« គោលលទ្ធិ និងសេចក្ដីសញ្ញា ១៨:១១–១៦ ៖ ‹ អ្នកនឹងមានសេចក្ដីអំណរដ៏មហិមា › » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៥ )
« គោលលទ្ធិ និងសេចក្ដីសញ្ញា ១៨:១១–១៦ » ព្រះគម្ពីរគោលលទ្ធិ និងសេចក្ដីសញ្ញា សៀវភៅសិក្សាសម្រាប់គ្រូបង្រៀនថ្នាក់សិក្ខាសាលា
មេរៀនទី ២៨ ៖ គោលលទ្ធិ និងសេចក្ដីសញ្ញា ១៨
គោលលទ្ធិ និងសេចក្ដីសញ្ញា ១៨:១១–១៦
« អ្នកនឹងមានសេចក្ដីអំណរដ៏មហិមា »
ពេលព្រះអម្ចាស់បន្តបើកសម្ដែងព្រះទ័យរបស់ទ្រង់អំពីសាសនាចក្ររបស់ទ្រង់ ទ្រង់បានមានបន្ទូលទៅកាន់យ៉ូសែប ស្ម៊ីធ អូលីវើរ ខៅឌើរី និងដាវីឌ វិតមើរ អំពីអំណរដែលអាចកើតចេញពីការចែកចាយដំណឹងល្អរបស់ទ្រង់ ។ មេរៀននេះអាចជួយបង្កើនបំណងប្រាថ្នារបស់សិស្សក្នុងការចែកចាយដំណឹងល្អរបស់ព្រះអង្គសង្គ្រោះជាមួយនឹងមនុស្សដទៃ ។
សកម្មភាពរៀនសូត្រដែលអាចមាន
តើអ្វីទៅដែលនាំឲ្យអំណរ ?
សូមពិចារណាអញ្ជើញសិស្សឲ្យធ្វើការជាគូរយៈពេលពីមួយទៅពីរនាទីសរសេរអំពីអ្វីៗដែលពួកគេអាចគិតឃើញអំពីអ្វីដែលនាំឲ្យពួកគេមានអំណរ ។ ជាជម្រើស សូមចែកសិស្សជាក្រុមតូចៗ ហើយឲ្យហ្វឺតសរសេរលើក្ដារខៀនដែលមានពណ៌ខុសគ្នាដល់ក្រុមនីមួយៗ ។ សិស្សនៅក្នុងក្រុមនីមួយៗមានពេលមួយទៅពីរនាទីដើម្បីប្ដូរវេនគ្នាសរសេរអ្វីមួយដែលនាំពួកគេឲ្យមានអំណរនៅលើក្ដារខៀន ។
សូមអញ្ជើញសិស្សបីបួននាក់ឲ្យចែកចាយអ្វីមួយដែលពួកគេបានសរសេរ និងមូលហេតុដែលវានាំយកអំណរឲ្យពួកគេ ។
ព្រះវរបិតាសួគ៌ និងព្រះយេស៊ូវគ្រីស្ទសព្វព្រះទ័យឲ្យយើងមានអំណរ ( សូមមើល នីហ្វៃទី ២ ២:២៥ ) ។ នៅក្នុង គោលលទ្ធិ និងសេចក្ដីសញ្ញា ១៨ ព្រះអង្គសង្គ្រោះបានប្រកាសពីអ្វីដែលនាំឲ្យទ្រង់មានអំណរ ហើយបានពន្យល់ពីរបៀបដែលយើងអាចដកពិសោធន៍អំណរប្រភេទនោះដូចគ្នាដែរ ។
សូមពិចារណាអញ្ជើញសិស្សឲ្យគិតថាតើបច្ចុប្បន្ននេះពួកគេមានអំណរប៉ុនណានៅក្នុងជីវិតរបស់ពួកគេ និងហេតុផលដែលពួកគេអាចចង់មានអំណរច្រើន ។ សូមលើកទឹកចិត្តពួកគេឲ្យរកមើលការបង្រៀននានា ពេលពួកគេសិក្សានៅថ្ងៃនេះអំពីរបៀបដែលពួកគេអាចដកពិសោធន៍អំណរដ៏ធំធេងនៅក្នុងជីវិតរបស់ពួកគេ ។
