Lesona 26: Mataupu Faavae ma Feagaiga 12–17; Iosefa Samita—Talafaasolopito 1:66–75

Mataupu Faavae ma Feagaiga 17

O Molimau e Toatolu

Na folafola mai e Iosefa Samita o isi e toatolu o le a avea ma molimau o papatusi auro. O Oliva Kaotui, Tavita Uitimera, ma Matini Harisi na valaauina e le Atua e avea ma nei molimau. E ala i lo latou faatuatua, na asia ai i latou e le agelu o Moronae ma faalogo i le siufofoga o le Faaola o tautino mai o mea sa latou vaai i ai e moni. O lenei lesona e mafai ona fesoasoani i tamaiti aoga e faamalosia ai a latou lava molimau o le Tusi a Mamona a o latou suesue i mau a Molimau e Toatolu.

Sauniuniga a le tamaititi aoga E mafai ona e valaaulia tamaiti aoga e saili ChurchofJesusChrist.org, ma vaavaai mo faamatalaga e uiga i Molimau e Toatolu o le Tusi a Mamona, ma ia o mai saunia e faasoa mai mea na latou maua.

Gaoioiga E Ono Mafai Ona Aoao Ai

Molimau

Ina ia folasia atu le matafaioi a molimau, e mafai ona e valaaulia ni tamaiti aoga se toatolu e avea ma molimau. O se tasi o auala e faia ai lenei mea o le nanaina lea o se aitema i totonu o se taga ma valaaulia se tamaitiiti aoga se toatasi e tilotilo i ai ma faamatala le aitema. Fesili i le vasega pe latou te talitonu i tamaiti aoga. Valaaulia isi tamaiti aoga e avea ma molimau lona lua ma le lona tolu. Talanoaina pe aisea e fesoasoani ai le i ai o ni molimau se toatele.

E i ai se matafaioi taua a molimau i le fuafuaga o le faaolataga a le Tama Faalelagi. Faitau le Mataupu Faavae ma Feagaiga 6:28, ma vaavaai mo mea na aoao mai e le Alii e uiga i molimau (tagai foi 2 Korinito 13:1).

• O a nisi o faataitaiga o molimau i le Ekalesia?

• Aisea e te manatu ai ua saunia e le Faaola ni molimau se tele o Lana galuega?

O Molimau e Toatolu

Na iloa e Iosefa Samita e ala i le Tusi a Mamona ma faaaliga o le a faatagaina e le Alii isi tagata e vaai i papatusi auro. Sa ia iloa o le a vaai molimau e toatolu ia i latou e ala i le mana o le Atua (tagai i le 2 Nifae 27:12–13; Eteru 5:2–4; Mataupu Faavae ma Feagaiga 5:11–15). O Oliva Kaotui, Tavita Uitimera, ma Matini Harisi sa i ai se manaoga musuia ia i latou taitoatasi e avea ma se tasi o molimau. Sa tofu i latou ma se matafaioi taua i le oo mai o le Tusi a Mamona.

E mafai ona e faaali atu ata o Molimau e Toatolu pe tusi o latou igoa i luga o le laupapa. E mafai e se tamaitiiti aoga ona faitau ia tali, ma e mafai e le vasega ona fai atu le molimau faafetaui. Pe e mafai foi ona e tuuina atu i tamaiti aoga le suega puupuu. O tali sao o le 1. E, 2. I 3. A.

Faafetaui molimau taitasi e Toatolu ma faamatalaga sao mai o latou olaga.

1. Oliva Kaotui

2. Tavita Uitimera

3. Matini Harisi

1. Tuuina atu tupe mo le lolomiina o le Tusi a Mamona

2. Sa avea o se tusiupu autu a Iosefa mo le tele o le faaliliuga o le Tusi a Mamona

3. Sa valaaulia Iosefa Samita e faamaea le faaliliuga o le Tusi a Mamona i le fale o lona aiga

Faitau le Mataupu Faavae ma Feagaiga 17:1–2, ma vaavaai mo le mea na ta’u e le Alii i Molimau e Toatolu o le a latou vaai i ai.

