Fakaʻohovale, Loto-Mamahi, & Palani ʻa e ʻOtuá
ʻOku nofo ʻa e taha naʻá ne faʻú ʻi ʻAlapēnia.
ʻI he aʻusia fakamamahi taha ʻo ʻeku moʻuí, ne u ongoʻi ai ʻa e ʻiate au ʻa e Tamai Hēvaní he lolotonga ʻeku fai fonongá.
Tā fakatātaaʻi ʻe David Curtis
Ko ha hengihengi ia ʻi he 2008, ʻi hono fafangu au ʻe heʻeku faʻeé ke u ʻalu ki he akó. Naʻá ku fiefia moʻoni he pongipongi ko iá, ka naʻe ʻikai ke u ʻilo ʻe iku ia ko e ʻaho kovi taha ʻo ʻeku moʻuí mo e taimi fakamuimui taha ke u feohi ai mo iá. Naʻe ʻikai ke ʻosi kotoa ʻeku ngaahi kalasí ʻi he ʻaho ko iá koeʻuhí he naʻe pau ke ʻave au ʻe ha kaungāmeʻa homau fāmilí mo talamai kuo taonakita ʻeku fineʻeikí. Naʻá ku kei taʻu 12 pē.
Naʻá ku fakakaukau, “ʻE anga fēfē haʻaku lava ʻo moʻui taʻe ʻi ai ʻeku faʻeé?” Ko hoku kaungāmeʻa lelei tahá ia.
Naʻá ku tangi ʻo lau māhina. Naʻe ʻikai ke u saiʻia he ʻalu ki he akó he naʻe kehe mai ʻa e anga ʻo e fānaú kehé kiate au mo nau fakaʻofaʻia ʻiate au. Naʻe ʻikai keu lavelaveʻiloa e meʻa ʻoku totonu ke u faí; ko e meʻa pē naʻá ku ʻiló, kuo pau ke u toʻa koeʻuhí ko e tokotaha kotoa.
ʻI ha ʻaho ʻe taha, hili ha māhina ʻe nima pe ono ʻo e mālōlō ʻeku fineʻeikí, naʻá ku ʻi hoku lokí toko taha pē ʻi he veʻe matapā sioʻatá, ʻo tangi, mo feinga ke mahino kiate au ʻa e ʻuhinga ʻoku ou ʻi heni aí. Fakafokifā pē kuó u ongona ha leʻo ʻi hoku ʻatamaí: “Ko hoku ʻofefine koe; he ʻikai ke u tuku ke ke faingataʻaʻia.” Naʻá ku ʻilo ko e ʻOtuá ia. Ka naʻe fakaʻohovale kiate au he naʻe ʻikai ke u toe tui kiate Ia, tautautefito ʻi heʻeku ongoʻi ko e ʻOtuá naʻá Ne toʻo ʻeku faʻeé meiate aú. Neongo naʻe ʻikai ke u ʻiloʻi ʻEne ʻuhingá, ka naʻá ku ongoʻi malu.
Naʻá ku ʻalu ki Loma ʻi ʻĪtali, ʻi ha ʻosi mei ai ha taʻu ʻe tolu, ke ʻaʻahi ki heʻeku faʻētangatá. Naʻá ne toutou talanoa mai fekauʻaki mo e siasi naʻe kau ki aí. Naʻá ne ʻave au ʻi ha Sāpate ʻe taha. Te u manatuʻi maʻu pē ʻeku fuofua lue hangatonu atu ki he ngaahi matapā ʻo e falelotú mo ongoʻi e ʻofa ʻa e Tamai Hēvaní ʻi heʻeku hū atú. Naʻe ongo ʻo hangē ko ʻapí.
Naʻá ku kamata maʻulotu leva he Sāpate kotoa pē pea mo e ngaahi ʻekitivitī kotoa he lolotonga e uiké. ʻOku ou saiʻia he feohi mo e toʻu tupu ʻo e Siasí. Naʻa nau ʻai ke u fiefia ange. Naʻa nau fakakaukau mo tui ki he ngaahi meʻa tatau ne u faí. Pea ʻi he ʻosi pē ha māhina ʻe tolu, kuo ʻosi hoku taimi ʻeveʻeva he faʻahitaʻu māfaná pea naʻe pau ke u foki ki ʻAlapēnia.
Ko e taimi naʻá ku foki mai aí, naʻá ku fakamatala ki heʻeku tangataʻeikí kau ki he ongo ne u maʻú mo e fiefia naʻá ku ongoʻi he lolotonga ʻa e taimi kotoa ko iá. Naʻe ʻikai ke saiʻia ia ai. Naʻá ne talamai he ʻikai ke ne tuku ke toe hoko atu ʻeku maʻulotú pe toe ako lahi ange ki ai. Naʻe pau ai ke u ʻūkuma ʻi he taʻu ʻe tolu hono hokó kae ʻoua kuo hokosia hoku taʻu 18. Pea te u lava leva ʻo fili pē maʻaku ke u papitaiso.
Naʻe tāpuekina au ʻi he lolotonga ʻo e taimi ko ʻení ʻaki ha kakai tokolahi naʻa nau talanoa mai kau ki he meʻa ne nau ako ʻi he lotú he Sāpate kotoa. Naʻe kau ʻi he kakai ko iá ʻa Sitefanī. Naʻe nofo ʻi ʻĪtali ʻi he taimi naʻe kau ai ʻeku faʻētangatá ki he Siasí, ka kuó ne foki mai ki hono ʻapí ʻi he ʻIunaiteti Siteití. Naʻe fakakaukau ʻeku faʻētangatá ʻe lelei ke mau fetohiʻaki, pea naʻá ku fakakau ai ia ko haʻaku kaungāmeʻa ʻi he Feisipuká.
Neongo naʻe teʻeki ai ke ma fetaulaki, ka te u houngaʻia maʻu pē ʻi heʻene tokoniʻi au ke fakatupulaki ʻeku tuí mo ako lahi ange ki he ongoongolelei ʻo Sīsū Kalaisí. Naʻe faitohi mai kiate au ʻi he meimei Sāpate kotoa pē ʻo fakamatala mai ʻa e meʻa kotoa naʻá ne ako ʻi he lotú pea mo tali ʻeku ngaahi fehuʻí. Ko ha kaungāmeʻa mamae ia kiate au.
Fakaʻosí, hili ha ngaahi taʻu ʻo ʻeku kītakí, naʻá ku papitaiso ai ʻi he ʻosi pē ha ʻaho ʻe ua mei he hoko hoku taʻu 18. Pea ʻe vavé ni pē haʻaku vahevahe ʻa e fiefia ne u maʻu ʻi he ʻaho ko iá mo ʻeku faʻeé, koeʻuhí he te u papitaiso maʻana. ʻOku ou ʻilo te ne laukau ʻaki e moʻui kuó u filí.
ʻOku ou ongoʻi naʻe tāpuekina au ʻe he Tamai Hēvaní koeʻuhí he naʻa ma feʻao mo Ia he lolotonga e vaaʻihala kotoa ʻo e fonongá, ʻi ha ngaahi meʻa lahi. Naʻe pau pē ke u tatali mo faʻa kātaki koeʻuhí he naʻe ʻi ai ʻEne palani kiate au. Ko Ia pē naʻá Ne ʻomi e ivi ke u matuʻuaki ʻa e ngaahi faingataʻa naʻá ku fehangahangai mo iá. Naʻá Ne ʻi ai maʻu pē, ʻo tokoniʻi au ke u fiefia ange.