Lēsoni 29: Tokāteline mo e Ngaahi Fuakava 18

Tokāteline mo e Ngaahi Fuakava 18:21–47

“Te u Fakahoko ʻi Homo Nimá ha Ngāue Fakaofo”

ʻI Sune ʻo e 1829, naʻe tuku ʻe he Fakamoʻuí kia ʻŌliva Kautele mo Tēvita Uitemā ʻa e fatongia ke fekumi ki ha kau tangata te nau toʻo Hono huafá kiate kinautolu ʻi he “loto fakamātoato moʻoni” (Tokāteline mo e Ngaahi Fuakava 18:27). Naʻe ui kimui ʻa e kau tangata ko ʻení ko e fuofua kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he kuonga fakakosipeli ko ʻení. ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻoku tokoniʻi mo tāpuekina ai kitautolu ʻe he ʻEikí ʻo fakafou ʻi hono uiuiʻi ʻEne kau ʻAposetoló.

Ngaahi ʻEkitivitī Ako ʻOku Ala Fakahokó

Ko e Kau ʻAposetolo ʻe Toko Hongofulu Mā Uá

ʻE lava ke tokoni ʻa e ʻekitivitī ko ʻení ke teuteuʻi ʻa e kau akó ke fakakaukau ki he tokoni ʻoku foaki ange ʻe he ʻEikí kiate kinautolu ʻo fakafou ʻi he kau ʻaposetolo mo e kau palōfita ʻi onopōní.

Hiki ʻa e ngaahi ngāue maʻuʻanga moʻui ko ʻení ʻi he palakipoé: kau toketā, kau ʻenisinia, kau tufunga, kau ngāue ukamea, kau faiako. Te ke lava foki ʻo kole ki he kau akó ke talaatu ha ngaahi ngāue maʻuʻanga moʻui kehe ʻoku fakafeʻungaʻi makehe ai ha kakai ke tokoniʻi kitautolu.

Fakakaukau ki ha tūkunga naʻá ke houngaʻia ai ʻi ha taha ʻo e kakai ko ʻení.

• Ko e hā ha tokoni ʻoku fakafeʻungaʻi makehe ai ʻa e kakaí ni ke foaki mai kiate kitautolú?

• ʻOku founga fēfē nai ʻenau feʻungá?

Fakakaukau ke fakaʻaliʻali ha tā lolotonga ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. Te ke lava ʻo fakaafeʻi ʻa e kau akó ke vahevahe nounou ha faʻahinga fakamatala pē ʻoku nau ʻilo fekauʻaki mo e kau tangata ko ʻení, kau ai honau ngaahi hingoá, fakaikiiki ʻo e fāmilí, pe puipuituʻa fakapalofesinalé. Fakapapauʻi ʻoku mahino ki he kau akó ʻoku ui ʻa e Kau ʻAposetoló ʻe Sīsū Kalaisi ke fakamoʻoni kiate Ia ʻi he funga ʻo e māmaní (vakai, Fakahinohino ki he Ngaahi Folofolá, “ʻAposetolo,” scriptures.ChurchofJesusChrist.org).

ʻOku ʻofa ʻa e Fakamoʻuí ʻiate kitautolu pea ʻokú Ne ui ha kau ʻAposetolo ke tokoniʻi kitautolu ʻi ha ngaahi founga makehe.

• Ko e hā ha tokoni ʻoku feʻunga makehe ai ʻa e kau ʻAposetolo ʻa e Fakamoʻuí ke fakahoko maʻatautolú?

• ʻOkú ke pehē ko e hā ha ngaahi fiemaʻu ʻoku fakaʻaongaʻi ʻe he ʻEikí ke fili ʻaki ʻEne Kau ʻAposetoló?

