Վարդապետություն և Ուխտեր 12–17, Ջոզեֆ Սմիթ—Պատմություն 1.66–75

Վարդապետություն և Ուխտեր 14

Դուք կունենաք հավիտենական կյանք

Ջոզեֆ Սմիթը և Օլիվեր Քաուդերին տեղափոխվեցին Նյու Յորք նահանգի Ֆայեթ քաղաք՝ Ուիթմերների տուն, որպեսզի ավարտեն Մորմոնի Գրքի թարգմանությունը: Դեյվիդ Ուիթմերը զգում էր Փրկչի վերականգնված ավետարանի զորությունը և ցանկանում էր մասնակցել աշխատանքին։ Վարդապետություն և Ուխտեր 14 բաժինը տրվել է ի պատասխան Դեյվիդի ցանկության, այն է՝ իմանալ Տիրոջ կամքն իր վերաբերյալ: Այս դասը կօգնի ուսանողներին լինել հնազանդ և դիմանալ մինչև վերջ՝ Փրկչի զորությամբ:

Ուսանողի նախապատրաստում․ Կարող եք առաջարկել ուսանողներին փնտրել մի սկզբունք, որը նրանք կարող են կիրառել սուրբ գրությունների իրենց անձնական ուսումնասիրությունից: Ուսանողները կարող են օգտագործել Եկ, հետևիր ինձ ձեռնարկի ուսումնական նյութերից մի քանիսը։

Հնարավոր ուսումնական վարժություններ

Հավիտենական կյանքի օրհնությունները

Որպեսզի օգնեք ուսանողներին մտածել այն մասին, թե Փրկիչն ինչ է խնդրում մեզ անել՝ հավիտենական կյանքի Իր պարգևին արժանանալու համար, կարող եք կիսվել հետևյալ սցենարով: Կարող եք ուսանողներին տալ հետևյալ հարցերը և հնարավորություն տալ նրանց մանրամասներ ավելացնելու սցենարին: Դա կարող է օգնել ձեզ տեսնել և հասկանալ ուսանողների հարցերն ու մտահոգությունները:

Սեմինարիայում հավիտենական կյանքի մասին իմանալուց հետո մի երիտասարդ կին մտածում է. «Ես պարզապես չեմ կարծում, որ բավականաչափ լավն եմ, որպեսզի ապրեմ իմ երկնային ծնողների և Հիսուս Քրիստոսի հետ ու նմանվեմ Նրանց: Ես չեմ պատրաստվում հասնել դրան»։

• Նա ինչո՞ւ կարող էր այդպես մտածել։

• Ուրիշ ինչի՞ մասին կարող է նա անհանգստանալ:

Սցենարը քննարկելուց հետո խնդրեք ուսանողներին խորհել, թե արդյոք իրենք երբևէ ունեցել են նմանատիպ զգացումներ: Առաջարկեք նրանց գրել մեկ կամ մի քանի հարց կամ մտահոգություն, որ իրենք ունեն հավիտենական կյանքի օրհնությունը ստանալու վերաբերյալ: Վարդապետություն և Ուխտեր 14 բաժինն ուսումնասիրելիս խրախուսեք ուսանողներին փնտրել Փրկչի առաջնորդությունը Հոգու միջոցով։

Ուիթմերների ընտանիքը

Որպեսզի օգնեք ուսանողներին ավելի լավ ծանոթանալ Ուիթմերների ընտանիքին, կարող եք առաջարկել որևէ ուսանողի կարդալ հետևյալ պարբերությունը կամ կարող եք ձեր բառերով կիսվել տեղեկություններով:

