Leksiyon 30: Doktrina ug mga Pakigsaad 18

Pagbansay 2 sa Doktrinal nga Kahanas

Pagsabot ug Pag-angkon og Espirituhanong Kahibalo

Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon maghatag sa mga estudyante og mga kahigayonan sa pagbansay nga mahanas sa mga tudling sa doktrinal nga kahanas ug sa doktrina nga gitudlo niini ingon man sa pagkat-on ug paggamit sa balaanong mga baroganan alang sa pag-angkon og espirituhanong kahibalo.

Posible nga mga Kalihokan sa Pagkat-on

Rebyo sa doktrinal nga kahanas: Sabta

Ang mosunod nga kalihokan naghatag sa mga estudyante og kahigayonan sa pagpalawom sa ilang pagsabot sa usa o sa daghan pa nga mga tudling sa doktrinal nga kahanas. Kini nga kalihokan molungtad lamang og 10–15 ka minuto aron sa paghatag og igong panahon alang sa pagbansay sa paggamit sa doktrinal nga kahanas unya sa leksiyon.

Ikonsiderar ang pagpatukar og kanta o himno ug dapita ang mga estudyante sa pagpataas sa ilang mga kamot kon sila makaila niini. Dayon dapita kadtong nakahibalo sa pipila sa mga pulong sa pagpataas sa ilang mga kamot. Sa kataposan, dapita ang mga estudyante kinsa nakasabot kon mahitungod sa unsa ang kanta sa pagpataas sa ilang mga kamot ug sa pagpakigbahin kon mahitungod sa unsa kini.

• Unsa ang kalainan tali sa pag-ila, pagkahibalo, ug pagsabot?

• Sa unsang mga paagi kita makaila o makahibalo sa usa ka butang nga walay pagsabot niini?

• Sa unsang paagi kini magamit sa doktrinal nga kahanas?

Ikonsiderar ang pagdapit sa mga estudyante sa pagtan-aw sa mga tudling sa doktrinal nga kahanas ug sa mahinungdanon nga hugpong sa mga pulong sa kasulatan diha sa Mahinungdanon nga Dokumento sa Doktrinal nga Kahanas (2023). Papilia sila og usa nga gusto nilang mas masabtan. Ang mosunod nga kalihokan makatabang sa mga estudyante sa pagpalawom sa ilang pagsabot.

Handurawa nga adunay usa ka tawo kinsa nagkinahanglan gayod sa mensahe nga anaa sa tudling nga imong gipili. Apan, aduna lamang kay 30 segundo aron ipasabot ngadto kanila ang kahulogan sa tudling. Gamita ang sunod nga pipila ka minuto aron mas masabtan ang unod sa tudling.

Ikonsiderar ang paggamit sa pipila sa mosunod nga mga estratehiya:

• Hinay-hinaye sa pagbasa ang bersikulo.

• Pangitaa ang mga pulong o mga hugpong sa mga pulong nga wala nimo masabti.

• Basaha ang ulohan sa seksiyon aron mahibaloan ang background nga nagluyo sa tudling.

• Tan-awa ang mga footnote.

• Gamita ang mga kapanguhaan sa Gospel Library.

Human sa igong panahon, bahina ang mga estudyante ngadto sa mga grupo o sa managpares. Mahimo dayong ipakigbahin sa mga estudyante ang ilang 30 segundonga mga pagpamubo sa tudling sa doktrinal nga kahanas nga ilang napili.

Pagkat-on ug paggamit sa mga baroganan sa pag-angkon og espirituhanong kahibalo

Kon gikinahanglan, dapita ang mga estudyante sa pagrebyo og daklit sa mga baroganan sa pag-angkon og espirituhanong kahibalo (tan-awa sa mga parapo 5–12 sa Mahinungdanon nga Dokumento sa Doktrinal nga Kahanas [2023]). Ang gisugyot nga mga kalihokan sa pagrebyo gilakip diha sa apendiks ubos sa “Mga Kalihokan sa Pagrebyo sa Doktrinal nga Kahanas.”

