Lesona 33: Mataupu Faavae ma Feagaiga 19

Mataupu Faavae ma Feagaiga 19:25–41

Vaaiga o Osigataulaga i se Vaaiga e Faavavau

Sa ta’utino Matini Harisi e mokesi lana faatoaga e totogi ai le lolomiina o le Tusi a Mamona. Sa tonu i le lomitusi, o E. B. Grandin, o le a ia le amataina le lolomiga seia oo ina aloaia ia feutagaina. O lenei mea o le a manaomia ai Matini e lamatia ai lona fale ma le tele o ana meatotino e faamautinoa ai le totogiina. Na tuuina mai e le Alii ia Iosefa se faaaliga lea na faalauteleina ai le vaaiga a Matini ma tuuina atu ai ia te ia le talitonuga manaomia e agai ai i luma ma le maliega. O lenei lesona e mafai ona fesoasoani i tagata aoga e mulimuli i le faataitaiga a le Faaola o le ositaulagaina o soo se mea e finagalo ai le Tama Faalelagi ia i tatou.

Gaoioiga E Ono Mafai Ona Aoao Ai

O faafitauli a Matini Harisi

Manatu faapea o loo e nofo i le 1829 ma o se tasi o uluai tagata talitonu i le valaauga o Iosefa Samita. Ua sau lau uo o Matini Harisi ia te oe mo se fautuaga. Ua e iloa o loo nofo o ia i se faatoaga matagofie e 240-eka. Ua ia ta’u atu ia te oe afai e lava kopi o le Tusi a Mamona e le faatauina atu, o le a manaomia ona ia faatauina atu lona fale ma le tele o lana faatoaga e totogi ai le lolomiga. O lona toalua ma tuaoi e tetee ia te ia i le lamatiaina o lana faatoaga mo Iosefa Samita ma le Tusi a Mamona. E mafai ona leiloa lona fale ma ana faiā ma e pele ia te ia.

• O a ni ou lagona pe ana o e i ai i le tulaga o Matini?

• O a ni fautuaga e mafai ona e avatu ia te Ia?

• O le a sou manatu i le taua o le lolomiina o le Tusi a Mamona pe a faatusatusa i le taua o le faatoaga a Harisi?

E mafai ona e filifili e fai koluma nei ma lisi i luga o le laupapa.

Tusi se laina i lalo i le ogatotonu o se laupepa i lau api talaaga mo suesuega. Faaigoa le koluma muamua o “Osigataulaga” ma le koluma lona lua “Fautuaga mai le Atua.”

I lalo o le koluma muamua, tusi ai osigataulaga na talosagaina Matini Harisi e fai.

O tali e mafai ona aofia ai ana tupe, fale, ma le faatoaga faapea foi ma lona tulaga tauleleia ma faiā ma aiga ma uo.

O le isi, i le koluma lava e tasi, lisi ai osigataulaga na talosagaina e le Alii pe ono talosagaina ai foi le autalavou e fai i nei aso.

Atonu ua uma ona faia e tagata aoga se lisi faatasi ai ma ni manatu talitutusa i le lesona “Mataupu Faavae ma Feagaiga 19:1–24, Vaega 1.“ Afai o lea, e mafai ona e faamanatu atu ia i latou lena lisi ma fesili atu pe latou te mananao e faaopoopo i ai se mea.

O se vaaiga e faavavau

Sue i le “Mauaina o le Malamalama Faaleagaga” vaega i le Pepa Autu o le Atamai i Aoaoga Faavae (2023). Faitau le palakalafa 8, ma vaavaai mo malamalamaaga e mafai ona fesoasoani i le tulaga po o tulaga o Matini Harisi ina ua fetalai mai le Alii ia i tatou e faia ni osigataulaga i aso nei.

Valaaulia tagata aoga e lisi mea na latou maua i le koluma “Fautuaga mai le Atua” i a latou api talaaga mo suesuega ma luga o le laupapa.

• Aisea e taua tele ai se vaaiga e faavavau pe a fetalai mai le Alii ia i tatou e faia mea faigata?

