“Tokāteline mo e Ngaahi Fuakava 18:11–16: ‘Hono ʻIkai Ke Lahi Pehē Fau ʻa Hoʻomo Fiefiá,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 18:11–16,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 28: Tokāteline mo e Ngaahi Fuakava 18
Tokāteline mo e Ngaahi Fuakava 18:11–16
“Hono ʻIkai Ke Lahi Pehē Fau ʻa Hoʻomo Fiefiá”
ʻI he hokohoko atu hono fakahā ʻe he ʻEikí Hono finangaló fekauʻaki mo Hono Siasí, naʻá Ne folofola kia Siosefa Sāmita, ʻŌliva Kautele, mo Tēvita Uitemā fekauʻaki mo e fiefia ʻe lava ke maʻu mei hono vahevahe ʻEne ongoongoleleí. ʻE lava ke tokoni ʻa e lēsoni ko ʻení ke fakatupulaki e loto-holi ʻa e kau akó ke vahevahe ʻa e ongoongolelei ʻa e Fakamoʻuí mo e niʻihi kehé.
Ngaahi ʻEkitivitī Ako ʻOku Ala Fakahokó
Ko e hā ʻa e meʻa ʻokú ne ʻomi ʻa e fiefiá?
Fakakaukau ke fakaafeʻi ʻa e kau akó ke ngāue tautau toko ua ʻi ha miniti ʻe taha ki he ua ʻo lisi ʻa e meʻa kotoa pē ʻoku lava ke nau fakakaukau ki ai ʻoku nau ʻomi kiate kinautolu ʻa e fiefiá. Pe, vahevahe ʻa e kau akó ki ha fanga kiʻi kulupu iiki pea ʻoange ki he kulupu takitaha ha lanu kehekehe ʻo e tekisitā ki he palakipoé. ʻI ha miniti ʻe taha ki he ua, ʻe lava ke taufetongi ʻa e tokotaha kotoa ʻi he kulupu takitaha ʻi hono tohi ha meʻa ʻi he palakipoé ʻokú ne ʻomi kiate kinautolu ʻa e fiefiá.
Fakaafeʻi ha niʻihi ʻo e kau akó ke vahevahe ha meʻa ʻe taha naʻa nau tohi pea mo e ʻuhinga ʻokú ne ʻomi ai kiate kinautolu ʻa e fiefiá.
ʻOku finangalo ʻa e Tamai Hēvaní mo Sīsū Kalaisi ke tau ongoʻi fiefia (vakai, 2 Nīfai 2:25). Naʻe fakahā ʻe he Fakamoʻuí ʻi he Tokāteline mo e Ngaahi Fuakava 18, ʻa e meʻa ʻokú ne ʻomi kiate Ia ʻa e fiefiá mo fakamatalaʻi ʻa e founga te tau lava ai ʻo aʻusia ʻa e faʻahinga fiefia ko iá.
Fakakaukau ke fakaafeʻi ʻa e kau akó ke nau fakakaukau ki he lahi ʻo e fiefia ʻoku nau lolotonga maʻu ʻi heʻenau moʻuí pea mo e ʻuhinga te nau fiemaʻu ai ke ongoʻi ha fiefia lahi angé. Poupouʻi kinautolu ke kumi ha ngaahi akonaki ʻi heʻenau ako ʻi he ʻaho ní fekauʻaki mo e founga te nau lava ai ʻo aʻusia ha fiefia lahi ange ʻi heʻenau moʻuí.
Ko e fiefia ʻa Sīsū Kalaisí
Fakaafeʻi ʻa e kau akó ke fakalaulauloto ki he meʻa ʻe ala folofola ʻaki ʻe he Fakamoʻuí kapau te nau fehuʻi kiate Ia pe ko e hā ʻa e meʻa ʻokú ne ʻomi kiate Ia ʻa e fiefiá.
Lau ʻa e Tokāteline mo e Ngaahi Fuakava 18:11–13 pea kumi ʻa e meʻa ʻokú ne ʻomi ha fiefia lahi ki he Fakamoʻuí.
Fakaafeʻi ʻa e kau akó ke fakalaulauloto ki he ongo fehuʻi hono hokó kimuʻa pea talí. Kimuʻa pea kole ange ke nau vahevahé, te ke lava ʻo fakaafeʻi kinautolu ke hiki ʻenau ngaahi talí ʻi heʻenau tohinoa akó. ʻE ala ʻaonga foki ki he kau akó ke lau ʻa e Luke 15:1–10 kimuʻa peá ke ʻeke ʻa e ongo fehuʻí.
