«Ջոզեֆ Սմիթ—Պատմություն 1.68–75, Վարդապետություն և Ուխտեր 13․ Քահանայության վերականգնումը», Վարդապետություն և Ուխտեր․ Սեմինարիայի ուսուցչի ձեռնարկ (2025)
«Ջոզեֆ Սմիթ—Պատմություն 1.68–75», Վարդապետություն և Ուխտեր 13, Վարդապետություն և Ուխտեր․ Սեմինարիայի ուսուցչի ձեռնարկ
Դաս 24. Վարդապետություն և Ուխտեր 12-17, Ջոզեֆ Սմիթ-Պատմություն 1.66–75
Ջոզեֆ Սմիթ—Պատմություն 1.68–75, Վարդապետություն և Ուխտեր 13
Քահանայության վերականգնումը
Մորմոնի Գրքի թարգմանության վրա աշխատելիս Ջոզեֆ Սմիթը և Օլիվեր Քաուդերին իմացան, որ Հիսուս Քրիստոսը Նեփիացիներին տվել է մկրտելու իշխանություն: Երբ Ջոզեֆն ու Օլիվերը աղոթքներով ձգտում էին ավելին իմանալ, նրանց այցելեց Հովհաննես Մկրտիչը, իսկ ավելի ուշ՝ Պետրոսը, Հակոբոսը և Հովհաննեսը, որոնք ուղարկվեցին՝ վերականգնելու քահանայության իշխանությունը երկրի վրա: Այս դասը կօգնի ուսանողներին զգալ Փրկչի քահանայության իշխանության վերականգնման նշանակությունը:
Հնարավոր ուսումնական վարժություններ
Փրկիչը տալիս է Իր իշխանությունը
Օգնեք ուսանողներին մտածել, թե ինչու է քահանայության վերականգնումը կարևոր իրենց համար: Կարող եք դա անել՝ ցուցադրելով այս նկարները և տալով հետևյալ հարցերը.
-
Ի՞նչ գիտեք այս նկարներում պատկերված իրադարձությունների մասին:
-
Ինչպիսի՞ն կլիներ ձեր կյանքն առանց Փրկչի քահանայության իշխանության:
Կարող եք կիսվել հետևյալ խոսքերով, որպեսզի օգնեք ուսանողներին տեսնել, թե քահանայության վերականգնումն ինչպես կարող է օրհնել Աստծո բոլոր զավակներին: Այս խոսքերը նաև կօգնեն երիտասարդ կանանց հասկանալ, որ քահանայության վերականգնումը կարևոր է իրենց համար:
Եկեղեցու կանանց ուղղված իր ելույթում նախագահ Ռասսել Մ. Նելսոնն ուսուցանել է, թե որքան կարևոր է քահանայության վերականգնումը մեր կյանքում․
Հոգևոր գանձեր
Շատ եմ ցանկանում, որ դուք հասկանաք, որ քահանայության վերականգնումը նույնքան կարևոր է կնոջ համար, որքան ցանկացած տղամարդու: Մելքիսեդեկյան Քահանայության վերականգնման շնորհիվ ուխտեր պահող կանայք և տղամարդիկ կարող են ստանալ «եկեղեցու բոլոր հոգևոր օրհնությունները» կամ կարող ենք ասել՝ բոլոր հոգևոր գանձերը, որոնք Տերը պահել է Իր զավակների համար։
Յուրաքանչյուր կին և յուրաքանչյուր տղամարդ, ով Աստծո հետ ուխտ է կապում և պահում այդ ուխտերը, և ով արժանիորեն մասնակցում է քահանայության արարողություններին, ուղղակիորեն կարող է ստանալ Աստծո զորությունը: (Ռասսել Մ․ Նելսոն, «Հոգևոր գանձեր»,Լիահոնա, նոյեմբեր 2019, 77)
Քահանայության վերականգնումը
Մորմոնի Գրքի թարգմանության վրա աշխատելիս Ջոզեֆ Սմիթը և Օլիվեր Քաուդերին իմացան, որ Հիսուս Քրիստոսը Նեփիացիներին տվել է մկրտություն կատարելու իշխանություն (տես 3 Նեփի 11.18–27)։ Ցանկանալով ավելին իմանալ այս իշխանության մասին՝ Ջոզեֆն ու Օլիվերը գնացին Սասքուեհանա գետի մոտակա անտառը և աղոթեցին:
Ուսանողները կարող են ստեղծել երեք հարցից բաղկացած հարցաշար, որոնց պատասխանները կարելի է գտնել Ջոզեֆ Սմիթ—Պատմություն 1.68–72 հատվածներում։ Օրինակ՝ հարցերից մեկը կարող է լինել «Ո՞վ է մկրտել Ջոզեֆ Սմիթին»: Այնուհետև նրանք կարող են հարցաշարերով փոխանակվել մեկ այլ ուսանողի հետ և գնահատել, թե որքան լավ են իրենք հասկանում քահանայության վերականգնման մանրամասները:
Կարդացեք Ջոզեֆ Սմիթ—Պատմություն 1.68–72 հատվածները՝ փնտրելով, թե ինչ զգացին Ջոզեֆն ու Օլիվերը, երբ աղոթում էին:
-
Ինչպե՞ս կամփոփեիք ձեր կարդացած հատվածները։
Հովհաննես Մկրտչի խոսքերը, որոնք նա ասում է Ջոզեֆ Սմիթ—Պատմություն 1.69 հատվածում, կարելի է գտնել նաև Վարդապետություն և Ուխտեր 13.1 հատվածում։