Fesoasoani i tagata aoga ia malamalama afai tatou te vaai i nei osigataulaga mai se vaaiga faaletino, e mafai ona foliga lofituina pe le talafeagai. O lenei manatu faatapulaa e mafai ona taitai atu ai i faaiuga tatou te salamo mulimuli ane ai.

A o suesue e tagata aoga ia fuaiupu nei, valaaulia i latou e maka ia malamalamaaga latou te maua ma faaopoopo i le koluma o le “Fautuaga mai le Atua”.

Faitau le Mataupu Faavae ma Feagaiga 19:26–28, 32–35, 38–41, ma vaavaai mo le fautuaga na tuuina mai e le Alii ia Matini Harisi e mafai ona fesoasoani ia te ia e iloa ai ona popolega ma se vaaiga e faavavau.

Valaaulia tagata aoga e faasoa mai le fautuaga na latou maua o ni faamatalaga o le upumoni. E mafai ona latou faailoa mai fautuaga e pei o nei:

E le tatau ona tatou manao i a tatou lava meatotino ae ia foai fua atu i le galuega a le Atua (tagai fuaiupu 26).

O le lē amanaiaina o mea ua fautuaina mai e le Alii o le a iu ina taunuu i le faanoanoa ma le faatafunaga (tagai fuaiupu 32–33).

Afai tatou te maua le Agaga e faatasi ma i tatou, e sili atu lo tatou faamanuiaga nai lo oa o le lalolagi (tagai fuaiupu 38).

• Na mafai faapefea e upumoni na e maua ona fesoasoani ia Matini Harisi?

• E mafai faapefea ona vaaia le alofa o le Atua mo Matini i lenei faaaliga?

Sa faasoa mai peresitene Dallin H. Oaks o le Au Peresitene Sili le mea lenei e uiga i le tali a Matini Harisi i le faaaliga lenei:

O se tasi o sao aupito silisili a Matini Harisi i le Ekalesia, lea e tatau ona faamamaluina ai o ia mo taimi uma, o lona faatupeina o le lolomiga o le Tusi a Mamona. Ia Aokuso 1829, sa ia mokesiina ai lona fale ma le faatoaga ia Egbert B. Grandin e faamau ai le totogi o le feagaiga a le lomitusi. O le fitu masina mulimuli ane, na faamaeaina ai kopi e 5,000 o le lomiga muamua o le Tusi a Mamona. Mulimuli ane, ina ua oo i le taimi e tatau ona totogi ai le mokesi, sa faapea ona faatauina atu le fale ma se vaega o le faatoaga mo le $3,000. I lenei auala, sa usitai ai Matini Harisi i le faaaliga a le Alii. (Dallin H. Oaks, “The Witness: Martin Harris,” Ensign, Me 1999, 36)

• Na faapefea ona faaalia i faatinoga a Matini ia amioga faaKeriso?

• Mai se vaaiga e faavavau, aisea na aoga ai le taulaga a Matini?

E mafai ona e valaaulia tagata aoga e tomanatu i mea na latou aoaoina i la latou suesuega o le afa muamua o le vaega 19. Mafaufau e talanoaina ma tagata aoga pe na faapefea e le naunau o le Faaola e ositaulaga o Ia lava e fai le finagalo o Lona Tama ona fesoasoani ia Matini e naunau ai e ositaulagaina ana meatotino. E mafai ona e valaaulia tagata aoga e mafaufau pe mafai faapefea e le faataitaiga a le Faaola o le faia o le finagalo o Lona Tama i le lotolotoi o puapuaga matuia ona musuia i latou e gauai atu i mea e finagalo ai le Tama Faalelagi.

O mea e ono ole mai ai le Alii ia te a’u

Valaaulia tagata aoga e filifili se mea se tasi o loo tusia i le koluma o “Taulaga” e faatatau i le autalavou i aso nei ma filifili se tasi pe sili atu foi o fautuaga a le Alii i le koluma “Fautuaga mai le Atua” e ono fesoasoani i se tasi e faia lena osigataulaga. Ona mafai lea ona e vaevaeina tagata aoga i ni paga ma valaaulia i latou e faamatala i a latou paga pe mafai faapefea ona fesoasoani le fautuaga i se tasi ua talosagaina e faia lena osigataulaga.

