Ko e Fekumi ki he Ngaahi Meʻafoaki Fakalaumālié

Fai ʻe Palesiteni Siaosi Q. Kēnoni (1827–1901)

Tokoni ʻUluaki ʻi he Kau Palesitenisī ʻUluakí

Mei he The Latter-day Saints Millennial Star, 23 ʻo ʻEpeleli, 1984, 258–61; naʻe ʻai ke tatau ʻa e fakaʻilonga leá mo e fakamataʻitohi lahí.

Ko homou toko fiha nai ʻoku fekumi ki he ngaahi meʻafoaki ko ʻeni kuo talaʻofa ʻe he ʻOtuá ke foakí?

ʻE lava ke vahevahe ki he tangata mo e fefine kotoa ʻi he Siasi ʻo Kalaisí ʻa e ngaahi meʻafoaki ʻo e Laumālie ʻo e ʻOtuá ʻo fakatatau ki heʻenau tuí mo e finangalo ʻo e ʻOtuá. …

Ko homou toko fiha nai … ʻoku fekumi ki he ngaahi meʻafoaki ko ʻeni kuo talaʻofa ʻe he ʻOtuá ke foakí? Ko homou toko fiha nai, ʻoku kole, ʻi hoʻomou punou ʻi he ʻao hoʻomou Tamai Hēvaní mo homou fāmilí pe ʻi ha ngaahi potu lilo, ke foaki kiate kimoutolu ʻa e ngaahi meʻafoaki ko ʻení? Ko homou toko fiha nai, ʻoku kole ki he Tamaí, ʻi he huafa ʻo Sīsuú, ke fakahā tonu Ia kiate kimoutolu ʻo fou ʻi he ngaahi mālohi mo e ngaahi meʻafoaki ko ʻení? Pe ʻokú ke fononga pē mei he ʻaho ki he ʻaho, ʻo hangē ha matapā ʻoku vilo ʻi hono ngaahi hinisí, ʻo taʻe-fakaʻaongaʻi ha kihiʻi tui, kae loto fiemālie pē ke papitaiso mo hoko ko ha mēmipa ʻo e Siasí pea fakafiefiemālie ai pē, mo fakakaukau kuo pau ho fakamoʻuí koeʻuhí he kuó ke ʻosi [papitaiso]? …

… ʻOku ou ʻilo ʻoku finangalo ʻa e ʻOtuá ke fakamoʻui ʻa e mahakí, ʻokú Ne finangalo ke foaki ʻa e meʻafoaki ʻo e ʻiloʻi ʻo e ngaahi laumālié, ʻa e meʻafoaki ʻo e potó, ʻo e ʻiló pea mo e kikité, pea mo ha ngaahi meʻafoaki kehe ʻe ala fie maʻu. Kapau ʻoku ʻi ai hatau niʻihi ʻoku ʻikai haohaoa, ko hotau fatongiá ke lotua e meʻafoaki te ne ʻai ke tau haohaoá. ʻOku ʻi ai nai haʻaku ngaahi fehālaaki? ʻOku ou fonu ai. Ko e hā hoku fatongiá. Lotu ki he ʻOtuá ke Ne foaki mai ha ngaahi meʻafoaki te ne fakatonutonu ʻa e ngaahi fehālaaki ko ʻení. Kapau ko ha tangata ʻita au, ko hoku fatongiá ke lotua ha manavaʻofa, ʻa ē ʻoku kātaki fuoloa mo angaʻofá. Ko ha tangata meheka nai au? Ko hoku fatongiá ke kumia ʻa e manavaʻofá, ʻa ē ʻoku ʻikai meheká. ʻOku pehē mo e kotoa ʻo e ngaahi meʻafoaki ʻo e ongoongoleleí. ʻOku fakataumuʻa kinautolu ki he meʻá ni. ʻOku ʻikai totonu ke pehē ʻe ha taha, “ʻIo, he ʻikai ke u lava ʻe au; ko hoku natulá pē ia ʻoʻoku” ʻOku ʻikai fakatonuhiaʻi ia heni, he ko e ʻuhinga ia kuo talaʻofa ai e ʻOtuá ke foaki ha ivi ke fakatonutonu e ngaahi meʻa ko ʻení, pea mo foaki e ngaahi meʻafoaki te ne fakangata kinautolú. Kapau ʻoku ʻi ai ha tangata ʻoku masiva ʻi he potó, ko hono fatongiá ia ke kole ki he ʻOtuá ha poto. ʻE tatau ai pē mo ha toe meʻa. Ko e fokotuʻutuʻu ia ʻa e ʻOtuá fekauʻaki mo Hono Siasí. ʻOkú Ne fie maʻu Hono Kāingalotú ke nau hoko ʻo haohaoa ʻi he moʻoní. Koeʻuhí ko e taumuʻá ni, ʻokú Ne ʻomi mo foaki ai ʻa e ngaahi meʻafoakí ni kiate kinautolu ʻoku fekumi ki aí, kae lava ke nau hoko ko ha kakai haohaoa ʻi he funga ʻo e māmaní, neongo e lahi honau ngaahi vaivaí, he kuo ʻosi talaʻofa ʻe he ʻOtuá ke foaki ʻa e ngaahi meʻafoaki ko ia ʻoku fie maʻu ki heʻenau haohaoá.