Ջոզեֆ Սմիթը և Օլիվեր Քաուդերին բախվեցին դաժան հալածանքների, երբ թարգմանում էին Մորմոնի Գիրքը Փենսիլվանիա նահանգի Հարմոնի քաղաքում։ Նրանք գրեցին Ուիթմերների ընտանիքին՝ հարցնելով նրանց, թե արդյոք իրենք կարող են տեղափոխվել Ուիթմերների տուն՝ Նյու Յորք նահանգի Ֆայեթ քաղաք, որպեսզի ավարտեն թարգմանությունը: Տիրոջ կողմից տրված աստվածային դրսևորումներից հետո Մերի Ուիթմերը և Փիթեր Ուիթմեր Ավագն ու նրանց ընտանիքը որոշեցին Ջոզեֆին, Էմմային և Օլիվերին հրավիրել իրենց տուն: Թարգմանության վրա աշխատելու ընթացքում Ուիթմերներն աջակցում էին նրանց: Դեյվիդ Ուիթմերը հատկապես ոգեշնչված էր Վերականգնման աշխատանքով և ցանկանում էր իմանալ Փրկչի կամքը իր վերաբերյալ: Ջոզեֆը ստացավ հայտնություն՝ այժմ Վարդապետություն և Ուխտեր 14 բաժինը, որում Փրկիչը առաջարկեց Դեյվիդին միանալ Իրեն այս «մեծ և սքանչելի աշխատանքում» (Վարդապետություն և Ուխտեր 14.1)։ Նա առաջարկեց Դեյվիդին «ձգտել ի հայտ բերել և հաստատել [Իր] Սիոնը» (Վարդապետություն և Ուխտեր 14.6)։ Այս առաջարկները՝ առաջնորդության և օրհնությունների հետ միասին, որոնք Փրկիչը նույնպես խոստանում է Վարդապետություն և Ուխտեր 14 բաժնում, վերաբերում են Երկնային Հոր բոլոր զավակներին։

Պահենք պատվիրանները և դիմանանք մինչև վերջ

Կարդացեք Վարդապետություն և Ուխտեր 14.5–7 հատվածները և փնտրեք, թե Փրկիչը ինչ է մեզ խնդրում անել՝ հավիտենական կյանքին արժանանալու համար։

• Ի՞նչ գտաք:

• Ի՞նչ սկզբունք կարող եք բացահայտել:

Օգնեք ուսանողներին բացահայտել հետևյալ սկզբունքը. Եթե մենք պահենք պատվիրանները և դիմանանք մինչև վերջ, կստանանք հավիտենական կյանքի Աստծո պարգևը: Կարող եք առաջարկել ուսանողներին նշել այս սկզբունքը իրենց սուրբ գրություններում։

Օգտվելով ստորև ներկայացված բացատրությունից՝ ուսանողները կարող են ձևակերպել մինչև վերջ դիմանալու պարզ սահմանումը: Այնուհետև կարող եք ուսանողներին առաջարկել ավելացնել այդ պարզ սահմանումն իրենց սուրբ գրություններում՝ հատված 7-ի կողքին։

Տասներկու Առաքյալների քվորումից երեց Դիտեր Ֆ. Ուխդորֆը բացատրել է, թե ինչ է նշանակում դիմանալ մինչև վերջ։

Աստծո արքայությունում փրկության համար հիմնարար պահանջն է՝ դիմանալ մինչև վերջ կամ հավատարիմ մնալ Հիսուս Քրիստոսի ավետարանի օրենքներին և արարողություններին մեր ողջ կյանքի ընթացքում: …

… Մինչև վերջ դիմանալը լոկ կյանքի դժվարությունները պասիվորեն հանդուրժելը կամ դրանց «դիմանալը» չէ։ Մեր կրոնը ակտիվ կրոն է, որն օգնում է Աստծո զավակներին այս կյանքի ընթացքում նեղ ու անձուկ ճանապարհին զարգացնել իրենց ամբողջ ներուժը և մի օր վերադառնալ Նրա մոտ։ (Դիտեր Ֆ. Ուխդորֆ, «Մի՞թե մենք պատճառ չունենք ուրախանալու», Լիահոնա, նոյեմբեր 2007 թ․, 20)

• Ձեր կարծիքով, ինչո՞ւ է պահանջվում պահել պատվիրանները և մինչև վերջ դիմանալ՝ հավիտենական կյանք ստանալու համար:

