“Lēsoni 17—Tokāteline mo e Ngaahi Fuakava 6: ‘Sio Pē Kiate Au ʻi he Fakakaukau Kotoa Pē; ʻOua ʻe Tālaʻa, ʻOua ʻe Manavahē,’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 6,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 17: Tokāteline mo e Ngaahi Fuakava 6–9
Tokāteline mo e Ngaahi Fuakava 6
“Sio Pē Kiate Au ʻi he Fakakaukau Kotoa Pē; ʻOua ʻe Tālaʻa, ʻOua ʻe Manavahē”
ʻI he ʻaho 5 ʻo ʻEpeleli 1829, naʻe fuofua fetaulaki ai ʻa ʻŌliva Kautele mo Siosefa Sāmita. Hili ha ʻaho ʻe ua mei ai, naʻá ne hoko ko e tangata tohi ʻa Siosefa ki hono liliu ʻo e Tohi ʻa Molomoná. ʻOku kau ʻi he Tokāteline mo e Ngaahi Fuakava 6 ha faleʻi mei he ʻEikí ʻokú ne fakamatalaʻi ʻa e ngaahi fehuʻi mo e hohaʻa naʻe maʻu ʻe ʻŌliva fekauʻaki mo ʻene kau ʻi he ngāue ʻa e ʻEikí. ʻOku fakataumuʻa ʻa e lēsoni ko ʻení ke tokoniʻi ʻa e kau akó ke falala ki he Fakamoʻuí ʻi he taimi ʻoku nau fehangahangai ai mo e veiveiuá mo e manavaheé.
Ngaahi ʻEkitivitī Ako ʻOku Ala Fakahokó
Ngaahi veiveiuá mo e manavaheé
Fakakaukau ke hiki ʻa e fehuʻi ko ʻení ʻi he palakipoé pea fakaafeʻi ʻa e kau akó ke hiki ʻenau ngaahi talí ʻi lalo ai. ʻE lava ke fai ʻeni kimuʻa pea kamata ʻa e kalasí pe ʻi he kamataʻanga ʻo e lēsoní.
-
Ko e hā ha ngaahi meʻa ʻoku manavahē, veiveiua, pe hohaʻa ki ai ʻa e toʻu tupú?
Hili hono aleaʻi ʻa e fehuʻi kimuʻá, fakaafeʻi ʻa e kau akó ke fakakaukau ki he ngaahi meʻa ʻoku nau manavahē, veiveiua, pe hohaʻa ki ai ʻi heʻenau moʻuí. Fakamatalaʻi ange ʻoku ʻi he Tokāteline mo e Ngaahi Fuakava 6 ha ngaahi moʻoni ʻe lava ʻo tokoni kiate kinautolu lolotonga ʻa e ngaahi taimi peheé. Fakaafeʻi ʻa e kau akó ke kumi ki he ngaahi moʻoni ko ʻení ʻi heʻenau akó.
Ko e kamata ke tokoniʻi ʻe ʻŌliva Kautele ʻa Siosefa Sāmitá
Fakamatalaʻi ange ʻoku ʻi he Tokāteline mo e Ngaahi Fuakava 6 ha fakahā naʻe foaki kia ʻŌliva Kautele. Ke tokoni ke mahino ki he kau akó ʻa e founga naʻe fuofua fetaulaki ai ʻa ʻŌliva mo Siosefa Sāmitá, te ke lava ʻo huluʻi ʻa e foʻi vitiō “Days of Harmony” mei he taimi 3:07 ki he 7:18. ʻOku maʻu ʻa e vitioó ni ʻi he ChurchofJesusChrist.org. Pe, ko hono lau ʻe he kalasí ʻa e Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, vōliume 1, Ko e Fuka ʻo e Moʻoní, 1815–1846 (2018), mei he peesi 58–60, pe ko hoʻo fakamatalaʻi fakanounou ʻa e palakalafi ko ʻení.
Ko ʻŌliva Kautelé ko ha faiako ia naʻe kamata nofo mo e ongomātuʻa ʻa Siosefa Sāmitá ʻi he faʻahitaʻu fakatōlau ʻo e 1828. Lolotonga ʻa e nofo ʻa ʻŌliva mo e fāmili Sāmitá, naʻá ne ʻilo ai fekauʻaki mo e uiuiʻi fakalangi ʻo Siosefá pea mo e hokohoko atu hono liliu ʻo e Tohi ʻa Molomoná. Naʻe ongoʻi ʻe ʻŌliva naʻe ueʻi ia ke ne kole pe ʻe lava ʻo tokoni kia Siosefa ʻi he liliú. ʻI he faʻahitaʻu failau ʻo e 1829, naʻe kaungā-fononga ai ʻa ʻŌliva mo Samuela ko e tehina ʻo Siosefá ki Hāmoni, Penisilivēnia, ke fuofua feʻiloaki mo e Palōfitá.
