“Akoako Fakataukei Fakatokāteline 2: Ko e Mahino mo Hono Maʻu ʻo e ʻIlo Fakalaumālié,” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Akoako Fakataukei Fakatokāteline 2,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 30: Tokāteline mo e Ngaahi Fuakava 18
Akoako Fakataukei Fakatokāteline 2
Ko e Mahino mo Hono Maʻu ʻo e ʻIlo Fakalaumālié
ʻE lava ke tokoni ʻa e fakataukei fakatokāteliné ki he kau akó ke langa ʻa e makatuʻunga ki heʻenau moʻuí ʻia Sīsū Kalaisi mo ʻEne ongoongoleleí. ʻE maʻu ʻe he kau akó ʻi he lēsoni ko ʻení ha ngaahi faingamālie ke akoako hono ako maʻuloto ʻo e ngaahi potufolofola fakataukei fakatokāteliné pea mo e tokāteline ʻoku nau akoʻí kae pehē ki hono ako mo fakaʻaongaʻi ʻa e ngaahi tefitoʻi moʻoni fakalangi ki hono maʻu ʻo e ʻilo fakalaumālié.
Ngaahi ʻEkitivitī Ako ʻOku Ala Fakahokó
Fakamanatu ʻo e fakataukei fakatokāteliné: Mahinó
ʻE maʻu ʻe he kau akó ʻi he ʻekitivitī ko ʻení ha faingamālie ke fakaloloto ʻa e mahino ʻoku nau maʻu ki ha potufolofola fakataukei fakatokāteline ʻe taha pe lahi ange. ʻOku totonu ke miniti pē ʻe 10–15 ʻa e ʻekitivitī ko ʻení kae ʻi ai ha taimi feʻunga ki hono akoako fakaʻaongaʻi ʻo e fakataukei fakatokāteliné ʻamui ange ʻi he lēsoní.
Fakakaukau ke tā ha foʻi hiva pe himi pea fakaafeʻi ʻa e kau akó ke hiki honau nimá kapau ʻoku nau ʻiloʻi ia. Fakaafeʻi leva ʻa e niʻihi ʻoku nau ʻiloʻi ha niʻihi ʻo e ngaahi leá ke hiki honau nimá. Fakaʻosí, fakaafeʻi ʻa e kau ako ʻoku mahino kiate kinautolu ʻa e ʻuhinga ʻo e hivá ke hiki honau nimá pea vahevahe ʻa e meʻa ʻoku fekauʻaki mo iá.
-
Ko e hā ʻa e faikehekehe ʻi he fakatokangaʻí, ʻiloʻí pea mo e mahinó?
-
Ko e hā ha ngaahi founga te tau lava ai ʻo fakatokangaʻi pe ʻiloʻi ha meʻa kae ʻikai ke tau maʻu ha mahino ki ai?
-
ʻE lava fēfē nai ke fakaʻaongaʻi ʻeni ki he fakataukei fakatokāteliné?
Fakakaukau ke fakaafeʻi ʻa e kau akó ke nau vakai ki he ngaahi potufolofola fakataukei fakatokāteliné mo e ngaahi kupuʻi lea mahuʻingá ʻi he potufolofolá Fakamatala ki he ʻElito ʻo e Fakataukei Fakatokāteliné (2023). ʻAi ke nau fili ha potufolofola ʻe taha te nau loto ke mahino lelei ange kiate kinautolu. ʻE lava ke tokoni ʻa e ʻekitivitī ko ʻení ki he kau akó ke fakaloloto ʻa e mahino ʻoku nau maʻú.
Fakakaukauloto ʻoku ʻi ai ha taha ʻokú ne fiemaʻu moʻoni ʻa e pōpoaki ʻi he potufolofola naʻá ke filí. Ka neongo ia, ko ha sekoni pē ʻe 30 ʻokú ke maʻu ke fakamatalaʻi ange ai ʻa e ʻuhinga ʻo e potufolofolá. Fakaʻaongaʻi ʻa e ngaahi miniti siʻi ka hokó ke mahino lelei ange kiate koe ʻa e kakano ʻo e potufolofolá.
Fakakaukau ke fakaʻaongaʻi ha niʻihi ʻo e ngaahi founga ko ʻení:
-
Lau māmālie ʻa e vēsí.
-
Kumi ʻa e ngaahi lea pe ngaahi kupuʻi lea ʻoku ʻikai mahino kiate koé.
-
Lau ʻa e ʻuluʻi fakamatala ʻo e vahé ke ʻiloʻi ʻa e puipuituʻa ʻo e potufolofolá.
-
Sio ki he futinoutí.