Fakamatalaʻi ange ʻe ako lahi ange ʻa e kau akó ʻi he ʻahó ni fekauʻaki mo e kau ʻaposetolo mo e kau palōfita ʻoku ui ʻe he Fakamoʻuí ke tataki kitautolú. Fakakaukau ke fakaafeʻi ʻa e kau akó ke nau fakakaukau ki he founga kuo liliu ai ʻenau moʻuí ʻi he ʻi ai ha kau ʻaposetolo mo ha kau palōfita ʻi he māmaní ʻi he ʻaho ní. Poupouʻi kinautolu ke kumi ʻa e ngaahi akonaki ʻe lava ʻo tokoni ke mahino lelei ange kiate kinautolu ʻa e founga ʻe lava ke faitāpuekina ai ʻenau moʻuí ʻo fakafou ʻi he kau palōfita mo e kau ʻaposetolo ʻi he ngaahi ʻaho kimui ní.

Ko hono toʻo kiate kitautolu ʻa e huafa ʻo Kalaisí

Naʻe fakahinohinoʻi ʻe he ʻEikí ʻa Tēvita Uitemā mo ʻŌliva Kautele ʻi he Tokāteline mo e Ngaahi Fuakava 18, ke na fekumi ki ha kau tangata ʻe ui ʻi ha ʻaho ke ngāue ʻi he Kōlomu ʻo e Kau ʻAposetolo ʻe Toko Hongofulu Mā Uá (vakai, Tokāteline mo e Ngaahi Fuakava 18:37–38).

Lau ʻa e Tokāteline mo e Ngaahi Fuakava 18:21–25, ʻo fekumi ki he akonaki ʻa e ʻEikí kia Tēvita mo ʻŌlivá.

• ʻOkú ke pehē ko e hā naʻe finangalo ai ʻa e ʻEikí ke mahino kia Tēvita mo ʻŌliva ʻa e meʻa naʻá ke lau ʻi he ngaahi veesi ko ʻení?

Fakaafeʻi ʻa e kau akó ke vahevahe ʻenau fakakaukau ki he ʻuhinga ke toʻo kiate kinautolu ʻa e huafa ʻo Kalaisí. Mahalo ʻe tokoni ke fakamahinoʻi ange ʻoku fakafou ʻi he papitaisó mo e sākalamēnití ʻa ʻetau fakahaaʻi ʻoku tau loto-fiemālie ke toʻo kiate kitautolu ʻa e huafa ʻo e Fakamoʻuí. ʻE lava foki ke ʻaonga mo e fakamatala ko ʻení:

Naʻe fakamatalaʻi ʻe ʻEletā Paula B. Pipa ʻo e Kau Fitungofulú ʻa e ʻuhinga ʻo hono toʻo kiate kitautolu ʻa e huafa ʻo Sīsū Kalaisí:

ʻI heʻetau toʻo kiate kitautolu ʻa e huafa ʻo Kalaisí, ʻoku tau tukupā ke toʻo ʻEne ngaahi akonakí, Hono ʻulungāngá,ʻEne ʻofa taupotú, ʻo fakatō loloto ia kiate kitautolu ke nau hoko ko ha konga ʻo kitautolu. (Paul B. Pieper, “Kuo Pau ke Toʻo Kiate Kinautolu Kotoa ʻa e Huafa kuo ʻOmi ʻe he Tamaí,” Liahona, Nōvema 2018, 44)

Ngaahi fiemaʻu mo e ngaahi fatongia ʻo e Kau ʻAposetoló

Naʻe fakahinohinoʻi foki ʻe he ʻEikí ʻa Tēvita mo ʻŌliva fekauʻaki mo e ngaahi fiemaʻu ki he niʻihi ʻe ui ko e kau ʻAposetoló.

Lau ʻa e Tokāteline mo e Ngaahi Fuakava 18:26–27, ʻo kumi ʻa e fiemaʻu ʻi he ongo veesi ko ʻení. Fakatokangaʻi ange ʻoku ʻuhinga ʻa e foʻi lea kau ākonga ʻi he veesi 27 ko fakamoʻoni fakafolofola kiate kinautolu ʻe ui ko e kau ʻAposetoló.

• Ko e hā ha tuʻunga feʻunga naʻe finangalo ʻa e Fakamoʻuí ke maʻu ʻe Heʻene kau ʻAposetoló?

• ʻOkú ke pehē ko e hā ʻe fiemaʻu ai ʻe he Fakamoʻuí ʻa e tuʻunga feʻunga ko ʻení maʻanautolu ʻoku hoko ko ʻEne kau ʻAposetoló?

