Lēsoni 27: Tokāteline mo e Ngaahi Fuakava 18

Tokāteline mo e Ngaahi Fuakava 18:1–13

“Manatu, ʻOku Mahuʻinga Lahi ʻa e Ngaahi Laumālié ʻi he ʻAo ʻo e ʻOtuá”

ʻI hono tali e fekumi ʻa e kau taki ʻo e Siasí ʻi he kuonga muʻá ki he finangalo ʻo e ʻEikí kau ki he founga ke langa hake ai Hono Siasí, naʻe foaki ʻe he ʻEikí ha fakahā kia Siosefa Sāmita, ʻŌliva Kautele, mo Tēvita Uitemā ʻa ia ʻoku lekooti ʻi he Tokāteline mo e Ngaahi Fuakava 18. Naʻe akoʻi ʻe he ʻEikí ki he kau tangatá ni ha ngaahi moʻoni mahuʻinga fekauʻaki mo e mahuʻinga ʻo hotau laumālié. ʻE lava ke tokoni ʻa e lēsoni ko ʻení ke ongoʻi ʻe he kau akó ʻoku mahuʻinga lahi ʻa honau laumālié ʻi he ʻao ʻo e ʻOtuá.

Ngaahi ʻEkitivitī Ako ʻOku Ala Fakahokó

Ko hotau mahuʻingá

Fakakaukau ke kamata ʻa e kalasí ʻaki hano hiki ʻi he palakipoé ʻa e fakamatala taʻe-kakato ko ʻení. Fakaafeʻi ʻa e kau akó ke nau fakakaukau ki ha ngaahi founga moʻoni ke fakakakato ʻaki. Fehuʻi ange pe ko e hā ʻe ongoʻi peheni ai ʻa e toʻu tupú.

ʻI he māmani ʻoku tau moʻui aí, mahalo te tau ongoʻi ʻoku ʻahiʻahiʻi pe lōmekina kitautolu ke fakatefito hotau mahuʻingá ʻi he _______________.

Pe, ko hoʻo hiki ʻa e ngaahi foʻi lea ko ʻení ʻi he palakipoé: Fōtungá, Ngaahi Lavameʻá, mo e Koloá. Fehuʻi ki he kau akó pe ko e hā ka ongoʻi ai ʻe ha toʻu tupu ʻe niʻihi ʻoku ʻahiʻahiʻi pe lōmekina kinautolu ke fakatefito honau mahuʻingá ʻi he ngaahi meʻa ko ʻení. Fehuʻi ange pe ko e hā mo ha ngaahi meʻa kehe ʻe ala ongoʻi ʻe he toʻu tupú ʻoku ʻahiʻahiʻi kinautolu ke nau fakaʻaongaʻi ko ha makatuʻunga ki honau mahuʻingá.

Fakaʻaongaʻi ha kiʻi taimi ke ke fakalaulauloto ai ki he ongo ʻokú ke maʻu fekauʻaki mo ho mahuʻinga fakatāutahá pea mo hono ʻuhingá. Ko e hā ʻokú ke fakahehema ki ai ke fakatefito ai ho mahuʻingá? ʻI hoʻo ako ʻi he ʻaho ní, kumi ha ngaahi moʻoni ʻe lava ʻo tokoni atu ke ke ongoʻi ho mahuʻingá ʻi he ʻao ʻo e ʻOtuá.

ʻOku akonaki ʻa e ʻEikí fekauʻaki mo e mahuʻinga ʻo e ngaahi laumālié

ʻE lava ke tokoni ʻa e fakamatala fakanounou ko ʻení ke mahino ki he kau akó ʻa e puipuituʻa ki he ngaahi veesi te nau ako ʻi he Tokāteline mo e Ngaahi Fuakava 18.

