“Mataupu Faavae ma Feagaiga 14: O Le a E Maua le Ola e Faavavau,” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 14,” Tusi Lesona a le Faiaoga Seminare o le Mataupu Faavae ma Feagaiga
Mataupu Faavae ma Feagaiga 12–17; Iosefa Samita—Talafaasolopito 1:66–75
Mataupu Faavae ma Feagaiga 14
O Le a E Maua le Ola e Faavavau
Sa siitia atu Iosefa Samita ma Oliva Kaotui i le aiga o Uitimera i Faiete, Niu Ioka, e faaauau ai le faaliliuga o le Tusi a Mamona. Sa lagona e Tavita Uitimera le mana o le talalelei toefuataiina a le Faaola ma sa manao e avea o se vaega o le galuega. Na maua mai ai le Mataupu Faavae ma Feagaiga 14 e tali atu ai i manaoga o Tavita ia iloa le finagalo o le Alii mo ia. O lenei lesona e mafai ona fesoasoani i tamaiti aoga ia usiusitai ma tumau e oo i le iuga i le mana gafatia o le Faaola.
Sauniuniga a le tamaititi aoga: E mafai ona e valaaulia tamaiti aoga e vaavaai mo se mataupu faavae e mafai ona latou faaaogaina mai a latou suesuega patino o tusitusiga paia. Atonu e mananao tamaiti aoga e faaaoga nisi o punaoa mo suesuega i le Sau, Mulimuli Mai ia te A’u.
Gaoioiga E Ono Mafai Ona Aoao Ai
O le faamanuiaga o le ola e faavavau
Ina ia fesoasoani i tamaiti aoga e mafaufau e uiga i mea ua fetalai mai le Faaola tatou te faia e agavaa ai mo Lana meaalofa o le ola e faavavau, e mafai ona e faasoa atu le ata faataitai lenei. Mafaufau e fai atu i tamaiti aoga fesili nei ma faataga i latou e faaopoopo nisi faamatalaga i le ata faataitai. O le faia o lena mea e mafai ona fesoasoani ia te oe e iloatino ai ma malamalama i fesili ma atugaluga atonu o i ai i tamaiti aoga.
Ina ua uma ona aoao e uiga i le ola e faavavau i le seminare, sa mafaufau se tamaitai talavou, “Ou te manatu e le lava lo’u lelei e ola faatasi ai ma o’u matua faalelagi ma Iesu Keriso ma avea e faapei o i Laua. O le a ou le mauaina.”
-
Aisea ua ia lagona ai faapea?
-
O le a se isi mea e ono popole i ai o ia?
A uma ona talanoaina le ata faataitai, fai i tamaiti aoga e mafaufau loloto pe na i ai lava ni o latou lagona faapena. Valaaulia i latou e tusi i lalo se fesili se tasi pe sili atu po o se atugaluga o loo ia i latou e uiga i le mauaina o le faamanuiaga o le ola e faavavau. Faamalosiau i tamaiti aoga e saili le taitaiga a le Faaola e ala i le Agaga a o latou suesueina le Mataupu Faavae ma Feagaiga 14.
O le aiga o Uitimera
Ina ia fesoasoani i au tamaiti aoga ia faamasani atili i le aiga o Uitimera, e mafai ona e valaaulia se tamaitiiti aoga e faitau le parakalafa lenei, pe faasoa atu le faamatalaga i au lava upu.
Sa feagai Iosefa Samita ma Oliva Kaotui ma sauaga matuia a o faaliliuina le Tusi a Mamona i Haramoni, Penisilevania. Sa la’ua tusi atu i le aiga o Uitimera ma fesili atu pe mafai ona latou siitia atu i lo latou fale i Feiete, Niu Ioka, e faamaea ai le faaliliuga. I le mavae ai o faaaliga mai le Alii, sa tonu ia Maria ma Pita Uitimera le Matua ma lo la aiga e valaaulia Iosefa, Ema, ma Oliva i lo la fale. Sa latou lagolagoina i latou a o latou galulue i le faaliliuga. Na faapitoa lava le lagonaina e Tavita Uitimera le musuia e ala i le galuega o le Toefuataiga ma sa manao ia iloa le finagalo o le Faaola mo ia. Na maua e Iosefa se faaaliga, lea ua avea nei ma Mataupu Faavae ma Feagaiga 14, lea na valaaulia ai e le Faaola ia Tavita e faatasi ma Ia i lenei “galuega tele ma le ofoofogia” (Mataupu Faavae ma Feagaiga 14:1). Sa ia valaaulia Tavita e “saili e aumai i luma ma faatu [Lana] Siona” (Mataupu Faavae ma Feagaiga 14:6). O nei valaaulia, faatasi ai ma le taitaiga ma faamanuiaga ua folafola mai foi e le Faaola i le Mataupu Faavae ma Feagaiga 14, e faatatau i fanau uma a le Tama Faalelagi.