Կարդացեք Վարդապետություն և Ուխտեր 13.1 հատվածը և բացահայտեք Ահարոնյան Քահանայության բանալիները։
Վարդապետություն և Ուխտեր 13.1 հատվածը վարդապետության սերտման հատված է: Առաջարկեք ուսանողներին նշել սուրբ գրությունների սերտման հատվածները տարբերակիչ ձևով, որպեսզի կարողանան հեշտությամբ գտնել դրանք:
-
Ի՞նչ օրհնություններ է տալիս Փրկիչը Ահարոնյան Քահանայության բանալիների միջոցով:
Հովհաննես Մկրտչի այցից հետո Փրկիչը ուղարկեց Պետրոսին, Հակոբոսին և Հովհաննեսին, որպեսզի վերականգնեն Մելքիսեդեկյան քահանայությունը երկրի վրա (տես Վարդապետություն և Ուխտեր 27.12, 128.20)։ 1836 թվականին Ջոզեֆ Սմիթը ստացավ քահանայության լրացուցիչ բանալիներ (տես Վարդապետություն և Ուխտեր 110.11–16)։ Յուրաքանչյուր իրադարձություն հանգեցնում էր Աստծո զորության հետագա ստացմանը՝ քահանայության արարողությունների միջոցով։
Կարող եք գրատախտակին գրել հետևյալ ճշմարտությունը. Հիսուս Քրիստոսը վերականգնեց Իր քահանայության իշխանությունը, որպեսզի մենք կարողանանք ստանալ Իր ավետարանի արարողությունները։ Երբ ուսանողները պատասխանեն ստորև բերված հարցին, կարող եք գրատախտակին կազմել քահանայության արարողությունների ցանկը:
-
Ի՞նչ արարողություններ է Տերը հասանելի դարձրել մեզ Իր քահանայության միջոցով:
Եթե ուսանողները օգնության կարիք ունեն՝ նախորդ հարցին պատասխանելու համար, կարող եք օգնել նրանց բացահայտել հետևյալ արարողությունները. մկրտություն, հաղորդություն, հաստատում, քահանայության ձեռնադրում, տաճարային օժտում, տաճարային կնքում, հիվանդների սպասավորում, մխիթարության և խորհրդի օրհնություններ, հայրապետական օրհնություններ, կարգում՝ կոչման համար և այլն:
Մասնակցություն քահանայության արարողություններին
Կարդացեք Ջոզեֆ Սմիթ—Պատմություն 1.73–74 հատվածները՝ փնտրելով, թե Ջոզեֆի և Օլիվերի վրա ինչպես է ազդել մասնակցությունը մկրտության և քահանայության ձեռնադրման արարողություններին:
Կարող եք նաև առաջարկել ուսանողներին կարդալ Ջոզեֆ Սմիթ—Պատմություն գրքի վերջում ներկայացված՝ Օլիվերի պատմության չորրորդ և հինգերորդ պարբերություններից հատվածներ:
-
Ի՞նչ ապացույց եք տեսնում, որ այս արարողությունները Ջոզեֆին և Օլիվերին ավելի մեծ հնարավորություն տվեցին ստանալու Աստծո զորությունը:
-
Քահանայության արարողություններին մասնակցելն ինչպե՞ս է օգնել ձեզ ավելի մեծ հասանելիություն զգալ դեպի Աստծո զորությունը:
Կարող եք առաջարկել ուսանողներին պատկերացնել, որ իրենց խնդրել են օրագրում գրառում կատարել՝ նկարագրելով քահանայության արարողության հետ կապված անձնական փորձառությունը, որը նման է Ջոզեֆ Սմիթ—Պատմություն 1.73 հատվածում նկարագրվածին: Ուսանողների ուշադրությունը հրավիրեք գրատախտակին գրված արարողությունների ցուցակին: Ժամանակ տվեք նրանց՝ մտածելու, գրելու և կիսվելու իրենց փորձառություններով: Կարող եք նաև կիսվել, թե քահանայության վերականգնումն ինչպես է օրհնություն եղել ձեր կյանքում:
Անգիր սովորեք
Կարող եք օգնել ուսանողներին այս դասի ընթացքում անգիր սովորել վարդապետության սերտման հղումը և հիմնական արտահայտությունը, ապա կրկնել դրանք հետագա դասերի ժամանակ: Սուրբ գրության հիմնական արտահայտությունը հետևյալն է․ «Ահարոնյան քահանայությունը «կրում է հրեշտակների սպասավորության և ապաշխարության և մկրտության ավետարանի բանալիները»»: Անգիր սովորելու համար նախատեսված վարժությունների վերաբերյալ գաղափարները ներկայացված են հավելվածի նյութերում՝ «Վարդապետության սերտման կրկնության վարժություններ» բաժնում: