“Lēsoni 20—Akoako Fakataukei Fakatokāteline 1: Ako Maʻulotó mo Hono Maʻu ʻo e ʻIlo Fakalaumālié,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Akoako Fakataukei Fakatokāteline 1,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 20: Tokāteline mo e Ngaahi Fuakava 6–9
Akoako Fakataukei Fakatokāteline 1
Ako Maʻulotó mo Hono Maʻu ʻo e ʻIlo Fakalaumālié
ʻE lava ke tokoni ʻa e fakataukei fakatokāteliné ki he kau akó ke langa ʻa e makatuʻunga ki heʻenau moʻuí ʻia Sīsū Kalaisi mo ʻEne ongoongoleleí. ʻE ʻoange ʻe he lēsoni ko ʻení ki he kau akó ha ngaahi faingamālie ke ako ʻa e ngaahi potufolofola fakataukei fakatokāteliné mo e ngaahi moʻoni ʻoku ʻi aí kae pehē foki ki hono ako mo fakaʻaongaʻi ʻa e ngaahi tefitoʻi moʻoni fakalangi ki hono maʻu ʻo e ʻilo fakalaumālié.
Ngaahi ʻEkitivitī Ako ʻOku Ala Fakahokó
Fakamanatu ʻo e fakataukei fakatokāteliné: Ako maʻuloto
Mahalo kuó ke ʻosi fakafeʻiloaki ʻa e kau akó ki ha ngaahi potufolofola fakataukei fakatokāteline ʻi he Tokāteline mo e Ngaahi Fuakavá ʻi he taʻú ni. Mahalo naʻe kau heni ʻa e Siosefa Sāmita—Hisitōlia 1:15–20, Tokāteline mo e Ngaahi Fuakava 1:30, mo e Tokāteline mo e Ngaahi Fuakava 1:37–38. ʻOku ʻoange ʻe he ʻekitivitī ko ʻení ki he kau akó ha faingamālie kefakamanatu ai ʻa e potufolofola ʻe tolu ko iá pea ʻai ke nau ʻilo mo e ngaahi potufolofola fakataukei fakatokāteline ʻe hiva hono hokó mei he Siosefa Sāmita—Hisitōlia 1:15–20 ki he Tokāteline mo e Ngaahi Fuakava 49:15–17. Kapau ʻokú ke ongoʻi ʻe lelei ange ki hoʻo kau akó, te ke lava ʻo liliu ia ke nofotaha pē ʻi he ngaahi potufolofola fakataukei fakatokāteline kuo ako ʻe he kau akó.
ʻOku totonu ke miniti pē ʻe 10–15 ʻa e ʻekitivitī ko ʻení kae ʻi ai ha taimi feʻunga ki hono akoako fakaʻaongaʻi ʻo e fakataukei fakatokāteliné ʻamui ange ʻi he lēsoní.
ʻOmi ha ngaahi meʻangāue ki he kalasí ʻe ʻiloʻi ʻe he kau akó mo ʻilo ʻa e founga hono fakaʻaongaʻí. ʻE lava ke kau heni ha screw driver, hāmala, mo ha kili.
-
Ko e fē ha taimi te ke houngaʻia ai ke maʻu ha taha ʻo e ngaahi meʻangāue ko ʻení?
Fakaʻatā ha kau ako ke vahevahe. Mahalo te nau vahevahe ha ngaahi aʻusia fakataautaha pe ngaahi tūkunga ʻoku nau fakakaukauloto ki ai. ʻE lava ke fiefia ʻa e kau akó pea mohu founga ʻi heʻenau ngaahi talí.
-
Ko e hā ha ngaahi tūkunga te ke houngaʻia ai ke maʻuloto ha potufolofola?
Ko e ngaahi potufolofola fakataukei fakatokāteliné ko hano filifili ia ʻo ha ngaahi potufolofola ʻe lava ke tokoni lahi kiate koe mo e niʻihi kehé. ʻOkú ke maʻu ʻi he seminelí ha ngaahi faingamālie ke ako maʻuloto ʻa e ngaahi potufolofolá mo e ngaahi kupuʻi lea mahuʻinga ʻo e ngaahi potufolofola fakataukei fakatokāteliné. Mahalo te ke feinga ke ako maʻuloto ʻa e kotoa ʻo e ngaahi veesi ʻo ha konga ʻo e ngaahi potufolofola ko ʻení.
