Mataupu Faavae ma Feagaiga 12–17; Iosefa Samita—Talafaasolopito 1:66–75

Mataupu Faavae ma Feagaiga 12–17; Iosefa Samita—Talafaasolopito 1:66–75

Vaaiga Aoao

A o faaliliuina le Tusi a Mamona, sa i ai fesili a Iosefa Samita ma Oliva Kaotui e uiga i le papatisoga mo le faamagaloina o agasala. Sa la fesili atu i le Alii. O le tali i le la fesili, na faaali mai ai Ioane le Papatiso ma tuuina atu i o laua luga le Perisitua Arona. O le toefuataiga o le perisitua na faaauau i vaiaso mulimuli ane ina ua toefuatai mai e Peteru, Iakopo, ma Ioane le Perisitua Mekisateko. A o faaiuina le faaliliuga o le Tusi a Mamona, e toatolu tagata na filifilia e vaai i papatusi auro. Na vaai Oliva Kaotui, Tavita Uitimera, ma Matini Harisi i le agelu o Moronae ma papatusi auro i se faaaliga. Sa latou faalogoina foi le siufofoga o le Alii o tautino mai e moni le Tusi a Mamona.

Fesoasoani i tamaiti aoga e taulai atu ia Iesu Keriso: A e fesoasoani i tamaiti aoga e faatotonugalemu lo latou aoaoina o le talalelei ia Iesu Keriso, e mafai e le Agaga Paia ona faamalosia lo latou malamalama ma le talisapaia o le Faaola. Fai fesili o le a fesoasoani i tamaiti aoga e vaavaai ai mo faamaoniga o Lona mana, alofa mutimutivale, ma le misiona togiola. Valaaulia tamaiti aoga e tusifaamaumau pe faasoa mai o latou lagona mo Ia. Mo nisi faamatalaga i le ala na faia ai e le Faaola lenei mea, tagai i le vaega “Fesoasoani i tagata aoao ia iloa le alofa, mana, ma le alofa mutimutivale o le Alii i o latou olaga” i le Aoao Atu i le Ala a le Faaola. E mafai foi ona e vaai i se faataitaiga o le auala e faia ai lenei mea i le lesona i lenei vaiaso ua faaulutalaina “Mataupu Faavae ma Feagaiga 14.”

Saunia e aoao atu

O lenei faamatalaga e tuuina atu ai ia te oe ni manatu o mea atonu e manaomia ona muai saunia mo lesona taitasi.

Iosefa Samita—Talafaasolopito 1:68–75; Mataupu Faavae ma Feagaiga 13

Faamoemoega o le lesona: Ina ia fesoasoani i tamaiti aoga ia lagonaina le taua o le toefuataiga o le pule o le perisitua a le Faaola

• Sauniuniga a le tamaititi aoga: Valaaulia tamaiti aoga e o mai saunia i le vasega e faasoa mai ni faamatalaga po o ni a latou fesili e uiga i le toefuataiga o le perisitua. E mafai ona latou saunia e ala i le faitauina o le anotusi mo le atapu’e 5 o le talafaasolopito o le Ekalesia, “Vaitafe o Susikuana,” o loo maua i le faaiuga o le fusitolu po o le vaega “Fesoasoani mo Suesuega” o le Gospel Library.

• Vitio: “’Oa Faaleagaga” (18:07; matamata mai le faailotaimi 3:00 seia oo i le 3:51)

Mataupu Faavae ma Feagaiga 14

Faamoemoega o le lesona: Ina ia fesoasoani i tamaiti aoga ia usiusitai ma tumau e oo i le iuga i le mana gafatia o le Faaola

• Sauniuniga a le tamaititi aoga: E mafai ona e valaaulia tamaiti aoga e vaavaai mo se mataupu faavae e mafai ona latou faaaogaina mai a latou suesuega patino o tusitusiga paia. Atonu e mananao tamaiti aoga e faaaoga nisi o punaoa mo suesuega i le Sau, Mulimuli Mai ia te A’u.

• Vitio: “O a Taeao e Faia ai e le Alii Vavega i o Outou Luma” (19:18; matamata mai le faailotaimi 15:08 i le 16:21)

Mataupu Faavae ma Feagaiga 17

Faamoemoega o le lesona: Ina ia fesoasoani i tamaiti aoga e faamalosia a latou lava molimau o le Tusi a Mamona a o latou suesue i molimau a Molimau e Toatolu

• Sauniuniga a le tamaititi aoga: E mafai ona e valaaulia tamaiti aoga e su’e le ChurchofJesusChrist.org mo faamatalaga e uiga i Molimau e Toatolu o le Tusi a Mamona ma ia o mai sauni e faasoa mai mea na latou maua.

• Anomea: O se taga ma se aitema (e tatau ona mafai e le taga ona nana se aitema o le a vaai ma faamatala e nisi tamaiti aoga i le vasega)

• Vitio: “O Se Aso mo le Faavavau” (23:09; matamata mai le faailotaimi 15:01 i le 17:55); “O Se Molimau Tumau i le Misiona a le Perofeta o Iosefa” (17:32; vaavaai mai le faailotaimi 4:18 i le 5:43)