• O le a se mea e te iloa e uiga i se tasi o nei mea?

• O le a le mea na manaomia e le Alii mai nei alii e vaai ai i nei mea?

Faitau le Mataupu Faavae ma Feagaiga 17:3–9, ma vaavaai mo le tiutetauave o le a i ai i Molimau e Toatolu pe a uma ona vaai i papatusi.

O a tiutetauave tatou te maua pe a tuuina mai e le Alii ia i tatou molimau o upumoni paia?

Fesoasoani i tamaiti aoga e faailoa le mataupu faavae: A uma ona faamanuiaina i tatou e le Alii i se molimau o le upumoni, ua ia i tatou se matafaioi e molimau atu e uiga i ai.

Atonu e te manao e valaaulia tamaiti aoga e faailoga i le fuaiupu 6 pe faapefea ona avea le Faaola ma se faataitaiga o lenei upumoni.

Aisea e te manatu ai e taua le tuuina mai e le Faaola o Lana molimau i le Tusi a Mamona?

“O Le Mau a Molimau e Toatolu”

Faitau le “O Le Mau a Molimau e Toatolu,” o loo maua i itulau tomua o le Tusi a Mamona, ma vaavaai mo mea na latou tuuina mai ai molimau e uiga i ai.

• O le a se mea e te lagona e taua i la latou molimau?

Ina ia vaai i se ata o le aafiaga o Molimau e Toatolu, e mafai ona e faaali atu le vitio “A Day for the Eternities” (23:09; matamata mai le faailotaimi 15:01 i le 17:55), o loo maua i le ChurchofJesusChrist.org.

A o faitau e tamaiti aoga “O Le Mau a Molimau e Toatolu,” e mafai ona e valaaulia i latou e tusi i luga o le laupapa upu po o fasifuaitau o loo tautino mai ai le moni o le Tusi a Mamona. Talanoa mea ua tusia e tamaiti aoga i luga o le laupapa. Atonu e fesoasoani le ta’u atu faapea o Molimau e Toatolu sa tele ni faataitaiga faaleagaga na i ai. I le faaopopo atu i le molimau a Iosefa Samita, sa latou vaai i le agelu o Moronae ma faalogo i le siufofoga o le Faaola o tautino atu ia i latou e moni le galuega.

• O le a se mea e mafai ona tatou aoao mai Molimau e Toatolu e uiga i le mauaina o a tatou lava molimau e moni le Tusi a Mamona?

Na molimau mai Peresitene Henry B Eyring o le Au Peresitene Sili i le mana o le latou molimau. Faitau le faamatalaga lenei pe matamata le vitio “An Enduring Testimony of the Mission of the Mission of the Prophet Joseph” (17:32; matamata mai le faailotaimi 4:18 i le 5:43).

O i latou e te alofa i ai e mafai ona sili atu ni faamaoniga faaletino i na molimau e ala i mea na latou vaaia ma faalogoina. O na Molimau e Toatolu sa ia i i latou se mea sili atu, o se mea tatou te manaomia uma. Na molimau atu le Agaga Paia i o latou mafaufau ma loto faapea o mea na latou vaai ma faalogo i ai e moni ia. Na ta’u atu e le Agaga ia i latou o le agelu e mai le Atua ma o le siufofoga, o le siufofoga o le Alii o Iesu Keriso. O lena molimau o le Agaga na tuuina atu ia i latou ma le toatele o e sa lei i ai iina. O se molimau e mafai, pe afai tatou te agavaa mo le mafutaga a le Agaga Paia, ona avea ma a tatou ma tumau ma i tatou e faavavau.