ʻI Sune ʻo e 1829, naʻe maʻu ai ʻe Siosefa Sāmita, ʻOliva Kautele mo Tēvita Uitemā ha fakahā ʻoku ʻiloa ko e Tokāteline mo e Ngaahi Fuakava 18. Naʻe fekauʻaki ʻa e fakahaá mo hono ui ʻo e Kau ʻAposetolo ʻe toko hongofulu mā ua ʻi he ngaahi ʻaho fakaʻosí pea mo hono langa hake ʻo e Siasí. Makehe mei he ngaahi fakahinohino ko ʻení, naʻe vahevahe ʻe he ʻEikí kia ʻŌliva mo Tēvita ha ngaahi moʻoni mālohi fekauʻaki mo hotau mahuʻingá.

Ko e Tokāteline mo e Ngaahi Fuakava 18:10–11 ko ha potufolofola fakataukei fakatokāteline ia. Fakakaukau ke fakaafeʻi ʻa e kau akó ke nau fakaʻilongaʻi ʻa e ngaahi potufolofola fakataukei fakatokāteliné ʻi ha founga makehe koeʻuhí ke nau lava ʻo maʻungofua kinautolu.

Lau ʻa e Tokāteline mo e Ngaahi Fuakava 18:9–13, ke vakai ki he meʻa naʻe akoʻi ʻe he ʻEikí fekauʻaki mo hotau mahuʻinga kiate Iá.

• Ko e hā naʻá ke saiʻia ai pe ako mei he ngaahi veesi ko ʻení?

ʻI he vahevahe ʻa e kau akó, hiki ʻi he palakipoé ʻa e ngaahi moʻoni naʻa nau maʻú. Ko ha ngaahi moʻoni ʻeni ʻe niʻihi ʻe lava ke nau ʻiloʻi:

ʻOku mahuʻinga lahi ʻa e ngaahi laumālié ʻi he ʻao ʻo e ʻOtuá.

ʻOku lahi fau hoku mahuʻingá ko ia naʻe finangalo lelei ai ʻa Sīsū ke mamahi pea pekia kae lava ke u fakatomala.

Mahalo ʻe tokoni ke ʻiloʻi ʻe nofo taha ange ʻa e lēsoni hokó (“Tokāteline mo e Ngaahi Fuakava 18:11–16”) ʻi he fiefia ʻoku maʻu ʻe he Fakamoʻuí ʻi he taimi ʻoku tau fakatomala aí.

• ʻOku fakahaaʻi fēfē nai ʻe he mamahi mo e pekia ʻa e Fakamoʻuí maʻatautolú ʻa hotau mahuʻinga kiate Iá?

• ʻE tokoni fēfē nai kiate kitautolu ke fakatefito hotau mahuʻingá ʻi he ʻofa ʻa e Tamai Hēvaní mo e Fakamoʻuí kiate kitautolú kae ʻikai ko e ngaahi hingoa fakamāmaní?

Fakaloloto ʻa e mahino ʻokú ke maʻú

Ke tokoni ke fakaloloto ʻa e mahino ʻa e kau akó ki he ngaahi moʻoni mei he Tokāteline mo e Ngaahi Fuakava 18:10–11, fakakaukau ke ʻoange ki he kau akó ha tatau ʻo e laʻipepa tufa ko ʻení pea fakaafeʻi kinautolu ke fakakakato ha taha pe fakatouʻosi ʻo e ongo fili ke akó. Fakaʻaliʻali ʻa e ongo fili ko ʻení pe ʻoange ia ko ha laʻipepa tufa.

Manatuʻi hotau mahuʻinga ki he ʻOtuá

Fili ha taha pe fakatouʻosi ʻo e ongo filí ni ke tokoni ke mahino lelei ange kiate koe peá ke houngaʻia ʻi ho mahuʻinga ki he ʻOtuá.

Fili 1: Ako fekauʻaki mo e Fakalelei ʻa Sīsū Kalaisí mo fakalaulauloto ki Heʻene ʻofa kiate koé. Te ke lava ʻo lau ha niʻihi ʻo e ngaahi veesi ko ʻení: ʻĪsaia 53:3–5; Luke 22:41–44; Sione 3:16–17; 1 Kolinitō 6:11, 19–20; ʻAlamā 7:7, 10–13. Te ke lava foki ʻo kumi ha ngaahi veesi kehekehe ke ke ako.