អំណរនៃព្រះយេស៊ូវគ្រីស្ទ
សូមអញ្ជើញសិស្សឲ្យសញ្ជឹងគិតអំពីអ្វីដែលព្រះអង្គសង្គ្រោះអាចមានព្រះបន្ទូល ប្រសិនបើពួកគេទូលសួរទ្រង់អំពីអ្វីដែលនាំឲ្យទ្រង់មានអំណរ ។
សូមអាន គោលលទ្ធិ និងសេចក្ដីសញ្ញា ១៨:១១–១៣ ហើយរកមើលដែលនាំឲ្យព្រះអង្គសង្គ្រោះមានអំណរដ៏មហិមា ។
សូមអញ្ជើញសិស្សឲ្យសញ្ជឹងគិតសំណួរពីរបន្ទាប់ទៀតពីមុនឆ្លើយសំណួរនោះ ។ ពីមុនសុំឲ្យពួកគេចែកចាយ អ្នកអាចអញ្ជើញពួកគេឲ្យសរសេរចម្លើយរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។ វាក៏អាចមានប្រយោជន៍ផងដែរក្នុងការអនុញ្ញាតឲ្យសិស្សអាន លូកា ១៥:១–១០ ពីមុនអ្នកសួរសំណួរ ។
-
ហេតុអ្វីអ្នកគិតថា ព្រះអង្គសង្គ្រោះមានអំណរដ៏មហិមាពេលអ្នកប្រែចិត្ត ?
-
តើការដឹងរឿងនេះអំពីព្រះអង្គសង្គ្រោះអាចជះឥទ្ធិពលដល់សកម្មភាព និងបំណងប្រាថ្នារបស់អ្នកដោយរបៀបណា ?
គោលលទ្ធិ និងសេចក្ដីសញ្ញា ១៨:១៥-១៦ គឺជាវគ្គចំណេះចំណានខាងគោលលទ្ធិ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីពួកគេអាចងាយរកវាឃើញ ។
សូមអាន គោលលទ្ធិ និងសេចក្ដីសញ្ញា ១៨:១៤–១៦ ហើយគូសចំណាំឃ្លាដែលបង្ហាញពីអ្វីដែលព្រះអង្គសង្គ្រោះសព្វព្រះទ័យចង់បានសម្រាប់យើង ។
-
តើខគម្ពីរទាំងនេះជួយអ្នកយល់អ្វីខ្លះអំពីព្រះអង្គសង្គ្រោះ និងព្រះរាជបំណងរបស់ទ្រង់ចំពោះយើង ?
ប្រសិនបើចាំបាច់ សូមពន្យល់ថា សេចក្ដីពិតមួយដែលយើងអាចរៀនពីខគម្ពីរទាំងនេះគឺថា ព្រះយេស៊ូវគ្រីស្ទសព្វព្រះទ័យឲ្យយើងមានអំណរដែលកើតចេញពីការនាំមនុស្សដទៃមករកទ្រង់ ។ សូមពិចារណាសរសេរសេចក្តីពិតនេះនៅលើក្តារខៀន ។
អែលឌើរ ម៉ាកឺស ប៊ី ណាស នៃពួកចិតសិបនាក់បានមានប្រសាសន៍អំពីអំណរដែលអាចកើតចេញពីការចែកចាយដំណឹងល្អ ៖
ចូរលើកពន្លឺរបស់អ្នករាល់គ្នាឡើង
នៅពេលមនុស្សម្នាក់ដឹងពីគោលបំណងដ៏រុងរឿងនៃជីវិត ហើយដឹងថាព្រះគ្រីស្ទអភ័យទោស និងជួយដល់អ្នកដែលដើរតាមទ្រង់ រួចហើយជ្រើសរើសដើរតាមព្រះគ្រីស្ទទៅក្នុងទឹកនៃពិធីបុណ្យជ្រមុជទឹកសម្រាប់ជីវិតផ្លាស់ប្ដូរប្រសើរឡើង—ទោះបីជាកាលៈទេសៈខាងក្រៅនៃជីវិតមិនមានក៏ដោយ ។
