Nonga ʻi Hoku Lotó

Fai ʻe Carol F. McConkie

Tokoni ʻUluaki ʻi he Kau Palesitenisī Lahi ʻo e Kau Finemuí

Naʻá ku mamata ʻi hoku taʻu valú ki he palōfitá, kia Palesiteni Tēvita O. Makei (1873–1970). Naʻe meʻa ange ke fakatapui ha falelotu foʻou ʻa e Siasí ʻi Palemaila, Niu ʻIoke, USA. Naʻe ʻalu hoku fāmilí ki he fakatapuí. Naʻe ō mai foki mo ha kakai tokolahi kehe. Naʻa mau fiefia kotoa ke mamata ki he palōfitá!

Naʻá ku fuʻu kei siʻi, pea naʻe faingataʻa ai ke u sio takai ki he kakaí kotoa. Ka ʻoku ou kei ongoʻi pē e ʻofa ʻa Palesiteni Makeí. Ne u mamata ʻi ha kiʻi taimi nounou ki hono louʻulu hinaá mo hono fofonga ʻofá. Peá u fakakaukau, “Ko e fōtunga ʻeni e palōfita ʻa e ʻOtuá.” Naʻá ku ʻosi lau fekauʻaki mo e kau palōfitá ʻi he folofolá, ka ko e fuofua taimi ʻeni ke u mamata ai ki ha palōfita pe Taki Māʻolunga. Naʻá ku toki ʻiloʻi ta ko e kau palōfitá ko ha kakai moʻoni. Pea ʻoku nau ʻofa ʻiate kitautolu! Te u manatuʻi maʻu ai pē ʻa e ʻofa mo e nonga ne u ongoʻi ʻi he ʻaho ko iá.

Naʻá ku maʻu ha toe aʻusia ʻi hoku taʻu 11, naʻe tokoni ke u ongoʻi ha nonga ʻi hoku lotó. Naʻe teu fai e konifelenisi fakasiteikí, pea ne u hiva ʻi he kuaea ʻa e siteikí. Naʻá ku fuʻu fiefia lahi! Naʻá ku tui ha sote hinehina fakaʻofoʻofa, mo ongoʻi makehe ʻaupito. Naʻe toʻo ʻa e fakalea ʻo e hiva ne mau hivaʻí mei he Sione 14:27, “ʻOku ou tuku ʻa e melinó kiate kimoutolu, ko ʻeku melino ʻoku ou foaki kiate kimoutolú: ʻoku ʻikai hangē ko e foaki ʻa māmaní, ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia.”

Naʻe ongo moʻoni ʻa e ngaahi lea ko iá ki hoku lotó, pea talu mei ai mo ʻeku manatuʻi maʻu pē. Ko e taimi naʻá ku hivaʻi ai ʻa e ngaahi lea ko iá, naʻá ku ʻiloʻi ʻoku moʻoni. Naʻá ku ongoʻi ʻoku talamai ʻe he Laumālie Māʻoniʻoní ʻoku tokoni e muimui kia Sīsū Kalaisí ke tau ongoʻi e melinó. Talu mei ai, ko e taimi kotoa pē ʻoku ou fekuki ai mo ha faingataʻa, ʻoku haʻu ki heʻeku fakakaukaú ʻa e potu folofolá ni mo ne ʻomi kiate au ʻa e melinó. Kuo faitāpuekina ʻe he moʻoni ko ia naʻá ku ako ʻi heʻeku kei siʻí ʻa e kotoa ʻo ʻeku moʻuí.