Akoʻi Kinautolu ke nau Lau e Tohi ʻa Molomoná

Emilien Rioux, Kiupeki, Kānata

Lolotonga ʻema ngāue fakafaifekau ʻi he Misiona Suisalani Sinivá, naʻe ui pea vaheʻi au ke u hoko ko e palesiteni fakakolo, pea ui hoku uaifí ke hoko ko e palesiteni Fineʻofá. Naʻá ma ngāue fakataha ʻaki homa mālohi kotoa ke fakaakeake ʻa e kolo langalanga haké. Neongo naʻe fokotuʻu ʻi he 1960 tupu, ka kuo teʻeki ke toe fai ha papitaiso ʻi he koló ʻi ha ngaahi taʻu lahi pea teʻeki ha toe faifekau mei ai kuo ʻave ki he malaʻe ʻo e ngāue fakafaifekaú ʻi he taʻu ʻeni ʻe 15.

Naʻe mahino ʻaupito ne mau fie maʻu e tokoni ʻa e ʻEikí kae lava ke fakaleleiʻi ʻa e ngaahi faingataʻa ne fehangahangai mo e koló. Hili haʻaku lotu fekauʻaki mo e ngaahi palopalema ʻo e koló, naʻe talamai ʻe he Laumālié kiate au, “Akoʻi ʻa e kāingalotú ke nau lau e Tohi ʻa Molomoná, pea te ke lavameʻa ai.”

Tuai e kemo, kuo mau palani ke fakatukupaaʻi ʻa e kāingalotú kotoa ke nau kamata lau ʻa e Tohi ʻa Molomoná.

Naʻe hoko ai ha ngaahi ola fisifisimuʻa. Naʻe toe foki mai ʻa e melinó mo e Laumālié ki he koló. Naʻe kau mai ha ngaahi fāmili foʻou ki he Siasí. Naʻe fakalotoa ha kiʻi talavou ʻe heʻene fie ngāué, pea ʻalu ʻo ngāue fakafaifekau. Naʻe fakamālohia ha ngaahi nofo-mali faingataʻaʻia ʻe niʻihi, pea fakaʻau ke vāofi ange ʻa e ngaahi fāmilí. ʻOku kei hokohoko atu e fakalakalaka ʻa e kiʻi kolo ko ʻení he ʻahó ni.

Naʻá ma kaungā siotonu mo e kāingalotu ʻo e koló ki he mālohi fakaofo ʻo e Tohi ʻa Molomoná. Ko e maka-tuʻuloto moʻoni ia ʻo ʻetau tui fakalotú pea mo ʻetau fakamoʻoni ki he ongoongoleleí pea mo Sīsū Kalaisí. ʻOku tau ʻofa ai ʻaki e kotoa hotau lotó. Ko ha maʻuʻanga tokoni ia ʻo e ʻilo taʻe-fakangatangata mo taʻe-ueʻiá.

Naʻe akoʻi kimaua ʻe he meʻá ni ko e Tohi ʻa Molomoná ko e founga pau taha ia ki hono tokoniʻi hotau ngaahi tokouá mo e tuofāfiné ke nau mavahe mei he ngaahi ʻata ʻo e fakapoʻuli fakalaumālié ʻa ia ʻokú ne ʻufiʻufi ʻa e māmaní. ʻOku ʻomi ʻe he tohí ni ʻa e nongá, nēkeneká, fiefiá, mo ha holi lahi ke muimui ki he Fakamoʻui ko Sīsū Kalaisí.