Ngaahi Talanoa ʻo e Tohi ʻa Molomoná
ʻOku Papitaiso ʻe ʻAlamā ha Kakai Tokolahi
Mei he Mōsaia 16–18.
Ko ʻApinetaí ko ha palōfita. Naʻá ne akoʻi ʻa e kakaí ke nau tui kia Sīsū pea taʻofi hono fai ʻo e ngaahi meʻa ʻoku koví. Naʻe ʻita ha tuʻi angakovi naʻe ui ko Noa ʻia ʻApinetai. Naʻe ʻikai fie fakatomala ʻa Noa.
Naʻe tui ha tangata naʻe ui ko ʻAlamā kia ʻApinetai. Naʻá ne hola ʻo toitoi mei he tuʻi ne houhaú. Naʻá ne ongoʻi tautea ʻi hono fai e ngaahi meʻa halá, peá ne fakatomala, ʻo tatau tofu pē mo e meʻa ne akoʻi ʻe ʻApinetaí.
Naʻe omi ha kakai tokolahi ke fanongo ki he akoʻi ʻe ʻAlamā fekauʻaki mo Sīsū Kalaisí. Naʻe akoʻi ʻe ʻAlamā kapau te nau fakatomala pea muimui kia Sīsū, ʻe lava ke papaitaiso kinautolu.
Naʻe pasipasi ʻa e kakaí ʻi he fiefia. Naʻa nau palōmesi ke fakafiemālieʻi ʻa e niʻihi kehé. Naʻa nau palōmesi ke ʻofa ki he ʻOtuá mo fakahā ki he niʻihi kehé ʻo kau kiate Ia. Naʻa nau mateuteu ke papitaiso.
Naʻe papitaiso tahataha ʻe ʻAlamā ʻa e kakaí. Naʻa nau mātuʻaki fiefia ʻaupito ke kau ki he Siasi ʻo Sīsuú.
ʻI he taimi ʻoku tau papitaiso aí, ʻoku tau fai ʻa e ngaahi fuakava tatau ne fai ʻe he kakai ʻo ʻAlamaá. Pea ʻoku tau hoko foki ai ko e konga ʻo e Siasi ʻo Sīsuú!