Lesona 24: Mataupu Faavae ma Feagaiga 12–17; Iosefa Samita—Talafaasolopito 1:66–75

Iosefa Samita—Talafaasolopito 1:68–75; Mataupu Faavae ma Feagaiga 13

O Le Toefuataiga o le Perisitua

A o galulue ai i le faaliliuga o le Tusi a Mamona, sa iloa e Iosefa Samita ma Oliva Kaotui o Iesu Keriso na tuuina atu i sa Nifae le pule e papatiso ai. A o la saili ma le agaga tatalo ia iloa atili, sa asia Iosefa ma Oliva e Ioane le Papatiso ma mulimuli ane e Peteru, Iakopo, ma Ioane, o e na auina mai e toefuatai mai le pule o le perisitua i le lalolagi. O lenei lesona e mafai ona fesoasoani i tamaiti aoga ia lagonaina le taua o le toefuataiga o le pule o le perisitua a le Faaola.

Gaoioiga E Ono Mafai Ona Aoao Ai

Ua tuuina mai e le Faaola Lana pule

Fesoasoani i tamaiti aoga e mafaufau pe aisea e taua ai le toefuataiga o le perisitua ia i latou. E mafai ona e faia lenei mea e ala i le faaali atu o nei ata ma fai atu fesili e pei o nei:

• O le a se mea ua e iloa e uiga i mea na tutupu o loo faaalia i nei ata?

• Faamata e faape’i ona ese lou olaga e aunoa ma le pule o le perisitua a le Faaola?

Mafaufau e faasoa atu le faamatalaga lenei e fesoasoani ai i tamaiti aoga ia iloa pe mafai faapefea e le toefuataiga o le perisitua ona faamanuiaina fanau uma a le Atua. E mafai foi ona fesoasoani lenei saunoaga i tamaitai talavou e iloa ai e talafeagai le toefuataiga o le perisitua ia i latou.

I se lauga na tuuina atu i tamaitai o le Ekalesia, na aoao mai ai Peresitene Russell M. Nelson e uiga i le taua o le toefuataiga o le perisitua e mafai ona i ai i o tatou olaga:

Ou te matua naunau mo outou ia malamalama o le toefuataiga o le perisitua e tutusa lava le fitoitonu ia te oe o se tamaitai e pei ona i ai i soo se alii. Ona ua toefuatai mai le Perisitua Mekisateko, ua tofu maua uma ai e tamaitai ma alii tausi-feagaiga le avanoa i “faamanuiagauma faaleagaga o le ekalesia” pe, e mafai ona tatou faapea, i ‘oa faaleagaga uma ua i ai i le Alii mo Lana fanau.

O tamaitai uma ma alii uma e osia ni feagaiga ma le Atua ma tausia na feagaiga, ma o e auai ma le agavaa i sauniga o le perisitua, e mauaina le avanoa tuusao i le mana o le Atua. (Russell M. Nelson, “O Oa Faaleagaga,”Liahona, Nov. 2019, 77)

Toefuataiga o le perisitua

A o faaliliuina e Iosefa Samita ma Oliva Kaotui le Tusi a Mamona, sa laua iloa le tuuina atu e Iesu Keriso o le pule ia sa Nifae e faatino ai papatisoga (tagai 3 Nifae 11:18–27). I le manao ai ia iloa atili e uiga i lenei pule, sa o atu ai Iosefa ma Oliva i le togavao e lata ane i le Vaitafe o Susikuana ma tatalo ai.

E mafai e tamaiti aoga ona faia se suega e tolu-fesili ma tali e mafai ona maua i le Iosefa Samita—Talafaasolopito 1:68–72. Mo se faataitaiga, o se tasi o fesili o le “O ai na papatisoina Iosefa Samita?” Ona mafai lea ona latou faafesuia’ia suega pupuu ma se isi tamaitiiti aoga ma iloilo po o le a le lelei o lo latou malamalama i faamatalaga o le toefuataiga o le perisitua.