-
Kapau naʻá ke ʻi he tūkunga ʻo ʻŌliva Kautelé, ko e hā ha ngaahi fehuʻi pe hohaʻa naʻá ke mei maʻu lolotonga ʻa e taimi ko ʻení?
Taimi nounou pē mei he tūʻuta ʻa ʻŌliva ki Hāmoní, naʻá ne hoko ko e tangata tohi ʻa Siosefa Sāmitá. Neongo naʻe maʻu ʻe ʻŌliva kimuʻa ha fakamoʻoni fakalangi ki he meʻafoaki fakaepalōfita ʻo Siosefa ke liliú, ka naʻá ne kei maʻu pē ha ngaahi fehuʻi fekauʻaki mo ʻene kau ʻaʻana ʻi he ngāue ʻa e ʻEikí. Naʻe maʻu ʻe Siosefa Sāmita ʻa e fakahā ʻoku lekooti ʻi he Tokāteline mo e Ngaahi Fuakava 6 lolotonga ʻa e taimi ko ʻení.
Ko hono ʻiloʻi mo e falala ki he Fakamoʻuí
Lau ʻa e Tokāteline mo e Ngaahi Fuakava 6:14–24, 32–37, ʻo kumi ha niʻihi ʻo e ngaahi faleʻi ʻa e ʻEikí kia ʻŌlivá. Tokanga makehe ki he meʻa naʻe akoʻi ʻe he ʻEikí fekauʻaki mo Iá te Ne lava ʻo tokoni kiate kitautolu ʻi he taimi ʻo e veiveiuá pe manavaheé.
Makehe mei hono lau ʻo e ngaahi veesi ko ʻení, ʻe lava foki ke mamata ʻa e kau akó ʻi he “Days of Harmony” mei he taimi 15:02 ki he 17:49.
Ke tokoni ke moʻui ʻaki ʻe he kau akó ʻa e meʻa ʻoku nau laú, fakakaukau ke fakaʻaliʻali ha fakatātā ʻo Sīsū Kalaisi ʻi he palakipoé. ʻI hono ʻiloʻi ʻe he kau akó ʻa e ngaahi akonaki ʻa e Fakamoʻuí mei he ngaahi veesi ko ʻení, te nau lava ʻo hiki takatakai ʻa e ngaahi akonaki ko iá ʻi he fakatātā ʻi he palakipoé.
-
Ko e hā naʻá ke ako fekauʻaki mo Sīsū Kalaisi ʻe lava ʻo tokoni atu ke ke falala kiate Ia ʻi he taimi ʻokú ke fehangahangai ai mo e manavaheé, veiveiuá, pe loto-hohaʻá?
-
ʻE tokoniʻi fēfē nai koe ʻe he ngaahi moʻoni ko ʻení fekauʻaki mo e Fakamoʻuí lolotonga ʻa e ngaahi taimi peheé?
Hanga kia Sīsū Kalaisi
Ko ha potufolofola fakataukei fakatokāteline ʻa e Tokāteline mo e Ngaahi Fuakava 6:36. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.
Toe lau ʻa e Tokāteline mo e Ngaahi Fuakava 6:36–37, ʻo kumi ʻa e ngaahi fakaafe ʻa e Fakamoʻuí kia ʻŌlivá.
-
Te ke fakamatala fakanounouʻi fēfē nai ʻa e foʻi moʻoni naʻe akoʻi ʻi he veesi 36?
Mahalo te ke fie fakamamafaʻi ange ko e taimi ʻoku tau sio ai kia Sīsū Kalaisí, te tau lava ʻo ikunaʻi ʻa e veiveiuá mo e manavaheé.
ʻOkú ke pehē ʻoku ʻuhinga ki he hā ke sio kia Sīsū Kalaisi ʻi he fakakaukau kotoa pē?
Ke tokoni ke ʻilo ʻe he kau akó ʻa e fekauʻaki ʻa e ngaahi akonaki ʻa e Fakamoʻuí ʻi he veesi 36 mo e 37, fakakaukau ke fakaʻaliʻali ʻa e fakatātā mei he kamataʻanga ʻo e lēsoní. Fakamatalaʻi ange ʻoku ʻuhinga ʻa e vakai ki ha meʻá ke sio mo fakatokangaʻi ia. Hili iá pea ʻeke ange ʻa e ongo fehuʻi ko ʻení:
-
ʻOkú ke pehē ko e hā ʻoku finangalo ai ʻa e Fakamoʻuí ke tau “vakai” ki Hono ngaahi laveá? (Tokāteline mo e Ngaahi Fuakava 6:37).
-
Ko e hā ha ola ʻe lava ke tau maʻu ʻi heʻetau manatu ki Heʻene Fakaleleí mo e Toetuʻú?
