Lesona 34: Mataupu Faavae ma Feagaiga 19

Iloilo Lou Aoaoina 2

Mataupu Faavae ma Feagaiga 6–19

O le manatunatu ma iloiloina lo tatou aoaoina faaleagaga e mafai ona fesoasoani ia tatou faalatalata atili atu ai i le Faaola. O lenei lesona e mafai ona fesoasoani i tagata aoga e manatua ma iloilo ai pe na faapefea ona fesoasoani o latou aafiaga i le suesueina o le Mataupu Faavae ma Feagaiga i lo latou tuputupu a’e ai faaleagaga.

Gaoioiga E Ono Mafai Ona Aoao Ai

Iloilo Lou Aoaoina

Mafaufau e valaaulia tagata aoga e tusi i lalo i luga o se fasipepa se mea latou te faia e manaomia ai le faataitai soo. Ona tuu atu lea ia i latou e pasi a latou pepa i luma. Faitau leotele nisi o i latou, ma vaai pe mafai e tagata aoga ona mate mai po o ai e ana le pepa na e faitauina. A uma pepa taitasi e te faitauina, e mafai ona e fai atu i le tagata aoga na tusia fesili nei.

• O le a le vave e oo mai ai lou alualu i luma i lenei gaoioiga?

• Aisea e taua ai le iloiloina o lou alualu i luma? E mafai faapefea ona aafia ai lou manao e faaauau pea ona faataitai?

  Fesoasoani i tagata aoga ia malamalama i le taua o le manatunatu i lo latou tuputupu ae faaleagaga ma a latou taumafaiga ia avea atili ia pei o le Tama Faalelagi ma Iesu Keriso. O ia manatunatuga e mafai ona faamalosia i latou e taumafai pea. E mafai e le Agaga Paia ona fesoasoani ia i latou ia iloa e oo lava i le tulaga maaleale agai i luma. Afai e manaomia, fesoasoani i tagata aoga ia malamalama e tusa lava pe latou te lagona latou te lei alualu i luma, o le manatunatu i lo latou alualu i luma e mafai ona fesoasoani ia i latou e iloa ai mea e mafai ona latou faia e agai ai i luma. E ono fesoasoani le iai o tagata aoga e tali i se tasi pe sili atu foi o fesili nei i a latou api talaaga mo suesuega.

• Na faapefea e mea ua e aoaoina i le Mataupu Faavae ma Feagaiga ona aafia ai ou lagona i le talalelei?

• Na faapefea e taumafaiga faifai pea i le aluga o taimi ona aafia ai lou tuputupu ae faaleagaga ma le faatuatua ia Iesu Keriso?

• Afai e te le lagonaina ua e tuputupu ae faaleagaga, o a ni nai fetuunaiga laiti e te ono faia i mea e masani ona e faia?

Atonu e te manao e tuu atu i tagata aoga e iloilo o latou lagona poo le tuputupu ae i mataupu na outou talanoaina i ni lesona faapitoa. Mafaufau le faaaogaina o nisi o manatu nei.

Faamatalaina o le oo mai o le Tusi a Mamona

I vaiaso talu ai nei, atonu na aoao ai tagata aoga e uiga i le oo mai faavavega o le Tusi a Mamona. Mafaufau e tuu tagata aoga i ni paga e sauni ai e faamatala atu le Tusi a Mamona i se isi paga o tagata aoga. E mafai ona e tuuina atu ia i latou se avanoa e aotele ai mea sa latou aoaoina e tali atu ai i se tulaga faataitai e pei o lenei.

Vaai faalemafaufau i se tasi ua fia iloa lou talitonuga i le Tusi a Mamona ma fai atu ia te oe e fesoasoani ia i latou ia malamalama po o le a le Tusi a Mamona ae poo fea na sau ai. E faapefea ona e faamatalaina?

E mafai ona e faia nisi o mea nei i lau faamatalaga:

• I au lava upu, faamatala atu ia i latou le tala i le ala na oo mai ai le Tusi a Mamona. (Atonu e te maua ni mau o le a fesoasoani ia te oe po o tala faasolopito e mafai ona e aoteleina.)

• Faaaoga ata e mafai ona fesoasoani ia te oe e faamatala ai.

• Faasoa atu ou lagona po o aafiaga i le Tusi a Mamona.