A uma ua lava se taimi e tuu atu i tagata aoga e faasoa ai le tasi i le isi, atonu e te fesili mo ni volenitia e faasoa mai a latou tali i le vasega.

E mafai ona e faaali atu o faatonuga nei ma valaaulia tagata aoga e faamaumau o latou manatu i a latou api talaaga mo suesuega.

1. I lau api talaaga mo suesuega, tusi ai se tulaga atonu e finagalo le Alii e te gauai atu ai i Lona finagalo atonu e faigata mo oe.

2. Lisi ni faafitauli e mafai ona e feagai i le taumafai ai e fai Lona finagalo.

3. Tusi pe faapefea e le vaaia o lou tulaga mai le vaaiga e faavavau a le Atua ona fesoasoani ia te oe e faatoilalo ai soo se tasi o nei faafitauli .

4. Tusi pe mafai faapefea e le faataitaiga a le Faaola i le Mataupu Faavae ma Feagaiga 19 ona musumusuina oe e gauai atu i le finagalo o lou Tama Faalelagi. (Atonu e te manao e faitau fuaiupu 2, 16–19, 23–24.)

5. Otooto ni nai laasaga muamua e mafai ona e faia e mulimuli ai i le faataitaiga a le Faaola i lou tulaga.

Punaoa Faaopoopo

E mafai faapefea e lo tatou sootaga ma le Atua ona fesoasoani ia i tatou e tumau faamaoni pe a tatou puapuagatia?

Na aoao mai Elder D. Todd Christoffferson o le Korama a Aposetolo e Toasefululua:

O Lo Tatou Sootaga ma le Atua

Ua aoao mai Elder Christofferson e faapea, po o a lava o tatou tulaga faaleolaga nei, e mafai lava ona tatou talitonu o le a faataunuuina e le Atua Ana folafolaga.

E naunau lo tatou Tama e taiala i tatou taitoatasi i luga o Lana ala o feagaiga ua i ai laasaga ua mamanuina e tusa ma o tatou manaoga taitoatasi, ma ua fua faatatau i Lana fuafuaga mo lo tatou fiafia taualuga ma Ia. E mafai ona tatou faatalitali i se talitonuga ma se faatuatuaga faatupulaia i le Tama ma le Alo, se lagona faateleina o lo La’ua alofa, ma le mafanafana ma le taiala faifaipea a le Agaga Paia.

Ae tusa lava, e le mafai lava ona faigofie lenei ala mo se tasi o i tatou. E matua tele naua le faagasologa o le faaleleia e manaomia ina ia faigofie ai. …

O le faagasologa o le finagalo faatonutonu ma le faaleleia o le Atua, o le tulaga e tatau ai, e i ai tulaga faafuasei e le manuia ma tiga i nisi taimi. I le toe tomanatu ai i le tala a Paulo, o i tatou “o suli faatasi ma Keriso; pe afai tatou te tiga faatasi ma ia, ina ia faamanuiaina foi i tatou faatasi ma ia.” [Roma 8:17; faaopoopo le faamamafa].

O le mea lea, i le lotolotoi o le afi a le tunu auro, nai lo le ita i le Atua, ia faalatalata atu i le Atua. Valaau atu i le Tama i le suafa o le Alo. Savavali faatasi ma i La’ua i le Agaga, i lea aso ma lea aso. Tuu atu ia i La’ua pe a mavae se taimi e faaali mai lo La’ua faamaoni ia te oe. Sau ma le faamaoni ia iloa i La’ua ma ia e iloa moni oe lava. Ia Faamuamua le Atua. (D. Todd Christofferson, “O Lo Tatou Sootaga ma le Atua,” Liahona, Me 2022, 79)

Aisea e vale ai le faataua o mea o le lalolagi nai lo mea a le Atua?

