“Mataupu Faavae ma Feagaiga 19:1–24, Vaega 2: ‘O A’u, [o Iesu Keriso], Na Puapuagatia i Nei Mea mo Tagata Uma,’” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 19:1–24, Vaega 2” Tusi Lesona a le Faiaoga Seminare o le Mataupu Faavae ma Feagaiga
Lesona 32: Mataupu Faavae ma Feagaiga 19
Mataupu Faavae ma Feagaiga 19:1–24, Vaega 2
“O Au, [Iesu Keriso], na Puapuagatia i Nei Mea mo Tagata Uma.”
Na aoao mai e le Alii upumoni mamana e uiga i Lana Togiola ia Matini Harisi i le Mataupu Faavae ma Feagaiga 19. E mafai le salamo mo a tatou agasala e ala ia Iesu Keriso. Ona o Ia ma Lana Togiola alofa mutimutivale, ua mafai ai ona faamamaina i tatou e ala i lo tatou salamo. O lenei lesona e mafai ona fesoasoani ai i tagata aoga e talisapaia atili ai le meaalofa a le Faaola o le salamo, lea ua mafai ona o Lana taulaga togiola sili.
Gaoioiga E Ono Mafai Ona Aoao Ai
Upumoni po o talafatu?
Ina ia amata le vasega, fesoasoani i tagata aoga e iloilo mea latou te iloa pe talitonu i ai e uiga i le salamo. O se tasi o auala talafeagai e faia ai lenei mea o le valaaulia lea o i latou e iloilo faamatalaga nei. E mafai ona e lolomiina eseese ia faamatalaga taitasi ma faaali atu i luga o le laupapa. Ona vaevae lea e tagata aoga o ia faamatalaga i vaega o Upumoni po o Talafatu. O le isi filifiliga o le faatulaga lea o se palota faaeletonika e le mailoa ma valaaulia tagata aoga e tali mai.
Pe o faamatalaga nei o ni upumoni po o talafatu?
-
O le faamoemoega autu o le salamo o le faasalaina lea o tagata agasala.
-
O i latou e le salamo o le a le agavaa e toe foi atu e mau faatasi ma le Atua.
-
E ui lava ina ono faigata, e tauia le salamo.
-
O le Salamo o se meaalofa mai le Atua.
-
E le mafai ona alofa moni le Tama Faalelagi ia te au sei vagana ua ou salamo.
-
O le salamo o se faagasologa e leai ni tiga.
O fesili nei e mafai ona fesoasoani e taiala ai se talanoaga e uiga i tali a tagata aoga. Mo ni talanoaga aoga, tagai i Autu o le Talalelei, “Salamo,” topics.ChurchofJesusChrist.org po o le “Talafatu e Valu e uiga i le Salamo,” Liahona, Mat. 2016, 52–55.
Manatua: Aua le faaaluina le tele o le taimi i talanoaga; O le a faatusatusa e tagata aoga nei faamatalaga i aoaoga a le Faaola i se taimi mulimuli ane o le lesona.
-
O a mea e avea ai nei faamatalaga ma upumoni po o talafatu?
-
Aisea e ono talitonu ai nisi tagata e moni se tasi o talafatu?
Valaaulia tagata aoga e tusi faapuupuu i a latou api talaaga mo suesuega o latou lava lagona e uiga i le salamo. E mafai ona e fai atu ia i latou e faaaofia ai o latou manatu e uiga i upumoni ma talafatu sa latou talanoaina.
I le Mataupu Faavae ma Feagaiga 19, na tali atu ai le Alii i popolega o Matini Harisi e uiga i le ono aveesea o lana faatoaga e totogi ai le lolomiina o le Tusi a Mamona. Na aoao atu e le Alii ia Matini e uiga i le salamo ma e uiga i Lana taulaga togiola sili. A o e suesue i le aso, atonu e te manao e tusi i lau api talaaga mo suesuega upumoni ua e aoaoina e uiga i le Faaola ma le faamanuiaga o le salamo ua Ia ofoina mai ia i tatou.
