Ngaahi Tali mei ha ʻAposetolo

Ko e hā ʻoku fai ʻe he Kau ʻAposetoló?

Fai ʻe ʻEletā David A. Bednar

ʻO e Kōlomu ʻo e Kau ʻAposetolo ʻe Toko Hongofulu Mā Uá

Mei he fakamafola fakamāmani Hangatonu ʻa ʻEletā mo Sisitā Petinaá.

Ko e kau ʻAposetoló ko e kau tamaioʻeiki ʻa e ʻEikí. ʻOku nau fononga ke ʻaʻahi ki he kāingalotu ʻo e Siasí ʻi he funga ʻo e māmaní.

Ko e fuofua taimi ne u folau ai ko e ʻAposetoló, naʻá ku feʻiloaki mo ha tangata naʻe faingataʻa ke ne moʻui ʻaki e Lea ʻo e Potó. Naʻá ku talaange, “Kuo fekauʻi mai au ʻe he ʻEikí ki heni ke u ʻoatu ha pōpoaki mahino ngofua ʻaupito kiate koe: ‘Te ke lava pē ʻo fai ʻeni. ʻOku ou palōmesi atu te ke maʻu ʻEne tokoní ʻi hoʻo fehangahangai mo e pole ko ʻení.”

ʻE fekauʻi nai ʻe he ʻEikí ha taha ʻo e Kau ʻAposetolo ʻe Toko Hongofulu Mā Uá ki he tafaʻaki ʻe taha ʻo e māmaní ke tokoniʻi ha tangata pē ʻe toko taha? Ko e talí ko e ʻio. ʻOkú Ne fai maʻu pē ia.

Ko e hā ʻa e ʻAposetolo?

ʻI he taimi naʻe ʻi he māmaní ai ʻa Sīsuú, naʻá Ne ui ha kau tangata ʻe toko 12 ke nau hoko ko Hono kau tokoni makehe. Naʻe ui kinautolu ko e kau ʻAposetolo. Kuó ne ui ʻa e kau ʻAposetoló ke hoko ko Hono kau tokoni makehe ʻi he kuongá ni. ʻOku nau fakamoʻoni ʻa Sīsū Kalaisi ki māmani kotoa. Ko ʻEletā Petinaá ko ha ʻAposetolo.