Leksiyon 28: Doktrina ug mga Pakigsaad 18

Doktrina ug mga Pakigsaad 18:11–16

“Unsa ka Dako ang Imong Hingpit nga Kalipay”

Samtang ang Ginoo nagpadayon sa pagpadayag sa Iyang kabubut-on kalabot sa Iyang Simbahan, namulong Siya ngadto nila ni Joseph Smith, Oliver Cowdery, ug David Whitmer mahitungod sa hingpit nga kalipay nga moabot gikan sa pagpakigbahin sa Iyang ebanghelyo. Kini nga leksiyon makatabang nga madugangan ang tinguha sa mga estudyante sa pagpakigbahin sa ebanghelyo sa Manluluwas ngadto sa uban.

Posible nga mga Kalihokan sa Pagkat-on

Unsay makahatag og hingpit nga kalipay?

Ikonsiderar ang pagdapit sa mga estudyante nga magtinabangay nga magpares sa usa ngadto sa duha ka minuto nga maglista sa tanan nga ilang mahunahunaan nga makahatag nila og hingpit nga kalipay. Sa laing paagi, ibutang ang mga estudyante sa gagmay nga mga grupo ug hatagi ang matag grupo og nagkalainlaing kolor sa whiteboard marker. Sulod sa usa ngadto sa duha ka minuto, ang matag usa sa matag grupo mahimong magpulipuli sa pagsulat og usa ka butang diha sa pisara nga makahatag kanila og hingpit nga kalipay.

Pagdapit og pipila ka mga estudyante sa pagpakigbahin og usa ka butang nga ilang gisulat ug kon nganong naghatag kini kanila og hingpit nga kalipay.

Gusto sa Langitnong Amahan ug ni Jesukristo nga kita mobati og hingpit nga kalipay (tan-awa sa 2 Nephi 2:25). Diha sa Doktrina ug mga Pakigsaad 18, ang Manluluwas mipahayag kon unsay naghatag Kaniya og hingpit nga kalipay ug mipasabot kon sa unsang paagi kita makasinati usab niana nga matang sa hingpit nga kalipay.

Ikonsiderar ang pagdapit sa mga estudyante sa paghunahuna kon unsa ka dako ang hingpit nga kalipay nga ilang gibati karon diha sa ilang mga kinabuhi ug kon ngano kaha nga gusto nila nga mobati og dugang pa nga hingpit nga kalipay. Dasiga sila sa pagpangita og mga pagtulun-an samtang nagtuon sila karon mahitungod kon unsaon nila nga makasinati og mas dako nga hingpit nga kalipay diha sa ilang mga kinabuhi.

Ang hingpit nga kalipay ni Jesukristo

Dapita ang mga estudyante sa pagpamalandong kon unsa kaha ang isulti sa Manluluwas kon mangutana sila Kaniya kon unsay makahatag Kaniya og hingpit nga kalipay.

Basaha ang Doktrina ug mga Pakigsaad 18:11–13 ug pangitaa kon unsay makahatag sa Manluluwas og dakong hingpit nga kalipay.

Dapita ang mga estudyante sa pagpamalandong sa sunod nga duha ka pangutana sa dili pa motubag. Sa dili pa sila hangyoon sa pagpakigbahin, mahimo nimo silang dapiton sa pagsulat sa ilang mga tubag diha sa ilang mga journal sa pagtuon. Mahimong mapuslanon usab alang sa mga estudyante nga basahon ang Lucas 15:1–10 sa dili pa ka mangutana.

• Ngano sa imong hunahuna nga ang Manluluwas mobati og hilabihan ka hingpit nga kalipay kon kita maghinulsol?

• Sa unsang paagi nga ang pagkahibalo niini mahitungod sa Manluluwas makaimpluwensiya sa imong mga binuhatan ug mga tinguha?

Ang Doktrina ug mga Pakigsaad 18:15–16 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Basaha ang Doktrina ug mga Pakigsaad 18:14–16 ug markahi ang mga hugpong sa mga pulong nga nagpakita kon unsay gusto sa Manluluwas alang kanato.

• Unsa ang natabang niini nga mga bersikulo diha kanimo sa pagsabot mahitungod sa Manluluwas ug sa Iyang mga tinguha alang kanato?