Human marebyo sa mga estudyante ang mga baroganan, ikonsiderar ang pagpresentar sa mosunod nga senaryo. Mahimo nimong pahunahunaon ang mga estudyante og mas piho nga mga detalye aron makatabang nga mahimong mas may kalabotan ang senaryo diha sa ilang mga kinabuhi. Sama pananglit, mahimo nilang tinoon kon unsa nga desisyon ang gisulayan nga buhaton ni Josie (sama sa kon kinahanglan ba niyang tapuson ang usa ka panaghigalaay, unsaon pag-atubang sa usa ka doktrinal nga kabalaka, o kon siya kinahanglan ba nga moalagad og misyon).

Kon mas pilion, mahimo nimong gamiton ang senaryo sa seksiyon nga “Dugang nga mga Kalihokan sa Pagkat-on” o paghimo og usa sa imong kaugalingon.

Si Josie adunay mahinungdanong desisyon nga pagahimoon. Nakasabot siya nga kini nga desisyon mahimong adunay seryoso nga epekto sa iyang kinabuhi ug nagtinguha sa direksiyon sa Dios pinaagi sa pagpadayag. Si Josie nag-ampo alang sa giya apan wala mobati nga nakadawat siya og tubag. Naghunahuna siya kon nagtinguha ba siya og pagpadayag sa husto nga paagi.

• Sa unsang paagi magamit ni Josie ang mga baroganan sa pag-angkon og espirituhanong kahibalo aron matabangan siya nga makasabot unsaon sa pagdawat og pagpadayag?

Kon masaligon ang mga estudyante sa ilang pagsabot sa tulo ka mga baroganan, tugoti sila sa pagtino kon unsa nga baroganan ang ilang unang gamiton kon sila si Josie. Kon dili sila segurado kon asa magsugod, mahimo nimong gamiton ang mga sugyot sa ubos. Buhata ang imong labing maayo aron sa pagtabang sa mga estudyante sa pagsuhid sa matag baroganan isip kabahin niini nga panaghisgotanan.

Susihon ang mga konsepto ug mga pangutana inubanan sa mahangtorong panglantaw

Basaha ang parapo 8 ubos sa “Pag-angkon og Espirituhanong Kahibalo” diha sa Mahinungdanon nga Dokumento sa Doktrinal nga Kahanas (2023), mangita og mga panabot mahitungod sa pagdapit sa giya sa Langitnong Amahan kon mohimo og mahagiton nga desisyon.

• Sa unsang paagi ikonsiderar ni Josie ang iyang pagpili sa konteksto sa plano sa kaluwasan?

• Sa unsang paagi nga ang pagtan-aw sa pagpili inubanan sa mahangtorong panglantaw makatabang sa pagdapit og pagpadayag?

Lihokon inubanan sa hugot nga pagtuo

Ikonsiderar ang pagdapit sa mga estudyante sa pagbasa ug sa paghisgot sa mosunod nga magpares o diha sa gagmay nga mga grupo.

Basaha ang mga parapo 5 ug 7 ubos sa “Pag-angkon og Espirituhanong Kahibalo” diha sa Mahinungdanon nga Dokumento sa Doktrinal nga Kahanas (2023), mangita og mga kamatuoran nga makatabang ni Josie sa pagtinguha ug pagdawat og pagpadayag gikan sa Langitnong Amahan.

• Ngano kaha nga gibati man ni Josie nga wala siya makadawat og pagpadayag? (Timan-i kon unsay mahimong makatabang diha sa parapo 7 aron masabtan ni Josie.)

• Unsa ang pipila ka mga paagi nga si Josie makalihok inubanan sa hugot nga pagtuo aron makadawat og pagpadayag?

Tinguhaa ang dugang nga panabot pinaagi sa balaanong gitudlo nga mga tinubdan

• Unsa ang pipila ka balaanong gitudlo nga mga tinubdan nga mahimong tun-an ni Josie aron mas masabtan kon unsaon pagtinguha, pagdawat, o pag-ila og pagpadayag?

