Leksiyon 29: Doktrina ug mga Pakigsaad 18

Doktrina ug mga Pakigsaad 18:21–47

“Pinaagi sa Inyong mga Kamot Ako Magbuhat og Kahibulongan nga Buhat”

Niadtong Hunyo 1829, ang Manluluwas mihatag kang Oliver Cowdery ug David Whitmer sa responsibilidad sa pagpangita og mga tawo nga modala sa Iyang ngalan diha kanila uban sa “hingpit nga katuyoan sa kasingkasing” (Doktrina ug mga Pakigsaad 18:27). Kining mga tawhana sa kaulahian tawgon isip unang mga miyembro sa Korum sa Napulog Duha ka Apostoles niini nga dispensasyon. Kini nga leksiyon makatabang sa mga estudyante nga makasabot kon sa unsang paagi ang Ginoo nagtabang ug nagpanalangin kanato pinaagi sa pagtawag sa Iyang Apostoles.

Posible nga mga Kalihokan sa Pagkat-on

Ang Napulog Duha ka Apostoles

Ang mosunod nga kalihokan makatabang sa pag-andam sa mga estudyante sa paghunahuna mahitungod sa tabang nga gihatag sa Ginoo kanila pinaagi sa apostoles ug mga propeta sa modernong panahon.

Isulat diha sa pisara ang mosunod nga mga trabaho: mga doktor, mga mekaniko, mga panday, mga trabahante sa puthaw, mga magtutudlo. Mahimo usab nimong hangyoon ang mga estudyante sa paghingalan sa ubang mga trabaho diin ang mga tawo talagsaon nga kwalipikado sa pagtabang kanato.

Paghunahuna og usa ka kahimtang sa dihang ikaw mapasalamaton alang sa usa niini nga mga tawo.

• Unsa nga tabang niini nga mga tawo ang talagsaon nga kwalipikadong ikahatag kanato?

• Sa unsang paagi sila mahimong kwalipikado?

Ikonsiderar ang pagpakita og kasamtangang hulagway sa ang Unang Kapangulohan ug sa Korum sa Napulog Duha ka Apostoles. Mahimo nimong dapiton ang mga estudyante sa pagpakigbahin sa daklit og bisan unsang impormasyon nga ilang nahibaloan bahin niini nga mga kalalakin-an, lakip ang ilang mga ngalan, mga detalye sa pamilya, o propesyonal nga mga background. Seguroha nga ang mga estudyante nakasabot nga ang Apostoles gitawag ni Jesukristo aron sa pagpamatuod Kaniya sa tibuok kalibotan (tan-awa sa Giya ngadto sa mga Kasulatan, “Apostol,” scriptures.ChurchofJesusChrist.org).

Ang Manluluwas naghigugma kanato ug nagtawag og Apostoles sa pagtabang kanato sa talagsaong mga paagi.

• Unsa nga tabang ang talagsaon nga kwalipikadong ikahatag kanato sa Apostoles sa Manluluwas?

• Unsa nga mga kwalipikasyon sa imong hunahuna ang gigamit sa Ginoo sa pagpili sa Iyang Apostoles?

Ipasabot nga karon ang mga estudyante makat-on og dugang mahitungod sa apostoles ug mga propeta nga gitawag sa Manluluwas sa paggiya kanato. Ikonsiderar ang pagdapit sa mga estudyante sa paghunahuna kon sa unsang paagi naapektohan ang ilang mga kinabuhi sa pagbaton og apostoles ug mga propeta dinhi sa yuta karon. Dasiga sila sa pagpangita og mga pagtulun-an nga makatabang kanila nga mas makasabot kon sa unsang paagi mapanalanginan ang ilang mga kinabuhi pinaagi sa mga propeta ug apostoles sa ulahing mga adlaw.