Kon gikinahanglan, ipasabot nga ang usa ka kamatuoran nga atong makat-onan gikan niini nga mga bersikulo mao nga gusto ni Jesukristo nga atong bation ang hingpit nga kalipay nga moabot gikan sa pagdala sa uban ngadto Kaniya. Ikonsiderar ang pagsulat niini nga kamatuoran diha sa pisara.

Si Elder Marcus B. Nash sa Seventy namulong sa hingpit nga kalipay nga moabot gikan sa pagpakigbahin sa ebanghelyo:

Kon ang usa ka tawo makakat-on sa mahimayaon nga katuyoan sa kinabuhi, makasabot nga si Kristo mopasaylo ug motabang niadtong kinsa mosunod Kaniya, ug dayon mopili sa pagsunod ni Kristo ngadto sa mga tubig sa bunyag, ang kinabuhi mausab aron mahimong mas maayo—bisan kon ang nagpalibot nga mga sikumstansiya sa kinabuhi dili mausab.

Usa ka madasigong malipayon nga sister nga akong nahimamat sa Onitsha, Nigeria, misulti kanako nga sa dihang siya nakat-on sa ebanghelyo ug nagpabunyag (ug karon gamiton ko ang iyang mga pulong), “ang tanang butang maayo ra para nako. Malipayon ko. Ania ko sa langit.” Ang pagpakigbahin sa ebanghelyo mopukaw sa hingpit nga kalipay ug paglaom sa mga kalag sa tighatag ug sa tigdawat. Sa tinuod, “unsa ka dako ang imong hingpit nga kalipay” samtang ikaw mopakigbahin sa ebanghelyo! Ang pagpakigbahin sa ebanghelyo modugang og hingpit nga kalipay ngadto sa hingpit nga kalipay, paglaom ngadto sa paglaom. (Marcus B. Nash, “Ipakita Ninyo ang Inyong Kahayag,” Liahona, Nob. 2021, 72)

• Ngano sa imong hunahuna nga ang paggiya sa laing tawo ngadto ni Jesukristo makahatag og dakong hingpit nga kalipay sa usa ka tawo?

• Unsa nga mga kasinatian ang imong nasinati (o nahibaloan) diin imong nakita ang hingpit nga kalipay sa pagpakigbahin sa ebanghelyo ngadto sa uban?

Aron matabangan ang mga estudyante sa miaging pangutana, mahimo nimo silang dapiton sa pagpangita og mga ehemplo diha sa mga kasulatan. Mahimo nilang basahon ang mga pulong ni Ammon (diha sa Alma 26:1–16) ug ni Alma (diha sa Alma 29:9–17). Mahimo usab nimo ipakita ang “Inviting All to Come unto Christ: Sharing the Gospel” (4:30), anaa sa ChurchofJesusChrist.org.

Pagbuntog sa mga babag

Ipasabot nga samtang kini nga mga saad gikan sa Ginoo makatabang sa pagdasig kanato sa pagpakigbahin sa Iyang ebanghelyo, usahay adunay mga babag o mga kabalaka nga makapugong kanato sa pagpakigbahin. Dapita ang mga estudyante sa paghingalan og pipila ka mga babag ug sa paglista sa ilang mga tubag diha sa pisara. Dayon dapita ang mga estudyante sa pagkompleto sa mosunod nga kalihokan, maghanduraw nga nakaila sila og usa ka tawo (o naghunahuna og usa ka tawo nga ilang nailhan) kinsa nag-atubang og usa niadtong mga babag.

Isulat kon unsay mahimo nimo nga ipakigbahin sa tawo nga adunay mga kabalaka mahitungod sa pagpakigbahin sa ebanghelyo sa Manluluwas. Ikosiderar ang pag-apil sa mosunod:

1. Unsa ang imong nahibaloan mahitungod sa Manluluwas nga makadugang sa imong tinguha sa pagdala sa uban ngadto Kaniya (ug usa ka kasulatan nga nagpamatuod sa imong nahibaloan, kon mahimo)

2. Sa unsa nga paagi nga ang mas pagpaduol ngadto sa Manluluwas nakahatag kanimo og hingpit nga kalipay ug kon nganong gusto nimo nga ang uban makadawat sa samang mga panalangin

3. Mga kasinatian nimo o sa uban nga imong nahibaloan sa pagdala og mga kalag ngadto kang Kristo ug sa unsang paagi kana nga mga kasinatian nakahatag og kalipay

Human ang mga estudyante adunay igong panahon sa paghimo og tubag, hatagi sila og kahigayonan nga ipakigbahin ang ilang nasulat. Usa ka paagi sa pagbuhat niini mahimong ang pagdapit og usa o duha ka estudyante sa pag-drama-drama isip usa ka tawo nga adunay mga kabalaka mahitungod sa pagpakigbahin sa ebanghelyo. Ang ubang mga estudyante mahimong mopakigbahin og usa ka butang nga ilang gihunahuna nga makatabang.