• ʻE tokoniʻi fēfē nai koe ʻi hono ʻiloʻi ʻeni fekauʻaki mo e Kau ʻAposetolo ʻa e Fakamoʻuí?

Fakamatalaʻi ange naʻe ʻoange ʻe he Fakamoʻuí ha ngaahi fatongia fakaeʻaposetolo kehe ʻi he Tokāteline mo e Ngaahi Fuakava 18 mo ha ngaahi feituʻu kehe pē ʻi he Tokāteline mo e Ngaahi Fuakavá. Fakakaukau ke tā ʻa e saati ko ʻení ʻi he palakipoé pea fakaafeʻi ʻa e kau akó ke hiki ia ʻi heʻenau tohinoa akó. ʻE lava ke ke tānaki ki ai ʻa e meʻa kuo ako ʻe he kau akó mei he veesi 26–27. ʻE lava leva ke lau fakafoʻituitui pe fakakulupu iiki ʻe he kau akó ʻa e ngaahi veesi ʻoku ʻoatú pea fakafonu ʻa e sātí ʻi heʻenau tohinoa akó. Hili iá pea tānaki ʻe he kulupu takitaha ha tali ʻe taha pe ua ki he lisi ʻi he palakipoé.

Fakaʻaongaʻi ʻa e Tokāteline mo e Ngaahi Fuakava 18:26–36 mo e 107:23 ke fakafonu ʻa e saati ko ʻení:

Ko e hā ha ngaahi ʻulungaanga naʻe finangalo ʻa e ʻEikí ke maʻu ʻe he Kau ʻAposetolo ʻe Toko Hongofulu Mā Uá?	Ko e hā ʻa e meʻa naʻe finangalo ʻa e ʻEikí ke fai ʻe he Kau ʻAposetoló ke tokoni ke ʻomi ʻa e niʻihi kehé kiate Iá?

Fakaafeʻi ha niʻihi ʻo e kau akó ke siakaleʻi ʻi he palakipoé ha meʻa fekauʻaki mo e kau ʻAposetoló ʻoku nau pehē ʻoku mahuʻinga pe ʻuhingamālie. Tuku ke nau vahevahe hono ʻuhingá. ʻE lava foki ke mou aleaʻi ʻa e ongo fehuʻi ko ʻení:

• Ko e hā naʻá ke ako mei he ngaahi veesi ko ʻení fekauʻaki mo e founga ʻe lava ke tokoniʻi ai koe ʻe he ʻEikí mo e niʻihi kehé ʻo fakafou ʻi Heʻene kau ʻAposetoló?

• Te ke fakamatalaʻi fakanounou fēfē nai ʻa e meʻa kuó ke ako fekauʻaki mo e kau ʻAposetoló mei he ngaahi veesi ko ʻení?

  Tokoni ke fakamatalaʻi fakanounou ʻe he kau akó ʻa e moʻoni ko ʻení ʻi he palakipoé: ʻoku tokoniʻi kitautolu ʻe he Kau ʻAposetolo ʻa e Fakamoʻuí ke tau haʻu kiate Ia mo ako ʻEne ngaahi folofolá.

• ʻOkú ke vakai fēfē nai ki hano tokoniʻi koe mo e niʻihi kehé ʻe he Kau ʻAposetolo ʻa e Fakamoʻuí ke haʻu kiate Ia ʻi he ʻaho ní?

Ngaahi sīpinga mo e ngaahi akonaki mei he Kau ʻAposetolo ʻi onopōní

ʻOange ki he kau akó ha taimi ke vakai ki he ngaahi sīpinga ʻo hono feau ʻe he kau ʻAposetolo ʻi onopōní ʻa e ngaahi fiemaʻu kiate kinautolú mo fakahoko ʻa e ngaahi fatongia naʻe fakamatalaʻi ʻe he ʻEikí ʻi he Tokāteline mo e Ngaahi Fuakava 18. ʻE lava ke tokoni heni ʻa e ʻekitivitī ko ʻení.