Lau pea fakaʻilongaʻi ʻa e ngaahi potufolofola ko ʻení ʻi hoʻo folofolá. Fili ha meʻa ʻe taha pe ua ʻokú ke ongoʻi ʻoku mahuʻingamālie taha kiate koé.
Fakaʻaliʻali ʻa e saati ʻoku lisi ai ʻa e ngaahi potufolofola fakataukei fakatokāteliné mo honau ngaahi kupuʻi lea mahuʻinga ʻi he folofolá. ʻOange ha taimi feʻunga ki he kau akó ke fakaʻilongaʻi ʻa e potufolofola takitaha.
|
Ngaahi potufolofola fakataukei fakatokāteliné |
Kupuʻi lea fakafolofola mahuʻingá |
|---|---|
Ngaahi potufolofola fakataukei fakatokāteliné | Kupuʻi lea fakafolofola mahuʻingá Naʻe mamata ʻa Siosefa Sāmita ki he “Tangata ʻe toko ua, ʻa ia ko hona ngingilá mo e nāunaú ʻoku ʻikai faʻa lava ke mafakamatalaʻi.” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá Ko e Siasi ʻo Sīsū Kalaisí ʻa e “siasi moʻoni mo moʻui pē tahá.” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá “Neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē.” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá “Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē.” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá “Te u fakahā kiate koe ʻi ho ʻatamaí pea ʻi ho lotó, ʻi he Laumālie Māʻoniʻoní.” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá ʻOku maʻu ʻe he Lakanga Taulaʻeiki Faka-ʻĒloné “ʻa e ngaahi kī ʻo e tauhi mai ʻa e kau ʻāngeló, pea mo e ongoongolelei ʻo e fakatomalá, pea mo e papitaisó.” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá “ʻOku mahuʻinga lahi ʻa e ngaahi laumālié ʻi he ʻao ʻo e ʻOtuá.” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá “Hono ʻikai ke lahi hoʻomo fiefiá, ʻo kapau te mo ʻomi ʻa e ngaahi laumālie tokolahi kiate au!” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá “Ko au, ko [Sīsū Kalaisi], kuó u kātakiʻi ʻa e ngaahi meʻá ni maʻá e kakai kotoa pē.” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá Ko e lea ki he palōfitá “ke mou tali ʻene leá, ʻo hangē ko e lea ia mei hoku ngutu ʻoʻokú.” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá “Te u fakahā au ʻe au mei he langí ʻi he mālohi mo e fuʻu nāunau lahi … ʻo nofo ʻi he māʻoniʻoni fakataha mo e tangatá ʻi he māmaní ʻi ha taʻu ʻe taha afe.” |
Ngaahi potufolofola fakataukei fakatokāteliné | Kupuʻi lea fakafolofola mahuʻingá “Kuo tuʻutuʻuni ʻe he ʻOtuá ʻa e nofomalí.” |
Fakaʻaongaʻi ha kiʻi taimi ke feinga ai ke ako maʻuloto ʻa e potufolofola fakamoʻoní mo e kupuʻi lea mahuʻinga ki ha potufolofola ʻe taha pe ua ʻoku ʻuhingamālie taha kiate koé. Fakakaukau foki ki ha tūkunga ʻe hoko ai hono maʻu ʻa e potufolofola mo e kupuʻi lea mahuʻinga naʻá ke ako maʻulotó ko ha tāpuaki kiate koe pe ko ha taha kehe.
ʻOange ha taimi feʻunga ki he kau akó ke nau kamata ako maʻuloto ai ʻa e ngaahi potufolofola fakamoʻoní mo e ngaahi kupuʻi lea mahuʻinga ʻi he potufolofola naʻa nau filí. Mahalo ʻe tokoni ke talaange ki he kau akó ʻe lava foki ke tokoni ʻa e polokalama Fakataukei Fakatokāteliné ke nau ako maʻuloto a e ngaahi potufolofola fakataukei fakatokāteliné.
