Tukupā ke Tuku
ʻOku nofo e taha naʻá ne faʻú ʻi Niu ʻIoke, USA.
Naʻe ʻikai fakalakalaka ʻeku poto he tā pianó, neongo e taʻu lahi ʻo ʻeku ako taá. Naʻe pehē ʻe heʻeku ongomātuʻá te u lava ʻo tuku makatuʻunga ʻi ha ʻuhinga pē ʻe taha: Naʻe pau ke u ako ha foʻi himi ʻe 50.
Naʻá ku hū fakaʻita atu ki homau falé, fonu ʻa loʻimata, ʻi ha ʻosi ha lēsoni tā piano fakamamahi ʻe taha. Ko e taʻu ʻaki ia hono fā ʻeku ako tā pianó, pea ko ʻeku toki lava ia ʻo tā ʻa e “Twinkle, Twinkle, Little Star.” Kuo toutou feinga ʻeku faiakó ke maʻu ha meʻa lelei ke talamai fekauʻaki ʻi he kovi ʻeku tā pianó, ka naʻe toe kovi ange ʻeku loto mamahí. Naʻe totongi ʻe heʻeku ongomātuʻá ha paʻanga ki ha ngaahi kalasi ako tā piano naʻe ʻikai ke u fie maʻu pe loto ki ai.
Naʻá ku fie maʻu ke loto ʻeku ongomatuʻá ke tuku. Naʻá ku kōlenga ange, “Kātaki.” “Te u fai ha meʻa pē. Hā pē ha meʻa?”
Naʻá na pehē ʻi he hili haʻana alea ʻiate kinaua pē, “Kapau te ke ako ha foʻi himi ʻe 50, te ma fakaʻatā ke ke tuku ā.”
Naʻá ku kamata ako tā leva, he taimi pē ko iá. Naʻá ku fuʻu fie maʻu ʻaupito ke tuku peá u loto ai ke fakamoleki ha toe taimi lahi ange ʻi he pianó. Naʻe feʻunga mo ha meimei māhina ʻe taha peá u toki poto hono tā ʻa e ʻuluaki foʻi himí ʻa ia ko e, “Fakamālō Ki he ʻOtuá” (Ngaahi Himí, fika 10). Naʻá ku kei taumuʻa pē ke tuku, pea naʻá ku hokohoko atu pē he ako taá.
Ka naʻe hoko ha meʻa mālie: naʻe fakaʻau ke faingofua ange hono tā ʻo e ngaahi himí. Naʻá ku ongoʻi fiefia ange ʻi he lolotonga ʻo e uiké. Naʻá ku fakatokangaʻi ʻoku ou ngūnguuʻi e ngaahi himí ʻi he lolotonga ʻo e ʻahó pea mo hiva leʻo lahi ange ʻi he houalotu sākalamēnití.
Naʻe fāifai pea ʻikai ke u toe lau ʻa e lahi ʻo e ngaahi himi naʻá ku ʻiló. Naʻá ku fakatokangaʻi ʻi he fakaʻau ke u poto ange ʻi he pianó, naʻá ku lava ʻo ako lelei ha himi foʻou ʻoku teʻeki ʻosi ha miniti ʻe 30.
Ko e taimi naʻe faifai peá u tānaki fakataha kotoa ai kinautolú, kuo laka hake ʻeku akó ʻi he foʻi himi ʻe 50. Pea naʻe ʻikai pē ha meʻa ke toe tuku ai ʻeku tā pianó. Naʻá ku loto lahi ange ʻi he tuʻunga ʻo ʻeku lava ʻo taá pea naʻá ku ongoʻi ʻa e mālohi ʻo e ngaahi himí ʻi heʻeku moʻuí.
ʻOku hangē ʻa e ngaahi himí ko e folofolá; ʻoku nau tala ʻa e moʻoní. Ko e taimi ʻoku ou tā ai ʻa e ngaahi himí, ʻoku ou ongoʻi ʻo hangē ʻoku ou keinanga ʻi he folofolá. Kuo hoko ʻeku ako ke tā ʻa e ngaahi himí ko ha kamataʻanga hono langa ʻeku fakamoʻoní mo e ako ʻo e moʻoní. ʻOku ou fakatokangaʻi ʻoku ou fakalau e fakalea ʻo ha ngaahi himi kehekehe ke tokoniʻi au he lolotonga ʻo e ʻahó. Kuo fakamālohia ʻeku fakamoʻoní ʻe he tā pianó pea mo fakaava ha ngaahi matapā kiate au ʻi ha potu pē te u ʻalu ai.