E lei teenaina lava e molimau e toatolu la latou mau e uiga i le Tusi a Mamona. Latou te lei mafaia aua sa latou iloa e moni. Sa latou faia ni osigataulaga ma feagai ma faigata e sili atu nai lo mea ua iloa e le toatele o tagata. Na tuuina atu foi e Oliva Kaotui lena lava molimau i le paia o le pogai o le Tusi a Mamona a o taoto o ia ua tali oti. Ae i taimi o faigata, sa maluelue ai lo latou faatuatua e uiga ia Iosefa o le perofeta lava a le Atua ma e na o le pau le ala e o mai ai i le Faaola, o Lana Ekalesia toefuataiina lea. Sa latou faaauau pea ona faamautuina le mea na latou vaai ma faalogo i ai i lena aafiaga ofoofogia, i le gasologa o vaitaimi uumi o le o ese mai le Ekalesia ma Iosefa, sa faateteleina ai le malolosi o a latou molimau. (Henry B. Eyring, “O Se Molimau Malosi i le Misiona a le Perofeta o Iosefa,” Liahona, Nov. 2003, 90)

• E faapefea e le “Mau a Molimau e Toatolu” ona aafia ai lau lava molimau o le Tusi a Mamona? ia Iesu Keriso?

• O a nisi o auala e mafai ona tatou faasoa atu ai la tatou molimau i le Faaola ma le Tusi a Mamona?

Mafaufau e valaaulia tamaiti aoga e faasoa mai a latou molimau i le Faaola ma le Tusi a Mamona. O se tasi o auala o le valaaulia lea o tamaiti aoga e tusi i lalo mea latou te fai mai ai pe afai na lolomiina a latou lava molimau ia Iesu Keriso ma le Tusi a Mamona mo le lalolagi. E mafai ona e fautuaina tamaiti aoga e faasoa mai a latou molimau i le vasega po o se isi tagata. E mafai foi ona faasoa atu lau molimau.

Punaoa Faaopoopo

O fea e mafai ona ou aoao atili ai e uiga i le Molimau e Toatolu?

• Autu Talafaasolopito o le Ekalesia, “Molimau o le Tusi a Mamona,” ChurchofJesusChrist.org/study/history/topics

• Au Paia: O Le Tala o le Ekalesia a Iesu Keriso i Aso e Gata Aivol. 1, O Le Tagavai o le Upumoni, 1815–1846 [2018], 73–75

• Larry E. Morris, “The Experience of the Three Witnesses,” i le Revelations in Context (2016), 25–28

• “Faatoaga a Uitimera: O Se Nofoaga o Vavega” (vitio; maimoa mai i le faailotaimi 9:20 i le 11:45), ChurchofJesusChrist.org

Aisea e taua tele ai le mau a Molimau e Toatolu?

Sa aoao mai Peresitene Dallin H. Oaks o le Au Peresitene Sili:

Na tofu maua taitoatasi e le toatolu se mafuaaga ma se avanoa tele e tauseseina ai lana molimau pe ana faapea e sese, pe faalualuagia ia faamatalaga pe a na i ai se mea e le sa’o. E pei ona lausilafia, ona o feeseeseaiga po o le lotovale na aofia ai isi taitai o le Ekalesia, o nei molimau uma e Toatolu na tapeina o latou igoa mai Le Ekalesia a Iesu Keriso o le Au Paia o Aso e Gata Ai e tusa lea o le valu tausaga talu ona faasalalauina la latou molimau. Na taitasi le tagata o le toatolu lenei ma alu i lona lava ala, ma le leai o se manatu e tasi e lagolago se taumafaiga taupulepule e faaleaga. Ae i le iuga o o latou soifua—o vaitau mai le 12 i le 50 tausaga ina ua mavae le aveese o o latou igoa mai le ekalesia—e leai se tasi o nei molimau na laa ese mai lana molimau na faasalalauina, pe fai atu se mea e faapuaoa ai lona moni.