O Ona puapuaga e faafaigofie ai o tatou mafatiaga
Mo lenei gaoioiga faataitai, e mafai ona suesue tagata aoga i ni vaega toalaiti. Fautuaina tagata aoga ia fefaaaloaloa’i a o latou suesue i nei fuaiupu.
Atonu e fia iloa e tagata aoga o le Mataupu Faavae ma Feagaiga 19:16–19 ua na o le pau lea o le tusiga paia e aofia ai le faamatalaga patino a le Faaola o Ona puapuaga.
Faitau le Mataupu Faavae ma Feagaiga 19:15–20 ma vaavaai mo mea e finagalo le Faaola e te aoaoina e uiga ia te Ia ma e uiga i le salamo. Atonu e te manao e tatalo ma valaaulia le Agaga Paia e fesoasoani ia te oe ia malamalama i mea e finagalo le Alii ia e iloa ma lagonaina mai nei fuaiupu.
O leMataupu Faavae ma Feagaiga 19:16–19 o se fuaitau o le atamai i aoaoga faavae. Mafaufau e valaaulia tagata oga e faailoga ia fuaitau o le atamai faaleaoaoga faavae i se auala tulaga ese ina ia mafai ona latou mauaina gofie.
A faasoa mai e tagata aoga mea ua latou aoaoina, e mafai e le Agaga Paia ona faamalosia a latou molimau i na upumoni. O se tasi auala e tuuina atu ai lenei avanoa o le tuu atu lea i vaega taitasi o se afa laupepa. Valaaulia vaega e tusi i luga o le pepa se upumoni aoga sa latou aoaoina e uiga i le salamo po o le Faaola mai a latou suesuega. Valaaulia se sui mai vaega taitasi e tula’i, faitau leotele a latou upumoni, ona faaali lea i luga o le laupapa.
Valaaulia vaega e faatusatusa mea na aoaoina e le vasega mai fuaiupu ma upumoni ma talafatu na iloiloina i le amataga o le vasega. E mafai ona latou talanoa fesili e pei o nei:
-
E mafai faapefea e aoaoga a le Faaola ona fesoasoani ia i tatou ia faigofie atili ai ona iloa upumoni ma talafatu e uiga i le salamo?
-
E mafai faapefea ona e toe tusia sa’o nei talafatu e atagia ai upumoni e uiga i le salamo?
Faamamafa ia upumoni nei: Na puapuagatia ma le loto i ai Iesu Keriso i Lana Togiola mo tagata uma (fuaiupu 16, 19). Afai tatou te filifili e aua le salamo, o le a tatou puapuagatia i le sala mo a tatou agasala (fuaiupu 17).
Ina ia fesoasoani i tagata aoga ia lagonaina le taua o nei upumoni, mafaufau e talanoaina fesili e pei o nei:
-
E faapefea e upu a le Faaola lava ia e uiga i Lana Togiola ona aafia ai ou lagona e uiga ia te Ia? Aisea?
-
E faapefea ona faaalia e le poloaiga a le Alii ia salamo Lona alofa mo i tatou?
-
O a ni auala e mafai ai e le malamalama i le alofa o le Faaola mo i tatou ona faateleina lo tatou manao e salamo?
O le meaalofa a le Faaola o le salamo
Tuu atu i tagata aoga se avanoa e manatunatu ai i o latou lagona e uiga i le Faaola. O le mea o loo mulimuli mai o ni auala eseese se tolu e mafai ona e faia ai lenei mea. E mafai ona e faasoa atu se vitio, valaaulia tagata aoga e suesue i faamatalaga mai taitai o le Ekalesia, pe usu faatasi se viiga o se vasega. E mafai ona e faaaogaina se tasi pe sili atu o nei mea e faalagolago i manaoga o au tagata aoga ma musumusuga a le Agaga Paia.