Fakaʻaongaʻi ha taimi ke ke ako ai ʻa e ngaahi akonaki ʻa ha ʻAposetolo ʻo e lolotonga ní ʻe toko taha pe tokolahi ange. Te ke lava ʻo ako ʻa e ngaahi lea fakamuimuitaha ʻo e konifelenisi lahí, ngaahi fakamatala ʻi he makasini ʻa e Siasí, pe ngaahi tohi ʻi he mītia fakasōsialé. ʻI hoʻo akó, kumi ʻa e founga ʻoku fakahoko ai ʻe he kau ʻAposetoló honau fatongia ke tokoniʻi kitautolu ke tau haʻu kia Kalaisí. Te ke lava foki ʻo kumi ha pōpoaki mei ha ʻAposetolo ʻokú ne fakamatalaʻi ha fiemaʻu pe fehuʻi pau ʻokú ke maʻu.

Hili hano maʻu ʻe he kau akó ha taimi feʻunga ke akó, tuku ke nau vahevahe ʻa e meʻa kuo nau akó mo e kalasí pe ʻi ha fanga kiʻi kulupu iiki.

Ngaahi Maʻuʻanga Tokoni Kehé

Ko hai naʻe fili ke kau ʻi he Kōlomu ʻo e Kau ʻAposetolo ʻe Toko Hongofulu Mā Uá?

Naʻe fokotuʻu ʻa e Kōlomu ʻo e Kau ʻAposetolo ʻe Toko Hongofulu Mā Uá ʻi Fēpueli 1835, ko e meimei taʻu ia ʻe ono hili hono maʻu ʻa e fakahā ʻoku lekooti ʻi he Tokāteline mo e Ngaahi Fuakava 18. ʻOku mahino naʻe hanga ʻe he Kau Fakamoʻoni ʻe Toko Tolu ʻo e Tohi ʻa Molomoná, ko ʻŌliva Kautele, Tēvita Uitemā, mo Māteni Hālisi, “ʻo fakatatau mo ʻenau fealeaʻaki mo Siosefa Sāmitá,” ʻo fili ʻa e kau tangata ko ʻení (vakai, Ngaahi Tefito ʻi he Hisitōlia ʻo e Siasí, “Kōlomu ʻo e Toko Hongofulu Mā Uá,” ChurchofJesusChrist.org/study/history/topics). Ko Laimani Sionisoni, Pilikihami ʻIongi, Hiipa C. Kimipolo, ʻOasoni Haiti, Tēvita W. Pāteni, Luke Sionisoni, Uiliami E. Makalelini, Sione F. Poinitoni, ʻOasoni Palati, Viliami Sāmita, Tōmasi B. Maasi, mo Paʻale P. Palati.

Ko e fē te u lava ʻo ako lahi ange ai fekauʻaki mo e Kau ʻAposetolo ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?

Hili pē hono hikinimaʻi ha mēmipa foʻou ʻo e Kau Palesitenisī ʻUluakí pe Kōlomu ʻo e Kau ʻAposetolo ʻe Toko Hongofulu Mā Uá, ʻoku pulusi ha piokālafi ʻi he ngaahi makasini ʻa e Siasí. Naʻe hiki ʻa e ngaahi fakamatala ko ʻení kimuí ni mai ʻe ha kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻOku maʻu ʻi he ngaahi fakamatala ko ʻení ha ngaahi fakaikiiki mo ha ngaahi talanoa lahi ange ʻi he ngaahi piokālafi ʻoku maʻu ʻi he prophets.ChurchofJesusChrist.org. Kapau kuo uiuiʻi ha Kau ʻAposetolo foʻou talu mei hono pulusi ʻo e tohi lēsoni ko ʻení, te ke lava ʻo maʻu ha fakamatala fekauʻaki mo kinautolu ʻi he makasini Liahoná hili ha ngaahi māhina siʻi mei hono hikinimaʻi kinautolu ʻi he konifelenisi lahí.