Fakakaukau ke lekooti ʻa e ngaahi potufolofola fakafekauʻaki ʻokú ke fie manatuʻí. Te ke lava ʻo hiki kinautolu ʻi hoʻo folofolá ʻi he tafaʻaki ʻo e Tokāteline mo e Ngaahi Fuakava 18:10–11, hiki ia ʻi hoʻo tohinoa akó, pe fakaʻaongaʻi hoʻo Gospel Library app ke faʻu ʻaki ha ngaahi fakaʻilonga pe fehokotakiʻanga.

Fili 2: Ako ʻa e ngaahi meʻa kuo akoʻi ʻe he kau taki ʻo e Siasí fekauʻaki mo hotau mahuʻinga ki he ʻOtuá. Fakaʻaongaʻi ʻa e Gospel Library pe ngaahi maʻuʻanga tokoni kehé ke maʻu ha ngaahi fakamatala pe lea ʻoku mahuʻingá. Te ke lava ʻo fekumi ki he ngaahi foʻi lea hangē ko e “mahuʻinga” pe “ʻofa ʻa e ʻOtuá” ke tokoni ke ke maʻu ha ngaahi maʻuʻanga tokoni. Ko e fakamatala ko ʻeni ʻa Sisitā Soi D. Sōnasi, ko e Palesiteni Lahi mālōlō ʻo e Palaimelí, ko ha sīpinga ia ʻe taha ʻo e meʻa te ke ala maʻú.

Tuku muʻa ke u fakamahinoʻi ʻa e fiemaʻu ke fakafaikehekeheʻi ʻa e ongo foʻi lea mātuʻaki mahuʻinga ko ʻení: mahuʻingá mo e tāú. ʻOku ʻikai ke na tatau. ʻOku ʻuhinga ʻa e mahuʻinga fakalaumālié ki heʻetau fakamahuʻingaʻi kitautolu ʻi he founga ʻoku fakamahuʻingaʻi ʻaki ʻe he Tamai Hēvaní kitautolú, kae ʻikai ko e founga ʻa e māmaní. Naʻe fakapapauʻi hotau mahuʻingá kimuʻa pea tau toki haʻu ki he māmaní. “Ko e ʻofa ʻa e ʻOtuá ʻoku taʻe-fakangatangata pea ʻe tuʻuloa ʻo lauikuonga.”

ʻI he tafaʻaki ʻe tahá, ʻoku maʻu ʻa e tāú ʻi he talangofuá. Kapau te tau faiangahala, ʻoku tau taʻe-taau, ka ʻoku ʻikai ʻaupito ke tau taʻe-mahuʻinga! ʻOku hokohoko atu pē ʻetau fakatomalá mo ʻetau feinga ke hangē ko Sīsuú, ka ʻoku kei kakato pē hotau tuʻunga mahuʻingá. Hangē ko e akonaki ʻa Palesiteni Pilikihami ʻIongí: “Ko e laumālie taʻe-feʻunga taha ʻi he funga ʻo e māmaní ʻi he taimi ní … ʻoku mahuʻinga tatau ia mo e ngaahi māmaní.” Te tau kei mahuʻinga pē ki he Tamai Hēvaní ʻo tatau ai pē. (Joy D. Jones, “Mahuʻinga Taʻe-Hano-Tatau,” Liahona, Nōvema 2017, 14)

Hili ha taimi feʻunga, ʻoange ha faingamālie ki he kau akó ke vahevahe ʻa e meʻa naʻa nau akó. ʻE lava ke nau ʻuluaki vahevahe tauhoa, pea vahevahe leva e kau ako ʻe loto fiemālie ke vahevahe mo e kalasí.