Afai e manaomia e tagata aoga sina taitaiga, e mafai ona e fautuaina i latou e faamatala mai nisi o tala nei. E mafai ona latou faaaogaina ata e pei o ata o loo i lalo e fesoasoani ai i le latou faamalamalamaga.

• O le asiasiga a le agelu o Moronae ia Iosefa Samita; o papatusi auro (Iosefa Samita—Talafaasolopito 1:30–54)

• O le faaliliuga e ala i le meaalofa ma le mana o le Atua

• O Molimau e Toatolu o papatusi auro (Mataupu Faavae ma Feagaiga 5:11–15; 17:1–5)

Lagonaina o le taua tele o lou agaga i le Atua

Afai na maua e tagata aoga se avanoa e suesue ai le Mataupu Faavae ma Feagaiga 18:1–13 i le seminare, atonu na e valaaulia i latou e fai le gaoioiga lenei. Afai o lea, tuu atu i tagata aoga e faasoa mai mea sa taua ia i latou e uiga i le aafiaga ma le ala na aoga ai ia i latou.

I se lesona talu ai nei, sa valaaulia ai oe e mafaufau loloto atili i lou taua i le silafaga a le Atua. Atonu na e faia se faamanatu o le a e vaai soo i ai (e pei o se pepa lautele o i ai se savali po o se telefoni), auai i tatalo tuu atoa ai le loto, faaalu le taimi e tusitusi ai api talaaga, suesue lou faamanuiaga faapeteriaka, po o le faia o se isi mea.

• O le a se mea na e faia e fesoasoani ai ia te oe e mafaufau loloto iai i lou taua i le Atua?

• O a ni eseesega ua e matauina talu ai nei i le va o le fuafuaina e le lalolagi o le taua ma le fuafuaina e le Atua?

• O le a se mea na e aoaoina talu ai nei ua faamautuina ai pe faateleina ai lou mautinoa o loo ia te oe le taua tele i le silafaga a le Atua?

Atonu e lei faia e nisi o au tagata aoga se mea i vaiaso talu ai nei e lagona ai lo latou taua i luma o le Atua. Ia nofouta i nei tagata aoga o se vaega o lenei talanoaga. Aua le faatuai ona valaaulia tagata aoga e amata pe faaauau pea ona faia lenei gaoioiga i vaiaso a sau. Faamautinoa atu ia i latou o le a faamautu mai e lo latou Tama Faalelagi Lona alofa mo i latou e pei ona latou faia.

Mauaina o faaaliga patino

Afai na e faaaogaina le ata lenei i se lesona talu ai nei, atonu e te manao e faaali atu mo tagata aoga pe tusi i luga o le laupapa. Valaaulia tagata aoga e faasoa mai mea na latou aoaoina i vaiaso talu ai nei e uiga i le auala e maua ma iloa ai faaaliga.

Ina ia fesoasoani i tagata aoga e iloilo pe na faapefea ona latou faaaogaina le mataupu faavae o faaaliga i o latou olaga, valaaulia i latou e faauma se tasi pe sili atu o faamatalaga nei i a latou api talaaga.

Filifili ni nai faamatalaga nei ma faauma i totonu o lau api talaaga. Atonu e te lagona le faagaeetia e tusifaamaumau isi mafaufauga ma manatu. Ia mautinoa e faia lena mea.

O le mea aupito sili ona taua ua ou aoaoina talu ai nei e uiga i faaaliga mai le Tama Faalelagi o le …

O ni nai mea sa ou taumafai talu ai nei e maua faaaliga e ala i le Agaga Paia e aofia ai …

O se mea na foliga mai na aafia ai lo’u tomai e maua faaaliga o le …

O se aafiaga sa ou oo i ai talu ai nei ou te le manao e faagalo o le …

Ou te manao e faaauau pea ona faateleina lo’u tomai e maua ai faaaliga mai le Atua ona …

Ina ia faateleina atili lo’u tomai e maua ai faaaliga mai le Atua, ou te tautino atu e …

Valaaulia tagata aoga e faasoa mai i le vasega soo se tasi o o latou manatunatuga i le mauaina o faaaliga faaletagata lava ia mai le Atua. Fai atu fesili tulitatao e fesoasoani i tagata aoga e tali ma fegalegaleai ai le tasi ma le isi. O fesili nei e pei o le “O le a se mea na faagaeetia ai oe e uiga i mea na faasoa mai e lau uo i le vasega?” po o le “O le a se mea na faasoa mai e lau uo i le vasega e te manao foi e taumafai?”