E le gata i lea, ua tu atu la latou molimau e aunoa ma se ila e ala mai i nisi molimau. E mafai e se tasi ona faafitia lena molimau, ae mafai faapefea e se tasi ona faamatala mai nei alii e toatolu amiolelei ua aufaatasi e tumau i lenei molimau ua faasalalauina e oo i le iuga o o latou ola i le feagai ai ma amusiaga e tele ma isi mea faigata na oo ia te i latou? E pei o le Tusi a Mamona lava ia, e leai se isi faamalamalamaga e sili atu nai lo lea ua tuuina atu i le molimau lava ia, o le faamatalaga paia a nei tagata lelei ma le faamaoni o e sa tautino atu le mea na latou vaai i ai. (Dallin H. Oaks, “The Witness: Martin Harris,” Ensign, Me 1999, 36)

O le a le molimau na tuuina atu e Molimau e Toatolu i le faaiuga o ō latou olaga?

Na molimau mai Oliva Kaotui (1806–1850):

O a’u o se toeaina o le a oti, ma o le a se aoga ia te a’u o le ta’u atu o se pepelo ia te oe? Ou te iloa … o lenei Tusi a Mamona sa faaliliuina e ala i le meaalofa ma le mana o le Atua. Sa vaai i ai o’u mata, na faalogo i ai o’u taliga, ma sa ootia ai lo’u malamalamaaga, ma ou te iloa o mea sa ou molimau i ai e moni. Sa le o se miti, sa le o ni mafaufauga faivalea o le mafaufau—sa moni lava. (Jacob F. Gates, “Testimony of Jacob Gates,” Improvement Era, Mar. 1912, 418–19)

Na molimau mai Tavita Uitimera (1805–1888):

I le afiafi o le Aso Sa, i le 5:30 (22 Ian., 1888), Sa valaau atu le Susuga a Uitimera i lona aiga ma nisi o ana uo i tafatafa o lona moega. … Ona ia saunoa atu lea ia i latou uma na siomia autafa o lona moega i upu nei: “Ia e tatau ia te outou uma ona faamaoni ia Keriso. Ou te fia fai atu ia te outou uma, o le Tusi Paia ma le talafaamaumau a sa Nifae (o le Tusi a Mamona) ua moni, ma ua mafai ona outou faapea atu na outou faalogo o o’u tuuina atu la’u molimau i luga o lo’u moega ina ua lata ona ou oti. Ia faamaoni outou uma ia Keriso, ma o lo outou taui o le a tusa lea ma a outou galuega. Ia faamanuia le Atua ia te outou uma. O lo’u faatuatua o ia Keriso e faavavau, o lalolagi e lēai ni mutaaga. Amene.” (Richmond Democrat,, 2 Fep., 1888, sii mai i le Andrew Jenson,Latter-day Saint Biographical Encyclopedia, 4 vols. [1901], 1:270)

Na molimau mai Matini Harisi (1783–1875):

Ioe, na ou vaai i papatusi lea na tusia ai le Tusi a Mamona; na ou vaai i le agelu; sa ou faalogo i le siufofoga o le Atua; ma ua ou iloa o Iosefa Samita o se Perofeta a le Atua, ua umiaina ki o le Perisitua Paia. The Last Testimony of Martin Harris,” na faamaumauina e William H. Homer i se faamatalaga na tauto ai i luma o J. W. Robinson, 9 Ape., 1927, sii mai i le Francis W. Kirkham, A New Witness for Christ in America, 2 vols. [1960], 1:254)

Mataupu Faavae ma Feagaiga 17:4. Na faapefea ona faamanuiaina Iosefa Samita i le mau a Molimau e Toatolu?