Faitau le Iosefa Samita—Talafaasolopito 1:68–72, ma vaavaai mo aafiaga o Iosefa ma Oliva a o la tatalo.

• E faapefea ona e aoteleina fuaiupu e te faitauina?

O upu na tautala i ai Ioane le Papatiso i le Iosefa Samita—Talafaasolopito 1:69 o loo maua foi i le Mataupu Faavae ma Feagaiga 13:1.

Faitau le Mataupu Faavae ma Feagaiga 13:1 ma faailoa mai ki o le Perisitua Arona.

O leMataupu Faavae ma Feagaiga 13:1 o se fuaitau o le atamai i aoaoga faavae. Mafaufau e valaaulia tamaiti aoga e faailoga ia fuaitau o le atamai i aoaoga faavae i se auala e iloga ina ia mafai ona e mauaina gofie.

• O a faamanuiaga ua tuuina mai e le Faaola e ala i ki o le Perisitua Arona?

Ina ua mavae le asiasiga a Ioane le Papatiso, sa auina atu e le Faaola ia Peteru, Iakopo, ma Ioane e toefuatai mai le Perisitua Mekisateko i le lalolagi (tagai Mataupu Faavae ma Feagaiga 27:12; 128:20). I le 1836, na taulimaina ai e Iosefa Samita ia ki faaopoopo o le perisitua (tagai i le Mataupu Faavae ma Feagaiga 110:11–16). O mea taitasi na tutupu na taitai atu ai i le mauaina atili o le mana o le Atua e ala i sauniga o le perisitua.

Mafaufau e tusi le upumoni lenei i luga o le laupapa: Na toefuatai mai e Iesu Keriso Lana pule o le perisitua ina ia mafai ai ona tatou maua sauniga o Lana talalelei. A o tali mai tamaiti aoga i le fesili lenei, e mafai ona e faia se lisi o sauniga o le perisitua i luga o le laupapa.

• O a sauniga ua faaavanoa mai e le Alii ia i tatou e ala i Lana perisitua?

Afai e manaomia e tamaiti aoga le fesoasoani i le taliina o le fesili na muamua atu, e mafai ona e fesoasoani ia i latou e faailoa mai sauniga nei: papatisoga, faamanatuga, faamauga, faauuga i le perisitua, faaeega paia, faaipoipoga i le malumalu, faauuina o e mama’i, faamanuiaga o le faamafanafanaga ma fautuaga, faamanuiaga faapeteriaka, vaetofia mo se valaauga, ma isi mea faapena.

Auai i sauniga o le perisitua

Faitau le Iosefa Samita—Talafaasolopito 1:73–74, ma vaavaai pe na faapefea ona aafia Iosefa ma Oliva a o la auai i sauniga o le papatisoga ma le faauuga i le perisitua.

E mafai foi ona e valaaulia tamaiti aoga e faitau vaega o parakalafa lona fa ma le lima o le tala a Oliva i le faaiuga o le Iosefa Samita—Talafaasolopito.

• O le a se faamaoniga ua e vaaia o nei sauniga na tuuina atu ai ia Iosefa ma Oliva le avanoa sili atu i le mana o le Atua?

• Na faapefea e le auai i sauniga o le perisitua ona fesoasoani ia te oe e lagona atili ai le mauaina o le mana o le Atua?

E mafai ona e valaaulia tamaiti aoga e mafaufau faapea sa talosagaina i latou e tusi se tusiga i le api talaaga e faamatala ai se aafiaga patino i se sauniga faaleperisitua, e pei o lea o loo faamatalaina i le Iosefa Samita—Talafaasolopito 1:73. Faasino tamaiti aoga i le lisi o sauniga o i luga o le laupapa. Tuu atu ia i latou se taimi e toe manatunatu ai, tusi e uiga i ai, ma faasoa mai o latou aafiaga. E mafai foi ona e faasoa atu pe na faapefea ona avea le toefuataiga o le perisitua o se faamanuiaga i lou olaga.