Pagdala ngari sa atong kaugalingon sa ngalan ni Kristo

Diha sa Doktrina ug mga Pakigsaad 18, ang Ginoo misugo nila ni David Whitmer ug ni Oliver Cowdery sa pagpangita og mga kalalakin-an kinsa sa umaabot nga adlaw pagatawgon sa pag-alagad diha sa Korum sa Napulog Duha ka Apostoles (tan-awa sa Doktrina ug mga Pakigsaad 18:37–38).

Basaha ang Doktrina ug mga Pakigsaad 18:21–25, mangita sa tambag sa Manluluwas ngadto ni David ug ni Oliver.

• Ngano kaha sa imong hunahuna nga gusto sa Ginoo nga masabtan nila ni David ug ni Oliver ang imong nabasa dinhi niini nga mga bersikulo?

Dapita ang mga estudyante sa pagpakigbahin kon unsa sa ilang hunahuna ang gipasabot sa pagdala diha sa ilang mga kaugalingon sa ngalan ni Kristo. Mahimong makatabang ang paghisgot nga pinaagi sa bunyag ug sa sakramento atong gipakita nga kita andam nga modala ngari kanato sa ngalan sa Manluluwas. Ang mosunod nga pamahayag mahimo usab nga mapuslanon:

Si Elder Paul B. Pieper sa Seventy mipasabot kon unsay buot ipasabot sa pagdala ngari sa atong kaugalingon sa ngalan ni Jesukristo:

Pinaagi sa pagdala sa atong kaugalingon sa ngalan ni Kristo, mopasalig kita sa pagdala sa Iyang mga pagtulun-an, sa Iyang mga kinaiya, ug sa kataposan sa Iyang gugma, nga bug-os ngadto sa atong pagka-nilalang aron nga kini mahimong kabahin kon si kinsa kita. (Paul B. Pieper, “Tanan Kinahanglan Gayod Modala diha Kanila sa Ngalan nga Gihatag sa Amahan,” Liahona, Nob. 2018, 44)

Mga kwalipikasyon ug mga responsibilidad sa Apostoles

Ang Ginoo mitudlo usab kang David ug Oliver mahitungod sa gikinahanglan nga mga kwalipikasyon alang niadtong kinsa pagatawgon isip Apostoles.

Basaha ang Doktrina ug mga Pakigsaad 18:26–27, mangita sa kwalipikasyon dinhi niini nga mga bersikulo. Timan-i nga ang pulong nga mga tinun-an diha sa bersikulo 27 usa ka paghisgot niadtong kinsa pagatawgon isip Apostoles.

• Unsa nga kwalipikasyon ang gitinguha sa Manluluwas nga maangkon sa Iyang Apostoles?

• Ngano kaha nga ang Manluluwas gusto man niini nga kwalipikasyon alang niadtong kinsa nag-alagad isip Iyang Apostoles?

• Sa unsang paagi nga ang pagkahibalo niini mahitungod sa Apostoles sa Manluluwas makatabang kanimo?

Ipasabot nga ang Manluluwas naglatid og dugang apostolikanhong mga responsibilidad diha sa Doktrina ug mga Pakigsaad 18 ug sa uban pang dapit sa Doktrina ug mga Pakigsaad. Ikonsiderar ang pagdrowing sa mosunod nga tsart diha sa pisara ug dapita ang mga estudyante sa pagkopya niini ngadto sa ilang mga journal sa pagtuon. Mahimo nimong idugang ang nakat-onan na sa mga estudyante gikan sa mga bersikulo 26–27. Mahimo dayon nga basahon sa mga estudyante ang gihatag nga mga bersikulo nga magtinagsa o diha sa gagmay nga mga grupo ug tubagon ang tsart diha sa ilang journal sa pagtuon. Dayon ang matag grupo makadugang og usa o duha sa ilang mga tubag ngadto sa lista diha sa pisara.