O le taimi lava na uma ai ona maua e Molimau e Toatolu la latou aafiaga ma le agelu, sa toe foi atu Iosefa Samita i le fale o Uitimera ma alaga atu i ona matua: “Tama, tina; lua te le iloa [lo’u] fiafia tele; ua faatagaina nei e le Alii ona faaali atu papatusi i isi tagata e toatolu e ese mai ia te a’u lava—ua latou vaai i se agelu, o le na molimau atu ia i latou; ma o le a latou molimau atu i le moni o mea na ou fai atu ai; aua o lea ua latou iloa mo i latou lava, ou te le fealuai solo e faavalea tagata. Ma ua ou lagonaina e pei ua faamatuuina mai a’u i se avega, lea sa toetoe ina a mamafa [tele] ona ou tauavea; ma ua olioli ai lo’u loto, ua le o toe tuua na o a’u nei i le lalolagi” Lusi Maki Samita, Talafaasolopito, 1845,” 154, josephsmithpapers.org)

Gaoioiga Faaopoopo e Aoao Ai

“O Le Mau a Molimau e Toavalu”

Ina ia fesoasoani i tamaiti aoga e suesue le “O Le Mau a Molimau e Toavalu,” e mafai ona e faitauina a latou molimau i itulau tomua o le Tusi a Mamona. E mafai foi ona e faitauina le 2 Nifae 27:13. O le vitio “A Day for the Eternities“ mai le faailotaimi 18:17 i le 18:38 o loo faaalia ai lo latou aafiaga. E mafai ona outou talanoaina le taua o a latou molimau ma le ala na ese ai o latou aafiaga mai Molimau e Toatolu.

O Maria Uitimera o se molimau o papatusi auro

Mafaufau e faasoa atu le aafiaga a Maria Uitimera:

Ina ua siitia atu Iosefa, Ema, ma Oliva i le fale o Uitimera, sa faateleina ai le avega a Maria Uitimera. Sa ia tausia manaoga o lona toalua ma lana fanau e toavalu o e sa nonofo i le fale pe lata ane. E ui e lei faitio Maria e uiga i le galuega faaopoopo, ae sa amata ona vaivai o ia.

“I se tasi aso, a o i ai o ia i fafo o le fale o manu lea e tatau ai susu o povi, sa ia vaaia ai se tamaloa lauulu sinasina ma se taga sa tautau i lona tauau. O lona tu faafuasei mai na fefe ai o ia, ae a o ia latalata mai, sa ia saunoa atu ia te ia i se leo agalelei lea na ia maua ai le toafimalie.

“‘O lo’u igoa o Moronae,’ o lana tala lea. ‘Ua e matua lelava lava i galuega faaopoopo uma e tatau ona e faia.’ Sa ia sii ese le taga mai lona tauau, ma sa tilotilo atu Maria a o amata ona ia tatalaina.

“‘Sa e matua faamaoni lava ma filiga i au galuega,’ sa ia faaauau ai. ‘O lea, e tatau ai ona e maua se molimau ina ia mafai ona faamalosia lou faatuatua.‘

“Sa tatala e Moronae lana taga ma aveese papatusi auro. Sa ia uuina papatusi auro i luma o Maria Uitimera ma susue ona itulau ina ia mafai ona ia vaai i tusitusiga na i ai i luga. Ina ua uma ona ia susue i le itulau mulimuli, sa ia uunaia Maria ia onosai ma faatuatua a o ia tauaveina avega faaopoopo mo sina isi taimi itiiti lava. Sa ia folafola atu o le a ia manuia mo lena mea.

“Sa mou atu le toeaina i se taimi mulimuli ane, ma tuua ai na o Maria. Sa i ai ana galuega fia fai, ae ua le toe faalavelave ia te ia” (Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 [2018], 70–71).

E mafai foi ona e faaalia le vitio “Mary Whitmer Sees the Gold Plates” (2:26) po o le “Faatoaga a Uitimera: O Se Nofoaga o Vavega” (15:42; maimoa mai le faailotaimi 5:06 i le 6:09).

O a tatou molimau o le Tusi a Mamona

E mafai foi ona outou talanoaina pe mafai faapefea ona tatou maua se molimau o le Tusi a Mamona. Mafaufau e faasoa atu le vitio “Book of Mormon Testimonies” (3:46) ma valaaulia tamaiti aoga naunautai e faasoa mai se molimau o le Tusi a Mamona po o fuaitau o mau mai le tusi e taua ia i latou.