Ngaahi Fehuʻi mo e Tali
“Naʻe fakakata ʻaki au ʻi he ʻakó koeʻuhí ko ʻeku kau ʻi he Siasí. ʻOku ou ʻilo ʻoku fie maʻu ke u taukaveʻi ʻeku tuí, ka ʻoku fuʻu faingataʻa! ʻE founga fēfē nai haʻaku loto-toʻa feʻunga?”
ʻOkú ke moʻoni ʻoku fie maʻu ke ke loto-toʻa ke fehangahangai mo e tūkunga ko ʻení. Ko hono fakakātoá, kuo fekau ʻe Sīsū Kalaisi ke, “Tuʻu hake pea ulo atu, koeʻuhí ke hoko ʻa hoʻomou māmá ko ha fuka ki he ngaahi puleʻangá” (T&F 115:5). ʻE lava pē ke ʻuhinga pe ʻikai ʻuhinga ʻa e tuku hoʻomou māmá ke ulo atú ke ke fakafepakiʻi ʻa kinautolu ʻoku nau manukiʻi koé.
Tatau ai pē pe ko e fē tuʻungá, ka te ke lava ʻo tukuange ki he filí ke ne ueʻi koe ke ke toe lelei ange. ʻI hoʻo ngāue mālohi ko ia ke fakamālohia hoʻo fakamoʻoní, te ke lava ai ʻo fakatupulaki ʻa e faʻahinga loto-toʻa fakalongolongo koē te ne tokoniʻi koe ke ke lea pe hokohoko atu pē hoʻo fai e meʻa ʻoku totonú, tatau ai pē kapau ʻoku manukiʻi koe ʻe he niʻihi kehé.
ʻOku lava ke fakatupu ʻita ʻa e fakamatalilí, ka ke manatu te ke lava ʻo lotu ke fakafonu ʻaki koe e ʻofa faka-Kalaisí ke ongoʻi ai ʻe he niʻihi kehé ʻa e ʻofa ʻa Kalaisí ʻo fakafou ʻiate koe (vakai ki he Molonai 7:48). Koeʻuhí ʻoku kehekehe ʻa e tūkunga kotoa pē, fekumi ki he fakahinohino ʻa e Laumālié ke ke ʻiloʻi e founga ke ke talia ai ʻa e tūkunga takitaha ʻi ha founga faka-Kalaisi.
Mahalo ko e lelei tahá ke ke talanoa fakatāutaha mo kinautolu kuo nau fakakata ʻaki koé, ʻo fakatatau mo e tūkungá, pe ko hano tukunoaʻi pē e ngaahi fakafilí ka ke kei moʻui ʻaki pē hoʻo tuí. Kapau ʻoku ʻikai fie fanongo ʻa e niʻihi kehé ia ki he meʻa ʻokú ke fie talaangé, ʻe ala hoko hoʻo sīpinga ʻo e angaʻofá, faʻa fakamolemolé, mo e loto fakamātoató, ko e pōpoaki lelei taha te ke lava ʻo ʻoange.
Fakahaaʻi e Loto-Toʻa Moʻoní
Mahalo he ʻikai tuku e fakakata ʻaki koé koeʻuhí he ʻokú ke loto toʻa feʻunga ke kole ange ke tuku, ka te nau ala tuku ia ʻi he taimi te ke fakahaaʻi ai hoʻo loto-toʻá ʻi heʻene fotu atu mei hoʻo moʻuí—ko e tokotaha Siasi koe. ʻE tomuʻa huhulu hifo e fakamoʻoni ia ʻa ʻetau Tamai Hēvaní kiate koe, ʻoku ʻikai ke ke fakatokangaʻi, pea ʻofa pē te ne fakaʻā honau matá ki he ongoongolelei kuo fakafoki maí ʻi hoʻo moʻuí.
Palaiti U., taʻu 17, Siteiti ʻImó, Naisīlia
Maʻu ha Mālohi ʻi he Fanga Kiʻi Meʻa Īkí
ʻOku mahuʻinga ʻa e lotú mo e ʻaukaí he te na tokoniʻi koe ke ke lava fehangahangai mo e ngaahi fakakata mo e ngaahi pole ʻi he akó, ʻo hangē pē ko e fehangahangai ʻa Sīsū Kalaisi mo e ngaahi manuki lahi ʻi he taimi naʻá Ne ʻi heni ai ʻi māmaní. Te na tokoni ke ke fakatupulaki ha ʻofa mo ha kātaki lahi ange ki he kakaí.