ប្អូនស្រីដ៏ស្រស់ស្រាយម្នាក់ ដែលខ្ញុំបានជួបនៅទីក្រុងអូនីស្សា ប្រទេសនីហ្សេរីយ៉ា បានប្រាប់ខ្ញុំថា ចាប់ពីពេលនោះមក នាងបានរៀនពីដំណឹងល្អ និងបានជ្រមុជទឹក( ហើយឥឡូវនេះ ខ្ញុំសូមដកស្រង់ពាក្យសំដីរបស់នាង ) « គ្រប់យ៉ាងគឺល្អសម្រាប់ខ្ញុំ ។ ខ្ញុំសប្បាយចិត្ត ។ ខ្ញុំនៅស្ថានសួគ៌ » ។ ការចែកចាយដំណឹងល្អនាំឲ្យមានអំណរ និងក្ដីសង្ឃឹមដល់ព្រលឹងរបស់អ្នកដែលចែកចាយផង និងអ្នកទទួលផង ។ ពិតណាស់ « អ្នកនឹងមានសេចក្ដីអំណរដ៏មហិមា » ពេលបងប្អូនចែកចាយដំណឹងល្អ ! ការចែកចាយដំណឹងល្អគឺជាការមានអំណរ និងក្ដីសង្ឃឹមម្ដងហើយម្ដងទៀត ។ ( ម៉ាកឺស ប៊ី ណាស « Hold Up Your Light » Liahona ខែវិច្ឆិកា ឆ្នាំ២០២១ ទំព័រ ៧១ )
-
ហេតុអ្វីអ្នកគិតថា ការនាំមនុស្សម្នាក់ទៀតទៅរកព្រះយេស៊ូវគ្រីស្ទនាំយកអំណរដ៏ច្រើនដល់បុគ្គលម្នាក់ ?
-
តើអ្នកធ្លាប់មានបទពិសោធន៍ ( ឬដឹង )អ្វីខ្លះ ដែលអ្នកធ្លាប់ឃើញអំណរនៃការចែកចាយដំណឹងល្អជាមួយនឹងមនុស្សដទៃ ?
ដើម្បីជួយសិស្សឲ្យឆ្លើយសំណួរមុនៗ អ្នកអញ្ជើញពួកគេឲ្យស្រាវជ្រាវរកគំរូនៅក្នុងបទគម្ពីរ ។ ពួកគេអាចអានពាក្យពេចន៍របស់អាំម៉ូន ( នៅក្នុង អាលម៉ា ២៦:១–១៦ ) និងអាលម៉ា ( នៅក្នុង អាលម៉ា ២៩:៩–១៧ ) ។ អ្នកក៏អាចបង្ហាញ « Inviting All to Come unto Christ: Sharing the Gospel » ( ៤:៣០ ) ដែលមាននៅគេហទំព័រ ChurchofJesusChrist.org ។
ការយកឈ្នះលើឧបសគ្គ
សូមពន្យល់ថា ខណៈដែលការសន្យាទាំងនេះមកពីព្រះអម្ចាស់ទាំងនេះអាចជួយលើកទឹកចិត្តយើងឲ្យចែកចាយដំណឹងល្អរបស់ទ្រង់ក៏ដោយ ក៏ពេលខ្លះមាននូវឧបសគ្គ ឬកង្វល់ដែលអាចរារាំងយើងមិនឲ្យចែកចាយដំណឹងល្អនេះដែរ ។ សូមអញ្ជើញសិស្សឲ្យរៀបរាប់ពីឧបសគ្គមួយចំនួន ហើយសរសេរចម្លើយរបស់ពួកគេនៅលើក្តារខៀន ។ បន្ទាប់មកអញ្ជើញសិស្សឲ្យបំពេញសកម្មភាពខាងក្រោម ដោយនឹកស្រមៃថា ពួកគេស្គាល់មនុស្សម្នាក់ ( ឬគិតពីមនុស្សម្នាក់ដែលពួកគេស្គាល់ )ដែលជួបឧបសគ្គមួយក្នុងចំណោមឧបសគ្គទាំងនោះ ។