Gamita ang Doktrina ug mga Pakigsaad 18:26–36 ug 107:23 sa pagtubag sa mosunod nga tsart:

Unsa nga mga kalidad ang gusto sa Ginoo sa Napulog Duha ka Apostoles?	Unsa ang gusto sa Ginoo nga buhaton sa Apostoles aron makatabang sa pagdala sa uban ngadto Kaniya?

Dapita ang pipila ka estudyante sa paglingin diha sa pisara og usa ka butang mahitungod sa Apostoles nga sa ilang hunahuna importante o makahuluganon. Ipakigbahin nila kon ngano. Mahimo usab nimong hisgotan ang mosunod nga mga pangutana:

• Unsa ang imong nakat-onan gikan niini nga mga bersikulo kon sa unsang paagi ang Ginoo makatabang kanimo ug sa uban pinaagi sa Iyang Apostoles?

• Unsaon nimo sa pagpamubo sa unsay imong nakat-onan mahitungod sa Apostoles gikan niini nga mga bersikulo?

  Tabangi ang mga estudyante sa pagpamubo sa mosunod nga kamatuoran diha sa pisara: ang Apostoles sa Manluluwas nagtabang kanato sa pagduol ngadto Kaniya ug sa pagkat-on sa Iyang mga pulong.

• Sa unsang paagi nimo nakita ang Apostoles sa Manluluwas nga nagtabang kanimo ug sa uban sa pagduol ngadto Kaniya karon?

Mga ehemplo ug mga pagtulun-an gikan sa Apostoles sa modernong panahon

Hatagi ang mga estudyante og panahon nga makakita og mga ehemplo sa Apostoles sa modernong panahon nga nakakab-ot sa mga kwalipikasyon ug nagtuman sa mga responsibilidad nga gilatid sa Ginoo diha sa Doktrina ug mga Pakigsaad 18. Ang mosunod nga kalihokan makatabang niini.

Paggahin og panahon sa pagtuon sa mga pagtulun-an sa usa o sa subra pa sa usa sa kasamtangang Apostoles. Mahimo nimong tun-an ang bag-o nga mga pakigpulong sa kinatibuk-ang komperensiya, mga artikulo sa magasin sa Simbahan, o mga post sa social media. Samtang magtuon ka, pangitaa kon giunsa pagtuman sa Apostoles ang ilang tahas sa pagtabang kanato nga moduol kang Kristo. Mahimo gani ka nga mangita og mensahe gikan sa usa ka Apostol nga nagtubag sa piho nga panginahanglan o pangutana nga aduna ka.

Human ang mga estudyante adunay igong panahon sa pagtuon, tugoti sila sa pagpakigbahin sa unsay ilang nakat-onan ngadto sa klase o diha sa gagmay nga mga grupo.

Dugang nga mga Kapanguhaan

Kinsa ang napili nga maapil sa Korum sa Napulog Duha ka Apostoles?

Ang Korum sa Napulog Duha ka Apostoles naporma niadtong Pebrero 1835, dul-an sa unom ka tuig human nadawat ang pagpadayag nga narekord sa Doktrina ug mga Pakigsaad 18. Ang Tulo ka mga Saksi sa Basahon ni Mormon, sila si Oliver Cowdery, David Whitmer, ug Martin Harris, “tataw nga nakigkonsulta ni Joseph Smith,” mipili niini nga mga lalakin-an (tan-awa sa Mga Hisgotanan sa Kasaysayan sa Simbahan, “Korum sa Napulog Duha,” ChurchofJesusChrist.org/study/history/topics). Sila si Lyman Johnson, Brigham Young, Heber C. Kimball, Orson Hyde, David W. Patten, Luke Johnson, William E. McLellin, John F. Boynton, Orson Pratt, William Smith, Thomas B. Marsh, ug Parley P. Pratt.

Asa ako makakat-on og dugang pa mahitungod sa Apostoles sa Ang Simbahan ni Jesukristo sa mga Santos sa Ulahing mga Adlaw?