• Ինչո՞ւ է Հիսուս Քրիստոսը պատվիրանները պահելու և մինչև վերջ հավատարմորեն դիմանալու օրինակ հանդիսանում:

• Այս գիտելիքն ինչպե՞ս կարող է օգնել մեզ պահպանել հավերժության հեռանկարը, երբ բախվում ենք կյանքի դժվարություններին:

Կարդացեք Վարդապետություն և Ուխտեր 14.8–11 հատվածները և փնտրեք, թե ինչ ուսուցանեց Փրկիչը Դեյվիդ Ուիթմերին, որը կարող էր օգնել նրան ստանալ հավիտենական կյանքի Աստծո պարգևը:

• Ձեր կարծիքով, ինչպե՞ս է այս խորհուրդը վերաբերում մեզ այսօր:

Օգտակար կլինի նշել, որ հատված 8-ում Տերը հայտնեց Դեյվիդին, որ նրան պատիվ կընձեռնվի լինել Մորմոնի Գրքի վկաներից մեկը:

Փրկչի՝ հնազանդվելու և դիմանալու ոգեշնչող զորությունը

Հետևյալ վարժությունը կօգնի ուսանողներին հասկանալ, որ Փրկչի զորությունն է մեզ հնարավորություն տալիս հնազանդ լինել և դիմանալ կյանքի դժվարություններին:

Օգնեք ուսանողներին կենտրոնանալ Հիսուս Քրիստոսի վրա․ Լրացուցիչ ուսուցում ստանալու համար տես «Օգնեք սովորողներին ճանաչել Տիրոջ սերը, զորությունը և ողորմածությունն իրենց կյանքում» դասընթացը՝ Ուսուցիչների զարգացման հմտություններ ուսուցողական նյութի մեջ։ Կիրառեք հմտությունը Հարցեր տվեք, որոնք Տիրոջ սերը, զորությունը և ողորմածությունը կապում են ուսուցանված ճշմարտությունների հետ։

Մտածեք այն մասին, թե որքան եք զգում Փրկչի օգնության կարիքը ձեր կյանքում: Գտեք սուրբ գրությունների հղում, որն ուսուցանում է, թե ինչպես կարող եք ապավինել ձեզ օգնելու Նրա զորությանը: Անհրաժեշտության դեպքում կարող եք կարդալ հետևյալ սուրբ գրությունների հղումներից մեկը կամ մի քանիսը:

Առաջարկեք ուսանողներին կիսվել սուրբ գրությունների հատվածներով, որոնք անձնապես կաևոր են իրենց համար, և բացատրել, թե ինչպես կարող են այդ հատվածներն օգնել իրենց ապավինել Փրկչի զորությանը՝ Նրա պատվիրանները պահելու և մինչև վերջ դիմանալու համար: Նրանք կարող են նաև օգտագործել Gospel Library հավելվածի հղման գործառույթը՝ իրենց ուսումնասիրած հատվածները Վարդապետություն և Ուխտեր 14.7 հատվածների հետ կապելու համար կամ կարող են խաչաձև հղումները գրել իրենց սուրբ գրությունների լուսանցքներում:

Կարդացեք Տասներկու Առաքյալների Քվորումից Երեց Ջեֆրի Ռ. Հոլլանդի խոսքերը և փնտրեք, թե Տերն ինչպես կօրհնի մեզ, եթե մենք ձգտենք հնազանդ լինել և դիմանալ մինչև վերջ:

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

Տէրը էգուց ձեր միջումը հրաշքներ է անելու

Եթե մեր սիրտը նվիրենք Աստծուն, եթե սիրենք մեր Տեր Հիսուս Քրիստոսին, եթե անենք ամեն ինչ՝ ավետարանով ապրելու համար, ապա ի վերջո վաղվա և մնացած այլ օրերը կլինեն փառահեղ, նույնիսկ, եթե ոչ միշտ հասկանանք դա: Ինչո՞ւ։ Որովհետև մեր Երկնային Հայրը ցանկանում է, որ դա այդպես լինի: Նա կամենում է օրհնել մեզ: Արժանավոր, լիառատ և հավիտենական կյանքն Իր զավակների համար․ ահա Նրա ողորմած ծրագրի գլխավոր նպատակը: Դա մի ծրագիր է, որը հիմնված է այն ճշմարտության վրա, «որ Աստծուն սիրողներին ամեն բաները գործակից են լինում դէպի բարին նորանց» [Հռովմեացիս 8.28]։ Այսպիսով, շարունակեք սիրել: Շարունակեք փորձել։ Շարունակեք վստահել։ Շարունակեք հավատալ։ Շարունակեք աճել։ Երկինքը ողջունում է ձեզ՝ այսօր, վաղը, հավիտյան (Ջեֆրի Ռ. Հոլլանդ, «Վաղը Տերը հրաշքներ կգործի ձեր շրջապատում», Լիահոնա, մայիս 2016 թ․, 127)

• Այս ելույթի ո՞ր բառերը կամ արտահայտություններն են ոգեշնչում ձեզ պահել պատվիրանները և դիմանալ մինչև վերջ:

Փրկչի օգնությամբ մենք կարող ենք ստանալ հավիտենական կյանք:

Հետևյալ հարցերի շուրջ խորհելիս ուսանողները գուցե ցանկանան հիշել իրենց մտահոգությունները՝ հավիտենական կյանքին արժանի լինելու վերաբերյալ։ Ուսանողները կարող են պատասխանել իրենց ուսումնական օրագրում:

• Նշեք մեկ կամ երկու բան, որոնք, ըստ ձեզ, կարող եք անել՝ հնազանդ լինելու և մինչև վերջ դիմանալու համար:

• Ի՞նչ կարող եք հիշել կամ անել, երբ բախվում եք խոչընդոտների՝ հնազանդվելու կամ մինչև վերջ դիմանալու ճանապարհին:

• Ինչպե՞ս կարող եք ապավինել Փրկչի զորությանը, երբ ձգտում եք պահել Նրա պատվիրանները և դիմանալ մինչև վերջ:

Կարող եք ավարտել՝ խրախուսելով ուսանողներին շարունակաբար ձգտել պահել Փրկչի պատվիրանները՝ վստահելով հավիտենական կյանքի Նրա խոստմանը:

Օժանդակ նյութեր

Ի՞նչ է հավիտենական կյանքը

Նախագահ Ռասսել Մ. Նելսոնն ուսուցանել է․

Հավիտենական կյանքը շատ ավելին է, քան պարզապես ժամանակի նշումը: Հավիտենական կյանքը կյանքի այնպիսի տեսակ ու որակ է, որով ապրում են Երկնային Հայրը և Նրա Սիրելի Որդին։ Երբ Հայրն առաջարկում է հավիտենական կյանք, Նա ըստ էության ասում է․ «Եթե դու ընտրում ես հետևել իմ Որդուն, եթե քո ցանկությունն է իսկապես դառնալ Նրա նման, ապա որոշ ժամանակ անց դու կապրես մեզ նման և կնախագահես աշխարհներ և թագավորություններ, ինչպես մենք ենք անում»։ (Ռասսել Մ. Նելսոն, «Փրկչի չորս պարգևները», Ensign, դեկտեմբեր 2019 թ․, 15)

Արդյո՞ք մինչև վերջ դիմանալն ավելին է, քան դժվար ժամանակներում դիմանալը:

Տասներկու Առաքյալների Քվորումի անդամ Երեց Ջոզեֆ Բ. Վիրթլին (1917–2008) բացատրել է.