សូមកត់ត្រាអ្វីដែលអ្នកអាចចែកចាយជាមួយនឹងបុគ្គលដែលមានកង្វល់អំពីការចែកចាយដំណឹងល្អរបស់ព្រះអង្គសង្គ្រោះ ។ សូមពិចារណារួមបញ្ចូលដូចខាងក្រោម ៖
-
តើអ្នកដឹងអ្វីខ្លះអំពីព្រះអង្គសង្គ្រោះដែលអាចបង្កើនបំណងប្រាថ្នារបស់អ្នកដើម្បីនាំយកមនុស្សដទៃមករកទ្រង់ ( និងបទគម្ពីរមួយដែលថ្លែងទីបន្ទាល់អំពីអ្វីដែលអ្នកដឹង បើអាច )
-
តើការខិតមកជិតនឹងព្រះអង្គសង្គ្រោះបានយកអំណរមកឲ្យអ្នកដោយរបៀបណា និងហេតុផលដែលអ្នកចង់ឲ្យមនុស្សដទៃទទួលបានពរជ័យដូចគ្នា
-
បទពិសោធន៍ដែលអ្នក ឬមនុស្សដទៃដែលអ្នកស្គាល់ធ្លាប់មាននៅក្នុងការនាំយកព្រលឹងមករកព្រះគ្រីស្ទ និងរបៀបដែលបទសោធន៍ទាំងនោះបាននាំមកនូវអំណរ
បន្ទាប់ពីសិស្សមានពេលគ្រប់គ្រាន់ក្នុងការបង្កើតចម្លើយមួយ សូមឲ្យឱកាសពួកគេចែកចាយអ្វីដែលពួកគេបានសរសេរ ។ វិធីមួយក្នុងការធ្វើបែបនេះគឺការអញ្ជើញសិស្សម្នាក់ ឬពីរនាក់ឲ្យសម្ដែងធ្វើជាមនុស្សម្នាក់ដែលមានកង្វល់អំពីការចែកចាយដំណឹងល្អ ។ សិស្សផ្សេងទៀតអាចចែកចាយរឿងមួយដែលពួកគេគិតឃើញថាអាចជួយបាន ។
បន្ទាប់ពីការពិភាក្សានេះ សូមធ្វើការអញ្ជើញដូចតទៅនេះដល់សិស្ស ៖
សូមចំណាយពេលដើម្បីសញ្ជឹងគិតពីអ្វីដែលអ្នកបានរៀន និងទទួលអារម្មណ៍នៅក្នុងមេរៀននេះ ។ សូមកត់ត្រាអារម្មណ៍របស់អ្នកអំពីការចែកចាយដំណឹងល្អ និងការព្យាយាមនាំមនុស្សដទៃទៅរកព្រះយេស៊ូវគ្រីស្ទ ។ សូមពិចារណាបញ្ចូលអ្វីៗដែលអ្នកបានរៀនជាពិសេសអំពីព្រះអង្គសង្គ្រោះ ដែលអ្នកចង់ចងចាំ ។
សូមពិចារណាបញ្ចប់មេរៀនដោយអញ្ជើញសិស្សម្នាក់ ឬពីរនាក់ឲ្យចែកចាយអ្វីដែលពួកគេបានរៀន ឬចង់ចងចាំ ។ សូមថ្លែងទីបន្ទាល់អំពីសេចក្ដីពិតដែលអ្នកបានពិភាក្សានៅថ្ងៃនេះ ។
ទន្ទេញ
អ្នកអាចនឹងចង់ជួយសិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឹះសម្រាប់ គោលលទ្ធិ និងសេចក្ដីសញ្ញា ១៨:១៥–១៦ គឺ« នោះអ្នកនឹងមានសេចក្ដីអំណរដ៏មហិមា បើសិនជាអ្នកបាននាំព្រលឹងជាច្រើនមករកយើង ! » គំនិតសម្រាប់សកម្មភាពទន្ទេញចាំ មាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។