Ke tokoni ke mahino lelei ange ki he kau akó ʻa e founga te nau lava ai ʻo sio kia Sīsū Kalaisí, fakakaukau ke fakaʻaliʻali ʻa e ngaahi tūkunga ko ʻení. Te ke lava foki ʻo faʻu ha ngaahi tūkunga kehe ʻoku felāveʻi mo e ngaahi tūkunga hoʻo kau akó.
ʻOku ʻi ai ha ngaahi fehuʻi ʻa ʻAna fekauʻaki mo e ongoongoleleí ʻoku teʻeki ke tali. ʻOkú ne ongoʻi ʻi he taimi ʻe niʻihi hangē ʻoku ʻikai mālohi feʻunga ʻene fakamoʻoní ke tokoniʻi ia ke ne ikunaʻi ʻene ngaahi veiveiuá.
ʻOku fefaʻuhi ʻa ʻĒliki mo e ngaahi ongo ʻo e mahuʻinga fakatāutahá. ʻOku ʻikai ke ne ongoʻi ʻoku fakatokangaʻi ia ʻe ha taha ʻi he akó.
ʻOku faingataʻa ki he ongomātuʻa ʻa Sōfiá ke na tokonaki fakapaʻanga maʻa hona fāmilí. ʻOkú ne hohaʻa naʻa ʻikai maʻu ʻe heʻene ongomātuʻá ha paʻanga feʻunga ke feau ʻa e ngaahi fiemaʻu kotoa hono fāmilí.
Fakakaukau ke vahevahe ʻa e kau akó ki ha fanga kiʻi kulupu iiki pea vahe ki he kulupu takitaha ha taha ʻo e ngaahi tūkungá ke nau tokanga taha ki ai ʻi heʻenau aleaʻi ʻa e ongo fehuʻi ko ʻení.
-
Ko e hā ha founga ʻe tolu ʻe lava ke sio ai ʻa e kakaí ni kia Kalaisi ʻi he ngaahi tuʻunga ʻoku nau ʻi aí?
-
ʻE lava fēfē nai ʻe hono fai ʻo e ngaahi meʻa ko iá ʻo fakahoko ha liliu ʻi he moʻui ʻa e niʻihi fakafoʻituitui ko ʻení?
ʻI he ʻosi ʻa e alēlea ʻa e kau akó ʻi heʻenau ngaahi kulupú, fakaafeʻi kinautolu ke vahevahe ha niʻihi ʻo ʻenau ngaahi talí mo e kalasí. Ke hoko ko ha konga ʻo e fealēleaʻaki ko ʻení, ʻe ala tokoni ke fehuʻi ki he kau akó pe ʻoku hoko fēfē nai ʻa e ngaahi ngāue naʻa nau ʻiló ko ha ngaahi sīpinga ʻo e sio kia Kalaisí.
Fakakaukau foki ke fakaafeʻi ʻa e kau akó ke vahevahe ha ngaahi sīpinga ʻo e founga kuo tāpuekina ai kinautolu ʻi heʻenau sio kia Sīsū Kalaisi ʻi heʻenau moʻuí.
Ko hono fakaʻaongaʻi ia ki hoʻo moʻuí
Ke tokoni ke fakaʻaongaʻi ʻe he kau akó ʻa e faleʻi ʻa e Fakamoʻuí ke sio kiate Iá, fakaafeʻi kinautolu ke fakakaukau ki heʻenau ngaahi manavaheé, veiveiuá, pe hohaʻa naʻa nau ʻomi ʻi he kamataʻanga ʻo e lēsoní. Fakaʻaliʻali ʻa e ongo fehuʻi ko ʻení pea ʻoange ki he kau akó ha taimi ke tali ai kinaua ʻi heʻenau tohinoa akó.
-
Ko e hā kuó ke ako pe ongoʻi fekauʻaki mo Sīsū Kalaisi ʻi he ʻahó ni ʻe lava ʻo tokoni atu ʻi he ngaahi manavahē, veiveiua, pe hohaʻa ʻokú ke maʻú?
-
Ko e hā ha ngaahi founga pau te ke feinga ai ke fakaʻaongaʻi ʻa e faleʻi ʻa e Fakamoʻuí ke “sio pē kiate [Ia] ʻi he fakakaukau kotoa pē; ʻoua ʻe tālaʻa, ʻoua ʻe manavahē”?
Ako Ma‘uloto
Mahalo te ke fie tokoni ki he kau akó ke ako maʻuloto ʻa e potufolofola fakamoʻoni mo e kupuʻi lea mahuʻinga ʻi he folofolá ʻo e Tokāteline mo e Ngaahi Fuakava 6:36 pea toe fakamanatu kinaua ʻi he ngaahi lēsoni ʻi he kahaʻú. Ko e vēsí kotoa ʻa e kupuʻi lea fakafolofola mahuʻingá : “Sio pē kiate au ʻi he fakakaukau kotoa pē; ʻoua ʻe tālaʻa, ʻoua ʻe manavahē.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”