Tauloto

Atonu e te manao e fesoasoani i tamaiti aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma iloilo i latou i lesona i le lumanai. O le fuaitau autu o le mau o le “Perisitua Arona e ‘umia ki o asiasiga ma galuega a agelu, ma le talalelei o le salamo, ma le papatisoga.’” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga o le Iloiloga o le Atamai i Aoaoga Faavae.”

Punaoa Faaopoopo

O fea e mafai ona ou aoao atili ai e uiga i le toefuataiga o le perisitua?

• O Autu o le Talafaasolopito o le Ekalesia, “Toefuataiga o le Perisitua Arona”; “Toefuataiga o le Perisitua Mekisateko,” ChurchofJesusChrist.org/study/history/topics

• Autu ma Fesili, “Toefuataiga o le Perisitua,” topics.ChurchofJesusChrist.org

• Au Paia: O Le Tala o le Ekalesia a Iesu Keriso i Aso e Gata Aivol. 1, O Le Tagavai o le Upumoni, 1815–1846 [2018], 65–75

• The Restoration of the Priesthood Authority and Organization” (vitio), ChurchofJesusChrist.org

Mataupu Faavae ma Feagaiga 13:1. O le a le uiga o ki taitasi o le Perisitua Arona?

Sa aoao mai Peresitene Dallin H. Oaks o le Au Peresitene Sili:

“O le a le uiga o le Perisitua Arona o loo taofia “ki o galuega a agelu” ma le “talalelei o le salamo ma le papatisoga, ma le faamagaloina o agasala”? O le uiga o loo maua i sauniga o le papatisoga ma i le faamanatuga. O le papatisoga e mo le faamagaloina o agasala, ma o le faamanatuga o se faafouina lea o feagaiga ma faamanuiaga o le papatisoga. O mea uma ia e lua e tatau ona muamua atu ai le salamo. Pe a tatou tausia feagaiga e faia i nei sauniga, ua folafola mai ia i tatou o le a tatou maua pea Lona Agaga e faatasi ma i tatou. O le auaunaga a agelu o se tasi o faaaliga mai o lena Agaga. (Dallin H. Oaks, “O Le Perisitua Arona ma le Faamanatuga,” Ensign, Nov. 1998, 37–38)

Iosefa Samita—Talafaasolopito 1:70–72. O anafea na toefuatai mai ai le Perisitua Mekisateko?

E le mafai ona maua sao le aso o lea faaaliga faalelagi mai faamatalaga o i ai. Na o le pau le faamatalaga mai ia Iosefa lava ia lea e faamatalaina ai e uiga i tulaga o le faaaliga i se tusi i le 1842 (lea ua iloga o le Mataupu Faavae ma Feagaiga 128) lea na ia molimau ai na ia faalogo “i le siufofoga o Peteru, Iakopo, ma Ioane i le vao i le va o Haramoni, i le itumalo o Susikuana, ma Kolesavile, i le itumalo o Perume, i luga o le vaitafe o Susikuana, ma taʼu mai o i latou lava ua i ai ki o le malo.” O tagata faitau i nei vaitaimi ua tofu ma faaiuga eseese mai ia faamatalaga eseese e tusa ma le taimi na faaali atu ai Peteru, Iakopo, ma Ioane. O a latou taumatega e amata mai i ni nai vaiaso ina ua uma ona faaali mai Ioane le Papatiso i le aso 15 o Me, 1829, i le tele o masina mulimuli ane. (O Autu o le Talafaasolopito o le Ekalesia,“Restoration of the Melchizedek Priesthood,” ChurchofJesusChrist.org/study/history/topics)

Gaoioiga Faaopoopo e Aoao Ai

Vaai faalemafaufau i le toefuataiga o le perisitua

Ina ia fesoasoani i tamaiti aoga e vaai faalemafaufau i mea na tutupu i le toefuataiga o le perisitua, mafaufau e faaali atu le “Aso o Haramoni” (25:01; matamata mai le faailotaimi 17:48 i le 21:02) po o le “Nofoaga o le Toefuataiga o le Perisitua” (18:56; matamata mai le taimi faailo 13:40 i le 18:56).