-
Fakaʻaongaʻi ʻa e ngaahi maʻuʻanga tokoni ʻi he Gospel Library.
Hili ha taimi feʻunga, vahevahe ʻa e kau akó ki ha ngaahi kulupu pe tautau toko ua. ʻE lava leva ke vahevahe ʻe he kau akó ʻenau fakamatala fakanounou sekoni ʻe 30 ʻo e potufolofola fakataukei fakatokāteline naʻa nau filí.
Ako mo fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié
Kapau ʻe fiemaʻu, fakaafeʻi ʻa e kau akó ke toe vakaiʻi nounou ʻa e ngaahi tefitoʻi moʻoni ki hono maʻu ʻo e ʻilo fakalaumālié (vakai, palakalafi 5–12 ʻo e Fakamatala ki he ʻElito ʻo e Fakataukei Fakatokāteliné [2023]). ʻOku fakakau ʻa e ngaahi ʻekitivitī fakamanatu ʻoku fokotuʻu atú ʻi he fakamatala fakalahi ʻi he “Ngaahi ʻEkitivitī Fakamanatu ʻo e Fakataukei Fakatokāteliné.”
Hili hono toe vakaiʻi ʻe he kau akó ʻa e ngaahi tefitoʻi moʻoní, fakakaukau ke ʻoange ʻa e tūkunga ko ʻení. Te ke lava ʻo tuku ki he kau akó ke nau fakakaukau ki ha ngaahi fakaikiiki pau ange ke tokoni ke toe mahuʻingamālie ange ʻa e tūkungá ki heʻenau moʻuí. Hangē ko ʻení, ʻe lava ke nau fakapapauʻi ʻa e fili ʻoku feinga ʻa Siosi ke fakahokó (hangē ko ʻene fili pe ʻoku totonu nai ke ne fakangata ha feohi fakakaungāmeʻa, founga ke fehangahangai ai mo ha hohaʻa fakatokāteline, pe ʻoku totonu nai ke ne ngāue fakafaifekau).
ʻOku ʻi ai ha fili mahuʻinga ʻa Siosi ke fakahoko. ʻOku mahino kiate ia ʻe lava ke uesia lahi ʻene moʻuí ʻe he fili ko ʻení pea ʻokú ne fie fekumi ki he fakahinohino ʻa e ʻOtuá ʻo fakafou ʻi he fakahā. Kuo lotua ʻe Siosi ha fakahinohino ka ʻoku teʻeki ke ne ongoʻi kuó ne maʻu ha tali. ʻOkú ne fifili pe ʻokú ne fekumi nai ki he fakahaá ʻi he founga totonú.
-
ʻE fakaʻaongaʻi fēfē nai ʻe Siosi ʻa e ngaahi tefitoʻi moʻoni ki hono maʻu ʻo e ʻilo fakalaumālié ke tokoni ke mahino kiate ia ʻa e founga ke maʻu ai ha fakahaá?
Kapau ʻoku maʻu ʻe he kau akó ha loto-falala ki he mahino ʻoku nau maʻú kau ki he ngaahi tefitoʻi moʻoni ʻe tolú, tuku ke nau fakapapauʻi pe ko e tefitoʻi moʻoni fē te nau ʻuluaki fakaʻaongaʻí kapau ko Siosi kinautolu. Kapau ʻoku ʻikai ke nau fakapapauʻi ʻa e feituʻu ke kamata aí, te ke lava ʻo fakaʻaongaʻi ʻa e ngaahi fokotuʻu ʻi laló. Fai ho lelei tahá ke tokoni ki he kau akó ke nau vakaiʻi ʻa e tefitoʻi moʻoni takitaha ko ha konga ʻo e fealēleaʻaki ko ʻení.
Vakavakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá
Lau ʻa e palakalafi 8 ʻi he “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023), ʻo kumi ha ngaahi fakakaukau fekauʻaki mo hono fakaafeʻi ʻa e fakahinohino ʻa e Tamai Hēvaní ʻi he taimi ʻoku fai ai ha fili faingataʻá.
-
ʻE lava fēfē nai ke fakakaukau ʻa Siosi ki heʻene filí ʻi he ʻuhinga ko e palani ʻo e fakamoʻuí?
-
ʻE tokoni fēfē nai hono vakaiʻi ʻo e filí ʻaki ha fakakaukau ʻoku taʻengatá ke fakaafeʻi ʻa e fakahaá?
Ngāue ʻi he tuí
Fakakaukau ke fakaafeʻi ʻa e kau akó ke lau mo aleaʻi ʻeni ʻi ha ngaahi hoa pe fanga kiʻi kulupu iiki.