Uolotā C., taʻu 15, Saieni, Pēlū
Ke Tākiekina Kimoutolu ʻi he Lotu
Ne u hoko ʻi ha taimi fuoloa ko e tokotaha Siasi pē ʻe taha ʻi hoku ʻapi akó. Naʻe hangē naʻe mahino au ki hoku ngaahi kaungāmeʻa ofi tahá, ka naʻe fakakata ʻaki au ʻe he toenga ʻo hoku ngaahi kaungāmeʻa ʻi he akó. Naʻá ku lotu ʻi ha ʻaho ʻe taha peá u ongoʻi keu talanoa mo e taha ʻo kinautolu naʻá ne fakaʻaiʻai ʻa e toengá ke nau fakakata ʻaki aú. Naʻá ku fakamatala ange naʻe ʻikai keu ʻita ai, ka naʻá ku kole ange ke ne fai mai ʻa e fakaʻapaʻapa ʻokú ne loto ke maʻú. Naʻe taukapoʻi maʻu pe au ʻe ha taha ʻo ʻeku kau faiakó ʻi ha taimi pē naʻá ne sio ai ki ha meʻa ʻoku hoko, ʻi he hili ʻene fanongo ki heʻema talanoá. ʻOku ou ʻilo ʻe ʻiate kimoutolu ʻa e ʻEikí ʻi hoʻomou talanoa mo e kakai pehení.
Sānela S., taʻu 14, Pangasinani, ʻOtu Filipainí
Fakatupulaki Hoʻo Fakamoʻoní
ʻUluakí, maʻu ha fakamoʻoni mālohi ki he moʻoni ʻokú ke fie vahevahe mo e niʻihi kehé. Peá ke maʻu leva ha ʻofa ki he kakai ʻoku nau fakakata ʻaki koé pea ʻoua ʻe fakakikihi, koeʻuhí he ʻoku ʻikai ʻaupito poupouʻi ʻe he ʻOtuá ʻa e fakakikihí (vakai ki he 3 Nīfai 11:29). Ko e mahuʻinga tahá, feinga ke ʻiate koe maʻu pē ʻa e Laumālié. ʻE tokoniʻi koe ʻe he Laumālié ke ke maʻu ha ʻofa mo ha loto-toʻa lahi ange, pea te Ne ngaohi hoʻo ngaahi leá ke mālohi.
Sūlia F., taʻu 19, Heisi, Siamane
ʻOfa Ki Homou Ngaahi Filí
Kuó u ʻosi ʻi he ngaahi tūkunga tatau. Kapau ʻokú ke tui mo fakavaivaiʻi koe, ʻe tāpuekina ʻaki koe ʻa e mālohi mo e tui ʻokú ke fie maʻú ke “ʻofa ki homou ngaahi filí, tapuakiʻi ʻa kinautolu ʻoku kapeʻi ʻa kimoutolú, … pea hūfia ʻa kinautolu” (Mātiu 5:44). ʻOku ou tapou atu ke mou fakatotolo ʻi he ngaahi folofolá ki ha ngaahi tali ki he founga ke ke mālohi aí. Lotu ʻi he taimi ʻoku ke ongoʻi tuēnoa ai ʻi hoʻo tuí. ʻOku pehē ʻe he Loma 8:31, “Ko e hā te tau lea ʻaki ki he ngaahi meʻa ní? Ka kuo kau ʻa e ʻOtuá [mo kitautolu], pea ko hai ʻe angatuʻu kiate kitautolu?” ʻOku ʻi ho tafaʻakí ʻa e ʻOtuá! ʻOku malava ha meʻa pē.
Leikeni T., taʻu 15, ʻIutā, USA
ʻOua Te Ke Ilifia
Faʻa talanoa lahi ange kau ki hoʻo tui fakalotú pe fakataumuʻa hoʻo fai ha ngaahi meʻa ke ʻohake ai. Naʻá ku ʻi ha tūkunga tatau peá u tohi ai ʻi heʻeku kato āfeí ʻo pehē, “ʻOku ou Saiʻia ʻAupito Heʻeku Hoko ko ha tokotaha [Māmonga].” ʻI heʻeku fai iá, naʻá ku fakaava ai e matapā ki ha ngaahi faingamālie ngāue fakafaifekau pea mo fakahaaʻi ki he kakaí ʻoku ʻikai te u ilifia ke fakahā ʻoku ou kau ki he Siasí. Ko e hā pē ha meʻa ʻokú ke fai, ʻoua naʻa tuku ke nau uesia koe. Hūfia kinautolu pea mo koe foki. ʻE vave pē haʻo fakatokangaʻi, kapau te ke tokanga ki hono fakahaofi e laumālie ʻo e niʻihi kehé, he ʻikai ke ke fuʻu ilifia ke talaange ke nau ʻiloʻi ʻa e moʻoni ʻo e ongoongolelei ʻa ʻetau Tamaí.
Savana P., taʻu 14, Tekisisi, USA