Tausia o poloaiga ma tumau e oo i le iuga
Faitau le Mataupu Faavae ma Feagaiga 14:5–7 ma vaavaai mo mea ua fetalai mai le Faaola ia i tatou e fai ia agavaa ai mo le ola e faavavau.
-
O le a se mea sa e mauaina?
-
O a mataupu faavae e mafai ona e faailoaina?
Fesoasoani i tamaiti aoga e faailoa mai le mataupu faavae lenei: Afai tatou te tausia poloaiga ma tumau e oo i le iuga, o le a tatou maua le meaalofa a le Atua o le ola e faavavau. E mafai ona e valaaulia tamaiti aoga e faailoga lenei mataupu faavae i a latou tusi paia.
I le faaaogaina o le faamatalaga lenei, e mafai e tamaiti aoga ona maua se faauigaga faigofie o le tumau e oo i le iuga. Ona mafai lea ona e valaaulia tamaiti aoga e faaopoopo lenei faauigaga i a latou tusitusiga paia i autafa o le fuaiupu 7.
Na faamalamalama mai e Elder Dieter F. Uchtdorf o le Korama a Aposetolo e Toasefululua le uiga o le tumau e oo i le iuga:
Tumau e oʻo i le iuga, po o le tumau ma le faamaoni i tulafono ma sauniga o le talalelei a Iesu Keriso i o tatou olaga uma, o se tulaga manaomia taua lea mo le faaolataga i le malo o le Atua. …
… O le tumau e oo i le iuga ua le na o se mataupu o le onosaia lelei o tulaga faigata o le olaga po o le “ia onosai ai pea.” O la tatou tapuaiga e ola, e fesoasoani ai i fanau a le Atua i le ala lauitiiti ma le vaapiapi e atiina ae lo latou agavaa atoa i lenei olaga ma toe foi atu ai ia te Ia i se aso. (Dieter F. Uchtdorf, “E Le Tatau Ea Ona Tatou Olioli?,” Liahona, Nov. 2007, 20)
-
Aisea e te manatu ai o le tausia o poloaiga ma le tumau e oo i le iuga e manaomia ina ia maua ai le ola e faavavau?
-
E faapefea ona avea Iesu Keriso ma se faataitaiga o le tausia o poloaiga ma tumau faamaoni e oo i le iuga?
-
E mafai faapefea e lenei malamalama ona fesoasoani ia i tatou e tausia se vaaiga e faavavau pe a feagai ma luitau o le olaga?
Faitau le Mataupu Faavae ma Feagaiga 14:8–11 ma vaavaai mo mea na aoao atu e le Faaola ia Tavita Uitimera e mafai ona fesoasoani ia te ia e maua ai le meaalofa a le Atua o le ola e faavavau.
-
O le a sou manatu e faapefea ona faatatau lenei fautuaga ia i tatou i aso nei?
Atonu e fesoasoani le ta’u atu faapea i le fuaiupu 8, na ta’u atu ai e le Alii ia Tavita o le a faamanuiaina o ia e avea ma se tasi o molimau o le Tusi a Mamona.
O le mana faaosofia o le Faaola e usitai ma tumau ai
O le gaoioiga lenei e mafai ona fesoasoani i tamaiti aoga e iloa ai o le mana o le Faaola lea e mafai ai ona tatou usiusitai ma onosaia luitau o le olaga.