Hili hono maʻu ʻe he kau akó ha taimi feʻungá, fakaafeʻi ha niʻihi ke nau akoako vahevahe ʻa e ngaahi kupuʻi lea mahuʻinga naʻa nau kamata ako maʻulotó. Te ke lava foki ʻo fakaafeʻi kinautolu ke fakamatalaʻi ʻa e ʻuhinga ʻe ala ʻaonga ai kiate kinautolu ke ako maʻuloto ʻa e ngaahi potufolofola fakamoʻoní mo e ngaahi kupuʻi lea ko ʻení.
Poupouʻi ʻa e kau akó ke hokohoko atu hono ako maʻuloto ʻo e ngaahi potufolofola fakamoʻoní mo e ngaahi kupuʻi lea mahuʻinga ʻi he potufolofolá ʻi he lolotonga ʻo e taʻú. ʻE lava foki ke nau ako maʻuloto ʻa e potufolofolá kotoa kapau te nau fiemaʻu.
Ako mo fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié
ʻOku nofotaha ʻa e toenga ʻo e lēsoní ʻi hono tokoniʻi ʻo e kau akó ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ki ha tūkunga moʻoni ʻo e moʻuí. Kimuʻa pea lau ʻa e tūkunga ʻi laló, mahalo ʻe ʻaonga ke tomuʻa fakaafeʻi ʻa e kau akó ke toe vakaiʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié. ʻOku fakakau ʻa e ngaahi ʻekitivitī fakamanatu ʻoku fokotuʻu atú ʻi he konga ʻo e fakamatala fakalahi ʻoku ui ko e “Ngaahi ʻEkitivitī Fakamanatu ʻo e Fakataukei Fakatokāteliné.” ʻOku maʻu ʻa e ngaahi fakamatala ʻo e ngaahi tefitoʻi moʻoní ʻi he palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023).
Naʻe kamata ako ʻe ʻEiva ʻa e Siosefa Sāmita—Hisitōliá mo e Tokāteline mo e Ngaahi Fuakavá pea naʻá ne maʻu ha aʻusia lelei. Ka neongo ia, naʻá ne maʻu ha ngaahi fakamatala kovi ʻi he mītia fakasōsialé fekauʻaki mo e Palōfita ko Siosefa Sāmitá ʻo ne puputuʻu mo hohaʻa ai.
Kapau ʻe ʻaonga, ʻe lava ke ke ʻeke ha ngaahi fehuʻi vakaiʻi hangē “Ko e hā ʻe puputuʻu pe hohaʻa ai [ʻa ʻEivá]?”
Fakakaukau ke vahevahe ʻa e kau akó ki ha fanga kiʻi kulupu iiki pea fakaafeʻi kinautolu ke nau fakakaukauʻi ha ngaahi founga ʻe ala tokoni ai ʻa e ngaahi tefitoʻi moʻoni ʻo hono maʻu ʻo e ʻilo fakalaumālié kia ʻEiva ʻi he tūkunga ko ʻení. Kapau ʻe ʻaonga, te ke lava ʻo fakaʻaliʻali ha niʻihi pe kotoa ʻo e ngaahi ʻekitivitī ko ʻení, pea te ke lava ʻo fakaafeʻi ʻa e ngaahi kulupú ke fakakakato kinautolu ko ha konga ʻo ʻenau ngaahi fokotuʻu fakakaukaú.
Vakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
-
Hiki ha kau palōfita ʻe toko tolu mei he kuohilí naʻe muimui ki ai ha kakai ʻe niʻihi ʻi he tui kae ʻikai muimui ha niʻihi pea mahalo naʻa nau fakaangaʻi kinautolu.
-
Ko e hā ha ngaahi ʻuhinga naʻe muimui ai ha kakai ʻe niʻihi kae fakaanga ha niʻihí?
-
Naʻe tāpuekina fēfē nai ʻe he ʻEikí ʻa kinautolu naʻe muimui ki Heʻene kau palōfitá?