-
ʻOkú ke pehē ko e hā ʻoku ongoʻi fiefia lahi ai ʻa e Fakamoʻuí ʻi heʻetau fakatomalá?
-
ʻE tākiekina fēfē nai hoʻo ngaahi ngāué mo e ngaahi holí ʻi hono ʻiloʻi ʻeni fekauʻaki mo e Fakamoʻuí?
Ko e Tokāteline mo e Ngaahi Fuakava 18:15–16 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.
Lau ʻa e Tokāteline mo e Ngaahi Fuakava 18:14–16 pea fakaʻilongaʻi ʻa e ngaahi kupuʻi lea ʻoku nau fakahaaʻi ʻa e finangalo ʻo e Fakamoʻuí maʻatautolú.
-
Ko e hā ʻa e meʻa ʻoku tokoniʻi ʻe he ngaahi veesi ko ʻení ke mahino kiate koe fekauʻaki mo e Fakamoʻuí mo Hono finangalo maʻatautolú?
Kapau ʻe fiemaʻu, fakamatalaʻi ange ko e moʻoni ʻe taha te tau lava ʻo ako mei he ngaahi veesi ko ʻení ʻoku finangalo ʻa Sīsū Kalaisi ke tau ongoʻi ʻa e fiefia ʻoku maʻu ʻi hono ʻomi ʻa e niʻihi kehé kiate Iá. Fakakaukau ke hiki ʻa e moʻoni ko ení ʻi he palakipoé.
Naʻe lea ʻa ʻEletā Mākisi B. Nesi ʻo e Kau Fitungofulú kau ki he fiefia ʻe lava ke maʻu mei hono vahevahe ʻo e ongoongoleleí:
ʻI he taimi ʻoku ʻilo ai ʻe ha taha ʻa e taumuʻa nāunauʻia ʻo e moʻuí, maʻu ha mahino ʻoku fakamolemoleʻi mo tokoniʻi ʻe Kalaisi ʻa kinautolu ʻoku muimui ʻiate Iá, pea fili leva ke muimui ʻia Kalaisi ki he ngaahi vai ʻo e papitaisó, ʻoku liliu ʻa e moʻuí ʻo lelei ange—ʻo aʻu ki he taimi ʻoku ʻikai lelei ai ʻa e ngaahi tūkunga ʻo e moʻuí.
Naʻe talamai ʻe ha fefine fofonga fiefia ne u fetaulaki mo ia ʻi ʻOnitisa, Naisīlia, talu mei he taimi naʻá ne ako ai ʻa e ongoongoleleí pea papitaisó, (pea ko ʻene leá ʻeni), “ʻoku lelei ʻa e meʻa kotoa pē kiate au. ʻOku ou fiefia. ʻOku ou ʻi hēvani.” ʻOku hanga ʻe hono vahevahe ʻo e ongoongoleleí ʻo ʻomi ʻa e fiefia mo e ʻamanaki lelei fakatouʻosi ki he laumālie ʻo e tokotaha vahevahé mo e tokotaha ʻokú ne talí . Ko hono moʻoní, “hono ʻikai ke lahi pehē fau ʻa [hoʻo] fiefiá” ʻi hoʻo vahevahe ʻa e ongoongoleleí! Ko hono vahevahe ʻo e ongoongoleleí ko e fiefia ia hoko mo e fiefia, ʻamanaki lelei hoko mo e ʻamanaki lelei. (Marcus B. Nash, “Hiki Hake Hoʻomou Māmá,” Liahona, Nōvema 2021, 71)
-
ʻOkú ke pehē ko e hā ʻoku ʻomi ai ki ha taha ha fiefia lahi ʻi heʻene tataki ha taha kehe kia Sīsū Kalaisí?
-
Ko e hā ha ngaahi aʻusia kuó ke maʻu (pe ʻilo ki ai) ʻa ia kuó ke mamata ai ki he fiefia ʻi hono vahevahe ʻo e ongoongoleleí mo e niʻihi kehé?
Ke tokoni ki he kau akó ʻi he fehuʻi kimuʻá, te ke lava ʻo fakaafeʻi kinautolu ke nau fekumi ki ha ngaahi sīpinga ʻi he folofolá. ʻE lava ke nau lau ʻa e ngaahi lea ʻa ʻĀmoní (ʻi he ʻAlamā 26:1–16) mo ʻAlamā (ʻi he ʻAlamā 29:9–17). Te ke lava foki ʻo huluʻi ʻa e “Inviting All to Come unto Christ: Sharing the Gospel” (4:30), ʻoku maʻu ʻi he ChurchofJesusChrist.org.
