Momeniti ʻo e Kau Faifekau Matuʻotuʻá
Ko e taha ʻo e ngaahi founga lelei taha ki he ngaahi hoa mali matuʻotuʻá ke fatu ʻaki ha ngaahi manatu fakaʻofoʻofá, ko haʻanau ngāue fakafaifekau fakataha.
ʻI he taimi ʻoku ngalo ai ha meʻa ʻi hotau kaungāmeʻa ʻoku taʻu 60 pe 70, ʻoku tau faʻa tukuhua ʻo fakaʻuhingaʻi e vahaʻa taimi loto ngalongalo ko iá ko e “haʻu pē hoholó.” Ka ʻoku ou fie talanoa ki ha faʻahinga momeniti kehe ʻo e hoholó—ko ha momeniti fakaʻofoʻofa ʻe fakangalongataʻa. Ko e taimi ia ʻoku fakatokangaʻi ai ʻe ha ongo faifekau mali matuʻotuʻa ʻokú na fakahoko e meʻa ʻoku finangalo ʻa e ʻEikí ke na fakahokó. ʻOkú na fakatokangaʻi leva he momeniti fakangalongataʻa ko iá:
-
ʻOkú na maʻu ha taukei he moʻuí ke vahevahe mo ha ngaahi talēniti, pōtoʻi ngāue mo e mahino ki he ongoongoleleí te na lava ʻo fakaʻaongaʻi ke faitāpuekina ai e niʻihi kehé.
-
ʻOku hoko ʻena tā sīpingá ko ha tāpuaki ki heʻena fānaú mo e makapuná.
-
ʻI heʻena tokoní ʻoku na fokotuʻu ai ha ngaahi feohi fakakaumeʻa taʻengata.
-
ʻOku toe mālohi ange ʻena nofo malí he ʻaho kotoa pē.
-
ʻOku fakafiefia e tokoni ʻi Hono huafá.
Ko Hono Fatu ʻo e Ngaahi Momenití
ʻE hoku ngaahi kaungāmeʻa matuʻotuʻa, ʻoku totonu ke lolotonga fatu ʻe kimoutolu ha ngaahi momeniti pehē. Fakakaukau ki he talanoa ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo ha meʻa naʻe fai ʻe ha ongo faifekau mali matuʻotuʻa ʻokú na ngāue ʻi Sile. Naʻe mālōlō ha taha e mātuʻa ʻo ha ʻeletā. Naʻe mamaʻo ʻa e palesiteni fakamisioná ʻo ʻikai ai ké ne lava ʻo aʻu vave ki he faifekaú.
Naʻe pehē ʻe ʻEletā Hōlani, “Ka naʻe ʻi ai ha ongomātuʻa faifekau [matuʻotuʻa] angalelei naʻe lolotonga ngāue ʻi he ʻēlia ko iá.” “Naʻá na nofo mo e faifekau ko iá ʻo ʻofeina mo fakafiemālieʻi ia kae ʻoua kuo lava e palesiteni fakamisioná ʻo fetuʻutaki fakatāutaha mo ia. Naʻe ʻi ai ha kau faifekau lelei kei talavou ʻi hotau misioná, ka naʻe ʻikai lava ʻe ha faifekau talavou tāutaha ʻo fai e meʻa naʻe lava ʻe he ongo mātuʻa ko iá ʻo fakahokó.”1
Ko hona pōtoʻi ngāue ʻi he momeniti ko iá ko hano fakahaaʻi pē ha ongoʻi fiekaungāmamahi ʻi he taimi naʻe fie maʻu aí. Naʻe ʻikai ke na tokanga kinaua ke leaʻaki ha toe lea kehe ka ko e lea pē ʻo e ʻofa Faka-Kalaisí. Naʻe ʻikai ke na hohaʻa ko e ʻikai ke na ʻi he faiʻaho ʻa hona mokopuná pe tāpuakiʻi ʻo ha pēpeé, neongo e mahuʻinga e ngaahi meʻá ni. Naʻá na tokanga pē ke na ʻi he feituʻu ʻe lava ʻo fakaʻaongaʻi ai kinaua ʻe he ʻEikí ke faitāpuekina e moʻui ʻa e taha ʻo ʻEne fānaú. Pea koeʻuhí he naʻá na loto fiemālie, naʻá Ne tuku ke na fakafofongaʻi Ia.
ʻOku Tātātaha Ke Faingamālie ʻa e Ngāue Tokoní
Ko hono moʻoní, ʻoku ʻikai faingamālie ia ki ha faifekau matuʻotuʻa ke mavahe mai ʻapi. Naʻe pehē pē ʻa Siosefa Sāmita, Pilikihami ʻIongi, Sione Teila, pe ko Uilifooti Utalafi. Naʻe ʻi ai haʻanau fānau mo e makapuna, pea ne nau ʻofa ʻi honau ngaahi fāmilí hangē ko ia ʻoku tau faí. Ka naʻa nau toe ʻofa foki ki he ʻEikí mo fie tauhi kiate Ia. Tokanga ha ʻaho te tau feʻiloaki ai mo e kakai toʻa ne nau tokoni ke fokotuʻu e kuonga fakakosipeli ko ʻení. ʻI heʻetau fai iá, te tau fiefia he naʻe ʻikai ke tau fekumi ke toitoi he taimi naʻe totonu ke tau ngāue aí.