-
ʻE lava fēfē nai ʻe he fakalaulauloto ki he ngaahi meʻa ko ʻeni fekauʻaki mo e kau palōfita kimuʻá ʻo ʻomi ha fakakaukau lelei ange ke tau fehangahangai ai mo e ngaahi fakamatala ʻoku ʻikai lelei fekauʻaki mo Siosefa Sāmitá?
-
Kapau ʻe fakamatala ʻe he kau akó ha hohaʻa fakahisitōlia fekauʻaki mo e Palōfitá, ʻe ala ʻaonga ke lau ʻa e palakalafi 9–10 ʻi he konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023).
Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí
-
Kumi ha maʻuʻanga tokoni ʻe taha kuo fokotuʻu fakalangi fekauʻaki mo e Palōfita ko Siosefa Sāmitá ʻokú ke pehē ʻe lava ʻo tokoni kia ʻEivá. ʻE lava ke tokoni ʻeni ke ke fakahoko ʻa e meʻá ni:
-
Kumi ha ngaahi veesi ʻi he Siosefa Sāmita—Hisitōliá pe Tokāteline mo e Ngaahi Fuakavá kuó ke ʻosi ako ʻokú ne fakahaaʻi ʻa e meʻa te tau lava ʻo fai ʻi he taimi ʻoku tau fehangahangai ai mo ha veiveiua pe ngaahi fehuʻí.
-
Kumi ʻa e “Siosefa Sāmitá” ʻi he Fakahinohino ki he Ngaahi Folofolá. Pe kumi ʻa e “Siosefa Sāmitá” ʻi he fakahokohoko fakamotuʻalea ʻo ha konifelenisi lahi pe Liahona pe ʻi he polokalama Gospel Library.
-
Kapau ʻokú ke fakakaukau ki ha fakamatala ʻoku ʻikai lelei ʻe ala lea ʻaki ʻe ha taha fekauʻaki mo e Palōfitá, vakai ki he ngaahi tefito ʻi he konga Ngaahi Tefitó mo e Ngaahi Fehuʻí ʻo e ChurchofJesusChrist.org ke vakai pe ʻoku ʻi ai ha fakamatala ʻe ala tokoni. Fakakaukau foki ki ha tokotaha falalaʻanga te ke lava ʻo poupouʻi ʻa e toʻu tupu ko ʻení ke talanoa mo ia.
-
Ngāue ʻi he tuí
-
Naʻe ʻomi ʻe he ʻEikí ʻa e ngaahi meʻá ni ʻo fakafou ʻia Siosefa Sāmita: ko e Tohi ʻa Molomoná, ko hono Fakafoki Mai ʻo e Siasi moʻoni mo moʻuí ki he māmaní, ko e ngaahi fuakava mo e ngaahi ouau ʻoku fiemaʻu ki he hākeakiʻí, mo e konga lahi ʻo e Tokāteline mo e Ngaahi Fuakavá. Fakalaulauloto ki ha ngaahi founga pau kuo tāpuekina ai ʻe he ʻEikí hoʻo moʻuí ʻi he ngaahi meʻá ni mo e founga te nau lava ai ʻo tokoni ke fakamālohia hoʻo fakamoʻoni ki he Palōfitá. Fakakaukau ki he meʻa naʻá ke fakahoko ke maʻu ai ʻa e ngaahi tāpuaki ko ʻení. Hiki ha ngaahi founga te ke lava ai ʻo fokotuʻu kia ʻEiva ke ngāue ʻi he tui ke hokohoko atu hono fakamālohia ʻene fakamoʻoni kia Siosefa Sāmitá ko ha palōfita ʻa e ʻOtuá.
Hili hono maʻu ʻe he kau akó ha taimi ke fakakaukau mo fakahoko ai ha niʻihi ʻo e ngaahi ʻekitivitī ʻi ʻolungá, fakaafeʻi kinautolu ke vahevahe ʻa e meʻa ʻoku nau ongoʻi ʻe ʻaonga taha kia ʻEivá. Poupouʻi ha kau ako ke vahevahe. Te ke lava foki ʻo fakakaukau ke fehuʻi ange, “Ko e hā mo ha ngaahi founga kehe ʻokú ke pehē te tau lava ai ʻo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ke tokoniʻi ha taha ʻi he tūkunga ko ʻení?”