooti ʻa e meʻa naʻa nau maʻú. ʻI he ngaahi moʻoni ʻe ala ʻilo ʻe he kau akó, tokoniʻi kinautolu ke nau ʻiloʻi ʻoku fetuʻutaki ʻa e ʻEikí ki hotau ʻatamaí mo hotau lotó ʻo fakafou ʻi he Laumālie Māʻoniʻoní.
Tukutaha e tokangá ki he ngaahi moʻoni ʻoku nau tataki ki he uluí: Ki ha ako lahi ange ki he ngaahi fehuʻi ʻoku tokoni ki he kau akó ke nau ʻiloʻi mo fakahā ha ngaahi tefitoʻi moʻoni fakauluí, vakai ki he ako ʻoku ui ko e “Tukutaha e tokangá ki he ngaahi moʻoni ʻoku nau tataki ki he uluí mo langaki ʻa e tui kia Sīsū Kalaisí,” ʻa ia ʻoku maʻu ʻi he Fakatupulaki ʻo e Ngaahi Taukei ʻa e Faiakó: Akoʻi ʻa e Tokāteliné.
Fakakaukau ke hiki ʻa e foʻi moʻoni ko ʻení ʻi lalo ʻi he ʻuluʻi fakamatalaʻi he palakipoé. ʻE lava foki ke tokoni hano tā ha fakatātā hangē ko ʻení ke fakakaukauloto ʻa e kau akó ki he ngaahi akonaki ʻa e ʻEikí ʻi he ngaahi veesi ko ʻení.
-
Makatuʻunga ʻi hoʻo ako mo e aʻusia fakatāutahá, ko e hā ha ngaahi founga ʻoku fetuʻutaki mai ai ʻa e ʻOtuá ki hotau ʻatamaí? ʻOkú Ne fetuʻutaki fēfē nai ki hotau lotó?
Naʻe vahevahe ʻe ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi founga ʻoku folofola mai ai ʻa e ʻOtuá ki hotau ʻatamaí mo e lotó ʻo fakafou ʻi he Laumālie Māʻoniʻoní:
ʻOku ou fakamoʻoni atu ʻe lava ke [folofola] atu ʻa e ʻEikí, ki ho ʻatamaí mo ho lotó ʻo fakafou ʻi he Laumālie Māʻoniʻoní. Mahalo pē ʻe faʻa hoko ia ko ha ngaahi ongo angamaheni. ʻE hoko mahino mo pau mai ʻa e fakahinohino ko iá ʻi he taimi ʻe niʻihi, ko ia ʻe lava ke ke tohiʻi ia, ʻo hangē ʻoku tala-kae-tohi fakalaumālie atú. (Richard G. Scott, “Ke Maʻu Ha Tataki Fakalaumālie,” Liahona, Nōvema 2009, 9)
Te ke lava ʻo tokoni ki he kau akó ke vakai ki ha sīpinga ʻo e fetuʻutaki ki he ʻatamaí mo e lotó ʻi he ngaahi sīpinga ko ʻeni ʻoku kaunga kia ʻŌliva Kautelé: Tokāteline mo e Ngaahi Fuakava 6:22–24; 9:8–9. ʻE lava ke kumi ʻe he kau akó ha ngaahi lea mo ha ngaahi kupuʻi lea naʻe fakaʻaongaʻi ʻe he ʻEikí ke fakamatalaʻi ʻaki ha niʻihi ʻo e ngaahi founga ʻokú Ne folofola mai ai ki hotau ʻatamaí mo e lotó.
Mahalo ʻe tokoni ke fakamatalaʻi ange ʻe lava ke ʻuhinga ʻa e māfana ʻo e lotó ʻoku fakamatalaʻi ʻi he Tokāteline mo e Ngaahi Fuakava 9:8 ki ha “ongoʻi fiemālie mo nonga” (Dallin H. Oaks, “Teaching and Learning by the Spirit,” Ensign, Mar. 1997, 13).
Fetuʻutaki ʻo fakafou ʻi he Laumālie Māʻoniʻoní
Fakamatalaʻi ange ʻoku lahi ha ngaahi akonaki kehe ʻi he folofolá pea mo e kau taki ʻo e Siasí ʻi onopōní ʻoku tokoni ke mahino kiate kitautolu ʻa e founga ʻoku fetuʻutaki mai ai ʻa e ʻOtuá kiate kitautolu ʻo fakafou ʻi he Laumālie Māʻoniʻoní. ʻOange ha taimi ki he kau akó ke nau kumi, ako, mo aleaʻi ai ha niʻihi ʻo e ngaahi akonaki ko ʻení.