Sa dili madugay human paluyohan ang bag-ong miyembro sa Unang Kapangulohan o sa Korum sa Napulog Duha ka Apostoles, usa ka biograpiya ang imantala sa mga magasin sa Simbahan. Labing bag-o lang, kini nga mga artikulo gisulat sa kaubang mga miyembro sa Korum sa Napulog Duha ka Apostoles. Kini nga mga artikulo adunay mas daghang mga detalye ug mga istorya kaysa sa mga biograpiya nga makita sa prophets.ChurchofJesusChrist.org. Kon ang bag-ong Apostoles gitawag sukad sa pagmantala niini nga manwal, mahimo kang makakita og artikulo mahitungod kanila diha sa Liahona nga magasin gikan sa pipila ka bulan human sila gipaluyohan diha sa kinatibuk-ang komperensiya.

“Si Presidente Russell M. Nelson: Gigiyahan, Giandam, Mipasalig” (ChurchofJesusChrist.org)

“Presidente Dallin H. Oaks: Pagsunod sa mga Paagi sa Ginoo” (ChurchofJesusChrist.org)

“Presidente Henry B. Eyring: Talagsaon nga Salabotan, Sama sa Bata nga Pagkamapainubsanon” (ChurchofJesusChrist.org)

“Elder Quentin L. Cook: Andam nga Kasingkasing ug Hunahuna” (ChurchofJesusChrist.org)

“Elder D. Todd Christofferson: Giandam Aron Makaalagad sa Ginoo” (ChurchofJesusChrist.org)

“Elder Neil L. Andersen: Tawo sa Hugot nga Pagtuo” (ChurchofJesusChrist.org)

“Elder Ronald A. Rasband: Dunay Talento nga Lider, Mapahinungoron nga Amahan” (ChurchofJesusChrist.org)

“Elder Gary E. Stevenson: Usa ka Masinaboton nga Kasingkasing” (ChurchofJesusChrist.org)

“Elder Dale G. Renlund: Usa ka Masulundon nga Sulugoon” (ChurchofJesusChrist.org)

“Elder Gerrit W. Gong: Higugmaa ang Ginoo ug Salig Kaniya” (ChurchofJesusChrist.org)

“Elder Ulisses Soares: Usa ka Tawo nga Walay Pagpanglimbong” (ChurchofJesusChrist.org)

Ang mosunod nga webpage naglangkob og mubo nga bayograpikal nga mga bidyo mahitungod sa Unang Kapangulohan ug sa Korum sa Napulog Duha ka Apostoles.

Meet the Apostles (ChurchofJesusChrist.org)

Unsa ang mga motibo sa Apostoles?

Si Elder Neil L. Andersen sa Korum sa Napulog Duha ka Apostoles mitudlo:

Ang uban mitan-aw sa Unang Kapangulohan ug sa Korum sa Napulog Duha nga adunay kalibotanon nga mga motibo nga mahimong mga lider sa politika, sa negosyo, ug sa kultura.

Apan, kami gihatagan og mga responsibilidad sa lahi kaayo nga paagi. Kami wala pilia o gipili gikan sa mga aplikasyon. Nga walay bisan unsa nga piho nga propesyonal nga pagpangandam, kami gitawag ug giordinahan nga mopamatuod sa ngalan ni Jesukristo sa tibuok kalibotan hangtod sa among kataposang gininhawa. Kami maningkamot sa pagpanalangin sa masakiton, sa nagsubo, sa nagmasulub-on, ug sa kabos ug sa paglig-on sa gingharian sa Dios. Kami magtinguha nga makahibalo sa kabubut-on sa Ginoo ug sa pagpahayag niini, ilabi na niadtong kinsa nagtinguha og kinabuhing dayon. (Neil L. Andersen, “Pagsunod kang Jesus: Pagkahimong Magbubuhat og Kadaitan,” Liahona, Mayo 2022, 19)

Sa unsang paagi ang Ginoo nangalagad sa mga indibidwal pinaagi sa Iyang Apostoles?

