ʻAlu ʻo Tokoni ki Ai

Thomas Robbins, Kalefōnia, USA

Naʻá ku tuʻu laine ʻi ha pausa. Naʻe ʻi muʻa ʻiate au ha faʻē mo ha fānau iiki ʻe toko ua ʻo kole ha penisini paʻanga ʻe $3 mo ha ongo foʻi ʻaisikilimi vanila.

ʻI heʻeku fuofua hila atú, naʻá ku lava ʻo ʻiloʻi naʻe siʻisiʻi ʻenau paʻangá. Naʻe laʻivaʻe pē fānaú mo vala mahaehae.

Naʻá ku fanongo ki hono lau fakalautelau ʻe he fefiné ha meʻa hangē ha silini maká ʻi he funga kānitá ke totongi e fakataú.

Hili e totongi ʻeku ʻutú, ne u lue atu leva ʻo fakahilehila hifo ki he kā ʻa e faʻeé. Ko ha ākenga motuʻa ange ʻoku ngalingali ʻoku fuʻu kai penisini lahi.

Naʻá ku ongoʻi ha loto-ʻofa ki he faʻē ʻo e fānau ʻe toko ua ko ʻení, ka naʻá ku fakamoʻui ʻeku motopaikí peá u ʻalu au.

Teʻeki lava ha miniti ʻo ʻeku lele he hala lahí, kuo ongo mai ha leʻo kiate au: “ʻAlu ʻo tokoni ki ai.” Naʻe hoko tuʻo ua mai ʻa e ueʻí.

Naʻá ku kalokalo, ʻo fakakaukau mahalo kuo ʻosi mavahe ia. Ko e hā te u talaange ki aí?

Naʻe toe ongo mahino mai ʻa e leʻó ko hono tuʻo tolú: “ʻAlu ʻo tokoni ki ai!”

Naʻá ku afe leva ʻo foki ki he pausá, mo feinga ke ʻiloʻi pe ko e hā teu talaangé kapau ʻe kei ʻi ai.

Naʻá ku fakatokangaʻi ʻi heʻeku aʻu atú, naʻe kei ava ʻa e matapā ʻo ʻene kaá. Naʻe ʻi he tafaʻaki ʻo e fakaʻulí, kae fiefia ʻene ongo kiʻi tamaikí mo ʻena ʻaisikilimí ʻi he sea muí.

Ne u fai ha kiʻi lotu, ʻo fehuʻi ki he Tamai Hēvaní pe ko e hā ʻoku totonu ke u lea ʻakí. Naʻe pehē mai ʻe he leʻo tatau kiate au, “Fakafeʻiloaki koe pea fehuʻi ange pe ʻokú ne fie maʻu ha tokoni.” Naʻá ku ʻalu atu ki heʻene kaá peá u fakafeʻiloaki atu au. Naʻá ku fakamatala ange naʻá ku maʻu ha ongo ke ʻeke ange pe ʻokú ne fie maʻu ha tokoni.

Naʻe kamata ke ne tangi mo pehē mai, “Ko e toki ʻosi ʻeni ʻeku lotu kia Sīsū, ʻo kole kiate Ia ke Ne ʻomi muʻa ha taha ke tokoni mai.”

Kuo tali ʻe he Tamai Hēvaní ʻene lotú. Naʻá ku totongi ke ʻutu fonu ʻene kaá peá u ʻoange ha fika ʻo ha tokotaha ʻi heʻemau kōlomu kaumātuʻá, ʻokú ne fie maʻu ha kau ngāue he taimi ko iá. ʻOku ʻikai ke u ʻilo pe ko e hā e meʻa naʻe hoko ki he faʻē kei talavou ko ení ʻi he hili iá, ka ʻoku ou fakamālō naʻá ku muimui ki he ueʻí, ke tokoniʻi ia.