ʻE saiʻia ange ha niʻihi ia ke ngāue tokoni lolotonga e kei nofo ʻi ʻapí. Hili ha pākālava ʻa ʻAsa Sūmaka Nalesoni (ʻikai haʻane fekauʻaki) ʻo heka saliote teketeke aí, naʻá ne hohaʻa naʻa ʻikai hoko ʻa ʻene fakaʻamu ʻi heʻene moʻuí ke ʻalu ʻo ngāue fakafaifekau mo hono husepāniti ko Toní. Naʻe talanoa ange hono kaungāʻapí ʻi he faletukuʻanga koloa ʻo e pīsopé ʻo fekauʻaki mo ʻene ngāue fakafaifekau he Siasí. Naʻe fakalotolahia ia pea ne na talanoa ai mo e supavaisa ʻi he falé, fakafonu ʻena foomu fakaongoongoleleí, pea naʻe ui ke na ngāue ʻi ha ʻaho ʻe ua ʻi he uike ʻi ha fale tukuʻanga koloa ofi ki honau ʻapí.
Naʻe pehē ʻe ʻAsa Nalesoni, “ʻOku faingofua ke te fakafiefiemālie pē ʻo pehē, ‘ʻOku ʻikai ke toe fie maʻu au ia.’” “Ka ʻoku ou ongoʻi he taimí ni ʻoku fie maʻu au. Pea ko ha fakamoʻoni ia kiate au.”
ʻOku Fie maʻu Moʻoni Koe
Kapau ʻe ʻahiʻahiʻi koe ke ke fakakaukau ʻoku ʻikai ke toe fie maʻu koe, tuku ke u fakamahino atu ʻoku fie maʻu koe. ʻOku ʻikai ha palesiteni fakamisiona ia he Siasí te ne taʻe fie maʻu ha ongomātuʻa mali ke ngāue ʻi hono misioná. ʻOku fakamālohia ʻe he kakai matuʻotuʻá e kau faifekau ʻeletā mo e kau sisitā kei talavoú. ʻOku nau fai ha poupou ʻokú ne tokoniʻi e niʻihi kehé ke nau ngāue lelei ange ʻi honau ngaahi fatongia takitaha. Pea ʻokú ke fakakaukau atu ʻa e mahuʻinga ki ha taki ne toki mēmipa pē ʻi ha ngaahi taʻu siʻi, ke faingofua ʻene maʻu e tokoni ʻa ha kāingalotu taukei ʻi he siasí? ʻOku faʻa hoko moʻoni ʻa e kau faifekau mali matuʻotuʻá ko ha tali ki he ngaahi lotu ʻa e kau pīsope mo e kau palesiteni fakakoló.
ʻOku mau poupouʻi atu ʻa e kau palesiteni fakamisioná ke nau kumi ki ha kau faifekau mali matuʻotuʻa ke tokoni ʻi hono feau e ngaahi fie maʻu honau misioná. ʻOku totonu ke kumi e kau pīsopé ki ha mātuʻa mali ʻe lava ʻo ngāué. ʻOku lisi ʻe he LDS.org ʻa e ngaahi faingamālie ngāue tokoni maʻá e mātuʻa malí. Ka ko hono fakakātoá, ʻe lava ʻa e ngaahi mātua malí ni ʻo tūʻulutui ʻo fehuʻi ki he Tamai Hēvaní e taimi totonu ke na ngāue fakataha aí. ʻI he kotoa e ngaahi meʻa ʻe fie maʻu ki aí, mahalo ko e meʻa mahuʻinga tahá e maʻu ko ia ha holi ke fai e ngāué (vakai, T&F 4:3).
ʻI heʻeku vikia ko ia e ngāue ʻa e kau faifekau matuʻotuʻá, ʻoku ou ʻiloʻi ʻoku ʻi ai ha tokolahi ʻoku nau fie ngāue ka ʻoku ʻikai ke nau lava ʻo fai ia. ʻOku ʻi ai ʻa e ngaahi fakangatangata ʻo makatuʻunga ʻi he taʻu motuʻá pe tuʻunga moʻui mahamahaki ʻa ia ʻoku fie maʻu ke vakaiʻi fakalelei, pehē foki ki he ngaahi fie maʻu mahuʻinga ʻa e fāmilí. ʻI he taimi ʻoku mālohi ai ʻa e holi ke ngāué ka ʻoku ʻi ai ha ngaahi fakangatangata ʻokú ne taʻofi hoʻo fai iá, ʻe lava ke fai ʻe ha niʻihi e ngāué maʻau, ka ke fai ʻe koe ʻa e tokoni fakapaʻangá.
Ngaahi mātuʻa mali matuʻotuʻa, neongo pe ko hai koe pe ko e fē feituʻu ʻoku ke ʻi aí, kātaki ʻo lotua ʻa e faingamālie ko ʻení ke fatu ʻaki ha ngaahi momeniti fakafiefia ʻo e ngāue fakafaifekau fakatahá. ʻE tokoni ʻatu ʻa e Tamai Hēvaní ke ke ʻilo ʻa e meʻa te ke lava faí.