Human niini nga diskusyon, hatagi ang mga estudyante sa mosunod nga pagdapit:

Paggahin og panahon sa pagpamalandong sa imong nakat-onan ug gibati niini nga leksiyon. Isulat kon unsay imong gibati mahitungod sa pagpakigbahin sa ebanghelyo ug sa pagsulay sa pagdala sa uban ngadto ni Jesukristo. Ikonsiderar ang paglakip sa bisan unsa nga imong nakat-onan, ilabi na mahitungod sa Manluluwas, nga gusto nimong hinumdoman.

Ikonsiderar ang pagtapos pinaagi sa pagdapit og usa o duha ka estudyante sa pagpakigbahin sa unsay ilang nakat-onan o gustong mahinumdoman. Pagpamatuod sa mga kamatuoran nga imong nahisgotan karon.

Isag-ulo

Mahimo nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan alang sa Doktrina ug mga Pakigsaad 18:15–16 mao ang “Unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsa ang hingpit nga kalipay?

Si Presidente Dallin H. Oaks sa Unang Kapangulohan mitudlo:

Ang hingpit nga kalipay labaw kay sa kalipay. Ang hingpit nga kalipay mao ang labing taas nga pagbati sa kaayohan. Naggikan kini sa pagkakompleto ug paghiuyon sa atong Magbubuhat ug sa iyang mahangtorong mga balaod. …

… Ang kaluoy sa Dios mao lamang ang tinubdan sa hingpit ug walay kataposan nga hingpit nga kalipay, nga nagpahiuli sa matag kapildihan, nagpauga sa matag luha, ug nagpapas sa matag kasakit. Ang walay kataposan nga hingpit nga kalipay labaw pa sa tanang pag-antos. Niini nga kinabuhi ug sa umaabot nga kinabuhi, kana nga hingpit nga kalipay moabot pinaagi sa Pagkabanhaw ug sa kapasayloan sa mga sala. (Dallin H. Oaks, “Joy and Mercy,” Ensign, Nob. 1991, 73–74)

Tan-awa usab ang Giya ngadto sa mga Kasulatan, “Hingpit nga Kalipay,” scriptures.ChurchofJesusChrist.org.

Unsaon nako sa pagdala sa uban ngadto kang Kristo?

Makatabang kita sa uban nga moduol ngadto kang Kristo pinaagi sa pagtabang kanila sa pagpakita og hugot nga pagtuo diha Kaniya ug sa Iyang Pag-ula, paghinulsol sa ilang mga sala, pagdawat sa bunyag ug sa gasa sa Espiritu Santo pinaagi sa awtorisado nga sulugoon sa Dios, ug sa paglahutay hangtod sa kataposan.

Ang bidyo nga “I’ll Go Where You Want Me to Go” (5:45) nagpakita sa daghang mga paagi sa pagdapit sa uban sa pagduol ngadto kang Kristo.

Unsa nga mga panalangin ang moabot samtang akong ipakigbahin ang ebanghelyo ni Jesukristo ngadto sa uban?

Si Elder Quentin L. Cook sa Korum sa Napulog Duha ka Apostoles mitudlo:

Ang mga panalangin sa pagpakigbahin sa ebanghelyo naglakip sa pagpalambo sa atong pagkakabig ngadto sa kabubut-on sa Dios ug pagtugot sa Dios nga mao ang mopatigbabaw sa atong mga kinabuhi. Kita mopanalangin sa uban aron makasinati og usa ka “dako nga kausaban” sa kasingkasing [Alma 5:14]. Anaa tinuod ang mahangtorong hingpit nga kalipay diha sa pagtabang sa pagdala sa mga kalag ngadto ni Kristo. (Quentin L. Cook, “Pagkakabig ngadto sa Kabubut-on sa Dios,” Liahona, Mayo 2022, 57)