Fokotuʻu ha ʻātakai ʻoku fakaʻapaʻapaʻi ai ʻa e taha kotoa pea ʻiloʻi ʻoku fakamahuʻingaʻi ʻenau tokoní: Kumi ha ngaahi faingamālie ke fakamālō ai ki he kau akó ʻi heʻenau ngaahi talí pea ʻai ke nau ʻiloʻi ʻokú ke mahuʻingaʻia ʻi he ngaahi founga ʻoku nau kau mai aí. Ki ha ako lahi ange ki he founga ke fakahaaʻi ʻa e mahuʻingá, vakai ki he ako ʻoku ui ko e “Fokotuʻu ha ʻātakai ʻoku fakaʻapaʻapaʻi ai e taha kotoa pea ʻiloʻi ʻoku fakamahuʻingaʻi ʻenau tokoní.” ʻOku maʻu ʻa e ako ko ʻení ʻi he Fakatupulaki e Ngaahi Taukei ʻa e Faiakó.

ʻE ala ʻaonga ki he kalasí kapau naʻe fakatahatahaʻi ʻi he palakipoé ha lisi ʻo e ngaahi maʻuʻanga tokoni ʻoku saiʻia taha ai ʻa e kaungā akó. ʻE lava ke hiki ʻe he kau akó ʻa e lisi ko ʻení ko ha ngaahi maʻuʻanga tokoni fakataautaha.

Ko hono fakafelāveʻi ia ki hoʻo moʻuí

ʻE lava ke tokoni hono vahevahe ʻo e ngaahi talanoa pe aʻusia ʻi onopōní ke ongoʻi ʻe he kau akó honau mahuʻinga ki he ʻOtuá. Kimuʻa pea kole ki he kau akó ke aleaʻi ʻa e fehuʻi ko ʻení, fakakaukau ke vahevahe hoʻo sīpinga pē ʻaʻau ki he founga kuó ke ongoʻi ai ho mahuʻinga ki he ʻOtuá. Te ke lava foki ʻo huluʻi ʻa e foʻi vitiō “The Hope of Godʼs Light” (6:46), ʻoku maʻu ʻi he ChurchofJesusChrist.org, pea fakaafeʻi ʻa e kau akó ke kumi ʻa e founga naʻe ʻiloʻi ai ʻe ha tangata hono mahuʻingá ʻi he ʻao ʻo e ʻOtuá.

• Ko e hā ha ngaahi aʻusia mei hoʻo moʻuí pe moʻui ʻa e niʻihi kehé kuo tokoni ke ke ongoʻi ʻoku mahuʻinga lahi ho laumālié ʻi he ʻao ʻo e ʻOtuá?

Fakaafeʻi ʻa e kau akó ke nau fakahoko ha meʻa ke fakakaukau lahi ange ai ki honau mahuʻingá ʻi he ʻao ʻo e ʻOtuá ʻi he uike ʻe taha pe ua ka hokó. ʻOange ha taimi maʻanautolu ʻi he kalasí ke teuteu ai ʻa e meʻa te nau fakahokó. ʻOku kau ʻi he lisi ko ʻení ha ngaahi fakakaukau te ke lava ʻo vahevahe. ʻE muimuiʻi ʻe he lēsoni “Siviʻi Hono 2 Hoʻo Akó” ʻa e ngaahi aʻusia ʻa e kau akó ʻi he ʻekitivitī ko ʻení.

Fakapapauʻi ʻa e founga te ke fakalaulauloto ai ki ho mahuʻinga ʻi he ʻao ʻo e ʻOtuá ʻi he ngaahi uike siʻi ka hokó. Ko ha ngaahi founga ʻeni ʻe niʻihi te ke lava ʻo fakahoko ai ʻeni:

• Faʻu ha fakamanatu pea tuku ia ʻi ha feituʻu te ke lava ʻo sio maʻu pē ki ai. ʻE lava pē ko ha pousitā pe puipuituʻa ʻo e telefoní (smartphone background) ʻoku kau ai ha ʻīmisi pea mahalo mo ha ngaahi foʻi lea mei he folofolá.