Ոմանք կարծում են, որ մինչև վերջ դիմանալը պարզապես դժվարությունների միջով անցնելն ու տառապելն է: Սակայն դա շատ ավելին է․ դա դեպի Քրիստոսը գալու և Նրանում կատարելագործվելու գործընթաց է: …

Մինչև վերջ համբերել նշանակում է, որ մենք մեր կյանքն ամուր հաստատել ենք ավետարանի հողի վրա՝ մնալով Եկեղեցու հիմնական ուղղության վրա, խոնարհաբար ծառայելով մեր մերձավորներին, ապրելով Քրիստոսանման կյանքով և պահելով մեր ուխտերը: (Ջոզեֆ Բ. Վիրթլին, «Առաջ մղվեք», Լիահոնա, նոյեմբեր 2004 թ․, 101)

Օժանդակ ուսումնական վարժություններ

Ինչպե՞ս դիմանալ մինչև վերջ

Կարող եք օգտագործել ստորև ներկայացված սցենարները՝ օգնելու ուսանողներին ավելի լավ հասկանալ, թե ինչ է նշանակում մինչև վերջ դիմանալ դժվարին հանգամանքներում: Դուք կարող եք ներկայացնել սցենարներ, որոնք ավելի լավ կհամապատասխանեն ձեր դասարանի կարիքներին կամ կարող եք առաջարկել ուսանողներին գրել իրենց սցենարը: Սցենարները քննարկելուց հետո առաջարկեք ուսանողներին պատասխանել հարցերին:

Երիտասարդ տղային անբարյացակամ են վերաբերվում իր ծխի կամ ճյուղի անդամները:

Երիտասարդ աղջիկը հոգեկան առողջության հետ կապված խնդիրներ ունի, որոնք հաճախ ազդում են դպրոց հաճախելու նրա կարողության վրա:

Երիտասարդ տղային, որը Եկեղեցու միակ անդամն է իր դպրոցում, ծաղրում են իր համոզմունքների և չափանիշների համար:

• Այդ մարդու համար ի՞նչ կարող է նշանակել մինչև վերջ դիմանալը: Ի՞նչ խոչընդոտների կարող է բախվել նա:

• Փրկչի վրա կենտրոնանալով՝ այդ մարդն ինչպե՞ս կարող է օգնել իրեն:

• Ինչպե՞ս կարող եք օգնել այդ ընկերոջը կենտրոնանալ Հիսուս Քրիստոսի վրա այդ դժվարությունների ժամանակ:

Քննարկման ավարտին առաջարկեք ուսանողներին կիսվել սցենարների կամ իրենց անձնական հանգամանքների վերաբերյալ ունեցած ցանկացած հարցով կամ մտահոգությամբ:

Արդյոք ես բավականաչափ լա՞վն եմ։

Շատ մարդիկ անհանգստանում են, որ չնայած պատվիրանները պահելու իրենց ջանքերին, մեղքերն ու թուլությունները խանգարում են իրենց ստանալ Փրկչի խոստացած օրհնությունները: Դասարանի հետ կարող եք կիսվել «Արդյոք ես բավականաչափ լա՞վն եմ» տեսանյութով։ Դուք կարող եք ընդգծել Երեց Ջ. Դևն Քորնիշի հավաստիացումը, որ մեր անկեղծ ջանքերը բավական են՝ Հիսուս Քրիստոսի շնորհիվ։

Am I Good Enough?

Ովքե՞ր էին Ուիթմերները։

Հետևյալ աղբյուրները կարող են օգնել ձեր դասարանին ներկայացնել Մերի Ուիթմերի և Փիթեր Ուիթմեր Ավագի ընտանիքը և նրանց ներդրումը Հիսուս Քրիստոսի Վերջին Օրերի Սրբերի Եկեղեցու վերականգնման գործում.

Սրբեր, հատոր 1, Ճշմարտության դրոշը, 68–72

Տեսանյութ. «Days of Harmony» (25:01), դիտել 21:55-23:53

Days of Harmony

Տեսանյութ. «A Day for the Eternities» (23:09), դիտել 1:35-8:20

A Day for the Eternities

Տեսանյութ. «Whitmer Farm: A Place of Miracles» (15:42) դիտել 0:00-4:23

Whitmer Farm: A Place of Miracles