Sauniga Faaleperisitua

A lisi mai e tamaiti aoga ia sauniga na faia e le Alii e ala i le perisitua, e mafai ona e faaali atu ata o sauniga o le perisitua ma valaaulia tamaiti aoga e faailoa mai po o le fea sauniga ua maua e ala i le Perisitua Arona ma po o le fea foi ua maua e ala i le Perisitua Mekisateko.

Sailia o le faaolataga

Sa saili Iosefa Samita i le faamagaloga o agasala i le tele o taimi sa faamaumauina ai. Faatusatusa le faaali mai o Ioane le Papatiso (Iosefa Samita—Talafaasolopito 1:68–74) i le Uluai Faaaliga (Iosefa Samita—Talafaasolopito 1:10–20 ma isi tala o le Uluai Faaaliga) ma i asiasiga a le agelu o Moronae (Iosefa Samita—Talafaasolopito 1:27–30). A o lei tutupu faaaliga faalelagi taitasi, o a fesili na fesili ai Iosefa? E faapefea e nei fesili ona fesootai le tasi i le isi? O le a se mea e mafai ona tatou aoao mai le faataitaiga a Iosefa o le a fesoasoani ai i a tatou lava taumafaiga e o mai i le Faaola?

Mataupu Faavae ma Feagaiga 12. Iosefa Knight le Matua.

O mea nei e mafai ona fesoasoani i tamaiti aoga e suesue ai le Mataupu Faavae ma Feagaiga 12 ma talisapaia saofaga a Iosefa Knight le Matua.

E mafai e tamaiti aoga ona faitau le ulutala o le vaega o le Mataupu Faavae ma Feagaiga 12 ma fuaiupu 6–9, ma vaavaai mo faatonuga na tuu atu e le Alii ia Iosefa Knight le Matua. Faamalamalama atu o le fesoasoani faaletino a Iosefa Knight ia Iosefa Samita ma Oliva Kaotui na mafai ai ona faaliliuina le Tusi a Mamona i se taimi puupuu faavavega. Mafaufau e talanoaina pe mafai faapefea foi ona tatou faia se matafaioi itiiti i vavega o le Toefuataiga (tagai Alema 37:6).

Atonu foi e te manao e faasoa atu lenei saafiafiga na tusia e Iosefa Samita i le 1842 e uiga i lana uo o Iosefa Knight le Matua.:

“A’o ou mafaufau i uiga mama ma agavaa lelei ma uiga o e faamaoni toaitiiti, lea ua ou tusia nei i le Tusi o le Tulafono a le Aliio i latou ia o e na tutu mai ia te a’u i itula uma o faigata, mo nei tausaga uumi e sefulu ma le lima; fai atu mo se faataitaiga; o lo’u uso matua ma pele o Iosefa Knights [Knight] Senro lē sa i ai faatasi ma le aofaiga o tagata muamua na auauna atu i mea na ou manaomia, a’o ou galue, i le amataga o le aumaia o le galuega a le Alii, ma le faataatiaina o le faavae o le Ekalesia a Iesu Keriso o le Au Paia o Aso e Gata Aimo le sefululima tausaga ua faamaoni o ia ma amio sao, ma sa oo lava ina tuu atu, ma faataitaiga ma le amiomama, ma le agalelei; ma e lei masuia i le itu taumatau po o le itu tauagavale. Faauta o ia o se tagata amiotonu” (i le The Iosefa Samita Papers, Documents, Volume 10: May–August 1842, ed. Elizabeth A. Kuehn ma isi [2020], 179).