• Lotu ʻi he pongipongi mo e pō kotoa pē ke mahino lelei ange ʻa e founga ʻoku ʻafio mai ai hoʻo Tamai Hēvaní kiate koé.

• Palani ha taimi pau ke ke tohi ai ʻi hoʻo tohinoá fekauʻaki mo ho mahuʻingá.

• Fakaʻaongaʻi ha taimi lahi ʻi hono lau mo ako lahi ange ki ho tāpuaki fakapēteliaké. Fakakaukau ki he founga ʻe kehe ai hoʻo fakahoko iá ke mahino moʻoni kiate koe ʻa e meʻa ʻoku finangalo hoʻo Tamai Hēvaní ke ke ʻiloʻi mo ongoʻi fekauʻaki mo koé.

Fakamoʻoni ki he ʻofa ʻa e ʻOtuá mo e mahuʻinga taʻe-fakangatangata ʻo e tokotaha ako takitaha, ʻa ia ʻoku fakahaaʻi ʻi he Fakalelei ʻa e Fakamoʻuí.

Ako Ma‘uloto

Mahalo te ke fie tokoni ki he kau akó ke ako maʻuloto ʻa e potufolofola fakataukei fakatokāteliné mo e kupuʻi lea mahuʻinga ʻo e folofolá lolotonga ʻa e lēsoni ko ʻení pea toe vakaiʻi ia ʻi he ngaahi lēsoni ʻi he kahaʻú. Ko e kupuʻi lea mahuʻinga ʻi he potufolofolá ʻi he Tokāteline mo e Ngaahi Fuakava 18:10–11 ko e “ʻOku mahuʻinga lahi ʻa e ngaahi laumālié ʻi he ʻao ʻo e ʻOtuá.” ʻOku maʻu ʻa e ngaahi fakakaukau ki he ngaahi ʻekitivitī ako maʻulotó ʻi he naunau fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”

Ngaahi Maʻuʻanga Tokoni Kehé

ʻOku fakahaaʻi fēfē mai ʻe he ʻOtuá ʻa e lahi hotau mahuʻinga kiate Iá?

Naʻe fakamahinoʻi ʻe ʻEletā D. Toti Kulisitofāsoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻa ʻoku foaki mai ʻe he Tamai Hēvaní ʻa ia ʻoku fakahaaʻi ai hotau mahuʻinga kiate Iá:

Ko e meʻa ʻoku foaki mai ʻe he Tamai Hēvaní maʻatautolú ko Ia mo Hono ʻAló, ko ha vā fetuʻutaki vāofi mo tolonga mo Kinaua ʻo fakafou ʻi he ʻaloʻofa mo e fakalaloa ʻa Sīsū Kalaisi, ko hotau Huhuʻí. Ko e fānau kitautolu ʻa e ʻOtuá, ʻoku vaheʻi ki he moʻui taʻe-faʻa-maté mo e moʻui taʻengatá. Ko hotau ikuʻangá ke hoko ko Hono ngaahi ʻea-hoko, ko e “kau [ʻea-hoko] fakataha mo Kalaisi” [Loma 8:17]. (D. Todd Christofferson, “Ko Hotau Vā Fetuʻutaki mo e ʻOtuá,” Liahona, Mē 2022, 79)

Ko e hā ʻa e mahuʻinga ʻo ha laumālié?

Fakakaukau ke mamata ʻi he “My Brother’s Keeper” mei he taimi 1:54 ki he 4:24 ke vakai ki ha sīpinga ʻo ha tali maʻongoʻonga ki he fehuʻi ko ʻení.

Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:

ʻOku tau ʻilo mei he fakahā ʻi onopōní, “ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá” [Tokāteline mo e Ngaahi Fuakava 18:10]. He ʻikai ke tau lava ʻo tala ʻa e mahuʻinga ʻo ha laumālie, ʻo tatau mo e ʻikai ke tau lava ʻo fua e lahi ʻo e ʻunivēsí. Ko e tokotaha kotoa pē ʻoku tau fetaulaki mo iá ko ha TMA [Tokotaha Mahuʻinga ʻAupito] ia ki heʻetau Tamai Hēvaní. …

Naʻe tangi ha fefine naʻe fuoloa ʻene feʻao mo e ʻahiʻahí mo e mamahí, ʻo pehē, “Kuó u toki ʻiloʻi ʻoku ou hangē pē ha laʻi paʻanga ʻe 20 pepá—ʻo manusinusi, mahaehae, ʻuli, ngaohikovia mo likoliko. Ka ʻoku ou kei paʻanga pē ʻe 20. ʻOku ʻi ai hoku mahuʻinga. Neongo ʻa e ʻikai ke u matamataleleí, pea neongo kuo ngaohikovia au, ka ʻoku kei kakato pē hoku mahuʻingá, ko e paʻanga ʻe 20.” (Dieter F. Uchtdorf, ““Ko Hoku Ongo Nimá Kimoutolu”” Liahona, Mē 2010, 69)

Naʻe toe fakamatala foki ʻe Palesiteni ʻUkitofa ʻo pehē:

Pea neongo te tau vakai atu ki he lahi ʻo e ʻunivēsí mo pehē, “Ko e hā ʻa e tangatá ʻi hono fakafehoanaki ki he nāunauʻia ʻo e fakatupú?” Naʻe folofola tonu pē ʻa e ʻOtuá ko kitautolu ʻa e ʻuhinga naʻá Ne fakatupu ai ʻa e ʻunivēsí! Ko ʻEne ngāué mo Hono nāunaú—ʻa e taumuʻa ʻo e ʻuniveesi fakaofó ni—ke fakahaofi mo hākeakiʻi ʻa e faʻahinga ʻo e tangatá [vakai, Mōsese 1:38–39]. ʻI hono fakalea ʻe tahá, ʻoku fakatupu kotoa ʻa e lahi ʻo ʻitānití, ʻa e ngaahi nāunaú mo e ngaahi meʻa lilo ʻo e taʻe-fakangatangata ʻa e ʻataá mo e taimí, maʻá e lelei ʻa e kakai matelie hangē ko koe mo aú. Naʻe fakatupu ʻe heʻetau Tamai Hēvaní ʻa e ʻunivēsí ke tau ala aʻusia ai ʻa e ngaahi meʻa ʻoku tau malavá ʻi heʻetau hoko ko Hono ngaahi foha mo e ngaahi ʻofefiné.

Ko ha lea fakatātā ʻeni kau ki he tangatá: ko e meʻa noa pē ʻa e tangatá ʻi hono fakafehoanaki ki he ʻOtuá; neongo iá, ʻoku tau mahuʻinga lahi ki he ʻOtuá. Neongo ʻe hā ko e meʻa noa pē kitautolu ʻi hono fakafehoanaki ki he fakatupu taʻe-fakangatangatá, ka ʻoku vela ʻi hotau fatafatá ʻa e māfana ʻo e afi taʻengatá. ʻOku tau maʻu ʻa e talaʻofa taʻe-mahakulea ʻo e hākeakiʻí—ko e ngaahi maama taʻe-hano-ngataʻanga—ʻe lava ke tau maʻu. Pea ko e fakaʻamu ia ʻa e ʻOtuá ke tokoniʻi kitautolu ke tau aʻu ki ai. (Dieter F. Uchtdorf, “ʻOkú ke Mahuʻinga Kiate Ia,” Liahona, Nōvema 2011, 20)

Ngaahi ʻEkitivitī Fakalahi ki he Akó

Ko ha founga ʻe taha ke kamata ʻaki ʻa e lēsoní

Fakaʻaliʻali ha ngaahi meʻa pe fakatātā kehekehe ʻo ha meʻa hangē ko e lolé, valá, telefoni toʻotoʻó, pe ʻū kā, pea ʻeke ki he kau akó pe ko e hā ʻa e lahi ʻo e paʻanga te nau loto-fiemālie pe ko ha niʻihi kehe ke totongi ki he meʻa takitaha. Tokoni ke mahino ki he kau akó ʻe lava ke makatuʻunga ʻa e mahuʻinga ʻo ha meʻa mei he meʻa ʻoku loto-fiemālie ha taha ke ne totongi ki aí.