Ko e founga ʻe taha te ke lava ʻo fai ai ʻení ko hono fakaafeʻi kinautolu ke fakaʻaongaʻi ʻa e meʻangāue hangē ko e Fakahinohino ki he Ngaahi Folofolá, pe fekumi ʻi he Gospel Library ke maʻu ha ngaahi potufolofola pe fakamatala mei he kau taki ʻo e Siasí ʻoku nau fakamatalaʻi ha niʻihi ʻo e ngaahi founga ʻe lava ke tau ʻiloʻi ai ʻa e fakahaá ʻo fakafou ʻi he Laumālie Māʻoniʻoní.
Ko ha fili ʻe taha ko hano fakaafeʻi ʻa e kau akó ke ako ʻa e ngaahi potufolofola ko ʻení ke vakai ki he meʻa te nau lava ʻo ako fekauʻaki mo e fakahā fakatāutahá:
Te ke lava foki ʻo huluʻi ʻa e vitiō “Patterns of Light: Discerning Light” (2:12). Naʻe vahevahe ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he foʻi vitiō ko ʻení ha ngaahi fakakaukau fekauʻaki mo e founga te tau lava ai ʻo fakatokangaʻi ʻa e faikehekehe ʻi heʻetau ngaahi fakakaukaú mo e ngaahi ueʻi mei he Laumālie Māʻoniʻoní.
Hili hono maʻu ʻe he kau akó ha taimi feʻunga ke akó, fakakaukau ke fakaafeʻi kinautolu ke tānaki atu ki he lisi ʻi he palakipoé ʻa e meʻa naʻa nau akó.
ʻE lava ke tokoni ʻa e ngaahi fehuʻi hangē ko ʻení ke aleaʻi ʻe he kau akó ʻa e meʻa naʻa nau akó pea fakaʻatā ʻa e Laumālie Māʻoniʻoní ke fakamoʻoni ki he kalasí.
-
Ko e hā naʻá ke ako fekauʻaki mo e ngaahi founga kehekehe ʻoku fetuʻutaki ai ʻa e ʻOtuá mo kitautolu ʻo fakafou ʻi he Laumālie Māʻoniʻoní?
-
Ko e hā ʻa e meʻa ʻoku tokoniʻi ʻe he ngaahi akonaki ko ʻení ke mahino kiate koe fekauʻaki mo e ʻulungaanga mo e finangalo ʻo e Tamai Hēvaní mo Sīsū Kalaisí?
-
Ko e hā ha ngaahi aʻusia kuó ke maʻu fekauʻaki mo e mahino kau ki he founga fetuʻutaki ʻa e Laumālie Māʻoniʻoní?
Fakamanatu ki he kau akó ʻa e ngaahi fehuʻi naʻa nau ʻohake ʻi he kamataʻanga ʻo e kalasí. Fakaafeʻi ʻa e kau akó ke vahevahe ʻa e meʻa naʻa nau ako ʻa ia naʻe tokoni ke tali ʻaki ha niʻihi ʻo e ngaahi fehuʻi ko ʻení. Fakaʻosi ʻa e kalasí ʻaki ha fakaafe ki he kau akó ke nau feinga ke fakatokangaʻi ʻa e folofola ʻa e ʻEikí ki honau lotó mo e ʻatamaí ʻi ha founga ʻe taha pe lahi ange mei he ngaahi founga lahi kuo nau ako ki aí. Tokoni ke mahino ki he kau akó ʻe fiemaʻu ha ngāue taʻe-tuku ʻi he kotoa ʻo ʻenau moʻuí ki hono ʻiloʻi ʻo e fakahā mei he ʻEikí.
Ako Ma‘uloto
Mahalo te ke fie tokoni ki he kau akó ke ako maʻuloto ʻa e potufolofola fakamoʻoní mo e kupuʻi lea mahuʻinga ʻo e Tokāteline mo e Ngaahi Fuakava 8:2–3 pea toe fakamanatu kinautolu ʻi he ngaahi lēsoni ʻi he kahaʻú. Ko e kupuʻi lea mahuʻinga ʻi he folofolá ko e “Te u fakahā kiate koe ʻi ho ʻatamaí pea ʻi ho lotó, ʻi he Laumālie Māʻoniʻoní.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”