Vitio
Atonu e te manao e faaali le vitio “For God So Loved the World” (4:48), e amata i le faailo taimi 1:56. O loo maua lenei vitio i le ChurchofJesusChrist.org ma e mafai ona fesoasoani i tagata aoga e vaai faalemafaufau ai i mea sa naunau le Faaola e puapuagatia ai e tuu mai ia i tatou le avanoa e salamo ai. Afai e te filifili e faaali atu, mafaufau e valaaulia tagata aoga e faailoa mai o latou lagona e uiga i le Faaola ma le meaalofa o le salamo mulimuli ane.
For God So Loved the World
Give thanks for the Lord Jesus Christ: His life, His atoning sacrifice, and His Resurrection. John 3:16
Faamatalaga mai Taitai o le Ekalesia
Mafaufau e tuueseese ia faamatalaga e lua o loo i le pepa tufaatu o loo avatu faatasi ai ma tuu atu i tagata aoga taitasi se tasi o faamatalaga. Valaaulia i latou e suesue i ai ma tusi i tua pe aisea e taua ai mo se talavou ona malamalama i ai. Ona valaaulia lea o i latou e faafesuiai pepa ma se tagata aoga sa i ai le isi faamatalaga ma faitau uma le faamatalaga ma mea na tusia e le isi tagata aoga.
O Iesu Keriso ma lo Tatou Salamo
Na matauina e Elder Lynn G. Robbins o le Fitugafulu:
E leai se tasi e sili ona ‘au ma i tatou nai lo le Faaola. …
… O le salamo e le o Sana fuafuaga faaleoleo lea pe a te’i ua tatou toilalo. O le salamo o Lana fuafuaga lea, ma le silafiaina o le a tatou toilalo lava. (Lynn G. Robbins, “Seia Fitugafulu ni Fitu”Liahona, Me 2018, 22)
Ua molimau mai Peresitene Russell M. Nelson:
O Iesu Keriso o lo tatou faataitaiga sili, “o lē na onosai i le satauro, ona o le olioli sa tuu i ona luma” [Eperu 12:2]. Mafaufau i lena mea! Ina ia mafai ona Ia onosaia aafiaga aupito i sili ona tiga e lei onosaia muamua i le lalolagi, na taulai atu ai lo tatou Faaola i le olioli!
Ma o le a le olioli lea sa tuu i Ona luma? E mautinoa lava na aofia ai le olioli i le faamamaina, faamaloloina, ma le faamalosia o i tatou; o le olioli i le totogiina mo agasala a tagata uma o le a salamo; o le olioli o le a mafai ai e oe ma a’u ona toe foi atu—i le mama ma le agavaa—e nonofo ma o tatou Matua Faalelagi ma aiga. (Russell M. Nelson, “O Le Olioli ma le Ola ai Faaleagaga,” Liahona, Nov. 2016, 83)
Viiga e uiga i le Faaola
Afai e te faaaogaina lenei filifiliga, e mafai ona e faatagaina tagata aoga e faasoa mai fuaitau e uiga i le Faaola mai viiga eseese o loo aoao mai ai e uiga i Lana meaalofa o le salamo. E faalagolago i manaoga ma tomai o au tagata aoga, e mafai ona e filifili e usu faatasi ni nai viiga o se vasega. E mafai ona e fautuaina tagata aoga e faafesootai nei viiga i le Mataupu Faavae ma Feagaiga 19:16–19 i a latou tusitusiga paia.
Mafaufauga patino
Tuu atu i tagata aoga se taimi e mafaufau loloto ai i mea sa latou aoaoina ma lagonaina. E te ono valaaulia i latou e faamaumau o latou manatu ma lagona i o latou api faamaumau mo suesuega. E mafai ona e valaaulia tagata aoga e mafaufau pe mafai faapefea ona latou valaaulia atoatoa le faamanuiaga a le Faaola o le salamo i o latou olaga.
Ia e mataala i musumusuga a le Agaga. Atonu foi e te manao e valaaulia tagata aoga e faasoa a latou molimau i le tasi ma le isi.
Tauloto
Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma iloilo i latou i lesona i le lumanai. O le fasifuaitau autu o le tusitusiga paia o le “O Au, [Iesu Keriso], na puapuagatia i nei mea mo tagata uma.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga o le Iloiloga o le Atamai i Aoaoga Faavae.”