“Palesiteni Russell M. Nelson: Tākiekina, Mateuteu, Tukupā” (ChurchofJesusChrist.org)

“Palesiteni Tāleni H. ʻOakesi: Ko e Muimui ki he Ngaahi Founga ʻa e ʻEikí” (ChurchofJesusChrist.org)

“Palesiteni Henelī B. ʻAealingi: Ko ha Poto Tāumamaʻo, Angafakatōkilalo hangē ha Kiʻi Tamasiʻí” (ChurchofJesusChrist.org)

ChurchofJesusChrist.org

ChurchofJesusChrist.org

ChurchofJesusChrist.org

ChurchofJesusChrist.org

“ʻEletā Kuenitini L. Kuki: Ko ha Loto mo e ʻAtamai Fie Ngāue” (ChurchofJesusChrist.org)

“ʻEletā D. Todd Christofferson: Mateuteu Ke Ngāue Maʻá e ʻEikí” (ChurchofJesusChrist.org)

“ʻEletā Neil L. Andersen: Tangata ʻo e Tuí” (ChurchofJesusChrist.org)

“ʻEletā Ronald A. Rasband: Ko ha Taki Mohu Talēniti, Tamai Moʻui Līʻoa” (ChurchofJesusChrist.org)

“ʻEletā Gary E. Stevenson: Ko ha Loto Mahino” (ChurchofJesusChrist.org)

“ʻEletā Dale G. Renlund: Ko Ha Tamaioʻeiki Talangofua” (ChurchofJesusChrist.org)

“ʻEletā Gerrit W. Gong: ʻOfa ki he ʻEikí pea Falala Kiate Ia” (ChurchofJesusChrist.org)

“ʻEletā Ulisses Soares: Ko ha Tangata Taʻe-ha-kākā” (ChurchofJesusChrist.org)

ʻOku ʻi he peesi uepisaiti ko ʻení ha ngaahi vitiō piokālafi nounou fekauʻaki mo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá.

Meet the Apostles (ChurchofJesusChrist.org)

Ko e hā ʻa e ngaahi taumuʻa ʻa e Kau ʻAposetoló?

Naʻe akoʻi ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Following Jesus: Being a Peacemaker

ʻOku fakakaukau [ha] niʻihi ʻoku fakamāmani ʻa e ngaahi taumuʻa ʻa e Kau Palesitenisī ʻUluakí pea mo e Kōlomu ʻo e Toko Hongofulu Mā Uá ʻo hangē ko e kau taki fakapolitikalé, fakapisinisí, mo fakafonuá.

Neongo ia, ka ʻoku maʻu hotau ngaahi fatongiá ʻi ha ngaahi founga kehe ʻaupito. ʻOku ʻikai ke fokotuʻu kitautolu pe fili mei ha ngaahi tohi kole. ʻOku ʻikai ha faʻahinga teuteu makehe fakapalofesinale, ʻoku ui kitautolu mo fakanofo ke fakamoʻoniʻi ʻa e huafa ʻo Sīsū Kalaisí ki he māmaní kae ʻoua kuo mole ʻetau moʻuí. ʻOku tau tukupā ke tāpuekina ʻa e mahamahakí, liʻekiná, loto mamahí, pea mo e masivá mo fakamālohia ʻa e puleʻanga ʻo e ʻOtuá. ʻOku tau feinga ke ʻiloʻi e finangalo ʻo e ʻEikí pea fakahaaʻi ia, tautefito kiate kinautolu ʻoku fekumi ki he moʻui taʻengatá. (Neil L. Andersen, “Muimui ʻia Sīsū: Hoko ko ha Tokotaha Faʻa Fakalelei,” Liahona, Mē 2022, 19)

ʻOku tokoni fēfē nai ʻa e ʻEikí ki he niʻihi fakafoʻituituí ʻo fakafou ʻi Heʻene Kau ʻAposetoló?

Naʻe vahevahe ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e aʻusiá ni:

Face to Face with Elder and Sister Bednar

Ko e Kau ʻAposetoló ko e kau tamaioʻeiki ʻa e ʻEikí. ʻOku nau fononga ke ʻaʻahi ki he kāingalotu ʻo e Siasí ʻi he funga ʻo e māmaní.

Ko e fuofua taimi ne u folau ai ko e ʻAposetoló, naʻá ku feʻiloaki mo ha tangata naʻe faingataʻa ke ne moʻui ʻaki ʻa e Lea ʻo e Potó. Naʻá ku talaange, “Kuo fekauʻi mai au ʻe he ʻEikí ki heni ke u ʻoatu ha pōpoaki mahino ngofua ʻaupito kiate koe: ‘Te ke lava pē ʻo fai ʻeni. ʻOku ou palōmesi atu te ke maʻu ʻEne tokoní ʻi hoʻo fehangahangai mo e pole ko ʻení.’”