Lau ʻa e palakalafi 5 mo e 7 ʻi he “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023), ʻo kumi ha ngaahi moʻoni ʻe lava ʻo tokoni kia Siosi ke ne fekumi mo maʻu ha fakahā mei he Tamai Hēvaní.
-
Ko e hā hono ʻuhinga ka ala ongoʻi ai ʻe Siosi ʻoku teʻeki ke ne maʻu ha fakahaá? (Fakaʻilongaʻi ʻa e meʻa ʻe ala tokoni ʻi he palakalafi 7 ke mahino kia Siosí.)
-
Ko e hā ha ngaahi founga ʻe niʻihi ʻe lava ke ngāue ai ʻa Siosi ʻi he tui ke maʻu ha fakahaá?
Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí
-
Ko e hā ha niʻihi ʻo e ngaahi maʻuʻanga tokoni kuo fokotuʻu fakalangi ʻe lava ke ako ʻe Siosi ke mahino lelei ange kiate ia ʻa e founga ke fekumi, maʻu, pe ʻiloʻi ai ʻa e fakahaá?
Kapau ʻe fiemaʻu, mou vakai mo e kau akó ki he “Fakahaá” ʻi he Fakahinohino ki he Ngaahi Folofolá pe Ngaahi Tefito ʻo e Ongoongoleleí.
ʻE ala ʻaonga foki ki he kau akó ʻa e ngaahi potufolofola ko ʻení: Siosefa Sāmita—Hisitōlia 1:11–14, 29; Tokāteline mo e Ngaahi Fuakava 6:14–16, 22–24; 8:1–3; 9:8–9; 11:12–13. Hili ʻa e akó, ʻe lava ke lau ʻe he kau akó ʻa e ngaahi lea ʻa ha taha naʻa nau maʻú pea vahevahe ʻa e ʻuhinga ʻoku nau pehē ai ʻe ʻaongá.
Kapau ʻe ʻaonga, faʻu ha kōlomu ʻe tolu ʻi he palakipoé pea hiki ha taha ʻo e ngaahi kupuʻi lea ko ʻení ʻi ʻolunga ʻi he kōlomu takitaha: Fekumi ki he Fakahaá, Maʻu ʻa e Fakahaá, mo e ʻIloʻi ʻa e Fakahaá. ʻI hono vahevahe ʻe he kau akó ʻa e meʻa naʻa nau maʻú, fakaafeʻi kinautolu ke hiki ʻenau ngaahi fakakaukaú ʻi lalo ʻi ha ʻuluʻi tohi ʻe taha pe lahi ange. Kapau ʻoku siʻisiʻi ange ʻa e ngaahi fakakaukaú ʻi ha kōlomu ʻe taha, ʻeke ki he kau akó pe ko e hā naʻa nau ako ʻe ala tokoni ki he konga ko ia ʻo e fakahaá.
-
Ko e hā mo ha toe meʻa kuó ke ako pe ongoʻi fekauʻaki mo hono maʻu ha fakahaá te ke lava ʻo vahevahe mo Siosi?
ʻOange ha faingamālie ki he kau akó ke fai ha ngaahi fehuʻi pe vahevahe ha ngaahi aʻusia kuo nau maʻu. ʻI heʻenau vahevahé, hokohoko atu ke fakamamafaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié. Te ke lava ʻo fai ʻeni ʻaki hano fakamahinoʻi ʻa e ngaahi founga naʻa nau fakaʻaongaʻi ai ʻa e ngaahi tefitoʻi moʻoní ʻi heʻenau ngaahi aʻusiá pe ko hono fakaafeʻi kinautolu ke akoako fakaʻaongaʻi ʻa e ngaahi tefitoʻi moʻoní ʻi heʻenau fekumi ki ha tali ki he ngaahi fehuʻí. Manatuʻi ʻoku ʻikai fiemaʻu ke ke ʻiloʻi ʻa e tali ki he fehuʻi kotoa pē te nau ʻeké. Naʻe talaange ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi ha taimi ʻe taha ki he kau faiakó: “ʻOku lelei ʻaupito pē ke pehē, ʻʻOku ʻikai ke u ʻilo.’ Ka neongo ia, ʻi hono lea ʻakí, ʻoku ʻi ai ho fatongia ke kumi ʻa e tali lelei taha ki he ngaahi fehuʻi lelei ʻoku fai ʻe hoʻo kau akó” (“The Opportunities and Responsibilities of CES Teachers in the 21st Century” [lea ki he kau faiako fakalotu ʻi he Potungāue Ako ʻa e Siasí, 26 Fēpueli 2016], broadcasts.ChurchofJesusChrist.org).