Fesoasoani i tamaiti aoga e taulai atu ia Iesu Keriso: Mo nisi faataitaiga i lenei mea, tagai i le aoaoga ua faaautuina, “Fesoasoani i tagata aoao ia iloa le alofa, mana,ma le alofa mutimutivale o le Alii i o latou olaga” o loo maua i le Tomai o le Atinaega o Faiaoga. Mafaufau e faataitai le tomai. Fai fesili e taulai atu i le fesootaiga o le alofa, mana, ma le alofa mutimutivale o le Alii i upumoni na aoao atu.
Mafaufau pe o le a le tele o lou manaomia o le fesoasoani a le Faaola i lou olaga. Sue se mau faasino o loo aoao mai ai auala e mafai ona e faalagolago ai i Lona mana e fesoasoani ai ia te oe. Afai e manaomia, e mafai ona e faitauina se tasi pe sili atu o mau faasino nei.
Valaaulia tamaiti aoga e faasoa mai fuaitau o mau e taua patino ma faamatala pe mafai faapefea e nei fuaitau ona fesoasoani ia i latou e faalagolago i le mana o le Faaola e tausi ai Ana poloaiga ma tumau e oo i le iuga. E mafai foi ona latou faaaogaina le sootaga o le polokalama o le Gospel Library e fesootai ai fuaitau o mau sa latou suesueina ma le Mataupu Faavae ma Feagaiga 14:7, pe e mafai foi ona latou tusia mau fefaasinoai i autafa o a latou tusitusiga paia.
Faitau le saunoaga a Elder Jeffrey R. Holland o le Korama a Aposetolo e Toasefululua ma vaavaai pe o le a faapefea ona faamanuiaina e le Alii i tatou a o tatou taumafai ia usiusitai ma tumau e oo i le iuga.
Na aoao mai Elder Jeffrey R. Holland o le Korama a Aposetolo e Toasefululua:
O a Taeao e Faia ai e le Alii o Vavega i o Outou Luma
Afai tatou te tuu atu o tatou loto i le Atua, afai tatou te alolofa i le Alii o Iesu Keriso, afai tatou te faia le mea silisili tatou te mafaia e ola ai i le talalelei, o taeao la ma isi aso uma o le a iu lava ina ofoofogia, e tusa lava pe tatou te le iloaina i taimi uma e ofoofogia. Aisea? Ona e finagalo lo tatou Tama Faalelagi ia faapena! E finagalo o Ia e faamanuia i tatou. O se ola e faavavau, tauia ma faamanuiaina o le vaega autu lea o Lana fuafuaga alofa mutimutivale mo Lana fanau! O se fuafuaga e faalagolago i le upumoni “e galue mea uma lava mo le lelei ia i latou o e ua alolofa i le Atua” [Roma 8:28]. O lea ia alolofa pea. Ia taumafai pea. Ia faalagolago pea. Ia talitonu pea. Ia tuputupu a‘e pea. O le a faamalosiau pea le lagi ia te outou nei, taeao, ma le faavavau. (Jeffrey R. Holland, “O a Taeao e Faia ai e le Alii o Vavega i o Outou Luma,” Liahona, Me 2016, 127)
-
O a upu po o fasifuaitau i lenei faamatalaga e faaosofia ai oe e tausi poloaiga ma tumau e oo i le iuga?
I le i ai ma le Faaola e mafai ona tatou mauaina le ola e faavavau
Atonu e mananao tamaiti aoga e toe mafaufau i o latou atugaluga e uiga i le agavaa mo le ola e faavavau a o latou tomanatu i fesili nei. E mafai ona tali mai tamaiti aoga i a latou api faamaumau mo suesuega.
-
O a ni mea se tasi pe lua e te lagona e mafai ona e faia ina ia usiusitai ai ma tumau e oo i le iuga?
-
O le a se mea e mafai ona e manatua pe faia pe a e feagai ma faafitauli i le usiusitai po o le tumau e oo i le iuga?
-
E mafai faapefea ona e faalagolago i le mana o le Faaola a o e taumafai e tausi Ana poloaiga ma tumau e oo i le iuga?
E mafai ona e faaiu i le fautuaina o tamaiti aoga e faaauau pea ona taumafai e tausi poloaiga a le Faaola, talitonu i Lana folafolaga o le ola e faavavau.