Si Elder David A. Bednar sa Korum sa Napulog Duha ka Apostoles mipakigbahin sa mosunod nga kasinatian:

Ang mga apostoles mga sulugoon sa Ginoo. Mobiyahe sila aron pagbisita sa mga miyembro sa Simbahan sa tibuok kalibotan.

Ang unang higayon nga ako mibiyahe isip usa ka Apostol, nakahimamat ko og usa ka tawo kinsa naglisod sa pagsunod sa Pulong sa Kaalam. Giingnan nako siya, “Ang Ginoo mipadala kanako dinhi sa paghatag kanimo og usa ka yano kaayo nga mensahe: ‘Mahimo nimo kini. Mosaad ko nga ikaw makabaton sa Iyang tabang samtang imong atubangon kini nga hagit.’”

Mopadala ba ang Ginoo og usa sa Napulog Duha ka Apostoles gikan sa pikas bahin sa kalibotan aron sa pagtabang og usa lang ka tawo? Ang tubag oo. Buhaton niya kini pirme. (“Unsa man ang Buhaton sa mga Apostoles?,” Liahona, Abr. 2016, 66)

Dugang nga mga Kalihokan sa Pagkat-on

Doktrina ug mga Pakigsaad 18:27. Hingpit nga katuyoan sa kasingkasing

Human mailhan ang mga baroganan sa leksiyon, ikonsiderar ang pagdapit sa mga estudyante sa pagbasa sa asoy ni Jesukristo nga nagtawag sa Iyang Apostoles diha sa Mateo 4:18–22, mangita kon giunsa pagpakita niining mga tawhana ang “hingpit nga katuyoan sa kasingkasing.” Mahimo kang mangutana sama sa “Unsa kaha ang lahi nga nahimo niining mga tawhana kon sila milihok uban ang tipik nga katuyoan sa kasingkasing?” o “Unsa ang pipila ka paagi nga ang mga propeta ug apostoles karon nahisama niining mga mangingisda?” Mahimo nimong pahinumdoman ang mga estudyante nga gibiyaan sa Apostoles ang ilang mga propesyon ug ubang mga prayoridad aron sa pag-alagad ni Jesukristo sa tibuok nahabilin sa ilang mga kinabuhi. Kini usa ka paagi nga sila nag-alagad nga adunay hingpit nga katuyoan sa kasingkasing. Ikonsiderar ang pagpakigbahin og ehemplo gikan sa kinabuhi sa usa ka Apostol sa modernong panahon.

Presidente Russell M. Nelson

Ikonsiderar ang pagtan-aw sa “President Nelson: Prophet of God” (6:26). Dapita ang mga estudyante sa pagpangita og ebidensiya nga si Presidente Russell M. Nelson nagtinguha sa pagdala sa ngalan ni Jesukristo diha kaniya nga adunay hingpit nga katuyoan sa kasingkasing.

Madungog nako ang tingog sa Ginoo pinaagi sa pagtuon sa mga kasulatan

Kon gibati nimo nga mapuslanon ang pagtutok sa pagtuon sa kasulatan sa mga estudyante, hatagi ang mga estudyante og panahon sa pagbasa sa Doktrina ug mga Pakigsaad 18:34–36 ug sukda ang ilang kaugalingong pagtuon. Dapita sila sa pag-ila og usa ka paagi nga atong madungog ang tingog sa Ginoo. Tingali kinahanglan nimong ipasabot nga “kini nga mga pulong” nagpasabot sa mga kasulatan. Ikonsiderar ang pagpangutana sama sa “Kanus-a man nimo nadungog ang tingog sa Ginoo samtang nagtuon ka sa mga kasulatan?” o “Unsay makatabang kanato nga makadungog sa Iyang tingog nga mas klaro samtang kita magtuon?”