Na ta’u atu e le Alii ia Matini Harisi o le i ai o le Agaga e faatasi ma ia e sili atu nai lo oa o le lalolagi (tagai Mataupu Faavae ma Feagaiga 19:38). O le faamamafaina o lenei aoaoga, na aoao mai e Elder Joseph B. Wirthlin (1917–2008) o le Korama a Aposetolo e Toasefululua:

O loo ta’u mai i tusi paia ia i tatou, “Aua tou te toloai oa mo outou i le lalolagi,o i ai le mogamoga ma le ele e faaumatia ai, o i ai fo’i tagata gaoi e eli atu ma gaoi ai: A ia outou toloa’i oa mo outou i le lagi” [Mataio 6:19–20]. O oa o lenei lalolagi e pei lava o le efuefu e faatusa i oa o loo faatalitali mai mo tagata faamaoni i maota o le Tama . E matua faavalevalea lava se tagata na te faaaluina ona aso e saili ai mea e pala ma matafi. E matuai atamai lava se tagata na te faaaluina ona aso e saili ai le ola e faavavau. (Joseph B. Wirthlin, “Aitalafu Faalelalolagi, Aitalafu Faalelagi,” Liahona, Me 2004, 43)

Gaoioiga Faaopoopo e Aoao Ai

O le taua o le oo mai o le Tusi a Mamona

Ina ia fesoasoani i tagata aoga ia malamalama pe aisea o le a fesili atu ai le Alii ia Matini Harisi i se tulaga lamatia i le aveeseina ai o lana faatoaga, e mafai ona e faasoa atu le faamatalaga lenei mai ia Peresitene Ezra Taft Benson (1899–1994):

“O se … molimau malosi i le taua o le Tusi a Mamona o le matauina lea o le tulaga na tuuina ai e le Alii lona oo mai taimi atofaina o le oo mai o le Toefuataiga. Na o le pau lava le mea na muamua mai ai, o le Uluai Faaaliga. …

“Mafaufau i lena mea i se tulaga e faatatau i ai. O le o’o mai o le Tusi a Mamona na muamua mai i le toefuataiga o le perisitua. Sa lomia … a o lumanai le faatulagaina o le Ekalesia. Sa tuuina atu i le Au Paia le Tusi a Mamona e faitau a o lei tuuina atu ia i latou faaaliga sa otooto mai ai mataupu faavae maoae e pei o tikeri e tolu o le mamalu, faaipoipoga faaselesitila po o galuega mo e ua maliliu” (Ezra Taft Benson, “The Book of Mormon—Keystone of Our Religion,” EnsignNov. 1986, 4).

E te ono fesili i tagata aoga pe aisea e manatu ai na taua ai ona oo muamua mai le Tusi a Mamona ao le’i faavaeina le ekalesia, ma a’o le’i tutupu le tele o isi mea taua o le Toefuataiga. E mafai e tagata aoga ona faitau le Mataupu Faavae ma Feagaiga 18:3–5 e vaai ai i le mea na ta’u atu e le Alii ia Oliva Kaotui e uiga i le matafaioi a le Tusi a Mamona i le faatulagaga o le Ekalesia.

“Aua e te manao i au lava meatotino”

A faailoa mai e tagata aoga ia mataupu faavae i lenei lesona, atonu o le a faamanuiaina i latou mai se talanoaga puupuu i le uiga o le fuaiupu 26. E mafai ona e valaaulia se tagata aoga i luma o le potuaoga ma tuu atu i lena tagata aoga se galuega faafoliga i se mea e nonofo ai (e mafai ona avea o se fasipepa o loo tusia ai i luga le “Pule o se Fale”). Fai atu i tagata aoga e vaai faalemafaufau e moni. Ona valaaulia lea o se isi tagata aoga i luma o le vasega, ma fesili i le vasega po o le a se lagona o le tagata lona lua pe afai latou te manao i le fale o le tagata aoga muamua. Mafaufau e fai atu fesili nei:

• E mafai faapefea ona maua ni lagona talitutusa faapea e se tasi ua talosagaina e ositaulagaina ana lava meatotino?

• E mafai faapefea e talavou ona faatoilalo le manao i a latou meatotino?