  Kon gikinahanglan, idirekta ang pagtagad sa mga estudyante ngadto sa “Pagpadayag” diha sa Giya ngadto sa mga Kasulatan o sa Gospel Topics.

  Mahimong makita usab sa mga estudyante nga makatabang ang mosunod nga mga kasulatan: Joseph Smith—Kasaysayan 1:11–14, 29; Doktrina ug mga Pakigsaad 6:14–16, 22–24; 8:1–3; 9:8–9; 11:12–13. Human sa pagtuon, mahimong basahon sa mga estudyante ang mga kinutlo nga ilang nakaplagan ug mopakigbahin kon nganong sa ilang hunahuna kini makatabang.

  Kon mapuslanon, paghimo og tulo ka mga kolum diha sa pisara ug ilista ang usa niini nga mga hugpong sa mga pulong sa ibabaw sa matag kolum: Pagtinguha og Pagpadayag, Pagdawat og Pagpadayag, ug Pag-ila og Pagpadayag. Samtang ipakigbahin sa mga estudyante ang ilang nakaplagan, dapita sila sa pagsulat sa ilang mga panabot ubos sa usa o sa daghan pa niini nga mga ulohan. Kon ang usa ka kolum adunay mas gamay nga mga panabot, pangutan-a ang mga estudyante kon unsay ilang nakat-onan nga mahimong makatabang niana nga bahin sa pagpadayag.

• Unsa pa ang imong nakat-onan o gibati mahitungod sa pagdawat og pagpadayag nga mahimo nimong ipakigbahin kang Josie?

Hatagi ang mga estudyante og mga kahigayonan sa pagpangutana o sa pagpakigbahin og mga kasinatian nga ilang nasinati. Samtang sila mopakigbahin, ipadayon ang paghatag og gibug-aton sa mga baroganan sa pag-angkon og espirituhanong kahibalo. Mahimo nimo kini pinaagi sa paghisgot og mga paagi nga ilang gigamit ang mga baroganan sa ilang mga kasinatian o pinaagi sa pagdapit kanila sa pagbansay sa paggamit sa mga baroganan samtang nagtinguha sila og mga tubag sa mga pangutana. Hinumdomi nga dili nimo kinahanglan mahibaloan ang tubag sa matag pangutana nga ilang ipangutana. Si Presidente M. Russell Ballard sa Korum sa Napulog Duha ka Apostoles sa makausa misulti ngadto sa mga magtutudlo: “Walay problema ang pag-ingon nga, ‘Wa ko kahibalo.’ Hinoon, kon nasulti na kana, ikaw dunay responsibilidad sa pagpangita sa pinakaposibling mga tubag sa mahunahunaong mga pangutana sa inyong mga estudyante” (“The Opportunities and Responsibilities of CES Teachers in the 21st Century” [pakigpulong ngadto sa mga Church Educational System religious educators, Peb. 26, 2016], broadcasts.ChurchofJesusChrist.org).

Dugang nga Kalihokan sa Pagkat-on

Alternatibong senaryo

Mahimo nimong gamiton ang usa sa mosunod nga mga senaryo aron matabangan ang mga estudyante nga makabansay sa paggamit sa mga baroganan sa pag-angkon og espirituhanong kahibalo. Ang matag senaryo gibase sa doktrina nga gitudlo sa Doktrina ug mga Pakigsaad 18:10–11.

Si Chase naninguha pag-ayo sa eskwelahan ug sa iyang mga ekstrakurikular nga mga kalihokan apan wala gyod siya mobati nga maayo ang iyang nahimo. Iyang gibati nga ang iyang pagsalig, kalipay, ug koneksiyon ngadto sa Dios paingon sa pagkawalay kadasig.

Ang pamilya ni Kate nakigbisog sa kawalay trabaho, nga nagdala og daghang kalisod sa iyang panimalay. Dugang pa, ang iyang mga kaedad sa eskwelahan kasagaran mosulti og bati ug makapasakit nga mga butang ngadto kaniya. Ang pag-atubang niini nga mga hagit nakahatag kaniya og pagbati nga emosyonal ug espirituhanong kahaw-ang.