Sēniti maʻá e Tamai Hēvaní
ʻOku nofo ʻa e taha naʻá ne faʻú ʻi Kalolaine Tokelau, USA.
“Tauhi ʻa e ngaahi fekaú. Maluʻi kita he talangofuá”(Tohi Hiva ʻa e Fānaú, 68).
Naʻe lamu fakaʻosi ʻe ʻAna ʻene mā tōtilá. Naʻe molū pea ifo. Naʻe saiʻia ʻaupito ʻa ʻAna ʻi he mā tōtila ʻene kui fefiné. Ko e konga lelei taha ia ʻo e maʻu meʻatokoni pongipongí.
Naʻe sio pē ʻa ʻAna ki hono fufulu ʻe heʻene kui fefine ko ʻApuelá ʻa e ʻū peletí.
Naʻe hangē pē ko e ngaahi pongipongi kehé. Ka naʻe ʻi ai ha meʻa ʻe taha naʻe kehe.
Naʻe angamaheni ke faʻa luelue ʻa ʻApuela ki he māketí ke fakatau ha meʻakai. Ka naʻe ʻikai pehē ʻa e ʻahó ni. Naʻe ʻikai ke ʻi ai ha paʻanga ia he ʻahó ni ke fakatau ʻaki ha meʻakai.
“Ko e hā te ta kai ʻapongipongí?” Ko e fifili ia ʻa ʻAná.
Pea toki manatuʻi hake ʻe ʻAna. Naʻá ne ʻiloʻi ha feituʻu naʻe ʻi ai ha paʻanga! Naʻá ne fakatokangaʻi ʻanepō hono faʻo ʻe ʻApuela ha fanga kiʻi sēniti ki ha kiʻi konga tupenu lanu hinehina.
“ʻApuela, naʻe ngalo ia ʻiate koe? ʻOku ʻi ai pē hoʻo paʻanga ke fakatau mai ʻaki ha meʻakai.”
“Paʻanga hā?” Ko ʻApuela ange ia.
Naʻe lele ʻa ʻAna ke toʻo mai e paʻangá. Naʻá ne lulululuʻi e kiʻi kato sēnití. Ngahaha! Ngahaha!
Naʻe mamali pē ʻa ʻApuela. “ʻAna, ko ʻetau vahehongofulú ia. Ko e paʻanga ia ʻAʻana.”
“Ka ko e hā te tau kai ʻapongipongí?” Ko e fehuʻi ange ia ʻa ʻAná.
Pehē ange leva ʻa ʻApuela, “ʻOua te ke tokanga ki ai. ʻOku ou tui ʻe tokoniʻi kitaua ʻe he Tamai Hēvaní.”
Naʻe ʻoange ʻe ʻApuela ʻi he pongipongi hono hokó ʻa e mā tōtila koane fakaʻosí. Peá ne tangutu hifo leva ʻi hono seá. Naʻá ne tuitui ha ngaahi matalaʻiʻakau lanu kulokula ki ha kofu mo fai ha ngaahi talanoa ki he taimi naʻá ne kei siʻi aí. Naʻe ʻikai ke mata hohaʻa.
Fakafokifā kuo ongona ʻe ʻAna ha tukituki. Naʻá ne lele ke fakaava e matapaá.
“ʻE Petelō!”
Pehē ange ʻe Petelō, “Naʻá ku ongoʻi ʻoku totonu ke u ʻaʻahi mai kiate kimoua.” Naʻá ne hili ha milemila ʻe tolu ʻi he funga tēpilé. Ko e taha, naʻe ʻi ai e mahoaʻa koane ki he mā tōtila. Ko e taha, naʻe ʻi ai ʻa e kakanoʻi manu. Ko e taha, naʻe ʻi ai ha vesitapolo kei foʻou mei he māketí.
Naʻe pehē ange leva ʻa ʻApuela, “ʻOiauē, ʻe hoku foha angalelei. Te u ngaohi maʻau ʻeku supo mitipolo lelei tahá!”
Pehē ange leva ʻa Petelō, “Ko hoʻo supó ʻoku lelei taha ʻi māmaní.”
Naʻe kata ʻa ʻAna mo pasipasi hono nimá.
Peá ne taʻofi. Naʻe ʻi ai ha meʻa naʻá ne fie ʻilo. “ʻApuela, naʻá ke ʻosi ʻilo ʻe haʻu ʻa Peteloó he ʻahó ni? Ko e ʻuhinga nai ia naʻe ʻikai te ke hohaʻa aí?”
Pehē mai ʻa ʻApuela ia, “ʻIkai. Ko e taimi ʻoku totongi ai ʻeku vahehongofulú, ʻoku ou tui ʻe tāpuekina au ʻe he Tamai Hēvaní. Pea naʻá Ne fai ia!”
Naʻe fāʻofua ʻa ʻAna kia ʻApuela. Naʻá ne ongoʻi ʻo hangē ko e kiʻi taʻahine fiefia taha ia ʻi Mekisikoú. Naʻá ne tui mo ʻApuela ki he Tamai Hēvaní. Naʻe ʻikai ke ne kei faʻa tatali ke kai ʻa e supo ifo ʻa ʻApuelá!