Ko hono ikunaʻi ʻo e ngaahi fakafeʻātungiá
Fakamatalaʻi ange neongo ʻe lava ke tokoni ʻa e ngaahi talaʻofa ko ʻeni mei he ʻEikí ke fakaʻaiʻai kitautolu ke vahevahe ʻEne ongoongoleleí, ka ʻi he taimi ʻe niʻihi, ʻoku ʻi ai ha ngaahi fakafeʻātungia pe hohaʻa te ne ala taʻofi kitautolu mei heʻetau vahevahé. Fakaafeʻi ʻa e kau akó ke talaatu ha niʻihi ʻo e ngaahi fakafeʻātungiá pea hiki ʻenau ngaahi talí ʻi he palakipoé. Fakaafeʻi leva ʻa e kau akó ke fakakakato ʻa e ʻekitivitī ko ʻení, ʻo fakakaukauloto ʻoku nau ʻiloʻi ha taha (pe fakakaukau ki ha taha ʻoku nau ʻiloʻi) ʻokú ne fehangahangai mo ha taha ʻo e ngaahi fakafeʻātungia ko iá.
Hiki ʻa e meʻa te ke lava ʻo vahevahe mo e tokotaha ʻoku hohaʻa fekauʻaki mo hono vahevahe ʻo e ongoongolelei ʻa e Fakamoʻuí. Fakakaukau ke fakakau ʻa e ngaahi meʻa ko ʻení:
-
Meʻa ʻokú ke ʻilo fekauʻaki mo e Fakamoʻuí te ne fakatupulaki hoʻo holi ke ʻomi ʻa e niʻihi kehé kiate Iá (mo ha potufolofola ʻoku fakamoʻoniʻi ai ʻa e meʻa ʻokú ke ʻiló, kapau ʻe lava)
-
Founga kuo hanga ai ʻe hoʻo ofi ange ki he Fakamoʻuí ʻo ʻoatu ʻa e fiefiá mo e ʻuhinga te ke loto ai ke maʻu ʻe he niʻihi kehé ʻa e ngaahi tāpuaki tatau
-
Ngaahi meʻa kuó ke aʻusia pe ko ha niʻihi kehe ʻokú ke ʻilo, ʻi hono ʻomi ʻa e ngaahi laumālié kia Kalaisí mo e founga naʻe ʻoatu ai ʻe he ngaahi aʻusia ko iá ha fiefiá
Hili hono maʻu ʻe he kau akó ha taimi feʻunga ke faʻu ai ha tali, ʻoange ha faingamālie ke vahevahe ai ʻa e meʻa naʻa nau tohí. Ko e founga ʻe taha ke fai ai ʻení ko hano fakaafeʻi ha toko taha pe toko ua ʻo e kau akó ke ne fakatātaaʻi ha taha ʻoku hohaʻa fekauʻaki mo hono vahevahe ʻo e ongoongoleleí. ʻE lava ke vahevahe ʻe he toenga ʻo e kau akó ha meʻa ʻe taha naʻa nau fakakaukau ki ai ʻe ala tokoní.
Hili ʻa e fealēleaʻaki ko ʻení, ʻoange ki he kau akó ʻa e fakaafe ko ʻení:
Fakaʻaongaʻi ha taimi ke fakakaukauloto ai ki he meʻa kuó ke ako mo ongoʻi ʻi he lēsoni ko ʻení. Hiki ʻa e ongo ʻokú ke maʻu fekauʻaki mo hono vahevahe ʻo e ongoongoleleí mo e feinga ke ʻomi ʻa e niʻihi kehé kia Sīsū Kalaisí. ʻE lava ke ke fakakau ai ha faʻahinga meʻa pē kuó ke ako ʻa ia te ke fie manatuʻí, tautautefito fekauʻaki mo e Fakamoʻuí.
Fakakaukau ke fakaʻosi ʻaki hano fakaafeʻi ha toko taha pe toko ua ʻo e kau akó ke vahevahe ʻa e meʻa naʻá na akó pe loto ke na manatuʻí. Fakamoʻoni ki he ngaahi moʻoni kuo mou aleaʻi ʻi he ʻaho ní.
Ako Ma‘uloto
Mahalo te ke fie tokoni ki he kau akó ke ako maʻuloto ʻa e fakamoʻoni fakafolofola ki he fakataukei fakatokāteliné mo e kupuʻi lea mahuʻinga ʻo e folofolá lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea mahuʻinga ʻo e potufolofolá ʻi he Tokāteline mo e Ngaahi Fuakava 18:15–16 ko e “Hono ʻikai ke lahi hoʻomo fiefiá, ʻo kapau te mo ʻomi ʻa e ngaahi laumālie tokolahi kiate au!” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”