Dugang nga mga Kalihokan sa Pagkat-on

Alternatibong pagsugod sa leksiyon

Dapita ang mga estudyante sa pagpakigbahin sa pipila sa mosunod nga magpares o sa gagmay nga mga grupo:

Unsa nga mga salida ang ilang irekomendar nga tan-awon ug ngano

Unsa nga mga pagkaon ang ilang irekomendar nga kan-on ug ngano

Unsa nga mga libro ang ilang irekomendar nga basahon ug ngano

Human sa pagpakigbahin sa mga estudyante sulod sa pipila ka minuto, dapita sila sa paghisgot kon nganong mirekomendar sila ug andam nga mopakigbahin niini nga mga butang. Ipasabot nga karong adlawa sila makakat-on mahitungod sa laing butang nga mahimong magmadasigon sila nga ipakigbahin ngadto sa uban.

Mga kapilian nga bidyo

Mahimong tan-awon sa mga estudyante ang “Good Things to Share” (2:21) o “Dali ug Tan-awa” gikan sa time code 4:29 hangtod sa 8:45 aron makita ang mga butang nga kanunay natong ipakigbahin ug kon nganong gusto natong ipakigbahin ang ebanghelyo ni Jesukristo. Mahimong makatabang usab ang pagtan-aw sa “Inviting Others to Come and See” (1:17) aron makakita og mga ehemplo kon unsaon sa pagpakigbahin sa ebanghelyo.

Usa ka kahigayonan sa paggamit

Ikonsiderar ang paggamit niini nga kalihokan sa kataposan sa leksiyon kon imong gibati nga makatabang sa mga estudyante ang paghimo og plano sa pagpakigbahin sa ebanghelyo.

Ipasabot nga sa paugnat sa kusog [sports], ang mga coach kasagaran maghimo og “estratehiya” aron ilatid [outline] ang ilang estratehiya aron makadaog sa dula.

Si Elder S. Gifford Nielsen sa Seventy, kinsa nagduwa kaniadto og propesyonal nga football sa Estados Unidos, mipakigbahin sa mosunod kon unsaon sa paghimo og estratehiya sa pagpakigbahin sa ebanghelyo ug sa pagdawat og hingpit nga kalipay.

Kon magdula ko og football, maghunahuna ko og mga estratehiya. Kami masaligong moapil sa lumba kon ang among team andam sa saktong mga plano, kami siguradong makadaog. …

Tungod kay kitang tanan naa sa team sa Ginoo, kita ba adunay atong kaugalingong estratehiya? Andam na ba tang mobuhat? Kon kita, isip mga miyembro, nahigugma gayod sa atong pamilya, mga higala, ug kaubanan, dili ba nato ipakigbahin ang atong pagpamatuod sa gipahiuli nga ebanghelyo ngadto kanila? …

Mopakigbahin ko ninyo og estratehiya nga akong gibati nga ipatuman … ? Dapiton ko kamo sa pagkonsiderar niining tulo ka punto samtang kamo naghunahuna sa inyong plano.

Una, mag-ampo sa piho aron makadala og usa ka tawo nga mas maduol sa Manluluwas ug sa Iyang ebanghelyo matag adlaw. …

Ikaduha, pag-ampo alang sa mga misyonaryo nga nagserbisyo sa inyong area ug sa ilang mga investigator matag adlaw. …

Ikatulo, imbitara ang usa ka higala ngadto sa kalihokan sa sulod o gawas sa inyong panimalay. Bisan asa kamo o unsay inyong gibuhat, hunahunaa kon si kinsa kaha ang malingaw sa okasyon ug dayon paminawa ang Espiritu samtang mogiya Siya kaninyo. (S. Gifford Nielsen, “Pagpadali sa Estratehiya sa Ginoo!,” Liahona, Nob. 2013, 33–34)

Ikonsiderar ang pagpangutana og sama sa mosunod:

• Unsa ang imong ganahan sa estratehiya nga gisugyot ni Elder Nielsen?

• Sa unsang paagi kini nga mga sugyot mahimong epektibo nga mga paagi sa pagdala sa uban ngadto sa Manluluwas?

• Unsa pa ang ubang mga ideya ang mahimo nimong ipatuman aron makatabang sa pagdala sa uban ngadto ni Jesukristo?

Dapita ang mga estudyante sa pagtinguha sa inspirasyon sa Ginoo samtang maghimo sila og ilang kaugalingong “estratehiya” sa pagpakigbahin sa ebanghelyo ngadto sa uban.