Fakaafeʻi leva ʻa e kau akó ke lau ʻa e Tokāteline mo e Ngaahi Fuakava 18:10–11 ke vakai ki honau mahuʻingá mo e meʻa naʻe loto-fiemālie ha taha ke totongi [ki he ngaahi meʻa ko iá].

Vitiō

Fakakaukau ke huluʻi ʻa e vitiō “Am I Good Enough?” (3:28), ʻa ia ʻoku fakahaaʻi ai ha ngaahi hohaʻa ʻe ala maʻu ʻe he toʻu tupú fekauʻaki mo honau mahuʻingá mo e founga ke ikunaʻi ai ʻa e ngaahi hohaʻa ko iá.

Ngaahi Tūkungá

Hili hono tokoniʻi ʻa e kau akó ke ʻilo mo mahino kiate kinautolu ʻa e ngaahi moʻoni ʻi he lēsoni ko ʻení, fakakaukau ke fakaʻaliʻali ʻa e ngaahi tūkunga ko ʻení. Pe te ke fakaafeʻi ʻa e kau akó ke nau fakakaukau ki ha ngaahi tūkunga angamaheni kehe ʻe ʻikai mahino pe ongoʻi ai ʻe he toʻu tupú honau mahuʻingá. Fehuʻi ange pe ʻe tokoni fēfē nai ki he toʻu tupu takitaha ko ʻení ke fai ha liliu ʻi hono ʻiloʻi ʻa e moʻoni fekauʻaki mo honau mahuʻingá.

ʻOku fakafehoanaki maʻu pē ʻe Maia ia ki he niʻihi kehé mo ongoʻi ʻoku nau talēnitiʻia mo mohu tāpuekina ange ʻiate ia.

ʻOku faʻa hohaʻa maʻu pē ʻa Keli ki he fakakaukau ʻa e niʻihi kehé fekauʻaki mo iá.

ʻOku fakaʻaongaʻi ʻe Tafu ha taimi lahi mo ha paʻanga lahi ʻi heʻene feinga ke tauhi ʻa e ngaahi ākenga ʻi hono ʻapiakó koeʻuhí ke sio ʻa e niʻihi kehé kiate ia ʻoku feʻunga mo e ākengá.

Fai ha tohi

ʻI he ofi ki he fakaʻosinga ʻo e lēsoní, tokoni ki he kau akó ke nau fakakaukau ki he founga te nau lava ai ʻo vahevahe ʻa e meʻa naʻa nau akó mo ha taha kehe. ʻE lava ke nau fakalaulauloto ki ha ngaahi fakakaukau mo ha ngaahi ongo ʻa ha taha ʻoku ʻikai mahino kiate ia hono mahuʻinga ki he ʻOtuá. Fakaafeʻi ʻa e kau akó ke fakaʻaongaʻi ʻa e meʻa kuo nau ako mo ongoʻi ʻi he lēsoni ko ʻení ke fai ha tohi nounou ki he tokotaha ko ʻení. ʻE lava ke nau fakakau ai ha ngaahi kupuʻi lea mei he folofolá pe ngaahi maʻuʻanga tokoni kehe (fakataha mo ʻenau ngaahi potufolofola fakamoʻoní) kae pehē ki ha ngaahi aʻusia fakataautaha. Kapau ʻoku fakakaukau ʻa e kau akó ki ha tokotaha pau, ʻe lava ke nau fakakaukau ke ʻoange kiate ia ʻa e tohí pe ʻave ia ʻi ha pōpoaki telefoni (text).