ʻE fekauʻi nai ʻe he ʻEikí ha taha ʻo e Kau ʻAposetolo ʻe Toko Hongofulu Mā Uá ki he tafaʻaki ʻe taha ʻo e māmaní ke tokoniʻi ha tangata pē ʻe toko taha? Ko e talí ko e ʻio. ʻOkú Ne fai maʻu pē ia. (“Ko e Hā ʻOku Fai ʻe he Kau ʻAposetoló?,” Liahona, ʻEpeleli 2016, 66)

Ngaahi ʻEkitivitī Fakalahi ki he Akó

Tokāteline mo e Ngaahi Fuakava 18:27. Loto-fakamātoato moʻoni

Hili hono ʻiloʻi ʻa e ngaahi tefitoʻi moʻoni ʻi he lēsoní, fakakaukau ke fakaafeʻi ʻa e kau akó ke lau ʻa e fakamatala ki hono ui ʻe Sīsū Kalaisi ʻEne Kau ʻAposetoló ʻi he Mātiu 4:18–22, ʻo kumi ʻa e founga naʻe fakahaaʻi ai ʻe he kau tangata ko ʻení ʻa e “loto-fakamātoato moʻoní.” Te ke lava ʻo fai ha ngaahi fehuʻi hangē ko ʻení “Ko e hā naʻe mei fai ʻe he kau tangata ko ʻení kapau naʻe ʻikai ke nau ngāue loto-fakamātoato moʻoni?” pe “Ko e hā ha ngaahi founga ʻoku tatau ai ʻa e kau palōfita mo e kau ʻaposetolo ʻo e ʻaho ní mo e kau tangata toutai ko ʻení?” ʻE lava ke ke fakamanatu ki he kau akó ʻoku tukuange ʻe he kau ʻAposetoló ʻenau ngaahi ngāue maʻuʻanga moʻuí mo ha ngaahi meʻa mahuʻinga kehe ke ngāue taimi kakato maʻa Sīsū Kalaisi ʻi he toenga ʻo ʻenau moʻuí. Ko ha founga ʻeni ʻe taha ʻoku nau ngāue ai ʻi he loto-fakamātoato moʻoni. Fakakaukau ke vahevahe ha sīpinga mei he moʻui ʻa ha ʻAposetolo ʻi onopooni.

Palesiteni Russell M. Nelson

Fakakaukau ke mamata ʻi he “President Nelson: Prophet of God” (6:26). Fakaafeʻi ʻa e kau akó ke kumi ha fakamoʻoni ʻoku maʻu ʻe Palesiteni Lāsolo M. Nalesoni ʻa e loto-holi ke toʻo kiate ia ʻa e huafa ʻo Sīsū Kalaisí ʻi he loto-fakamātoato moʻoni.

ʻOku ou lava ʻo fanongo ki he leʻo ʻo e ʻEikí ʻaki hono ako ʻa e folofolá

Kapau ʻokú ke ongoʻi ʻe ʻaonga ke tukutaha e tokangá ʻi he ako folofola ʻa e kau akó, ʻoange ha taimi ki he kau akó ke lau ʻa e Tokāteline mo e Ngaahi Fuakava 18:34–36 pea vakaiʻi ʻenau akó. Fakaafeʻi kinautolu ke feinga ke ʻiloʻi ha founga ʻe taha te tau lava ai ʻo fanongo ki he leʻo ʻo e ʻEikí. Mahalo ʻe fiemaʻu ke ke fakamatalaʻi ange ʻoku ʻuhinga ʻa e “ngaahi leá ni” ki he folofolá. Fakakaukau ke fai ha ngaahi fehuʻi hangē “Ko e fē ha taimi kuó ke fanongo ai ki he leʻo ʻo e ʻEikí ʻi hoʻo ako ʻa e folofolá?” pe “Ko e hā ʻe lava ʻo tokoni ke tau fanongo lelei ange ai ki Hono leʻó ʻi heʻetau akó?”